Tagda ang Katingalahang mga Buhat sa Diyos

“Daghang butang ang imong nabuhat, Oh Jehova nga Diyos ko, bisan ang imong katingalahang mga buhat ug ang imong mga hunahuna nganhi kanamo; walay mausa nga ikatandi kanimo.”—SALMO 40:5.

1, 2. Kita adunay unsang ebidensiya sa katingalahang mga buhat sa Diyos, ug angayng makapukaw kini kanato sa pagbuhat ug unsa?

 KON magbasa ka ug Bibliya, masabtan nimo dayon nga ang Diyos naghimog katingalahang mga butang alang sa iyang katawhan sa kakaraanan, ang Israel. (Josue 3:5; Salmo 106:7, 21, 22) Bisag si Jehova sa pagkakaron wala mosalga sa tawhanong mga kalihokan sama sa iyang gihimo sa Israel, kita makakita sa atong palibot ug daghang pamatuod sa iyang katingalahang mga buhat. Busa kita dunay katarongan sa pagduyog sa salmista sa pag-ingon: “Pagkadaghan sa imong mga buhat, Oh Jehova! Sa kaalam gibuhat mo silang tanan. Ang yuta napuno sa imong mga binuhat.”—Salmo 104:24; 148:1-5.

² Daghan karon wala magtagad o dili motuo niining klarong ebidensiya sa mga kalihokan sa Maglalalang. (Roma 1:20) Apan, mapuslanon ug angay natong palandongon kining maong mga buhat ug  mohimog mga konklusyon may kalabotan sa atong baroganan ug katungdanan ngadto sa atong Magbubuhat. Ang Job mga kapitulo 38 ngadto sa 41 maoy maayong giya alang niini, kay dinha si Jehova nagkuha sa pagtagad ni Job labot sa pipila ka bahin sa Iyang katingalahang mga buhat. Tagda ang pipila ka makataronganong mga isyu nga gipatungha sa Diyos.

Gamhanan ug Katingalahang mga Buhat

3. Sumala sa narekord diha sa Job 38:22, 23, 25-29, ang Diyos nangutana ug unsang mga butang?

³ Sa usa ka higayon, gipangutana sa Diyos si Job: “Nakasulod ka na ba sa mga balay-tipiganan sa niyebe, o imo bang nakita bisan ang mga balay-tipiganan sa ulan nga yelo, nga akong gipugngan una alang sa panahon sa kasakit, alang sa adlaw sa panag-away ug sa gubat?” Diha sa daghang bahin sa atong yuta, ang niyebe ug ulan nga yelo maoy bahin na sa kinabuhi. Ang Diyos nagpadayon: ‘Kinsa ba ang naghimo ug usa ka agianan alang sa baha ug usa ka dalan alang sa dag-om sa bagyo nga inubanan ug dalugdog, aron sa pagpaulan niini sa yuta nga walay tawo, diha sa kamingawan nga walay yutan-ong tawo, aron sa pagtagbaw sa gihampak-sa-bagyo ug biniyaan nga mga dapit ug aron sa pagpatubo sa linghod nga balili? May amahan ba ang ulan, o kinsa ba ang nag-anak sa mga tinulo sa yamog? Gikan kang kinsa bang tiyan migula ang yelo, ug kon bahin sa nanibuok nga tun-og sa langit, kinsa man gayod ang nanganak niini?’—Job 38:22, 23, 25-29.

4-6. Sa unsang diwa kulang ang kahibalo sa tawo bahin sa niyebe?

⁴ Ang uban nga nagpuyo sa puliki kaayong katilingban ug kinahanglang mobiyahe tingali maghunahuna nga problema ang niyebe. Apan, gilantaw sa daghan pang uban ang niyebe nga makahatag ug kalipay, nga nagapatungha ug usa ka maanindot nga tugnawng lugar nga nagahatag ug kahigayonan alang sa talagsaong mga kalihokan. Sa maghunahuna sa pangutana sa Diyos, nahibalo ka ba gayod kon unsa ang niyebe, bisan sa hitsura niini? Aw, nahibalo kita kon unsay hitsura sa pundok sa niyebe, tingali tungod kay nakakita na ug mga letrato sa mga bungtodbungtod sa niyebe o tungod kay nakakita na kita mismo ug daghan kaayong niyebe. Apan komosta ang tagsatagsa ka snowflake o tipik sa niyebe? Nakakita ka na ba kon unsay hitsura niini, tingali nakakita mismo diha sa tuboran niini?

⁵ Gitun-an ug giletratohan kini sa pipila ka tawo sa daghan nang katuigan. Ang usa ka snowflake tingali dunay ginatos ka gigming daling madugmok nga mga kristal nga yelo nga may lainlaing matahom nga mga disenyo. Ang librong Atmosphere nag-ingon: “Dugay nang nahibaloan nga walay kinutoban ang disenyo sa mga snowflake, ug bisan pag ang mga siyentipiko moinsistir nga walay balaod sa kinaiyahan ang nagdili nga kini magdoblehay ug disenyo, wala pa gayoy nakit-an sukad nga dunay duha ka snowflake nga pareho ug disenyo. Usa ka talagsaong panukiduki nga gihimo ni . . . Wilson A. Bentley, kinsa nakagugol ug kapin sa 40 ka tuig nga nagtuki ug nagletrato sa mga snowflake pinaagig mikroskopyo, wala makakitag duha ka snowflake nga pareho gayod.” Ug bisan pa kon, sa talagsaong kahimtang, managsama kini ug disenyo, makausab ba gayod kana sa pagkakatingalahan sa panagkadaiya sa disenyo sa mga snowflake?

⁶ Hinumdomi ang pangutana sa Diyos: “Nakasulod ka na ba sa mga balay-tipiganan sa niyebe?” Daghan ang naghunahuna nga ang mga panganod mao ang mga pondohanan sa niyebe. Mahanduraw mo ba ang imong kaugalingon nga miadto sa mga pondohanan niini aron susihon ang walay kinutobang disenyo sa mga snowflake ug nagtuon kon sa unsang paagi kini nanungha? Usa ka ensiklopedia sa siyensiya nag-ingon: “Wala gihapon matugkad ang kinaiyahan ug gigikanan sa uyok sa niyebe nga gikinahanglan aron moyelo ang mga tulo sa panganod sa temperatura nga mga -40°F (-40°C).”—Salmo 147:16, 17; Isaias 55:9, 10.

7. Unsa ka matukion ang kahibalo sa tawo bahin sa ulan?

⁷ O komosta ang ulan? Gipangutana sa Diyos si Job: “Aduna bay amahan ang ulan, o kinsay nanganak sa mga tulo sa yamog?” Ang mao gihapon nga ensiklopedia sa siyensiya nag-ingon: “Tungod sa kakomplikado sa mga paglihok sa atmospera ug sa pagbag-obag-o sa alisngaw ug elemento sa hangin, morag imposible nga makahimo ug usa ka detalyado, pangatibuk-ang  teoriya kon sa unsang paagi mougmad ang mga panganod ug ulan.” Sa simpleng mga pulong, ang mga siyentipiko naghatag ug detalyadong mga teoriya, apan dili gayod sila bug-os makapatin-aw bahin sa ulan. Bisan pa, nahibalo ka nga hinungdanon ang pagtulo sa ulan, nga maghatag ug tubig sa yuta, magpabuhi sa mga tanom, maghimo sa kinabuhi nga posible ug makapalipay.

8. Nganong ang mga pulong ni Pablo nga narekord diha sa Buhat 14:17 nahiangay?

⁸ Dili ka ba mouyon sa konklusyon ni apostol Pablo? Iyang giawhag ang uban sa pagtan-aw niining katingalahang mga buhat nga pamatuod bahin sa Usa nga naghimo niini. Si Pablo miingon bahin kang Jehova nga Diyos: ‘Wala niya itugot nga dili kapanghimatud-an ang iyang kaugalingon sanglit gibuhat man niya ang maayo, nga naghatag kaninyog ulan gikan sa langit ug mabungahong mga panahon, nga nagbuhong sa inyong mga kasingkasing sa pagkaon ug sa kalipay.’—Buhat 14:17; Salmo 147:8.

9. Sa unsang paagi ang katingalahang mga buhat sa Diyos nagpasundayag sa iyang dakong gahom?

⁹ Walay duhaduha nga ang Magbubuhat niining katingalahan ug mapuslanong mga buhat dunay walay-kinutoban nga kaalam ug dako kaayong gahom. Mahitungod sa iyang gahom, hunahunaa kini: Ginaingon nga mga 45,000 ka dalugdog ug kilat ang mahitabo kada adlaw, kapin sa 16 milyones kada tuig. Kini nagpasabot nga mga 2,000 ka dalugdog ug kilat ang nahitabo niining gutloa mismo. Ang komplikadong mga panganod sa usa ka pagdalugdog ug pagkilat mopagawas ug enerhiya nga katumbas sa kusog sa napulo o kapin pang bombang nukleyar nga gihulog panahon sa Gubat sa Kalibotan II. Makita nimo ang pipila niini nga enerhiya ingong kilat. Gawas nga katingalahan, ang kilat makatabang sa paggamag mga porma sa nitroheno nga makaabot sa yuta, nga suphon sa mga tanom ingong natural nga abono. Busa ang kilat maoy usa ka enerhiya nga gipasundayag, ug kini makahatag usab ug tinuod nga mga kaayohan.—Salmo 104:14, 15.

Unsay Imong Konklusyon?

10. Unsaon nimo pagtubag ang mga pangutana nga makita diha sa Job 38:33-38?

¹⁰ Handurawa ang imong kaugalingon nga anaa sa dapit ni Job, nga gipangutana sa Labing Makagagahom nga Diyos. Tingali mouyon ka nga ang  kadaghanang tawo dili magtagad sa katingalahang mga buhat sa Diyos. Gipangutana kita ni Jehova sa mga pangutana nga atong mabasa sa Job 38:33-38. ‘Nakahibalo ka ba sa mga lagda sa kalangitan, o ikabutang mo ba ang awtoridad niini diha sa yuta? Makapatugbaw ka ba sa imong tingog ngadto sa panganod, aron ang bul-og sa tubig makatabon kanimo? Makasugo ka ba sa mga kilat aron sila manglakaw ug moingon kanimo, “Ania kami!”? Kinsay nagbutang ug kaalam sa mga lut-od sa panganod, o kinsay naghatag ug pagsabot sa katingad-anang butang sa langit? Kinsay tukmang makaihap sa mga panganod pinaagi sa kaalam, o ang mga banga sa langit—kinsay makayabo niini, sa dihang ang abog mibubo ingong tinunaw nga masa, ug ang mga bugon sa yuta managtapot?’

11, 12. Unsa ang pipila ka butang nga nagpamatuod nga ang Diyos mao ang Magbubuhat sa katingalahang mga buhat?

¹¹ Nahisgotan na nato ang pipila lamang ka punto nga gipatugbaw ni Elihu kang Job, ug kita nakamatikod ug pipila ka pangutana nga gipatubag ni Jehova si Job “ingon sa usa ka tawo nga lig-on ug lawas.” (Job 38:3) Moingon kita ug “pipila” lamang tungod kay diha sa mga kapitulo 38 ug 39, gipasiugda sa Diyos ang lain pang hinungdanong mga bahin sa kalalangan. Pananglitan, siya naghisgot sa mga konstelasyon sa langit. Kinsay nahibalo sa ilang tanang balaod, o mga kasugoan? (Job 38:31-33) Gihisgotan ni Jehova kang Job ang pipila ka mananap—ang leyon ug ang uwak, ang kanding ug ang sebra, ang ihalas nga torong baka ug ang ostrich, ang kusgang kabayo ug ang agila. Sa ato pa, gipangutana sa Diyos si Job kon siya ba ang naghatag sa mga kinaiya niining nagkalainlaing mga mananap, nga nagtugot kanila nga mabuhi ug mosanay. Lagmit malingaw ka sa pagtuon niining mga kapituloha, ilabina kon mahigugmaon ka ug kabayo o ubang mga mananap.—Salmo 50:10, 11.

¹² Mahimo nimong susihon usab ang Job mga kapitulo 40 ug 41, diin gipatubag na usab ni Jehova si Job sa mga pangutana bahin sa duha ka partikular nga mga linalang. Atong masabtan nga ang gihisgotan dinhi mao ang hipopotamus (Behemot), nga labihan ka dako ug kusgan kaayog lawas, ug ang makahahadlok nga buaya sa Nilo (Leviatan). Ang matag usa maoy usa ka katingalahan sa kalalangan nga takos natong tagdon. Ato karong tan-awon kon unsay angay natong mga konklusyon.

13. Unsay epekto diha kang Job ang pagpangutana sa Diyos, ug sa unsang paagi kining mga butanga makaapektar kanato?

¹³ Ang Job kapitulo 42 nagpakita kanato kon unsay epekto sa pagpangutana sa Diyos kang Job. Sayo pa niini si Job sobra ra kaayong nakahatag ug pagtagad sa iyang kaugalingon ug sa uban. Apan human makadawat ug pagbadlong nga gipadayag diha sa mga pangutana sa Diyos, gibag-o ni Job ang iyang panghunahuna. Siya miangkon: ‘Nahibaloan ko nga ikaw [Jehova] makaarang sa paghimo sa tanang butang, ug walay laraw nga dili nimo makab-ot. “Kinsa ba kining naglubog sa tambag nga walay kahibalo?” Busa ako misulti, apan dili nako masabtan ang mga butang nga katingalahan kaayo alang kanako, nga wala nako mahibaloi.’ (Job 42:2, 3) Oo, human sa paghatag ug pagtagad sa mga buhat sa Diyos, si Job miingon nga kining mga butanga katingalahan kaayo alang kaniya. Human sa paghisgot niining mga katingalahan sa kalalangan, kita angayng mapukaw usab sa pagdayeg sa dakong kaalam ug gahom sa Diyos. Alang sa unsang katuyoan? Aron mapukaw ba lamang sa pagdayeg sa dakong gahom ug katakos ni Jehova? O angay bang mapukaw kita sa pagbuhat ug labaw pa niana?

14. Sa unsang paagi si David misanong sa katingalahang mga buhat sa Diyos?

¹⁴ Buweno, diha sa Salmo 86, kita makakita ug susamang mga ekspresyon nga gipamulong ni David, kinsa diha sa unang bahin sa salmo miingon: “Ang kalangitan nagapahayag sa himaya sa Diyos; ug ang kawanangan nagasaysay sa buhat sa iyang mga kamot. Ang matag adlaw nagapahayag ug mga pulong, ug ang matag gabii nagapadayag ug kahibalo.” (Salmo 19:1, 2) Ug si David mipadayon. Diha sa Salmo 86:10, 11, atong mabasa: “Kay ikaw dako ug nagabuhat sa katingalahang mga butang; ikaw ang Diyos, ikaw lamang. Oh Jehova, tudloi ako mahitungod sa imong dalan. Ako magalakaw sa imong kamatuoran. Bug-osa ang akong kasingkasing sa pagkahadlok sa imong ngalan.” Ang kataha ni David sa Maglalalang tungod sa Iyang tanang katingalahang mga buhat naglakip sa nahiangayng sukod sa matinahurong kahadlok. Imong masabtan kon ngano. Dili buot ni David nga mapukaw sa kasuko ang Usa nga makahimo niining katingalahang mga buhat. Dili usab nato siya angay pasuk-on.

15. Nganong ang matahaong kahadlok ni David sa Diyos nahiangay?

¹⁵ Lagmit nakaamgo si David nga sanglit ang Diyos dunay dako kaayong gahom nga kontrolado niya, iyang magamit kining gahoma batok kang bisan kinsa nga dili takos sa iyang kahimuot. Alang kanila, usa kini ka makuyaw nga tilimad-on. Gipangutana sa Diyos si Job: “Nakasulod ka na ba sa mga pondohanan sa niyebe, o imo bang nakita bisan ang mga tipiganan sa ulan nga yelo, nga akong  gipugngan una alang sa panahon sa kasamok, alang sa adlaw sa panag-away ug sa gubat?” Ang niyebe, ulan nga yelo, bagyo, hangin, ug kilat mahimong matawag nato nga iyang mga hinagiban. Ug pagkamakalilisang ang gahom niining maong mga puwersa sa kinaiyahan!—Job 38:22, 23.

16, 17. Unsay nag-ilustrar sa paggamit sa Diyos sa katingalahang gahom, ug giunsa niya paggamit kining gahoma sa una?

¹⁶ Tingali makahinumdom ka ug pipila ka katalagman nga nahitabo sa imong lugar nga gipahinabo sa usa niini—usa ka bagyo, unos, urakan, ulan nga yelo, o kalit nga pagbaha. Agig ilustrasyon, sa naghinapos ang tuig 1999, usa ka dakong bagyo mihampak sa habagatan-kasadpang Uropa. Bisan ang mga eksperto sa panahon nakurat niini. Ang kusog nga hangin miabot ug 200 kilometros por ora nga nakalangkat sa libolibong atop, nakatumba sa mga poste sa koryente, ug nakapabalintong sa mga trak. Handurawa kini: Giluka ug gibali sa bagyo ang duolan sa 270 ka milyong kahoy, 10,000 diha lamang sa parke sa Versailles, sa gawas sa Paris. Minilyong balay ang nawad-an ug koryente. Hapit 100 ang nangamatay. Kanang tanan nahitabo sa makadiyot nga pag-agi sa bagyo. Pagkagrabe nga puwersa!

¹⁷ Tingali may motawag niini ingong mga bagyong dili-normal, dili-pinugngan, dili-makontrolar nga mga hitabo. Apan, unsa kaha ang mahitabo kon ang gamhanan kaayong Usa mohimog katingalahang mga buhat pinaagi sa paggamit niini nga mga puwersa diha sa kontrolado, pinugngan nga paagi? Gihimo niya ang susama niini sa panahon ni Abraham, kinsa nakaamgo nga ang Maghuhukom sa tibuok yuta nakatimbang na sa pagkadaotan sa duha ka siyudad, ang Sodoma ug Gomora. Grabe kaayo sila ka daotan nga ang mga pagtuaw sa pagreklamo batok kanila nakaabot sa Diyos, kinsa mitabang sa tanang matarong nga makalingkawas gikan sa gihukman na nga mga siyudad. Ang kasaysayan nagtaho: “Unya si Jehova nagpaulan ug asupre ug kalayo gikan kang Jehova, gikan sa mga langit,” diha niadtong mga siyudara. Usa kadto ka katingalahang buhat, giluwas ang mga matarong ug gilaglag ang wala nay paglaom nga mga daotan.—Genesis 19:24.

18. Unsang katingalahang mga butang ang gihisgotan sa Isaias kapitulo 25?

¹⁸ Sa ulahi nga panahon, ang Diyos nagpakanaog ug hudisyal nga hukom batok sa karaang siyudad sa Babilonya, nga tingali maoy gihisgotang siyudad diha sa Isaias kapitulo 25. Ang Diyos nagtagna nga dunay usa ka siyudad nga mahimong usa ka kagun-oban: “Imong gihimo ang usa ka siyudad ingong tapok sa mga bato, ang usa ka kinutaang lungsod ingong kagun-oban, ang usa ka puloy-anang torre sa mga estranyo nga dili na siyudad, nga dili tukoron pag-usab bisan hangtod sa panahong walay tino.” (Isaias 25:2) Ang mga dumuduaw karon sa lugar sa karaang Babilonya makaingon nga kini tinuod. Sulagma ba lamang ang pagkapukan sa Babilonya? Dili. Hinunoa, atong madawat ang pamanabana ni Isaias: “Oh Jehova, ikaw ang akong Diyos. Bayawon ko ikaw, dayegon ko ang imong ngalan, kay ikaw nakabuhat ug katingalahang mga butang, mga laraw sukad sa unang kapanahonan, sa pagkamatinumanon, sa pagkakasaligan.”—Isaias 25:1.

Katingalahang mga Buhat sa Umaabot

19, 20. Unsay atong mapaabot nga katumanan sa Isaias 25:6-8?

¹⁹ Gituman sa Diyos ang tagna sa itaas sa miagi, ug duna siyay himoon nga katingalahang buhat sa umaabot. Niini nga konteksto, diin si Isaias naghisgot sa “katingalahang mga butang” sa Diyos, kita makakita ug kasaligang tagna nga matuman pa sa umaabot, sama nga natuman ang paghukom diha sa Babilonya. Unsang ‘katingalahang butang’ ang gisaad? Ang Isaias 25:6 nag-ingon: “Si Jehova sa mga panon maghikay gayod alang sa tanang katawhan, niining bukira, ug usa ka bangkete sa mantikaon kaayo nga pagkaon, usa ka bangkete sa bino nga pinalugdang, sa mantikaon kaayo nga pagkaon nga puno sa utok sa bukog, sa bino nga pinalugdang, sinala.”

²⁰ Seguradong matuman kining tagnaa diha sa bag-ong kalibotan nga gisaad sa Diyos, nga anaa lamang sa atong unahan. Niana unyang panahona, ang katawhan mahaw-asan sa mga problema nga nagpabug-at sa daghan kaayo karon. Sa pagkatinuod,  ang tagna sa Isaias 25:7, 8 nagpasalig nga gamiton sa Diyos ang iyang gahom sa paglalang sa paghimog usa sa labing katingalahang mga buhat sa tanang panahon: “Iyang lamyon gayod ang kamatayon hangtod sa kahangtoran, ug ang Soberanong Ginoong Jehova tinong magpahid sa mga luha gikan sa tanang nawong. Ug ang kaulawan sa iyang katawhan iyang wagtangon gikan sa tibuok yuta, kay si Jehova maoy nagsulti niini.” Gikutlo ni apostol Pablo kanang tekstoha sa ulahi ug gipadapat kini sa pagbuhi pag-usab sa Diyos sa mga patay, pagbanhaw sa mga patay. Pagkakatingalahang buhat unya kana!—1 Corinto 15:51-54.

21. Unsang katingalahang mga buhat ang himoon sa Diyos alang sa mga patay?

²¹ Ang laing katarongan kon nganong wala na unyay mga luha sa kaguol maoy tungod kay wagtangon na ang pisikal nga mga sakit sa mga tawo. Sa dinhi pa si Jesus sa yuta, daghan ang iyang giayo—ang mga buta nakakita, ang mga bungol nakadungog, ang mga baldado napabaskog. Ang Juan 5:5-9 nag-asoy nga iyang giayo ang usa ka tawong bakol sulod sa 38 ka tuig. Ang mga nakakita niini nagtuo nga kini kahibulongan kaayo, o usa ka katingalahang buhat. Ug tinuod gayod! Apan, giingnan sila ni Jesus nga mas kahibulongan pa ang pagbanhaw sa mga patay: “Ayaw kahibulong niini, tungod kay ang takna nagsingabot nga ang tanan nga anaa sa handomanang mga lubnganan makadungog sa iyang tingog ug manggula, ang mga nagbuhat ug maayong mga butang ngadto sa pagkabanhaw sa kinabuhi.”—Juan 5:28, 29.

22. Nganong ang kabos ug ang sinakit makalantaw sa umaabot nga malaomon?

²² Seguradong mahitabo kini tungod kay si Jehova mao ang usa nga nagsaad niini. Makaseguro ka nga sa dihang gamiton ug mainampingong palihokon ang iyang dakong gahom sa pagpasig-uli, katingalahan gayod ang resulta. Ang Salmo 72 naghisgot kon unsay iyang pagahimoon pinaagi sa iyang Hari nga Anak. Dayon ang matarong molambo. Dagaya unya ang pakigdait. Luwason sa Diyos ang kabos ug ang nag-antos. Siya nagsaad: “Aduna unyay dagayang lugas sa ibabaw sa yuta; sa tumoy sa kabukiran adunay pagsugwak. Ang iyang bunga mahisama nianang sa [karaang] Lebanon, ug kadtong gikan sa siyudad molambo sama sa mga tanom sa yuta.”—Salmo 72:16.

23. Ang katingalahang mga buhat sa Diyos mopalihok kanato sa paghimog unsa?

²³ Tin-aw, kita adunay katarongan sa pagtagad sa tanang katingalahang mga buhat ni Jehova—kon unsay iyang nahimo sa una, kon unsay iyang ginahimo karon, ug kon unsay iyang himoon sa haduol nga umaabot. “Dalayegon si Jehova nga Diyos, ang Diyos sa Israel, nga mao lamang ang nagabuhat ug katingalahang mga buhat. Ug dalayegon ang iyang mahimayaong ngalan hangtod sa panahong walay tino, ug pagapun-on unta ang tibuok nga yuta sa iyang himaya. Amen ug Amen.” (Salmo 72:18, 19) Angay nga mao kanay atong ihisgot diha sa atong makapadasig nga panagsultihay uban sa mga paryente ug sa uban. Oo, atong “ipahayag sa taliwala sa kanasoran ang iyang himaya, ang iyang katingalahang mga buhat sa taliwala sa tanang mga katawhan.”—Salmo 78:3, 4; 96:3, 4.

Unsaon Nimo Pagtubag?

• Sa unsang paagi ang mga pangutana nga gisukna ngadto kang Job nagpasiugda sa kakulang sa tawhanong kahibalo?

• Unsang mga pananglitan sa katingalahang mga buhat sa Diyos nga gihisgotan diha sa Job mga kapitulo 37-41 ang nakapadasig kanimo?

• Unsay angay natong reaksiyon human nakatuon sa pipila sa katingalahang mga buhat sa Diyos?

[Mga Pangutana sa Pagtuon]

[Mga hulagway sa panid 10]

Unsay imong ikahinapos bahin sa pagkakatingalahan sa panagkadaiya sa disenyo sa mga snowflake ug sa katingalahang gahom sa kilat?

[Credit Line]

snowcrystals.net

[Mga hulagway sa panid 13]

Himoa nga ang katingalahang mga buhat sa Diyos mahimong bahin sa imong pagpakigsulti