Magmalipayon Uban sa Malipayong Diyos

“Sa kataposan, mga igsoon, magpadayon sa pagmaya, . . . ug ang Diyos sa gugma ug sa kalinaw magauban kaninyo.”—2 CORINTO 13:11.

1, 2. (a) Nganong daghan ang nakulangan ug kalipay sa kinabuhi? (b) Unsa ang kalipay, ug sa unsang paagi nato maugmad kini?

 NIINING mangiob nga mga adlaw, daghang tawo ang diyutay rag makitang hinungdan sa pagmaya. Kon ang trahedya mahitabo kanila o sa ilang minahal, sila mobati tingali sama sa karaang si Job, kinsa miingon: “Ang tawo, nga natawo sa usa ka babaye, mubo ug kinabuhi ug tugob sa kasamok.” (Job 14:1) Ang mga Kristohanon maapektahan usab sa mga kapit-os ug mga kabug-at niining “makuyaw nga mga panahong lisod sagubangon,” ug dili ikatingala nga ang matinumanong mga alagad ni Jehova usahay mobatig kaluya sa buot.—2 Timoteo 3:1.

² Sa gihapon, ang mga Kristohanon mahimong magmalipayon, bisan ilalom sa pagsulay. (Buhat 5:40, 41) Aron masabtan kon sa unsang paagi posible kini, palandonga una kon unsa ang kalipay. Ang kalipay gihubit ingong “pagbati nga mapukaw tungod sa pagkabaton o pagdahom sa usa ka maayong butang.” a Busa, kon mogahin kitag panahon sa paghunahuna bahin sa atong nadawat nga mga panalangin karon samtang nagapalandong sa maayong mga butang nga nagpaabot kanato sa bag-ong kalibotan sa Diyos, kita magmalipayon.

3. Sa unsang diwa ikaingon nga ang tanan adunay labing menos pipila ka katarongan nga magmaya?

³ Ang tanan nakadawat ug pipila ka panalangin nga angayng pasalamatan. Ang usa ka ulo sa pamilya mawad-an tingali sa iyang trabaho. Siyempre, mabalaka siya. Buot niyang motagana alang sa iyang mga minahal. Bisan pa niana, kon siya lig-on sa pisikal ug maayog lawas, makapasalamat gihapon siya tungod niana. Kon makakita siyag trabaho, makatrabaho siya pag-ayo. Sa laing bahin, ang usa ka Kristohanong babaye gitakboyan tingali ug makapaluya nga sakit. Bisan pa niana, mahimong makapasalamat siya tungod sa pagpaluyo sa mahigugmaong mga higala ug mga membro sa pamilya kinsa motabang kaniya sa pagsagubang sa iyang sakit uban ang dignidad ug kaisog. Ug ang tanang matuod nga mga Kristohanon, bisan unsa pay ilang mga kahimtang, mahimong magmaya diha sa pribilehiyo nga nakaila kang Jehova, ang “malipayong Diyos,” ug kang Jesu-Kristo, ang “malipayon ug bugtong Magmamando.” (1 Timoteo 1:11; 6:15) Oo, si Jehova nga Diyos ug si Jesu-Kristo malipayon kaayo. Nahuptan nila ang ilang kalipay bisan pa sa kamatuoran nga ang mga kahimtang sa yuta lahi kaayo sa katuyoan ni Jehova sa sinugdan. Ang ilang panig-ingnan  dakog ikatudlo kanato kon unsaon paghupot ang atong kalipay.

Wala Gayod Sila Mawad-i sa Ilang Kalipay

4, 5. (a) Sa unsang paagi misanong si Jehova sa dihang ang unang mga tawo mirebelde? (b) Sa unsang paagi gihuptan ni Jehova ang positibong tinamdan ngadto sa mga tawo?

⁴ Sa tanaman sa Eden, si Adan ug Eva nakatagamtam ug hingpit nga panglawas ug hingpit nga hunahuna. Diha silay mabungahong buluhaton ug maanindot nga mga palibot nga himoon kana. Labaw sa tanan, nabatonan nila ang pribilehiyo nga regular nga makapakig-estorya kang Jehova. Katuyoan sa Diyos nga makatagamtam sila ug malipayong kaugmaon. Apan ang atong unang mga ginikanan wala matagbaw niining tanang maayong mga gasa; ilang gikawat ang gidili nga bunga gikan “sa kahoy sa kahibalo sa maayo ug daotan.” Kining masupilong buhat maoy nakaingon sa tanang kasubo nga naagoman nato karon, nga ilang mga kaliwat.—Genesis 2:15-17; 3:6; Roma 5:12.

⁵ Hinunoa, wala tugoti ni Jehova ang dili-mapasalamaton nga tinamdan ni Adan ug Eva nga mohikaw kaniya sa iyang kalipay. Siya masaligon nga ang kasingkasing sa labing menos pipila sa ilang mga anak matukmod sa pag-alagad kaniya. Sa pagkatinuod, masaligon kaayo siya nga bisan sa wala pa makapatungha si Adan ug Eva sa ilang unang anak, iyang gipahibalo ang iyang katuyoan nga lukaton ang ilang masinugtanong mga kaliwat! (Genesis 1:31; 3:15) Sa kasiglohan human niana, ang kinabag-an sa katawhan nagsubay sa mga tunob ni Adan ug Eva, apan wala isalikway ni Jehova ang tawhanong pamilya tungod nianang kaylap nga pagkamasupilon. Hinunoa, iyang gisentro ang iyang pagtagad diha sa mga lalaki ug babaye nga ‘nakapalipay sa iyang kasingkasing,’ kadtong naningkamot gayod sa pagpahimuot kaniya tungod kay sila nahigugma kaniya.—Proverbio 27:11; Hebreohanon 6:10.

6, 7. Unsay mitabang kang Jesus sa pagpabiling malipayon?

⁶ Komosta si Jesus—giunsa niya paghupot ang iyang kalipay? Ingong gamhanang espiritung linalang sa langit, nabatonan ni Jesus ang tanang kahigayonan nga makita ang mga kalihokan sa mga lalaki ug babaye sa yuta. Dayag ang ilang mga pagkadili-hingpit, bisan pa niana gihigugma sila ni Jesus. (Proverbio 8:31) Sa ulahi, sa dihang mianhi siya sa yuta ug aktuwal nga ‘mipuyo taliwala’ sa katawhan, ang iyang panglantaw sa tawo wala mausab. (Juan 1:14) Unsay nakapaarang sa hingpit nga Anak sa Diyos sa paghupot nianang positibong panglantaw sa makasasalang tawhanong pamilya?

⁷ Una sa tanan, si Jesus makataronganon sa iyang mga panahom sa iyang kaugalingon ug sa uban. Nahibalo siya nga dili niya madani ang kalibotan. (Mateo 10:32-39) Busa nagmaya siya sa dihang dunay bisan usa ka sinserong tawo nga maayog pagsanong sa mensahe sa Gingharian. Bisan tuod ang panggawi ug tinamdan sa iyang mga tinun-an usahay dili maayo, nahibalo si Jesus nga sa ilang kasingkasing buot gayod nilang mobuhat sa kabubut-on sa Diyos, ug gihigugma niya sila tungod niana. (Lucas 9:46; 22:24, 28-32, 60-62) Makahuloganon nga diha sa pag-ampo ngadto sa iyang langitnong Amahan, gisumaryo ni Jesus ang positibong paglihok sa iyang mga tinun-an hangtod nianang tungora: “Sila nagsunod sa imong pulong.”—Juan 17:6.

8. Nganli ang pipila ka paagi nga niana kita makasundog kang Jehova ug kang Jesus maylabot sa paghupot sa atong kalipay.

⁸ Sa walay duhaduha, kitang tanan makabenepisyo sa pagpalandong sa panig-ingnan nga gihatag ni Jehova nga Diyos ug ni Kristo Jesus niining bahina. Kita ba mas bug-os nga makasundog kang Jehova tingali pinaagi sa pagkahimong dili sobrang mabalak-on sa dihang ang mga butang dili mosangpot sumala sa atong gilaoman? Masunod ba nato pag-ayo ang mga lakang ni Jesus pinaagi sa paghupot ug positibong panglantaw sa atong mga kahimtang karon, maingon man sa pagkamakataronganon sa atong dahomon sa atong kaugalingon ug sa uban? Susihon nato kon sa unsang paagi ang pipila niining mga prinsipyoha ikapadapat sa praktikal nga paagi diha sa usa ka natad nga duol sa kasingkasing sa masibotong mga Kristohanon bisan asa—ang ministeryo sa kanataran.

Hupti ang Positibong Panglantaw sa Ministeryo

9. Sa unsang paagi nahibalik ang kalipay ni Jeremias, ug sa unsang paagi ang iyang panig-ingnan makatabang kanato?

⁹ Buot ni Jehova nga kita magmalipayon diha sa pag-alagad kaniya. Ang atong kalipay kinahanglang dili mag-agad sa mga resulta nga atong mabatonan. (Lucas 10:17, 20) Si propetang Jeremias misangyaw sulod sa daghang tuig  diha sa dili-mabungahon nga teritoryo. Sa dihang gihatagan niyag dakong pagtagad ang negatibong reaksiyon sa mga tawo, nawad-an siya sa iyang kalipay. (Jeremias 20:8) Apan sa dihang namalandong siya sa kaanindot sa mensahe mismo, nahibalik ang iyang kalipay. Miingon si Jeremias kang Jehova: “Ang imong mga pulong nakaplagan, ug akong gikaon kini; ug kanako ang imong pulong nahimong kasadya ug pagmaya sa akong kasingkasing; kay ako gitawag sa imong ngalan, Oh Jehova.” (Jeremias 15:16) Oo, si Jeremias nagmaya sa iyang pribilehiyo sa pagwali sa pulong sa Diyos. Kita usab mahimong magmaya.

10. Sa unsang paagi mapreserbar nato ang atong kalipay diha sa ministeryo bisan pag ang atong teritoryo sa pagkakaron dili mabungahon?

¹⁰ Bisan pag ang kinabag-an sa mga tawo dili mosanong sa maayong balita, duna gayod kitay hinungdan nga magmalipayon samtang kita nakigbahin sa ministeryo sa kanataran. Hinumdomi nga si Jehova dayag nga masaligon nga dunay pipila ka tawo nga matukmod sa pag-alagad kaniya. Sama kang Jehova, kinahanglang dili gayod kita mawad-ag paglaom nga labing menos ang pipila sa ngadtongadto makasabot sa isyu ug modawat sa mensahe sa Gingharian. Kinahanglang dili nato malimtan nga mausab ang mga kahimtang sa mga tawo. Sa dihang mag-atubang ug pipila ka wala-damhang kapildihan o kalisdanan, bisan ang labing tagbaw-sa-kaugalingon nga tawo magsugod tingali sa paghunahuna pag-ayo bahin sa kahulogan sa kinabuhi. Atua ka ba didto sa pagtabang sa dihang ang maong tawo mahimo nang ‘mahunahunaon sa iyang espirituwal nga panginahanglan’? (Mateo 5:3) Aw, duna tingaliy tawo diha sa imong teritoryo nga andam nang mamati sa maayong balita sa sunod higayon nga moduaw ka!

11, 12. Unsay nahitabo diha sa usa ka lungsod, ug unsay atong makat-onan gikan niana?

¹¹ Ang kahimtang sa atong teritoryo mahimong mabag-o usab. Tagda ang usa ka pananglitan. Sa usa ka gamayng lungsod, dihay nagpuyo nga usa ka magkasuod nga grupo sa batan-ong mga magtiayon nga dunay mga anak. Kada duaw sa mga Saksi ni Jehova, managsama ra ang reaksiyon diha sa matag pultahan, “Dili kami interesado!” Kon duna man ugaling magpakitag interes sa mensahe sa Gingharian, ang mga silingan dili magdugay sa pagpaluya sa buot sa maong tawo aron dili na makigkita sa mga Saksi. Dayag nga usa ka hagit ang pagwali didto. Bisan pa niana, ang mga Saksi wala molunga; nagsige gayod sila ug sangyaw. Unsay resulta?

¹² Ngadtongadto, daghan sa mga bata nianang maong lungsod nanagko, nangaminyo, ug namuyo didto. Kay nakaamgo nga ang ilang dalan sa kinabuhi wala moresulta sa tinuod nga kalipay, ang pipila niining mga hohamtong na nagsugod sa pagpangita sa kamatuoran. Nakaplagan nila kini sa dihang maayo ang ilang pagsanong sa maayong balita nga gimantala sa mga Saksi. Busa human sa daghang tuig, ang gamayng kongregasyon misugod pagtubo. Handurawa ang kalipay sa mga magmamantala sa Gingharian nga wala molunga! Hinaot ang pagkamalahutayon sa pagpakig-ambit sa mahimayaong mensahe sa Gingharian maglipay usab kanato!

Ang mga Isigkamagtutuo Mopaluyo Kanimo

13. Kang kinsa kita makadangop sa dihang maluya ang atong buot?

¹³ Sa dihang modaghan ang mga pagpit-os o sa dihang mohapak ang katalagman, asa ka man makadangop alang sa kahupayan? Milyonmilyong  dedikadong mga alagad ni Jehova ang modangop una kang Jehova diha sa pag-ampo, dayon sa ilang Kristohanong mga igsoong lalaki ug babaye. Samtang dinhi sa yuta, si Jesus mismo nagpabili sa pagpaluyo sa iyang mga tinun-an. Sa gabii una siya mamatay, gihisgotan niya sila ingong “mao ang nagpabilin kanako diha sa akong mga pagsulay.” (Lucas 22:28) Siyempre, kadtong maong mga tinun-an dili-hingpit, apan ang ilang pagkamaunongon nakapahupay sa Anak sa Diyos. Kita usab makakuhag kalig-on gikan sa mga isigkamagsisimba.

14, 15. Unsay nakatabang sa usa ka magtiayon sa pagsagubang sa kamatayon sa ilang anak nga lalaki, ug unsay imong makat-onan gikan sa ilang eksperyensiya?

¹⁴ Usa ka Kristohanong magtiayon nga ginganlag Michel ug Diane nakakat-on kon unsa ka hinungdanon ang pagpaluyo sa ilang mga igsoong lalaki ug babaye sa kongregasyon. Ang ilang 20-anyos nga anak nga lalaki, si Jonathan, usa ka Kristohanon nga lagsik ug may masanag nga kaugmaon, gidayagnos nga dunay tumor sa utok. Ang mga doktor determinado gayong moluwas kaniya, apan ang pisikal nga kahimtang ni Jonathan migrabe hangtod nga usa ka hapon niana, namatay siya. Naguol pag-ayo si Michel ug Diane. Ilang naamgohan nga ang Tigom sa Pag-alagad, nga gihimo nianang gabhiona, hapit nang matapos. Sa gihapon, kay nagkinahanglan gayod ug kahupayan, ilang gihangyo ang ansiyano nga kauban nila nga kuyogan sila sa Kingdom Hall. Miabot sila sa dihang gipahibalo sa kongregasyon ang kamatayon ni Jonathan. Human sa tigom, ang naghilak nga mga ginikanan gilibotan sa ilang mga igsoong lalaki ug babaye, kinsa mihalog kanila ug misultig mga pulong sa paghupay. Nahinumdom si Diane: “Mibati kamig kahaw-ang pag-abot namo sa tigomanan, apan pagkadakong kahupayan ang among nadawat gikan sa mga igsoon—gidasig gayod nila kami! Bisan tuod dili nila mahimong wad-on ang among kasakit, sila mitabang kanamo nga makaagwanta ilalom sa kapit-os!”—Roma 1:11, 12; 1 Corinto 12:21-26.

¹⁵ Ang kalisdanan nagpasuod pa kang Michel ug Diane sa ilang mga igsoon. Nagpasuod usab kini kanila sa usag usa. Matod ni Michel: “Nakakat-on ako sa pagmahal pa sa akong pinanggang asawa. Sa mga yugto nga mobati kamig kaluya sa buot, mag-estoryahanay kami bahin sa kamatuoran sa Bibliya ug kon sa unsang paagi ginapalig-on kami ni Jehova.” Si Diane midugang: “Ang paglaom sa Gingharian mas makahuloganon pa gani alang kanamo karon.”

16. Nganong hinungdanon nga mohimog unang lakang sa pagpahibalo sa atong mga igsoon sa atong mga panginahanglan?

¹⁶ Oo, ang atong Kristohanong mga igsoong lalaki ug babaye magsilbing “makapalig-on nga tabang” kanato panahon sa malisod nga mga yugto sa kinabuhi ug busa motabang kanato sa pagpreserbar sa atong kalipay. (Colosas 4:11) Siyempre, dili sila makabasa sa atong hunahuna. Busa, kon nagkinahanglan kita ug pagpaluyo, maayong pahibaloon nato sila. Dayon makapahayag kita ug tiunay nga pagpabili sa bisan unsang paghupay nga ikahatag sa atong mga igsoon, nga isipon kana nga gikan kang Jehova.—Proverbio 12:25; 17:17.

Tan-awa ang Imong Kongregasyon

17. Unsang mga hagit ang giatubang sa usa ka nag-inusarang inahan, ug sa unsang paagi lantawon nato ang mga tawo nga sama kaniya?

¹⁷ Kon tan-awon nimo pag-ayo ang mga isigkamagtutuo, mas makat-onan nimo ang pagpabili kanila ug makakaplag ka ug kalipay diha sa pagpakig-uban kanila. Tan-awa ang imong kongregasyon. Unsay imong nakita? Duna bay nag-inusarang ginikanan nga nanglimbasog sa pagmatuto sa iyang mga anak diha sa dalan sa kamatuoran? Gipalandong mo ba ang maayong panig-ingnan nga iyang gihatag? Sulayi sa paghanduraw ang pipila sa mga problema nga iyang giatubang. Usa ka nag-inusarang inahan nga ginganlag Jeanine naghisgot sa pipila niini: kamingaw, pagbirigbirig gikan sa mga lalaki diha sa trabahoan, kanihit sa kuwarta. Apan ang kinadak-ang babag sa tanan, matod niya, naglangkit sa pag-atiman sa emosyonal nga mga panginahanglan sa iyang mga anak, sanglit lahi ang kada bata. Gihisgotan ni Jeanine ang laing suliran: “Usa ka dakong hagit nga likayan ang kiling nga himoon ang imong anak nga lalaki nga ulo sa panimalay puli sa bana. Duna koy anak nga babaye, ug lisod hinumdoman nga dili siya pabug-atan pinaagi sa paghimo kaniya nga akong sumbonganan sa akong mga suliran.” Sama sa libolibong mahinadlokon-sa-Diyos nga nag-inusarang mga ginikanan, si Jeanine bug-os-panahon nga nagtrabaho ug nag-atiman sa iyang panimalay. Tun-an usab niya sa Bibliya ang iyang mga anak, bansayon sila diha sa ministeryo, ug  dad-on sila sa mga tigom sa kongregasyon. (Efeso 6:4) Pagkamalipayon ni Jehova samtang adlaw-adlaw niyang gipanid-an ang mga paningkamot niining pamilyaha sa paghupot ug integridad! Dili ba makapalipay sa atong kasingkasing ang pagkabaton nianang mga igsoona diha sa atong taliwala? Tinuod gayod.

18, 19. Iilustrar kon sa unsang paagi mapalalom nato ang atong pagpabili alang sa mga membro sa kongregasyon.

¹⁸ Tan-awa na usab ang imong kongregasyon. Makita tingali nimo ang matinumanong mga biyuda o mga biyudo nga “wala gayod mopalta” sa mga tigom. (Lucas 2:37) Masubo ba sila usahay? Siyempre. Gimingaw gayod sila sa ilang mga kapikas! Apan puliki sila kanunay diha sa pag-alagad kang Jehova ug dunay personal nga kaikag sa uban. Ang ilang lig-on, positibo nga tinamdan makadugang sa kalipay sa kongregasyon! Usa ka Kristohanon nga nag-alagad diha sa bug-os-panahong ministeryo sulod sa kapin sa 30 ka tuig mikomento: “Usa sa akong kinadak-ang kalipay mao ang pagkakita sa tigulang nga mga igsoong lalaki ug babaye nga nakaagom sa daghang pagsulay nga nag-alagad gihapon kang Jehova nga matinumanon!” Oo, ang tigulang nga mga Kristohanon sa atong taliwala makadasig kaayo sa mga batan-on.

¹⁹ Komosta ang mga bag-ohan nga di pa dugayng nakig-uban sa kongregasyon? Wala ba kita madasig sa dihang gipahayag nila ang ilang pagtuo diha sa mga tigom? Hunahunaa ang pag-uswag nga ilang nahimo sukad sila nagtuon sa Bibliya. Si Jehova nalipay gayod kanila. Kita ba usab? Gipahayag ba nato ang atong pag-uyon, nga  magdayeg kanila tungod sa ilang mga paningkamot?

20. Nganong ikaingon nga ang matag membro sa kongregasyon adunay hinungdanong bahin diha sa kongregasyon?

²⁰ Ikaw ba minyo, dili-minyo, o nag-inusarang ginikanan? Ikaw ba ilo sa amahan (o sa inahan), usa ka biyuda o biyudo? Ikaw ba usa nga nakig-uban sa kongregasyon sulod sa daghang tuig o usa nga bag-o pa lang nagsugod sa pagpakig-uban? Magmasaligon nga ang imong matinumanong panig-ingnan makapadasig kanamong tanan. Ug sa dihang moduyog ka sa pag-awit sa alawiton sa Gingharian, sa dihang mokomento ka o mohatag ka sa usa ka bahin sa estudyante sa Teokratikanhong Tunghaan sa Ministeryo, ang natampo nimo nakadugang sa among kalipay. Labawng hinungdanon, makapalipay kini sa kasingkasing ni Jehova.

21. Kita adunay daghang hinungdan sa pagbuhat sa unsa, apan unsang mga pangutana ang motungha?

²¹ Oo, bisan niining masamok nga panahon, mahimong magmalipayon kita diha sa pagsimba sa atong malipayon nga Diyos. Daghan kitag hinungdan nga mosanong sa pagdasig ni Pablo: “Magpadayon sa pagmaya, . . . ug ang Diyos sa gugma ug sa kalinaw magauban kaninyo.” (2 Corinto 13:11) Apan, komosta kon kita nag-atubang ug kinaiyanhong katalagman, paglutos, o grabeng kalisod sa ekonomiya? Posible bang mahuptan ang atong kalipay bisan sa maong mga kahimtang? Ikaw na ang mohinapos samtang imong konsiderahon ang mosunod nga artikulo.

[Footnote]

Makatubag Ka Ba?

• Sa unsang paagi gihubit ang kalipay?

• Sa unsang paagi ang paghupot ug positibong tinamdan motabang kanato nga magmalipayon?

• Unsay makatabang kanato sa pagbaton ug positibong panglantaw sa teritoryo sa atong kongregasyon?

• Sa unsang mga paagi gipabilhan nimo ang mga igsoong lalaki ug babaye sa imong kongregasyon?

[Mga Pangutana sa Pagtuon]

[Mga hulagway sa panid 10]

Ang mga tawo sa atong teritoryo mahimong magbag-obag-o

[Hulagway sa panid 12]

Unsang mga hagit ang giatubang niadtong anaa sa imong kongregasyon?