Mga Magmamantala sa Gingharian Nagtaho

Ngalan sa Diyos Nahinloan Gikan sa Pasipala

ANG Pulong sa Diyos, ang Bibliya, nag-ingon: “Hupti ninyo ang maayong panggawi taliwala sa mga nasod, aron nga, sa butang nga ilang gisulti batok kaninyo ingong mga mamumuhat ug daotan, sila ingong resulta sa inyong maayong mga buhat nga niini sila mga saksing-nakakita maghimaya sa Diyos sa adlaw sa iyang pagsusi.” (1 Pedro 2:12) Busa, ang matuod nga mga Kristohanon naningkamot nga huptan ang maayong panggawi aron dili mapasipalahan ang ngalan ni Jehova.

Sa usa ka hilit nga lugar sa Zambia nga gitawag ug Senanga, usa ka magtutudlo ang gikawatan ug radyo diha sa iyang balay. Sanglit misangyaw man ang mga Saksi ni Jehova sa maong lugar, ang tawo nag-akusar kanila sa pagpangawat. Iyang gitaho kana sa kapolisan, nga nag-insistir nga gikawat sa mga Saksi ang iyang radyo. Ingong pamatuod nga miadto sa iyang balay ang mga Saksi, iyang gipakita ang usa ka tract nga iyang nakaplagan diha sa salog. Apan, ang kapolisan wala motuo kaniya. Ilang gisultihan siya nga mopauli ug magsusi pa pag-ayo.

Ang mga Saksi nga misangyaw sa kasilinganan sa magtutudlo nianang adlawa gidasig sa lawas sa mga ansiyano nga moadto ug makigsulti sa magtutudlo maylabot sa maong panghitabo. Ang pipila sa mga igsoon miadto ug nakigsulti kaniya, nga nagpatin-awng buot nilang hinloan ang ngalan ni Jehova gikan sa pasipala. Sa ilang panaghisgot, ilang gisugilon kaniya nga ilang nahimamat ang usa ka batan-ong lalaki diha sa iyang balay ug ilang gihatagan siya ug usa ka tract. Gumikan sa ilang paghulagway, nailhan sa magtutudlo ang maong tawo. Ngani, sila parehong membro sa usa ra ka simbahan. Ang magtutudlo nakigsulti sa batan-on, apan iyang gipanghimakak ang mga sumbong. Unya ang magtutudlo nakighisgot sa maong butang sa mga ginikanan sa batan-ong lalaki ug dayon mipauli sa iyang balay. Sulod lamang sa usa ka oras, giuli sa inahan sa batan-on ang gikawat nga radyo.

Tungod kay nagbasol, ang magtutudlo miadto sa lawas sa mga ansiyano ug nangayog pasaylo tungod sa paghimog bakak nga mga sumbong. Gidawat sa mga ansiyano ang iyang pagpangayog pasaylo apan gihangyo siya nga ang resulta sa maong kaso ipahibalo sa publiko aron masayod ang tanan nga dili sad-an ang mga Saksi. Usa ka pahibalo ang gihimo diha sa eskuylahan, sa ingon naghinlo sa ngalan ni Jehova gikan sa pasipala. Ang mga Saksi ni Jehova makapadayon na sa pagsangyaw nga may kagawasan sa maong lugar.

[Mapa/Hulagway sa panid 19]

(Alang sa aktuwal nga pagkahan-ay, tan-awa ang publikasyon)

APRIKA

Zambia

[Credit Line]

Mountain High Maps® Copyright © 1997 Digital Wisdom, Inc.