Kon sa Unsang Paagi ang Pagkabalo Nakaapekto sa Duha ka Babaye

SI Sandra maoy usa ka balo nga nagpuyo sa Australia. Sa dihang namatay ang iyang bana pipila na ka tuig kanhi, ang dihadihang reaksiyon ni Sandra mao ang bug-os nga kahikurat. “Ang pagkaamgo nga kalit lang nawala kanako ang akong kapikas ug labing suod nga higala nakapahugno kanako. Wala na gayod ako mahinumdom kon giunsa ko paghiuli sa balay gikan sa ospital o kon unsa pay akong gibuhat niadtong adlawa. Sulod sa misunod nga pila ka semana, ang akong mga kahadlok nahimong makanunayong sakit sa lawas.”

Si Sandra adunay mas edarang higala, si Elaine, kinsa nabalo mga unom na ka tuig. Gialimahan ni Elaine ang iyang bana, si David, sulod sa unom ka bulan sa wala pa siya mamatay sa kanser. Hilabihan ang iyang kaguol nga wala madugay human sa kamatayon sa iyang bana, nakasinati siyag temporaryong pagkabuta. Duha ka tuig sa ulahi nakuyapan siya diha sa publiko. Ang iyang doktor walay nakaplagang timailhan sa balatian sa lawas. Apan, nadiskobrehan niya nga giluom lang diay ni Elaine ang iyang kaguol, busa gisugyotan niya siya nga mopauli una ug paningkamotan pag-ayo nga makahilak. “Gidangtan usag dugaydugay nga panahon una ko mabuntog ang akong kaguol,” miangkon si Elaine, nga midugang nga kon mingawon, “moadto ako sa lawak katulganan ug tabonan ko ang akong ulo sa mga sinina ni David.”

Tinuod, ang kamatayon sa usa ka minahal nga kapikas makapahinabo ug nagkalainlaing mga reaksiyon, kay ang pagkabalo naglangkit gayod ug labaw pa kay sa pagkinabuhi lamang nga walay bana. Pananglitan, gibati ni Sandra sulod sa usa ka yugto sa panahon nga nausab na ang iyang pagkatawo. Sama sa daghang bag-ong nangabalo, siya mibati usab nga daling masakitan, walay kasegurohan. Nahinumdom si Sandra: “Kay naanad na nga ang akong bana mao ang mohimo sa kataposang mga desisyon, sa kalit ako na lang karon ang mohimo sa maong mga desisyon. Natugaw ang akong pagkatulog. Gikapoy ug gibudlayan ako. Naglibog ko kon unsa gayoy buhaton.”

Adlaw-adlaw dunay mga eksperyensiya nga susama nianang kang Sandra ug Elaine. Ang sakit, mga aksidente, gubat, pagpuo sa kaliwat, ug kapintasan sa katibuk-an nakaamot sa nagatubong gidaghanon sa mga balo. a Daghan niining mga babayhana nag-antos lang sa hilom, nga wala masayod kon unsay buhaton. Unsay mahimo sa mga higala ug mga paryente sa pagtabang kanilang nagpasibo pa sa pagkabalo? Ang mosunod nga artikulo dunay pipila ka mga sugyot nga tingali makatabang.

[Footnote]