‘Sa Pagkatinuod ang Ginoo Gibanhaw!’

Handurawa kon unsa ka subo ang mga tinun-an ni Jesus sa dihang gipatay ang ilang Ginoo. Ang ilang paglaom daw sama ka walay-kinabuhi sa lawas nga gipahiluna ni Jose sa Arimatea sa lubnganan. Natapos usab ang bisan unsang mga panahom nga si Jesus maghatag ug kagawasan sa mga Hudiyo gikan sa yugo sa Roma.

KON mao pa kadto ang kataposan sa maong butang, ang mga tinun-an ni Jesus lagmit nangawala usab sama sa mga sumusunod sa daghang nag-angkon nga mga Mesiyas. Apan buhi si Jesus! Sumala sa Kasulatan, nagpakita siya sa iyang mga sumusunod sa ubay-ubayng mga okasyon wala madugay human sa iyang kamatayon. Busa, ang pipila kanila natukmod sa pagpatugbaw: ‘Sa pagkatinuod ang Ginoo gibanhaw!’—Lucas 24:34.

Kinahanglang panalipdan sa mga tinun-an ang ilang pagtuo kang Jesus ingong Mesiyas. Agig panalipod, ilang gihisgotan ilabina ang iyang pagkabanhaw gikan sa mga patay ingong malig-ong pamatuod sa iyang pagka-Mesiyas. Sa pagkatinuod, “uban ang dakong gahom ang mga apostoles nagpadayon pagpamatuod mahitungod sa pagkabanhaw sa Ginoong Jesus.”—Buhat 4:33.

Kon adunay si bisan kinsa nga nakapamatuod sukad nga dili tinuod kini nga pagkabanhaw—tingali pinaagi sa pagpaangkon sa usa sa mga tinun-an nga dili kini tinuod o pinaagi sa pagpakita nga ang lawas ni Jesus nagpabilin diha sa lubnganan—ang Kristiyanidad mahanaw unta sa sinugdan pa. Apan nagpabilin kini. Tungod kay nahibalo  nga buhi si Kristo, ang mga sumusunod ni Jesus miadto bisan diin nga nagmantala sa iyang pagkabanhaw, ug daghan kaayo ang nahimong mga magtutuo sa nabanhawng Kristo.

Nganong makatuo ka usab sa pagkabanhaw ni Jesus? Unsay pamatuod nga kini maoy aktuwal nga hitabo?

Nganong Konsiderahon ang Pamatuod?

Ang upat ka asoy sa Ebanghelyo ngatanan nagtaho bahin sa pagkabanhaw ni Jesus. (Mateo 28:1-10; Marcos 16:1-8; Lucas 24:1-12; Juan 20:1-29) a Ang ubang mga bahin sa Kristohanon Gregong Kasulatan naghisgot nga may katinoan bahin sa pagkabanhaw ni Kristo gikan sa mga patay.

Dili ikatingala nga ang pagkabanhaw ni Jesus gimantala sa iyang mga sumusunod! Kon tinuod siyang gibanhaw sa Diyos, mao kana ang labing katingalahang balita nga nadungog sukad sa kalibotan. Kana nagpasabot nga naglungtad ang Diyos. Dugang pa, kana nagpasabot nga si Jesus buhi gayod karon.

Sa unsang paagi mag-impluwensiya kana kanato? Aw, si Jesus nag-ampo: “Kini nagkahulogan ug kinabuhing walay kataposan, ang ilang pagkuha ug kahibalo bahin kanimo, ang bugtong matuod nga Diyos, ug sa usa nga imong gipadala, si Jesu-Kristo.” (Juan 17:3) Oo, mabatonan nato ang naghatag-kinabuhi nga kahibalo bahin kang Jesus ug sa iyang Amahan. Pinaagi sa pagpadapat sa maong kahibalo, bisan pag kita mamatay, kita mahimong banhawon, tungod kay si Jesus gibanhaw. (Juan 5:28, 29) Mabatonan nato ang paglaom nga kinabuhing walay kataposan diha sa usa ka paraisong yuta ilalom sa langitnong Gingharian sa Diyos sa mga kamot sa iyang hinimayang Anak, si Jesu-Kristo, ang Hari sa mga hari.—Isaias 9:6, 7; Lucas 23:43; Pinadayag 17:14.

Nan, hinungdanon ang isyu kon si Jesus gibanhaw ba gayod gikan sa mga patay. Kini nag-apektar sa atong kinabuhi karon ug sa atong mga kalaoman sa umaabot. Mao nga giawhag namo kamo sa pagsusi sa upat ka matang sa pamatuod nga si Jesus namatay ug gibanhaw.

Si Jesus Namatay Gayod Diha sa Estaka

Ang ubang mga maduhaduhaon nangangkon nga, bisan tuod gilansang, si Jesus wala gayod mamatay diha sa estaka. Matod nila hapit lang siyang mamatay ug nga siya naulian tungod sa kabugnaw sa lubnganan. Apan, ang tanang tinubdan nga mabatonan nagpamatuod nga ang patayng lawas ni Jesus mao ang gipahiluna sa lubnganan.

Sanglit gipatay si Jesus atubangan sa publiko, dihay mga saksi sa kamatuoran nga siya namatay gayod diha sa estaka. Ang iyang kamatayon gipamatud-an sa senturyon nga maoy gitugyanan sa pagpatay kaniya. Kadtong maong opisyal sa kasundalohan maoy usa ka propesyonal kansang trabaho naglakip sa pagtino nga namatay gayod si Jesus. Dugang pa, human lamang mapamatud-i nga namatay si Jesus nga ang Romanong Gobernador nga si Poncio Pilato naghatag sa lawas ni Jesus ngadto kang Jose sa Arimatea aron ilubong.—Marcos 15:39-46.

Nakita nga Walay Sulod ang Lubnganan

Ang walay-sulod nga lubnganan naghatag sa mga tinun-an sa ilang unang pamatuod sa pagkabanhaw ni Jesus, ug kining maong pamatuod dili gihapon malalis. Si Jesus gilubong diha sa usa ka bag-ong lubnganan, usa nga wala pa gayod magamit. Duol kini sa dapit diin siya gilansang ug niadtong panahona dali ra gayod kining matultolan. (Juan 19:41, 42) Ang tanang asoy sa Ebanghelyo nagkauyon nga sa pag-abot sa mga higala ni Jesus diha sa lubnganan sa ikaduhang buntag human sa iyang kamatayon, nawala ang iyang lawas.—Mateo 28:1-7; Marcos 16:1-7; Lucas 24:1-3; Juan 20:1-10.

Ang walay-sulod nga lubnganan nakapatingala sa mga kaaway ni Jesus, maingon man sa iyang mga higala. Ang iyang mga kaaway dugay nang naningkamot nga makita siyang patay ug ilubong. Kay nalampos na ang ilang tumong, nanagana sila mao nga nagbutang sila ug mga guwardiya ug gitak-opan ang lubnganan. Bisan pa niana,  pagkabuntag sa unang adlaw sa semana, kini walay sulod.

Gikuha ba sa mga higala ni Jesus ang iyang lawas gikan sa lubnganan? Wala gayod, tungod kay gipakita sa Ebanghelyo nga sila nasubo pag-ayo human siya patya. Dugang pa, ang iyang mga tinun-an dili gayod moantos sa paglutos ug kamatayon alang sa usa ka butang nga ilang nahibaloan nga dili tinuod.

Kinsay nagkuha sa lawas gikan sa lubnganan? Imposible gayod nga ang mga kaaway ni Jesus ang nagkuha sa lawas. Bisan pag gikuha nila kini, ila gayod kining ipakita sa ulahi aron sa pagpanghimakak sa mga pangangkon sa mga tinun-an nga si Jesus nabanhaw ug buhi. Apan wala gayoy nahitabo nga sama niana, kay ang Diyos maoy milihok.

Mga semana sa ulahi, ang mga kaaway ni Jesus wala motubag sa dihang nagpamatuod si Pedro: “Mga tawo sa Israel, paminawa kining mga pulonga: Si Jesus nga Nasaretnon, usa ka tawo nga dayag nga gipakita sa Diyos kaninyo pinaagi sa gamhanang mga buhat ug mga tilimad-on ug mga ilhanan nga gibuhat sa Diyos pinaagi kaniya sa inyong taliwala, sumala gayod sa inyong nahibaloan, kini nga tawo, ingong usa nga gitugyan pinaagi sa pihong katuyoan ug kahibalong-daan sa Diyos, inyong gilansang sa usa ka estaka pinaagi sa kamot sa malinapasong mga tawo ug gipatay. Apan ang Diyos nagbanhaw kaniya pinaagi sa pagtangtang sa kahapdos sa kamatayon, tungod kay dili man gayod mahimo nga siya padayong mapugngan niini. Kay si David nag-ingon labot kaniya, ‘Si Jehova anaa kanunay atubangan sa akong mga mata . . . Dugang pa, bisan ang akong unod magapuyo diha sa paglaom; tungod kay dili mo biyaan ang akong kalag sa Hades, ni itugot mo nga ang imong maunongon makakita ug pagkadunot.’”—Buhat 2:22-27.

Daghan ang Nakakita sa Gibanhawng Jesus

Sa basahon sa Mga Buhat, ang magsusulat sa Ebanghelyo nga si Lucas nag-ingon: “Ngadto [sa mga apostol] usab pinaagi sa daghang piho nga mga pamatuod [si Jesus] nagpakita nga buhi human siya mag-antos, nga nakita nila sulod sa kap-atan ka adlaw ug nagsaysay sa mga butang bahin sa gingharian sa Diyos.” (Buhat 1:2, 3) Ubay-ubayng tinun-an ang nakakita sa nabanhawng Jesus sa lainlaing okasyon—diha sa usa ka tanaman, diha sa dalan, sa pagpangaon, sa daplin sa Dagat sa Tiberias.—Mateo 28:8-10; Lucas 24:13-43; Juan 21:1-23.

Ang mga kritiko nagduhaduha sa pagkatinuod niini nga mga pagpakita. Sila moingon nga ang mga magsusulat nag-imbento sa maong mga asoy, o ilang hisgotan ang daw mga panagsumpakiay niana. Sa pagkatinuod, ang ginagmayng kalainan diha sa mga asoy sa Ebanghelyo nagpamatuod nga walay panagkunsabo. Ang atong kahibalo bahin kang Jesus mapasangkad sa dihang ang usa ka magsusulat mohatag ug mga detalye nga molig-on sa ubang mga asoy sa pipila ka hitabo sa yutan-ong kinabuhi ni Kristo.

Ang mga pagpakita ba ni Jesus human sa pagkabanhaw maoy mga paglamat? Ang bisan unsang argumento nga kini maoy paglamat dili katuohan, tungod kay nakita siya sa daghan kaayong tawo. Lakip kanila ang mga mananagat, mga babaye, usa ka alagad sa gobyerno, ug bisan ang nagduhaduha nga tinun-ang si Tomas, kinsa nakombinsir lamang sa dihang nakita niya ang dili-malalis nga pamatuod nga si Jesus gibanhaw gikan sa mga patay. (Juan 20:24-29) Sa daghang okasyon, ang mga tinun-an ni Jesus wala dayon makaila sa ilang nabanhawng Ginoo. Kas-a, kapin sa 500 ka tawo ang nakakita kaniya, kadaghanan kanila buhi pa sa dihang si apostol Pablo migamit sa maong hitabo ingong pamatuod sa iyang pagpanalipod sa pagkabanhaw.—1 Corinto 15:6.

 Ang Buhi nga si Jesus Dunay Impluwensiya sa mga Tawo

Ang pagkabanhaw ni Jesus dili lamang usa ka butang nga kaikagan o lantugian. Ang kamatuoran nga siya buhi nakaimpluwensiya sa mga tawo bisan diin sa positibong paagi. Sukad sa unang siglo, nausab ang tinamdan sa daghang tawo gikan sa kawalay-pagtagad o bug-os nga pagsupak sa Kristiyanidad ngadto sa pagkasegurado gayod nga kini mao ang matuod nga relihiyon. Unsay nakapausab kanila? Ang pagtuon sa Kasulatan nagpamatuod kanila nga gibanhaw sa Diyos si Jesus ingong mahimayaong espiritung linalang sa langit. (Filipos 2:8-11) Nagpasundayag sila ug pagtuo kang Jesus ug sa tagana ni Jehova nga Diyos alang sa kaluwasan pinaagi sa halad-lukat ni Kristo. (Roma 5:8) Ang maong mga tawo nakakaplag ug tinuod nga kalipay pinaagi sa pagtuman sa kabubut-on sa Diyos ug sa pagkinabuhi nga kaharmonya sa mga pagtulon-an ni Jesus.

Tagda kon unsay kahulogan sa pagkahimong Kristohanon sa unang siglo. Walay makuha sa pagkainila, gahom, o bahandi. Sa kasukwahi gayod, daghang unang mga Kristohanon ang ‘malipayong midawat sa pagpangagaw sa ilang mga gipanag-iya’ tungod sa ilang pagtuo. (Hebreohanon 10:34) Sa Kristiyanidad gikinahanglan ang pagkinabuhi uban ang pagsakripisyo ug paglutos nga sa daghang kahimtang natapos sa kamatayon ingong martir.

Una pa mahimong mga sumusunod ni Kristo, ang uban may maayong kalaoman kon mahitungod sa pagkainila ug bahandi. Si Saulo sa Tarso nagtuon ubos sa nabantog nga magtutudlo sa Balaod nga si Gamaliel ug nagsugod sa paghimo sa iyang kaugalingon nga inila atubangan sa mga Hudiyo. (Buhat 9:1, 2; 22:3; Galacia 1:14) Apan, si Saulo nahimong apostol Pablo. Siya ug daghan pang uban nagsalikway sa pagkainila ug gahom nga gitanyag niining kalibotana. Ngano? Aron ipakaylap ang mensahe sa tinuod nga paglaom nga gipasukad sa mga saad sa Diyos ug sa kamatuoran nga si Jesu-Kristo nabanhaw gikan sa mga patay. (Colosas 1:28) Andam silang moantos alang sa usa ka kawsa nga nahibaloan nilang gipasukad sa kamatuoran.

Mao usab kana ang gibuhat sa minilyon karon. Makita nimo sila diha sa mga kongregasyon sa mga Saksi ni Jehova sa tibuok kalibotan. Ang mga Saksi mainitong nagdapit kanimo sa tinuig nga pagsaulog sa kamatayon ni Kristo, nga himoon human sa pagsalop sa adlaw sa Dominggo, Abril 8, 2001. Malipay sila nga motambong ka sa maong okasyon ug sa tanan nilang mga tigom aron sa pagtuon sa Bibliya nga gihimo diha sa ilang mga Kingdom Hall.

Nganong dili mokat-on ug dugang, dili lamang bahin sa kamatayon ug pagkabanhaw ni Jesus kondili usab bahin sa iyang kinabuhi ug mga pagtulon-an? Giawhag niya kita sa pagduol kaniya. (Mateo 11:28-30) Lihok na karon sa pagkuha ug tukmang kahibalo bahin kang Jehova nga Diyos ug kang Jesu-Kristo. Ang pagbuhat niana magkahulogan ug walay-kataposang kinabuhi ilalom sa Gingharian sa Diyos diha sa mga kamot sa iyang pinalanggang Anak.

[Footnote]

[Mga hulagway sa panid 7]

Minilyon ang nakakaplag ug tinuod nga kalipay ingong mga sumusunod ni Jesu-Kristo

[Picture Credit Line sa panid 6]

Gikan sa Self-Pronouncing Edition of the Holy Bible, nga naundan sa King James ug sa Rebisadong mga bersiyon