Nagbarog nga Bug-os ug May Hugot nga Pagtuo

Maisogong mga Maghuhupot sa Integridad Nagmadaogon Taliwala sa Paglutos sa Nazi

“MAGMAALAMON, anak ko, ug lipaya ang akong kasingkasing, aron matubag ko siya nga nagatamay kanako.” (Proverbio 27:11) Gipakita niining mainitong pagdapit nga ang intelihenteng mga linalang sa Diyos makapalipay sa kasingkasing ni Jehova tungod kay sila matinumanon ug maunongon kaniya. (Sofonias 3:17) Apan, si Satanas, ang tigtamay, determinado sa pagbungkag sa integridad niadtong nag-alagad kang Jehova.—Job 1:10, 11.

Ilabina sukad sa sayong bahin sa ika-20ng siglo sa dihang siya gitambog gikan sa langit ngadto sa hawanan sa yuta, gipakita ni Satanas ang dakong kasuko batok sa katawhan ni Jehova. (Pinadayag 12:10, 12) Bisan pa niana, ang matuod nga mga Kristohanon nakabarog nga “bug-os ug may hugot nga pagtuo” ug naghupot sa ilang integridad sa Diyos. (Colosas 4:12) Tagdon nato sa lakbit ang usa ka talagsaong panig-ingnan sa maong paghupot sa integridad—nianang sa mga Saksi ni Jehova sa Alemanya una pa ug panahon sa Gubat sa Kalibotan II.

Masibotong Buluhaton Misangpot sa mga Pagsulay sa Integridad

Sa katuigang 1920 ug sa sayong katuigan sa 1930, ang Bibelforscher, ingon sa pagtawag kanhi sa mga Saksi ni Jehova sa Alemanya, nanagtag ug daghang literatura sa Bibliya. Tali sa 1919 ug sa 1933, sa aberids nakapahimutang sila ug walo ka libro, mga pulyeto, o mga magasin sa matag banay sa Alemanya.

Niadtong panahona, ang Alemanya maoy usa ka nasod nga may daghang dinihogang mga sumusunod ni Kristo. Ngani, sa 83,941 ka tawo nga nakig-ambit sa Panihapon sa Ginoo niadtong 1933 sa tibuok kalibotan, duolan sa 30 porsiyento ang nagpuyo sa Alemanya. Sa wala madugay, kining mga Saksing Aleman nakasinatig grabeng mga pagsulay sa integridad. (Pinadayag 12:17; 14:12) Ang mga pagpapahawa gikan sa mga trabaho, mga pagronda sa mga balay, ug mga pagpalagpot gikan sa mga tunghaan dali rang migrabe ngadto sa mga pagbunal, mga pag-aresto, ug mga pagbilanggo. (Hulagway 1) Busa, sa katuigan nga magdangat na ang Gubat sa Kalibotan II, ang mga Saksi ni Jehova naglangkob ug 5 ngadto sa 10 porsiyento sa tanan nga gitener diha sa mga kampong konsentrasyon.

Kon Nganong ang mga Nazi Naglutos sa mga Saksi

Apan, nganong nahaling sa mga Saksi ni Jehova ang kapungot sa rehimeng Nazi? Sa iyang librong Hitler—1889-1936: Hubris, ang propesor sa kasaysayan nga si Ian Kershaw nagpahayag nga ang mga Saksi nahimong tumong sa paglutos tungod kay sila wala “mouyon sa bug-os nga gipangayo sa kagamhanang Nazi.”

Ang librong Betrayal—German Churches and the Holocaust, nga giedit sa propesor sa kasaysayan nga si Robert P. Ericksen ug sa propesor sa Jewish studies nga si Susannah Heschel, nagpatin-aw  nga ang mga Saksi “midumili sa pagpakigbahin sa kapintasan o sa paggamit sa militaryong puwersa. . . . Gibarogan sa mga Saksi ang pagkaneyutral sa politika, nga nagpasabot nga dili sila mobotar kang Hitler ni mosaludar kang Hitler.” Kini, midugang ang samang tinubdan, naghaling sa kasuko sa mga Nazi ug nagbutang sa mga Saksi diha sa kahimtang nga pagadagmalan tungod kay ang “Nasodnong Sosyalismo dili motugot sa maong pagdumili.”

Usa ka Tibuok-Kalibotang Protesta ug Bug-os nga Pag-atake

Pinaagi sa usa ka espesyal nga mensahero, niadtong Pebrero 9, 1934, si Joseph F. Rutherford, nga nanguna sa buluhaton niadtong panahona, nagpadala kang Hitler ug usa ka sulat sa pagprotesta ingong reaksiyon sa katig-a sa Nazi. (Hulagway 2) Niadtong Oktubre 7, 1934, ang sulat ni Rutherford gisundan sa mga 20,000 ka sulat ug mga telegrama sa pagprotesta nga gipadala sa mga Saksi ni Jehova kang Hitler gikan sa 50 ka nasod, lakip ang Alemanya.

Ang mga Nazi mibalos pinaagi sa pagpasamot sa ilang paglutos. Sa Abril 1, 1935, ang mga Saksi gibando sa tibuok nasod. Ug sa Agosto 28, 1936, gilansad sa mga Gestapo ang bug-os nga pag-atake kanila. Bisan pa niana, ang mga Saksi “nagpadayon sa pagpanagtag ug mga pulyeto ug naghupot gihapon sa ilang pagtuo,” matod sa Betrayal—German Churches and the Holocaust.

Pananglitan, niadtong Disyembre 12, 1936, bisan hapit nang madiskobrehan sa mga Gestapo, ang mga 3,500 ka Saksi nanagtag ug tinagpulo ka libong kopya sa pinatik nga resolusyon mahitungod sa pagdaogdaog nga ilang naagoman. Mahitungod niini nga kampanya, Ang Bantayanang Torre nagtaho: “Usa kadto ka dakong kadaogan ug usa ka mahulagwayong pagduslak sa kaaway, nga nakahatag ug dili-mabatbat nga kalipay sa matinumanong mga magbubuhat.”—Roma 9:17.

Paglutos Wala Molampos!

Gipadayon sa mga Nazi ang pagpangita sa mga Saksi ni Jehova. Pagka-1939, unom ka libo kanila ang gibilanggo, ug libolibo ang gibalhog ngadto sa mga kampong konsentrasyon. (Hulagway 3) Unsa ang kahimtang pagkatapos sa Gubat sa Kalibotan II? Mga 2,000 sa nabilanggong mga Saksi ang namatay, kapin sa 250 ang gipatay. Bisan pa niana, misulat ang mga Propesor nga si Ericksen ug Heschel, “ang mga Saksi ni Jehova nagpabilin gayod sa paghupot sa ilang pagtuo atubangan sa kalisod.” Ingong resulta, sa dihang napukan ang rehimen ni Hitler, kapin sa usa ka libong mga Saksi ang migawas nga madaogon gikan sa mga kampo.—Hulagway 4; Buhat 5:38, 39; Roma 8:35-37.

Unsay nakahatag ug kusog sa katawhan ni Jehova nga makalahutay sa paglutos? Si Adolphe Arnold, nga naluwas sa kampong konsentrasyon, misaysay: “Bisan kon ikaw luya na kaayo, si Jehova makakita kanimo, makahibalo sa imong naagoman, ug siya mohatag kanimo sa gikinahanglang kusog aron maantos ang kahimtang ug magpabiling matinumanon. Dili mubo ang iyang kamot.”

Haom gayod nga mapadapat ang mga pulong ni propetang Sofonias sa maong matinumanong mga Kristohanon! Siya mipahayag: “Si Jehova nga imong Diyos anaa sa imong taliwala. Ingong Usa nga gamhanan, siya magaluwas. Siya magasadya tungod kanimo uban ang pagmaya.” (Sofonias 3:17) Hinaot nga sundogon sa tanang magsisimba sa matuod nga Diyos karong adlawa ang pagtuo sa maong maunongong mga Saksi nga naghupot sa integridad atubangan sa paglutos sa Nazi ug lipayon usab ang kasingkasing ni Jehova.—Filipos 1:12-14.

[Picture Credit Line sa panid 8]

Państwowe Muzeum Oświȩcim-Brzezinka, courtesy of the USHMM Photo Archives