Kon Unsaon Pagbuntog sa Negatibong mga Pagbati

● Si Asap mimulo: “Kawang lamang gayod nga gihinloan ko ang akong kasingkasing ug gihunawan ko ang akong mga kamot sa pagkainosente. Ug ako gihampak sa tibuok nga adlaw, ug ako gitul-id sa matag buntag.”—Salmo 73:13, 14.

● Si Baruk miagulo: “Alaot ako karon, kay si Jehova nagdugang ug kaguol sa akong kasakit! Ako naluya tungod sa akong pagpanghupaw, ug walay dapit-pahulayan nga akong nakaplagan.”—Jeremias 45:3.

● Si Noemi mibakho: “Ang Labing Gamhanan naghimong mapait kaayo alang kanako. Tugob ako sa akong paggikan, ug walay dala sa dihang gipapauli ako ni Jehova. Nganong tawgon ninyo ako ug Noemi, nga si Jehova man ang nagpaubos kanako ug ang Labing Gamhanan ang nagpahinabo ug katalagman kanako?”—Ruth 1:20, 21.

ANG Bibliya naundan sa daghang panig-ingnan sa matinumanong mga magsisimba ni Jehova nga usahay malumsan sa mga pagbati sa pagkaluya sa buot. Ang matuod mao nga ingong dili hingpit nga mga tawo ang tanan kanato sa popanahon makasinati sa maong mga pagbati. Ang pipila kanato hayan mas daling mobatig pagkaluya sa buot—tingali mobati pa ganig pagkaluoy sa kaugalingon—kay sa uban tungod kay nakasinati ug makapasubong mga kasinatian.

Apan, kon dili makontrolar, kini nga mga emosyon makadaot sa atong relasyon sa uban ug kang Jehova nga Diyos. Usa ka Kristohanong babaye nga daling mobatig pagkaluoy sa kaugalingon miadmitir: “Gibalibaran ko ang daghang pagdapit alang sa sosyal nga mga kalihokan tungod kay akong gibati nga ako dili takos nga kauban alang niadtong anaa sa kongregasyon.” Pagkamalaglagon sa epekto nianang mga pagbatia sa kinabuhi sa usa ka tawo! Unsay imong buhaton aron sa pagbuntog niini?

Duol Kang Jehova

Sa Salmo 73, prangkang misulat si Asap bahin sa iyang kalibog. Sa dihang gitandi ang iyang kahimtang sa mauswagong kinabuhi sa mga daotan, siya nasina. Siya nakamatikod nga ang mga dili-diyosnon mapahitas-on ug mabangis, ug sila daw nakaipsot sa silot. Unya gipahayag ni Asap ang iyang mga pagduhaduha bahin sa kahinungdanon sa iyang pagsunod sa usa ka matul-id nga paagi sa kinabuhi.—Salmo 73:3-9, 13, 14.

Ikaw ba, sama kang Asap, nakamatikod sa dayag nga kalamposan sa daotan kinsa nagpasigarbo sa ilang daotang buhat? Giunsa pagbuntog ni Asap ang iyang negatibong mga pagbati? Siya nagpadayon: “Nagpadayon ako sa paghunahuna aron mahibaloan kini; kasamok kini sa akong mga mata, hangtod nga misulod ako sa dakong sangtuwaryo sa Diyos. Buot kong hisayran ang ilang kaugmaon.” (Salmo 73:16, 17) Si Asap mihimog positibong mga lakang pinaagi sa pagdangop kang Jehova sa pag-ampo. Sumala sa mga pulong nga gigamit sa ulahi ni apostol Pablo, gibuntog ni Asap ang iyang “pisikal nga pagkatawo” pinaagi sa pagpukaw sa “espirituwal nga pagkatawo” sa iyang kahiladman. Kay nabalikan sa espirituwal nga panglantaw, nasabtan niya nga gidumtan ni Jehova ang pagkadaotan ug nga sa gitakdang panahon ang daotan pagasilotan.—1 Corinto 2:14, 15.

Pagkahinungdanon gayod nga tugotan nimong ang Bibliya motabang kanimo sa pagsentro sa imong pagtagad sa katinuoran sa kinabuhi! Si Jehova nagpahinumdom kanato nga siya wala magpakabuta  kon unsay ginabuhat sa daotang mga tawo. Ang Bibliya nagtudlo kanato: “Ayaw pagpahisalaag: Ang Diyos dili kayagayagaan. Kay bisan unsay ginapugas sa usa ka tawo, kini usab iyang anihon . . . Busa dili kita mohunong sa pagbuhat ug maayo.” (Galacia 6:7-9) Ibutang ni Jehova ang mga daotan “sa madanglog nga dapit”; sila iyang “pukanon ngadto sa kalaglagan.” (Salmo 73:18) Ang hustisya sa Diyos mao ang modaog kanunay sa kataposan.

Ang mapinadayonong programa sa espirituwal nga pagpakaon diha sa lamesa ni Jehova ug ang makapahimsog nga asosasyon uban sa katawhan sa Diyos motabang kanimo sa pagpalig-on sa imong pagtuo ug sa pagbuntog sa pagkaluya sa buot o sa uban pang negatibong mga pagbati. (Hebreohanon 10:25) Sama kang Asap, pinaagi sa pagpabiling suod sa Diyos, masinati nimo ang iyang mahigugmaong pagpaluyo. Si Asap nagpadayon: “Apan ako nagauban kanunay kanimo; gikuptan mo ang akong tuong kamot. Pinaagi sa imong tambag pagatultolan mo ako, ug sa ulahi dad-on mo ako sa himaya.” (Salmo 73:23, 24) Usa ka Kristohanong babaye nga giabusohan sa bata pa nakakat-on sa kaalam niini nga mga pulong. “Ang kanunayng suod nga pagpakig-uban sa kongregasyon,” siya miingon, “nagpakita kanako sa lain pang punto de bista sa kinabuhi. Tataw kaayo nga akong nakita nga ang Kristohanong mga ansiyano mahigugmaon, nga sila dili mga polis kondili mga magbalantay.” Oo, ang mabinationg Kristohanong mga ansiyano nagadulag hinungdanong papel sa paghanaw sa makadaot nga mga emosyon.—Isaias 32:1, 2; 1 Tesalonica 2:7, 8.

Dawata ang Tambag ni Jehova

Si Baruk, ang sekretaryo ni propetang Jeremias, nagbakho tungod sa emosyonal nga kapit-os bahin sa iyang asaynment. Hinunoa, si Jehova malulutong nagpasentro sa pagtagad ni Baruk sa tinuod nga butang. “‘Apan kon bahin kanimo, ikaw nagpadayon sa pagtinguha ug dagkong mga butang alang sa imong kaugalingon. Ayaw pagpadayon sa pagtinguha. Kay ania, ako magadala ug katalagman diha sa tanang unod,’ mao ang giingon ni Jehova, ‘ug ihatag ko kanimo ingon nga inagaw ang imong kalag sa tanang dapit nga imong adtoan.’”—Jeremias 45:2-5.

Pinaagi sa prangkang mga pulong gipatin-aw ni Jehova nga ang kaugalingong hinakog nga mga pangagpas ni Baruk mao ang hinungdan sa iyang kahigawad. Si Baruk dili makakaplag ug kalipay sa iyang hinatag-Diyos nga asaynment kon sa samang higayon nagtinguha ug dagkong mga butang alang sa iyang kaugalingon. Ikaw usab mahimong makakaplag nga ang labing epektibong lakang aron mabuntog ang pagkaluya sa buot mao ang paglikay sa mga kabaldahan ug ang pagbaton sa kalinaw sa hunahuna nga nagagikan sa diyosnong pagkakontento.—Filipos 4:6, 7.

Didto sa Moab wala tugoti sa nabalong si Noemi nga ilain niya ang iyang kaugalingon tungod sa kagul-anan sa dihang namatay ang iyang bana ug ang iyang duha ka anak. Hinunoa, dihay higayon nga sa makadiyot siya adunay mapait nga mga pagbati bahin sa iyang kaugalingon ug sa iyang duha ka umagad nga babaye. Sa iyang pagpagikan kanila, si Noemi miingon: “Mapait kaayo  kini alang kanako tungod kaninyo, nga ang kamot ni Jehova gibakyaw batok kanako.” Sa makausa pa, sa nakaabot na siya sa Betlehem, siya miinsistir: “Ayaw ako tawga ug Noemi [“Akong Kahimut-anan”]. Tawga ako ug Mara [“Mapait”], kay ang Labing Gamhanan naghimong mapait kaayo alang kanako.”—Ruth 1:13, 20.

Apan, wala ilain ni Noemi ang iyang kaugalingon diha sa mga tolda sa pagbangotan—nga layo kang Jehova ug sa iyang katawhan. Sa Moab siya nakadungog nga “si Jehova nagliso sa iyang pagtagad ngadto sa iyang katawhan pinaagi sa paghatag kanila ug tinapay.” (Ruth 1:6) Siya nakasabot nga ang labing maayong dapit alang kaniya mao ang pagpakig-uban sa katawhan ni Jehova. Uban sa iyang umagad nga si Ruth, si Noemi mipauli sa Juda human niadto ug mahanasong naggiya kang Ruth kon sa unsang paagi siya makiglabot sa ilang partidong si Boaz, ang iyang manlulukat.

Susama karong adlawa, ang mga maunongon nga nawad-an sa ilang kapikas diha sa kamatayon malamposong nagsagubang sa emosyonal nga kapit-osan pinaagi sa pagpadayong puliki sulod sa Kristohanong kongregasyon. Sama kang Noemi, sila padayong nagmakugihon sa espirituwal nga mga butang, nga nagabasa sa Pulong sa Diyos matag adlaw.

Mga Kaayohang Makuha sa Pagpadapat sa Diyosnong Kaalam

Kining maong mga asoy sa Bibliya nagtaganag hait nga salabotan kon unsaon sa usa ka tawo pagsagubang ang mga epekto sa negatibong mga pagbati. Si Asap nangayog tabang sa sangtuwaryo ni Jehova ug mapailobong naghulat kang Jehova. Si Baruk misanong sa tambag ug milikay sa materyalistikong mga kabaldahan. Si Noemi nagpadayong aktibo uban sa katawhan ni Jehova, nga nag-andam sa batan-ong si Ruth alang sa iyang mga pribilehiyo sa pagsimba sa matuod nga Diyos.—1 Corinto 4:7; Galacia 5:26; 6:4.

Mabuntog nimo ang pagkaluya sa buot ug ang uban pang negatibong mga pagbati pinaagi sa pagpamalandong sa mga kadaogan ni Jehova nga iyang gihatag sa iyang katawhan, sa matag indibiduwal ug sa kinatibuk-an. Tungod niana, palandonga ang kinalabwang buhat sa gugma ni Jehova sa pagtagana sa lukat alang kanimo. Pabilhi ang tiunay nga gugma sa Kristohanong panag-igsoonay. Isentro ang imong kinabuhi sa bag-ong kalibotan sa Diyos nga anaa na lamang sa unahan. Ug hinaot ikaw mosanong sama kang Asap: “Bahin kanako, ang pagduol sa Diyos maayo alang kanako. Ang Soberanong Ginoong Jehova gihimo ko nga akong dalangpanan, aron ipahayag ang tanan mong mga buhat.”—Salmo 73:28.