Nag-organisar si Pablo ug Pagpangolektag mga Hinabang Alang sa mga Balaan

ANG espirituwal nga mga intereses mao ang labing hinungdanon sa matuod nga mga Kristohanon. Bisan pa niana, ang kahangawa alang sa pisikal nga kaayohan sa uban hinungdanon usab alang kanila. Kasagaran nagtagana sila sa mga panginahanglan niadtong nag-antos sa kalisdanan. Ang inigsoong gugma mopalihok sa mga Kristohanon sa pagtabang sa mga isigkamagtutuo nga nanginahanglan.—Juan 13:34, 35.

Ang gugma alang sa iyang espirituwal nga mga igsoong lalaki ug babaye nagpalihok kang apostol Pablo sa pag-organisar ug pagpangolektag mga hinabang taliwala sa mga kongregasyon sa Acaya, Galacia, Macedonia, ug sa distrito sa Asia. Nganong kinahanglanon kini? Sa unsang paagi giorganisar ang maong programa sa pagpangolektag mga hinabang? Unsay sanong? Ug nganong angay kitang maikag sa nahitabo?

Ang Kahimtang sa Kongregasyon sa Jerusalem

Human sa Pentekostes 33 K.P., ang mga Hudiyo ug mga proselita gikan sa lainlaing mga dapit nga nahimong mga tinun-an panahon sa Pentekostes nagpabilin ug dugaydugay sa Jerusalem aron makakat-on ug dugang bahin sa matuod nga pagtuo. Diin gikinahanglan, ang mga isigkamagsisimba andam nga mitabang sa pag-abaga sa mga panginahanglan nianang maong dugaydugay nga pag-estar. (Buhat 2:7-11, 41-44; 4:32-37) Ang sibil nga kagubot basin miresulta sa dugang nga panginahanglan sanglit ang Hudiyong mga makinasodnon nagpasiugda ug rebelyon ug kapintasan sa magubtanong panon. Apan, aron walay sumusunod ni Kristo nga magutman, dihay gihimong adlaw-adlaw nga pag-apod-apod ug pagkaon ngadto sa kabos nga mga babayeng balo. (Buhat 6:1-6) Gilutos pag-ayo ni Herodes ang kongregasyon, ug sa tungatunga sa katuigang 40 K.P., gihampak sa gutom ang Judea. Kon bahin sa mga sumusunod ni Jesus, kining tanan lagmit nga miresulta ngadto sa gitawag ni Pablo ug “mga pag-antos,” “mga kasakitan,” ug ‘pagpangagaw sa mga butang nga [ilang] gipanag-iya.’—Hebreohanon 10:32-34; Buhat 11:27–12:1.

Sa mga 49 K.P., lisod gihapon kaayo ang kahimtang. Busa, human mouyon nga maoy hatagag pagtagad ni Pablo ang mga Hentil diha sa iyang pagsangyaw, si Pedro, Santiago, ug Juan nag-awhag kaniya nga “hinumdoman ang mga kabos.” Mao kanay gipaningkamotan ni Pablo nga buhaton.—Galacia 2:7-10.

Pag-organisar sa Pagpangolekta

Si Pablo maoy nagdumala sa pagpangolekta ug salapi alang sa mga kabos nga mga Kristohanon sa Judea. Sa mga 55 K.P., giingnan niya ang mga taga-Corinto: “Mahitungod sa pagpangolekta alang sa mga balaan, ingon sa akong gisugo sa kongregasyon sa Galacia, nianang paagiha usab buhata ninyo. Matag unang adlaw sa semana ang matag usa kaninyo diha sa iyang kaugalingong balay kinahanglang magagahin agig pagtigom sumala sa  iyang pag-uswag . . . [Unya] bisan kinsang mga tawhana nga giuyonan ninyo pinaagig mga sulat, kini sila akong ipadala aron dad-on ang inyong malulotong gasa ngadto sa Jerusalem.” (1 Corinto 16:1-3) Paglabay sa usa ka tuig miingon si Pablo nga ang Macedonia ug Acaya nakigbahin sa pagpanghatag. Ug sa dihang ang nakolekta nga salapi gipadala ngadto sa Jerusalem, ang presensiya sa mga delegado gikan sa distrito sa Asia daw nagpakita nga ang mga kongregasyon usab nianang dapita miamot.—Buhat 20:4; 2 Corinto 8:1-4; 9:1, 2.

Walay gipugos sa paghatag ug labaw kay sa iyang maarangan. Hinunoa, kadto maoy pag-angay-angay sa kahimtang aron ang bisan unsang sobra makasapal sa kakulangan taliwala sa mga balaan sa Jerusalem ug Judea. (2 Corinto 8:13-15) “Ipabuhat sa matag usa ang sumala sa iyang gihukom diha sa iyang kasingkasing,” miingon si Pablo, “dili nga kontragusto o pinugos, kay gihigugma sa Diyos ang malipayong maghahatag.”—2 Corinto 9:7.

Gihatagan sa apostol ang mga taga-Corinto ug maayong katarongan sa pagkahimong mahinatagon. Si Jesus ‘nahimong kabos tungod kanila, aron sila mahimong dato’ sa espirituwal. (2 Corinto 8:9) Tino nga buot nilang sundogon ang iyang mahinatagong espiritu. Dugang pa, tungod kay ang Diyos nagpatugob kanila “sa tanang matang sa pagkamahinatagon,” haom nga motabang sila sa pagtagana sa mga panginahanglan sa mga balaan.—2 Corinto 9:10-12.

Tinamdan Niadtong Nakigbahin sa Maong Programa

Daghan kitag makat-onan bahin sa boluntaryong paghatag pinaagi sa pagpalandong sa tinamdan niadtong nakigbahin sa unang-siglong programa sa paghatag ug hinabang ngadto sa mga balaan. Ang pagpangolekta nagpasundayag ug labaw pa kay sa kahangawa alang sa kabos nga mga isigkamagsisimba ni Jehova. Nagpakita kini nga dihay bugkos sa panag-igsoonay tali sa Hudiyo ug Hentil nga mga Kristohanon. Ang paghatag ug pagdawat ug mga amot nagpakita nga dunay panaghiusa ug panaghigalaay sa mga Hentil ug mga Hudiyo. Ang ilang pagpanghatag maoy sa materyal maingon man sa espirituwal nga paagi.—Roma 15:26, 27.

Sa sinugdan wala tingali awhaga ni Pablo ang mga Kristohanon sa Macedonia sa paghatag—sila usab nag-ilaid sa kakabos. Apan, sila ‘nangaliyupo alang sa pribilehiyo sa paghatag.’ Aw, bisan tuod sila nag-antos sa “usa ka dakong pagsulay ilalom sa kasakitan,” sila malipayong mihatag “labaw sa ilang maarangan”! (2 Corinto 8:1-4) Ang ilang kinadak-ang pagsulay lagmit naglakip sa mga akusasyon nga sila nagtuman sa usa ka relihiyon nga supak sa balaod sa mga Romano. Busa masabtan nga sila magpakita ug empatiya sa ilang mga igsoon nga taga-Judea, kinsa nag-antos sa susamang mga kalisdanan.—Buhat 16:20, 21; 17:5-9; 1 Tesalonica 2:14.

Bisan tuod gigamit ni Pablo ang unang kasibot sa mga taga-Corinto alang sa pagpangolekta aron sa pagdasig sa mga taga-Macedonia, ang kaikag sa Corinto nawala. Niining tungora gihisgotan sa apostol ang pagkamahinatagon sa mga taga-Macedonia aron palihokon ang mga taga-Corinto. Nakita niya nga kinahanglang pahinumdoman sila nga miabot na ang panahon nga taposon ang ilang gisugdan sa miaging tuig. Unsay nahitabo?—2 Corinto 8:10, 11; 9:1-5.

Gisugdan ni Tito ang pagpangolekta didto sa Corinto, apan mitungha ang mga suliran nga lagmit nakababag sa iyang mga paningkamot. Human konsultaha si Pablo didto sa Macedonia, si Tito mibalik uban sa duha pa ka igsoon aron sa pagpalig-on sa kongregasyon sa Corinto ug sa pagtapos sa pagpangolekta. Ang uban nagpasumbingay tingali nga misulay si Pablo sa pagpahimulos sa mga taga-Corinto. Lagmit mao kiniy hinungdan kon nganong nagpadala siya ug tulo ka lalaki aron sa pagtapos sa pagpangolekta ug girekomendar ang matag usa kanila. “Kami nagalikay nga may si bisan kinsa nga makakitag sayop kanamo maylabot  niining dakong amot nga among dumalahon,” matod ni Pablo. “Kay kami ‘nagahimog matinud-anong pagtagana, dili lamang sa panan-aw ni Jehova, kondili usab sa panan-aw sa mga tawo.’”—2 Corinto 8:6, 18-23; 12:18.

Paghatod sa mga Amot

Sa tingpamulak sa 56 K.P., ang mga amot nga salapi andam nang dad-on ngadto sa Jerusalem. Si Pablo miuban sa mga delegado nga gipili sa mga miamot. Ang Buhat 20:4 nag-ingon: “Mikuyog kaniya si Sopater nga anak nga lalaki ni Piro nga taga-Berea, si Aristarko ug si Segundo nga mga taga-Tesalonica, ug si Gayo nga taga-Derbe, ug si Timoteo, ug gikan sa distrito sa Asia si Tiquico ug si Trofimo.” Dayag nga kauban usab nila si Lucas, kinsa mao tingali ang naghawas sa mga Kristohanon sa Filipos. Busa, labing menos siyam ka tawo ang mipanaw niining maong misyon.

“Ang total nga kantidad sa amot nga natigom sa pagpangolekta lagmit nga dako kaayo,” matod sa eskolar nga si Dieter Georgi, “tungod kay dili na unta maghasolhasol ug mogasto pa sa paghatod niini si Pablo ug ang daghan kaayong delegado.” Ang maong grupo wala lamang magtino sa seguridad niini kondili manalipod usab kang Pablo batok sa bisan unsang akusasyon sa pagkadili-matinud-anon. Kadtong gipadala naghawas sa Hentil nga mga kongregasyon atubangan sa mga balaan sa Jerusalem.

Milawig gikan sa Corinto ngadto sa Sirya, ang mga delegado lagmit miabot sa Jerusalem panahon sa Paskuwa. Apan, ang balita bahin sa laraw sa pagpatay kang Pablo nakapausab sa mga plano. (Buhat 20:3) Tingali nagtinguha ang iyang mga kaaway sa pagpatay kaniya diha sa dagat.

Diha pay ubang gikabalak-an si Pablo. Sa wala pa molarga, gisulatan niya ang mga Kristohanon sa Roma sa pag-ampo nga siya “maluwas gikan sa mga dili-magtutuo sa Judea ug nga ang akong ministeryo alang sa Jerusalem mahimong dalawaton ngadto sa mga balaan.” (Roma 15:30, 31) Bisan tuod ang mga balaan sa walay duhaduha modawat sa mga kontribusyon uban ang dakong pagpasalamat, tingali nabalaka si Pablo bahin sa kasamok nga mahitabo sa iyang pag-abot diha sa kadaghanang mga Hudiyo.

Ang apostol naghunahuna gayod sa mga kabos. Bisan tuod wala hisgoti diha sa Kasulatan kon kanus-a gitunol ang mga amot, ang paghatod niini nakapalambo sa panaghiusa ug nakapaarang sa Hentil nga mga Kristohanon sa pagpakita sa ilang mga isigkamagtutuo nga taga-Judea sa ilang pagkamapasalamaton tungod sa espirituwal nga mga bahandi nga nadawat gikan kanila. Ang pag-adto ni Pablo sa templo wala madugay human sa iyang pag-abot sa Jerusalem nagpukawg kagubot ug misangpot sa pagdakop kaniya. Apan sa kaulahian nakahatag kini kaniya ug kahigayonan sa pagpamatuod ngadto sa mga gobernador ug mga hari.—Buhat 9:15; 21:17-36; 23:11; 24:1–26:32.

Ang Atong mga Amot Karon

Sukad sa unang siglo, adunay dakong kausaban—apan ang nagpaluyong mga prinsipyo mao ra gihapon. Ang mga Kristohanon angayng pahibaloon sa pinansiyal nga mga panginahanglan. Ang bisan unsang mga amot nga ilang himoon alang niadtong nanginahanglan kinahanglang boluntaryo, gipalihok sa gugma alang sa Diyos ug sa isigkatawo.—Marcos 12:28-31.

Ang mga paagi sa paghatag ug hinabang nga gihimo alang sa mga balaan sa unang siglo nagpakita nga ang pagpangolekta sa maong mga amot kinahanglan nga maayong pagkaorganisar ug pagadumalahon sa matinud-anon gayod nga paagi. Siyempre, si Jehova nga Diyos nahibalo sa mga panginahanglan, ug siya nagtagana sa mga kinahanglanon sa iyang mga alagad aron sila makapadayon sa pagpaambit sa maayong balita sa Gingharian ngadto sa uban bisan pa sa mga kalisdanan. (Mateo 6:25-34) Apan, kitang tanan makaamot usab, bisan unsay atong pinansiyal nga kahimtang. Nianang paagiha, ‘ang tawo nga adunay daghan dili makabaton ug sobra ka daghan, ug ang tawo nga adunay diyutay dili makabaton ug diyutay kaayo.’—2 Corinto 8:15.