Usa ka Tibuok-Kalibotang Asosasyon nga Nagatagad sa Usag Usa

KUTOB sa makita sa mata, adunay mga tawo. Daghan ang tigulang, ang pipila kanila baldado kaayo mao nga sila naglisod paglakaw. Adunay mga mabdos ug batan-ong mga magtiayon nga daladala ang gagmayng mga anak. Silang tanan maoy mga kagiw—mga lalaki, mga babaye, ug mga bata—nga gipugos sa sibil nga gubat, mga kinaiyanhong katalagman, o ubang mga kahimtang sa pagbiya sa ilang mga balay aron mangitag kadangpan sa usa ka silingang nasod. Sublisubling napugos ang pipila sa pagbiya sa ilang mga pinuy-anan. Sa unang ilhanan sa sibil nga kagubot o sa usa ka kinaiyanhong katalagman, kuhaon nila ang pipila ka gamit sa balay, tigomon ang ilang mga anak, ug mokalagiw paingon sa mas hilwas nga dangpanan. Unya, sa dihang ang mga kahimtang mobalik na sa normal, daghang kagiw ang mobalik aron tukoron pag-usab ang ilang mga pinuy-anan ug magsugod na usab.

Sa milabayng mga tuig, gibuksan sa Republika sa Sentral Aprika ang ilang mga utlanan alang sa mga kagiw gikan sa daghang nasod. Niining bag-o pa lamang, linibo sa mga tawo, lakip sa daghang Saksi ni Jehova, ang napugos sa pagkalagiw gikan sa nagusbat-sa-gubat nga Demokratikong Republika sa Congo ngadto sa medyo hilwas nga Republika sa Sentral Aprika.

Mga Igsoon Nangabot Aron Motabang

Giisip sa mga Saksi sa Republika sa Sentral Aprika nga usa ka pribilehiyo ang pag-organisar ug makitawhanong tabang. Giandam ang mga sak-anan alang sa nangabot nga Kristohanong mga igsoon. Sa sinugdanan, gitagana ang mga lawak sa pribadong mga balay, apan samtang nagkadaghan ang mga kagiw, nadayag nga gikinahanglan ang dugang igoigong mga kahikayan. Ang pipila ka Kingdom Hall gihimong mga dormitoryo. Ang lokal nga mga Saksi mitabang sa pag-instalar ug dugang nga mga suga, pagtaod ug mga tubo sa tubig, ug pagsemento sa mga salog aron komportableng kapuy-an sa mga mosaka didto. Ang kagiw nga mga igsoon mitabang sa lokal nga mga igsoon sa pagtrabaho aron tukoron kining temporaryong mga dormitoryo. Ang tibuok nga programa sa Kristohanong mga tigom gihikay sa pinulongang Lingala aron nga ang mga nangabot katagan-an ug nagahatag-kinabuhing espirituwal nga pagkaon. Ang suod nga pagtinabangay tali sa lokal nga mga Saksi ug sa ilang mga bisita nagpakita nga ang usa ka internasyonal nga panag-igsoonay tinuod nga naglungtad.

Ang kagiw nga mga pamilya dili kanunay magdungan sa pag-abot. Usahay, ang mga membro sa pamilya nga nahimulag magkauban pag-usab didto na sa ilang destinasyon. Usa ka listahan niadtong  hilwas nga nangabot ang gibatonan sa matag Kingdom Hall. Gihimo ang mga kahikayan sa pagpangita niadtong nawala pa. Ang sangang buhatan nga nagdumala sa buluhaton sa mga Saksi ni Jehova sa nasod nagpadalag tulo ka sakyanan matag adlaw sa pagtabang sa mga Saksi nga nagpaingon pa sa ilang mahimong dangpanan ug sa pagpangita ni bisan kinsang tingali nawala. Kini nga mga sakyanan mailhan pinaagi sa usa ka dakong karatula, nga mabasa “WATCH TOWER—Mga Saksi ni Jehova.”

Hunahunaa ang gibating kalipay sa usa ka grupo sa pito ka kagiw nga mga bata nga nahimulag sa ilang mga ginikanan sa dihang ilang nakita ang usa ka sakyanan nga gipanag-iya sa mga Saksi ni Jehova. Midagan dayon sila ngadto sa sakyanan ug nagpaila sa ilang kaugalingon nga mga Saksi. Gipasakay sila sa mga igsoon sa sakyanan ug gidala sila sa usa ka Kingdom Hall, diin sa kataposan ilang nakauban pag-usab ang ilang mga pamilya.

Unsay nagpaarang niining sinserong mga Kristohanon nga masagubang ang maong mga kahimtang, dili lamang sa makausa, kondili sa makadaghang higayon? Sila bug-os kombinsido nga kita nagpuyo sa kataposang mga adlaw sumala sa gitagna sa Balaang Kasulatan.—2 Timoteo 3:1-5; Pinadayag 6:3-8.

Busa, nasayod sila nga sa dili madugay si Jehova nga Diyos magtapos sa mga gubat, pagdumot, kapintasan, ug panag-away. Ang problema sa mga kagiw mahimo na unyang usa ka butang sa kagahapon. Sa kasamtangan, uyon sa tambag ni apostol Pablo sa 1 Corinto 12:14-26, ang mga Saksi ni Jehova nanglimbasog sa pagtagad sa usag usa. Bisan giulang pinaagig mga suba, mga utlanan, mga pinulongan, ug gilay-on, sila mabalak-on sa usag usa, mao nga sila alisto sa pagtabang sa dihang adunay nanginahanglan.—Santiago 1:22-27.

[Mapa sa panid 30]

(Alang sa aktuwal nga pagkahan-ay, tan-awa ang publikasyon)

APRIKA

Republika sa Sentral Aprika

Demokratikong Republika sa Congo

[Credit Line]

Mountain High Maps® Copyright © 1997 Digital Wisdom, Inc.

[Mga hulagway sa panid 30]

Tulo ka Kingdom Hall gihimong mga sentro nga dawatanan

[Hulagway sa panid 31]

Ang mga pasilidad sa kosina dihadiha nga gitukod

[Hulagway sa panid 31]

Daghan pa ang nangabot

[Mga hulagway sa panid 31]

Bag-o pang nangatawo apan mga kagiw na