Sugilanon sa Kinabuhi

Kami Usa ka Tem

SUMALA SA GIASOY NI MELBA BARRY

Sa Hulyo 2, 1999, ang akong bana ug ako mitambong sa usa ka dakong panagkatigom sa mga Saksi ni Jehova, sama sa among ginahimo sa libolibong higayon sulod sa among 57 ka tuig nga kaminyoon. Si Lloyd nagpahayag sa kataposang pakigpulong sa distritong kombensiyon sa Hawaii nianang Biyernes. Dayon, nakuyapan siya. Bisan pa sa tanang paningkamot nga maulian siya sa panimuot, siya namatay. a

GIMAHAL ko gayod kadtong Kristohanong mga igsoong lalaki ug babaye sa Hawaii nga naningkamot sa pagtabang kanako nga masagubang kadtong maong trahedya! Natandog ni Lloyd ang kinabuhi sa kadaghanan kanila, maingon man nianang sa daghan pa sa tibuok kalibotan.

Sa duolan sa duha ka tuig sukad sa iyang pagkamatay, naghunahuna ako bahin sa among bililhong katuigan nga magkauban—kasagaran diha sa langyawng misyonaryong asaynment maingon man dinhi sa tibuok-kalibotang hedkuwarter sa mga Saksi ni Jehova sa Brooklyn, New York. Nahinumdoman ko usab ang akong kinabuhi sa batan-on pa ko didto sa Sydney, Australia, ug ang mga suliran nga giatubang nako ug ni Lloyd aron makasal panahon sa unang bahin sa Gubat sa Kalibotan II. Apan, paasoya una ko ninyo kon sa unsang paagi ako na-Saksi ug sa unsang paagi nahimamat nako si Lloyd niadtong 1939.

Kon sa Unsang Paagi Ako Na-Saksi

Si James ug Henrietta Jones mao ang akong mahigugmaon ug mapinanggaon nga mga ginikanan. Ako 14 anyos pa lamang sa dihang natapos nako ang akong pagtungha niadtong 1932. Ang kalibotan niadtong tungora diha sa kinataliwad-an sa Dakong Depresyon. Nagsugod ako pagtrabaho  aron sa pagtabang sa pamilya, nga naglakip sa akong duha ka manghod nga mga babaye. Sulod sa pipila ka tuig, diha na akoy maayog-suweldo nga trabaho diin akoy nagdumala sa ubay-ubayng batan-ong mga babaye nga nagtrabaho uban nako.

Sa kasamtangan, sa 1935, si Mama midawat ug literatura sa Bibliya gikan sa usa sa mga Saksi ni Jehova ug sa wala madugay nakombinsir siya nga nakaplagan niya ang kamatuoran. Ang ubang membro sa pamilya lakip nako naghunahuna nga nabuang siya. Hinunoa, usa ka adlaw niana, nakita nako ang pulyeto nga nag-ulohang Where Are the Dead? ug naikag ko sa ulohan. Busa sa tago gibasa nako ang pulyeto. Kadto ang nakapausab pag-ayo sa akong kinabuhi! Dihadiha misugod ako sa pagkuyog kang Mama ngadto sa tigom sa tungatunga sa semana nga gitawag ug Modelong Pagtuon. Ang pulyeto nga nag-ulohang Model Study—sa ngadtongadto diha nay tulo—may mga pangutana ug mga tubag ug mga teksto usab nga nagsuportar sa mga tubag.

Nianang panahona, sa Abril sa 1938, si Joseph F. Rutherford, usa ka hawas gikan sa tibuok-kalibotang hedkuwarter sa mga Saksi ni Jehova miduaw sa Sydney. Ang iyang pakigpulong publiko mao ang unang natambongan nako. Kadto himoon unta sa Sydney Town Hall, apan ang mga magsusupak milampos sa pagpakanselar sa among permiso sa paggamit sa maong lugar. Hinunoa, ang pakigpulong gihimo diha sa mas dako nga Sydney Sports Ground. Tungod sa dugang publisidad nga gipahinabo sa pagsupak, mga 10,000 ang nanambong, usa ka katingalahang gidaghanon kon hunahunaon nato nga diha lamay 1,300 ka Saksi sa Australia niadtong panahona.

Wala madugay human niadto, nakig-ambit ako sa pagsangyaw sa kanataran sa unang higayon—ug wala mabansay. Sa pag-abot sa among grupo sa among teritoryo nga sangyawan, ang brader nga nanguna miingon kanako, “Ikaw ang moadto nianang balaya.” Nakuyawan kaayo ko nga sa dihang ang tagbalay miabli sa pultahan, ako nangutana, “Unsa nang orasa?” Siya misulod sa balay, mitan-aw sa relo, ug mibalik paggawas ug misulti nako sa oras. Kadto ang kataposan sa maong pagduaw. Mibalik ko sa kotse.

Apan, wala ko molunga, ug sa wala madugay regular na akong nagpaambit sa mensahe sa Gingharian ngadto sa uban. (Mateo 24:14) Sa Marso 1939, akong gipasimbolohan ang akong pahinungod kang Jehova pinaagi sa pagpabawtismo sa tubig diha sa banyera sa among silingan, si Dorothy Hutchings. Tungod kay walay magamit nga mga igsoong lalaki, sa wala madugay human ako mabawtismohi, gihatagan akog mga responsibilidad sa kongregasyon nga kasagarang giasayn sa Kristohanong mga lalaki.

Kasagaran magtigom mi diha sa pribadong mga balay, apan usahay mangabang mi ug lawak alang sa mga pakigpulong publiko. Usa ka guwapong batan-ong brader gikan sa Bethel, among sangang buhatan, ang miadto sa among gamayng kongregasyon aron mopakigpulong. Wala nako mahibaloi nga siya diha diay laing rason sa pag-adto—aron masinati pa ako. Oo, nianang paagiha nako nahimamat si Lloyd.

Paghimamat sa Pamilya ni Lloyd

Sa wala madugay gusto nakong moalagad kang Jehova nga bug-os-panahon. Apan, sa dihang miaplay ako ingong payunir (makigbahin sa bug-os-panahong buluhaton sa pagsangyaw), gipangutana ko kon gusto ba nakong moalagad sa Bethel. Busa sa Septiyembre 1939, ang bulan nga nagsugod ang Gubat sa Kalibotan II, nahimo akong membro sa pamilyang Bethel sa Strathfield, usa ka komunidad nga sikbit sa Sydney.

Sa Disyembre 1939, mibiyahe ako paingon sa New Zealand aron motambong sa usa ka kombensiyon. Tungod kay si Lloyd taga-New Zealand man, miadto usab siya. Nagkauban mi pagbiyahe sa barko, ug mas nakaila namo ang usag usa. Gitino ni Lloyd nga mahimamat nako ang iyang mama ug papa ug mga manghod nga babaye sa kombensiyon sa Wellington ug sa ulahi sa ilang balay sa Christchurch.

Pagdili sa Among Buluhaton

Sa Sabado, Enero 18, 1941, ang mga opisyal sa gobyerno sa Commonwealth nangadto sa sangang buhatan sakay sa mga unom ka itom nga limousine aron ilogon ang propiedad. Sanglit nagtrabaho ako diha sa gamayng guardhouse sa ganghaan sa Bethel, ako ang unang nakakita nila. Mga 18 ka oras  una pa niana, gipahibalo na kami bahin sa pagdili, busa halos ang tanang literatura ug mga payl wala na diha sa sangang buhatan. Pagkasunod semana, lima ka membro sa pamilyang Bethel, lakip kang Lloyd, ang gibilanggo.

Nahibalo ko nga ang gikinahanglan pag-ayo sa mga igsoon diha sa bilanggoan mao ang espirituwal nga pagkaon. Aron madasig si Lloyd, mihukom ako sa pagpadala kaniya ug mga “sulat sa gugma.” Gisugdan nako kini pagsulat sa estilo nga sama sa sulat sa gugma, apan unya gikopya nako ang enterong mga artikulo sa Bantayanang Torre ug gipirmahan ko kana isip iyang hinigugma. Human sa upat ka bulan ug tunga, gibuhian si Lloyd.

Kaminyoon ug Padayon nga Pag-alagad

Sa 1940, ang inahan ni Lloyd miadto sa Australia, ug giingnan siya ni Lloyd nga nagplano ming magminyo. Gitambagan niya si Lloyd nga dili maayong magminyo tungod kay ang kataposan sa sistema sa mga butang daw duol na kaayo. (Mateo 24:3-14) Gipahibalo usab niya ang iyang mga higalang lalaki sa iyang mga plano, apan matag hisgot niya niana, kombinsihon nila siya nga dili maayong magminyo. Sa kataposan, usa ka adlaw niana sa Pebrero 1942, gihilom ako pagdala ni Lloyd—uban sa upat ka Saksi nga misaad nga ililong ang among plano—ngadto sa rehistrohanan sa kaminyoon, ug kami nagpakasal. Niadtong panahona walay probisyon sa Australia nga mahimong mokasal ang mga Saksi ni Jehova.

Bisan tuod wala kami tugti sa pagpadayon sa among pag-alagad sa Bethel ingong magtiayon, gipangutana mi kon gusto ba namong mosulod sa espesyal payunir nga buluhaton. Malipayon namong gidawat ang asaynment ngadto sa usa ka lungsod sa banika nga ginganlag Wagga Wagga. Ang among buluhatong pagsangyaw gidili gihapon, ug wala kamiy alawans, busa kinahanglang itugyan namo ang among palas-anon kang Jehova.—Salmo 55:22.

Kami mosakay sa bisikleta nga kasakyan ug duha ka tawo paingon sa mga banika, mangitag buotan nga mga tawo, ug makig-estoryag dugay kanila. Pipila lang ang gustong magtuon sa Bibliya. Apan, usa ka tag-iyag tindahan ang miapresyar pag-ayo sa buluhaton nga among ginabuhat nga tagan-an mi niya ug mga prutas ug utanon kada semana. Human kami mogugol ug unom ka bulan sa Wagga Wagga, gidapit kami pag-usab nga moalagad sa Bethel.

 Niadtong Mayo 1942, ang pamilyang Bethel mibiya sa sangang buhatan sa Strathfield ug mitawon ngadto sa pribadong mga balay. Ang pamilya nagtawontawon sa lainlaing mga balay halos matag duha ka semana aron dili matiktikan. Sa dihang si Lloyd ug ako mibalik sa Bethel sa Agosto, miduyog mi nila diha sa usa niini nga mga dapit. Ang among asaynment sa maadlaw mao ang pagtrabaho diha sa usa sa mga tagong imprentahan nga gitukod. Sa kataposan, sa Hunyo 1943, gikuha ang pagdili sa among buluhaton.

Pagpangandam Para sa Pag-alagad sa Langyawng Dapit

Sa Abril 1947 gihatagan kami ug pasiunang mga aplikasyon sa pagtambong sa Watchtower Bible School of Gilead, nga nahimutang sa South Lansing, New York, T.B.A. Sa kasamtangan, giasayn kami sa pagduaw sa mga kongregasyon sa Australia aron palig-onon sila sa espirituwal. Paglabay sa pipila ka bulan, nadawat namo ang imbitasyon nga motambong sa ika-11ng klase sa Gilead. Gitagalan kamig tulo ka semana sa pag-atiman sa kinahanglanong mga butang ug sa pag-empake sa among mga kabtangan. Mibiya kami sa among pamilya ug mga higala niadtong Disyembre 1947 ug mibiyahe paingon sa New York duyog sa 15 pa gikan sa Australia nga gidapit usab sa pagtambong sa mao gihapong klase.

Ang among pipila ka bulan didto sa Tunghaang Gilead dali rang milabay, ug nadawat na namo ang among asaynment isip mga misyonaryo sa Hapon. Tungod kay dugaydugay pa usa nahuman paghikay ang among mga papeles sa pag-adto sa Hapon, si Lloyd sa makausa pa giasayn ingong nagapanawng magtatan-aw sa mga Saksi ni Jehova. Ang mga kongregasyon nga giasayn nga duawon namo maoy gikan sa siyudad sa Los Angeles ngadto sa utlanan sa Mexico. Wala kamiy kotse, busa kada semana ang mga Saksi malipayng mohatod namo gikan sa usa ka kongregasyon ngadto sa lain. Ang dapit nga sakop nianang dakong sirkito sa pagkakaron gilangkoban na sa mga bahin sa tulo ka Ingles ug tulo ka Katsila nga mga distrito, ang matag distrito gilangkoban ug mga napulo ka sirkito!

Dayon, Oktubre 1949 na, ug nagpadulong na kami sa Hapon sakay sa usa ka barko nga sakyanan kanhi sa mga sundalo. Ang usa ka tumoy sa barko gigahin para sa mga lalaki ug ang pikas tumoy alang sa mga babaye ug mga bata. Usa na lang ka adlaw una pa sa gitakda nga pag-abot namo sa Yokohama, nasugamak kami sa bagyo. Dayag nga gipadpad sa bagyo ang dag-om, kay pagsubang sa adlaw pagkaugma, Oktubre 31, nakita namo ang katahom sa Mount Fuji. Pagkaanindot nga pag-abiabi kanamo sa among bag-ong asaynment!

Pagsangyaw Uban sa mga Hapones

Sa dihang hapit na ming modunggo, nakita namo ang gatosan ka itom-ug-buhok nga mga tawo. ‘Kasaba nila!’ kami naghunahuna sa dihang nadungog namo ang kusog nga kinagalkal. Ang tanan nagsul-ob ug bakya nga nagkinagalkal diha sa tabla nga mga pantalan. Human magpalabay ug usa ka gabii sa Yokohama, misakay mi ug tren paingon sa among asaynment isip mga misyonaryo sa Kobe. Didto si Don Haslett, usa ka klasmet sa Gilead nga miabot sa Hapon pipila ka bulan una kanamo, nakaabang na ug puy-anan sa misyonaryo. Kadto maoy nindot, dako, estilo-Kasadpan, dos-andanas nga balay—wala gayoy muwebles!

Aron duna mi kutson nga katulgan, manghabas mi ug tag-as nga sagbot sa nataran ug iplastar kini sa salog. Sa ingon niana nagsugod ang among kinabuhi isip misyonaryo, nga walay laing butang gawas sa among personal nga mga epektos. Nakabaton mi ug gagmayng mga pugon nga uling ang sugnod, nga gitawag ug hibachi, aron motaganag kainit ug magamit sa pagluto. Usa ka gabii niana, napalgan ni Lloyd ang duha ka kaubang mga misyonaryo, si Percy ug Ilma Iszlaub, nga nakuyapan. Naulian lamang sila sa dihang giablihan ni Lloyd ang mga bentana aron makasulod ang presko, bugnaw nga hangin. Ako usab nawad-an sa panimuot samtang nagluto diha niining maong mga pugon. Nagkinahanglan gayod ug panahon aron maanad sa pipila ka butang!

Ang pagtuon sa pinulongan maoy kinahanglang unahon, ug nagtuon kami ug Hinapon 11 ka oras kada adlaw sulod sa usa ka bulan. Human niana, misugod kami pagsangyaw sa kanataran dala ang sinulat nga usa o duha ka tudling-pulong aron makasugod kami. Sa akong unang adlaw sa pagsangyaw, nahimamat nako ang usa ka maanyag nga babaye, si Miyo Takagi, kinsa miabiabi kanako. Sa akong mga pagbalikduaw kaniya, nanglimbasog mi uban sa tabang sa mga diksiyonaryo nga Hinapon-Iningles hangtod nga naugmad ang mauswagong pagtuon sa Bibliya. Sa 1999, samtang nagtambong sa pagpahinungod sa gipadak-ang pasilidad sa sangang buhatan sa Hapon, nakita nako  pag-usab si Miyo, maingon man ang daghan pang uban nga minahal nga mga igsoon nga akong gitun-an kaniadto. Kalim-an ka tuig na ang milabay, apan sila masiboton gihapon nga mga magmamantala sa Gingharian, nga nagabuhat sa ilang maarangan sa pag-alagad kang Jehova.

Sa Kobe niadtong Abril 1, 1950, mga 180 ang mitambong sa among pagsaulog sa Memoryal sa kamatayon ni Kristo. Sa among katingala, pagkasunod buntag 35 ka tawo ang mitungha aron makig-ambit sa pagsangyaw sa kanataran. Ang matag misyonaryo nagkuyog ug tulo o upat niining maong mga bag-ohan diha sa pagsangyaw. Ang mga tagbalay wala makigsulti nako—ang langyaw nga gamay rag nasabtang Hinapon—kondili ngadto sa nanambong sa Memoryal nga nanguyog kanako. Nagsige silag estoryahay, apan wala koy kalibotan kon unsay ilang giestoryahan. Malipay kong moingon nga ang pipila niining maong mga bag-ohan miuswag sa kahibalo ug nagpadayon sa buluhatong pagsangyaw hangtod karon.

Daghang Pribilehiyo ug mga Asaynment

Nagpadayon kami sa among misyonaryong buluhaton sa Kobe hangtod sa 1952, nga nianang panahona giasayn kami sa Tokyo, diin si Lloyd maoy gisaligan sa pagdumala sa sangang buhatan. Ngadtongadto, tungod sa iyang mga asaynment nakaabot siya sa lainlaing mga dapit sa Hapon ug sa ubang mga nasod. Sa ulahi, sa usa sa iyang mga pagduaw sa Tokyo, si Nathan H. Knorr nga gikan sa tibuok-kalibotang hedkuwarter miingon kanako: “Lain pay ato, nahibalo ka ba kon asa paingon ang imong bana sa iyang sunod nga pagduaw sa sona? Sa Australia ug New Zealand.” Siya midugang: “Makakuyog sab ka, kon ikaw ang moplete sa imong kaugalingon.” Makapahinam gayod kadto! Kon buot hunahunaon, siyam ka tuig na sukad nga mibiya kami sa amoa.

Misulat dayon kami sa among mga pamilya. Ang akong inahan mihatag nako ug kuwarta nga ipalit ug tiket. Si Lloyd ug ako puliki kaayo sa among mga asaynment, ug wala kamiy kuwarta nga magamit sa pagduaw sa among mga pamilya. Busa mao kini ang tubag sa akong mga pag-ampo. Sa imong mahanduraw, si Mama nalipay kaayo nga nakita ako. Matod niya, “Buweno, magtigom kog kuwarta aron makabalik mo dinhi tulo ka tuig gikan karon.” Nagbulag mi nga naghunahuna niana, apan ikasubo, namatay siya pagkasunod nga Hulyo. Naglaom gayod ako sa among makalilipayng panagkita pag-usab sa bag-ong kalibotan!

Hangtod sa 1960 ang misyonaryong buluhaton mao ang akong bugtong asaynment, apan unya nakadawat kog sulat nga nag-ingon: “Ang kahikayan sukad niining petsaha mao nga ikaw ang molaba ug moplantsa sa sinina sa tibuok pamilyang Bethel.” Ang among pamilya niadtong panahona naglakip sa mga napulog-duha lamang ka tawo, busa makaatiman ako niining buluhatona gawas pa sa akong misyonaryong asaynment.

Sa 1962 giguba ang among Hinapon-ug-estilo nga balay, ug usa ka bag-ong sayis-andanas nga Puy-anang Bethel ang gitukod sa maong lugar sa pagkasunod tuig. Ako giasayn nga motabang sa batan-on, bag-ong Bethelite nga mga brader sa paghinlo ug pag-areglar sa ilang mga lawak. Kasagaran, ang mga batan-ong lalaki sa Hapon wala tudloi sa pagbuhatbuhat diha sa ilang panimalay. Ang gipasiugda mao ang sekular nga edukasyon, ug ang ilang mga inahan mao ang naghimo sa tanang buhatbuhaton sa balay alang kanila. Sa wala madugay nakat-onan nila nga dili nako buhaton ang tanan alang kanila sama sa gibuhat sa ilang inahan. Ngadtongadto, daghan ang miuswag ngadto sa pagdawat ug bag-o, responsable nga mga asaynment sulod sa organisasyon.

Sa usa ka init kaayo nga adlaw sa ting-init, may gitun-an sa Bibliya nga misuroy sa among pasilidad, ug nakit-an ko niya nga naglimpiyo sa mga kaligoanan. Miingon siya, “Palihog sultihi kon kinsa man ugaling ang nagdumala dinhi nga gusto kong mosuweldo ug katabang nga moanhi dinhi aron mobuhat niining  trabahoa alang kanimo.” Ako siyang giingnan nga bisan tuod giapresyar nako ang iyang malulotong hunahuna, andam kaayo kong mobuhat sa bisan unsa nga giasayn kanako sulod sa organisasyon ni Jehova.

Niining panahona, si Lloyd ug ako nakadawat ug imbitasyon nga motambong sa ika-39 nga klase sa Gilead! Pagkadakong pribilehiyo nga sa 1964, sa edad nga 46, moeskuyla na usab! Ang kurso gitagana ilabina sa pagtabang niadtong nag-alagad diha sa mga sangang buhatan sa pag-atiman sa ilang mga responsibilidad. Human sa napulo-ka-bulan nga kurso, giasayn kami ug balik sa Hapon. Niining tungora, diha na kamiy kapin sa 3,000 ka magmamantala sa Gingharian nianang nasora.

Kusog kaayo ang pagtubo nga pagka-1972 dihay kapin sa 14,000 ka Saksi, ug usa ka bag-ong singko-andanas nga sangang buhatan ang gitukod sa Numazu, habagatan sa Tokyo. Gikan sa Bethel, makita namo ang maanindot nga talan-awon sa Mount Fuji. Kapin sa usa ka milyong magasin kada bulan sa Hinapon nga pinulongan ang giimprenta sa dako, bag-ong rotary nga imprentahanan. Apan hapit nang mausab ang among kinabuhi.

Sa ulahing bahin sa 1974, si Lloyd nakadawat ug sulat gikan sa hedkuwarter sa mga Saksi ni Jehova sa Brooklyn nga nagdapit kaniya sa pag-alagad isip membro sa Nagamandong Lawas. Sa sinugdan naghunahuna ko: ‘Aw, magkabulag na gyod mi. Sanglit si Lloyd aduna may langitnong paglaom ug ako adunay yutan-ong paglaom, sa madugay ug madali magkabulag gihapon mi. Tingali dili na lang ko mouban kang Lloyd sa Brooklyn.’ Apan sa wala madugay gipasibo nako ang akong panghunahuna ug andam na kong mibalhin uban kang Lloyd sa Marso 1975.

Mga Panalangin Dinhi sa Hedkuwarter

Bisan pag dinhi na sa Brooklyn, naghandom gihapon si Lloyd sa Hapon, ug kanunay siyang maghisgot sa among mga eksperyensiya didto. Apan niining panahona diha nay mga kahigayonan nga mahimamat pa ang ubang kaigsoonan. Sa kataposang 24 ka tuig sa iyang kinabuhi, si Lloyd kasagarang gigamit diha sa buluhaton sa sona, nga naglangkit ug pagbiyahe sa tibuok kalibotan. Kadaghan kong nakauban niya sa pagbiyahe sa tibuok kalibotan.

Ang pagduaw sa among Kristohanong mga igsoon sa ubang mga nasod nakatabang nako sa pagsabot sa mga kahimtang nga gikinabuhian ug gitrabahoan sa daghan kanila. Dili gyod nako malimtan ang nawong sa diyes-anyos nga si Entellia, usa ka batang babaye nga akong nahimamat sa amihanang Aprika. Gimahal niya ang ngalan sa Diyos ug molakaw siya ug usa ka oras ug tunga paingon sa Kristohanong mga tigom. Bisan pa sa grabeng paglutos gikan sa iyang pamilya, si Entellia nagpahinungod sa iyang kaugalingon kang Jehova. Sa dihang giduaw namo ang iyang kongregasyon, diha lamay usa ka buok, ubos ug buyas nga bombilya nga nagbitay ibabaw sa nota sa mamumulong—gawas niana, ang tigomanan ngitngit kaayo. Bisag ingon niana ka ngitngit, makalilipay kaayo nga madungog ang mananoy nga pag-awit sa mga igsoong lalaki ug babaye.

Usa ka hinungdanong hitabo sa among kinabuhi nahitabo sa Disyembre 1998 sa dihang si Lloyd ug ako nalakip sa mga delegado sa “Iya sa Diyos nga Dalan sa Kinabuhi” nga Distritong mga Kombensiyon nga gipahigayon sa Cuba. Nakadayeg gayod kami sa pagkamapasalamaton ug kalipay nga gipahayag sa mga igsoong lalaki ug babaye didto nga dunay pipila ka igsoon gikan sa hedkuwarter sa Brooklyn nga miduaw kanila! Gipabilhan ko ang daghan kaayong mga panumdoman sa paghimamat sa minahal nga mga igsoon nga masibotong nagahatag ug kusog nga singgit sa pagdayeg ngadto kang Jehova.

Malinawon Uban sa Katawhan sa Diyos

Bisan tuod ang akong yutang natawhan mao ang Australia, nakakat-on ako sa pagmahal sa mga tawo bisan asa ako gipadala sa organisasyon ni Jehova. Mao kanay akong gibati sa Hapon, ug karon nga ania na ko sa Tinipong Bansa sulod sa kapin sa 25 ka tuig, mao usab kanay akong gibati dinhi. Sa pagkamatay sa akong bana, wala ko maghunahuna nga mobalik sa Australia, kondili magpabilin sa Brooklyn Bethel, diin ako giasayn ni Jehova.

Ako karon nag-edad na ug mga 80 anyos. Human sa 61 ka tuig sa bug-os-panahong ministeryo, andam gihapon kong moalagad kang Jehova bisan asa nga makita niyang angay akong mag-alagad. Sa pagkatinuod giatiman niya ako pag-ayo. Akong gipabilhan ang kapin sa 57 ka tuig nga nianang panahona nakaarang ako sa pagpakig-ambit sa akong kinabuhi uban sa usa ka minahal nga kapikas nga nahigugma kang Jehova. Masaligon ako sa padayong pagpanalangin ni Jehova kanamo, ug ako nahibalo nga dili Siya malimot sa among gibuhat ug sa gugma nga among gipakita alang sa iyang ngalan.—Hebreohanon 6:10.

[Footnote]

[Hulagway sa panid 25]

Uban kang mama sa 1956

[Hulagway sa panid 26]

Uban kang Lloyd ug sa usa ka grupo sa Hapones nga mga magmamantala sa unang bahin sa katuigang 1950

[Mga hulagway sa panid 26]

Uban sa akong unang gitun-an sa Bibliya sa Hapon, si Miyo Takagi, sa unang bahin sa katuigang 1950 ug sa 1999

[Hulagway sa panid 28]

Uban kang Lloyd diha sa buluhatong pagpanagtag ug magasin sa Hapon