Pagtabang sa mga Balo Latas sa Ilang mga Pagsulay

USA sa labing-inila nga mga estorya mahitungod sa mga balo mao ang asoy sa Bibliya bahin kang Ruth ug sa iyang ugangan nga si Naomi. Silang duha pulos mga balo. Apan, si Naomi namatyan dili lang sa iyang bana kondili sa duha usab niya ka anak nga lalaki, nga ang usa kanila mao ang nabana ni Ruth. Tungod kay nagpuyo man sila sa usa ka agrikultural nga katilingban nga nagsalig gayod sa mga kalalakin-an niini, makapasubo gayod kaayo ang ilang kahimtang.—Ruth 1:1-5, 20, 21.

Hinunoa, si Naomi dihay usa ka talagsaong higala ug maghuhupay nga mao si Ruth nga iyang umagad, kinsa wala gayod mobiya kaniya. Ngadtongadto, si Ruth napamatud-an nga “labi pang maayo [kang Naomi] kay sa pito ka anak nga lalaki”—dili lang tungod sa iyang halawom nga gugma kang Naomi kondili tungod usab sa iyang gugma sa Diyos. (Ruth 4:15) Sa dihang giawhag ni Naomi si Ruth nga mopauli ngadto sa iyang pamilya ug mga higala sa Moab, mitubag si Ruth uban ang usa sa labing makapatandog nga mga pulong sa pagkamaunongon nga natala sukad: “Kon asa ikaw moadto, ako moadto, ug kon asa ikaw magpalabay sa kagabhion ako magpalabay sa kagabhion. Ang imong katawhan  mahimong akong katawhan, ug ang imong Diyos akong Diyos. Kon asa ikaw mamatay, adto ako mamatay, ug didto ako igalubong. Hinaot si Jehova magbuhat niana kanako ug magdugang pa niana kon may bisan unsa man gawas sa kamatayon nga magbulag kanako ug kanimo.”—Ruth 1:16, 17.

Ang tinamdan ni Ruth namatikdan gayod ni Jehova nga Diyos. Gipanalanginan niya ang gamayng panimalay ni Naomi ug Ruth, ug sa ngadtongadto naminyo si Ruth kang Boaz nga Israelinhon. Ang ilang anak, kinsa nahimong usa sa katigulangan ni Jesu-Kristo, giatiman ni Naomi nga samag iyang kaugalingong anak. Kini nga kasaysayan maoy usa ka panig-ingnan kon sa unsang paagi atimanon ni Jehova ang mga balo kinsa moduol ug mosalig kaniya. Dugang pa, giingnan kita sa Bibliya nga gipabilhan niya kadtong kinsa mahigugmaong motabang sa mga balo sa ilang mga pagsulay. Busa sa unsang paagi masuportahan nato karon ang mga balo sa atong taliwala?—Ruth 4:13, 16-22; Salmo 68:5.

Espesipiko Apan Dili Maharihariong Tabang

Dihang motanyag ug tabang sa usa ka balo, labing maayo nga magmatin-aw ug magmaespesipiko apan dili mahariharion. Likayi ang mga komentong sama sa, “Pahibal-a lang ko kon duna kay gikinahanglan.” Sama ra kana sa pag-ingong, ‘Painiti ug busga ang imong kaugalingon’ ngadto sa usa nga gitugnaw ug gigutom ug unya walay gihimo nga tabang. (Santiago 2:16) Daghang tawo ang dili mangayog tabang sa dihang sila nanginahanglag usa ka butang; hinuon, ililong lang nila ang ilang mga panginahanglan. Gikinahanglan ang pagsabot sa dihang motabang kanila, nga ilhon kon unsa ang ilang mga panginahanglan. Sa laing bahin, ang naghingaping mga lakang—nga mao nay mokontrolar sa kinabuhi sa balo—mahimong moresulta sa kasilo o panagbangi. Busa, gipasiugda sa Bibliya ang panginahanglan nga magmatimbang sa atong mga pakiglabot sa uban. Bisan tuod gidasig kita nga maghupot ug dili-mahakogong personal nga interes sa ubang mga tawo, gipahinumdoman kita niini nga dili magmahilabtanon.—Filipos 2:4; 1 Pedro 4:15.

Gipasundayag ni Ruth ang maong timbang nga tinamdan ngadto kang Naomi. Samtang maunongong nagpabilin uban sa iyang ugangan, wala mamugos o magharihari si Ruth kaniya. Mihimo siyag makataronganong mga lakang, sama sa pagkuhag pagkaon alang kang Naomi ug sa iyang kaugalingon, apan gisunod usab niya ang mga instruksiyon ni Naomi.—Ruth 2:2, 22, 23; 3:1-6.

Siyempre, mahimong dakog kalainan ang panginahanglan sa matag usa. Si Sandra, nga gihisgotan ganina, miingon: “Ania kanako ang akong gikinahanglan sa akong kagul-anan—ang minahal kaayo ug mahigugmaon nga mga higala nga mialirong nako.” Sa laing bahin, si Elaine, nga gihisgotan ganina, nanginahanglag panahon nga mag-inusara. Busa, ang pagkamatinabangon nagkahulogang magmasinabtanon ug maghupot ug timbang nga panghunahuna tali sa pagtahod sa pribasiya sa uban ug sa pagkaandam kanunay sa pagtabang kon gikinahanglan.

Pagpaluyo nga Gikan sa Pamilya

Ang usa ka mainiton, mahigugmaong pamilya, kon aduna man, dakog mahimo sa pagpasalig sa usa ka balo nga masagubang niya ang iyang pagkabalo. Bisan pag ang pipila ka membro sa pamilya makatanyag ug mas dakong tabang kay sa uban, ang tanan mahimong makaamot. “Kon ang babayeng balo adunay mga anak o mga apo, patun-a una kini sila sa pagpakita sa diyosnong pagkamahinalaron diha sa ilang kaugalingong panimalay ug magpadayon sa paghatag sa angayng balos ngadto sa ilang mga ginikanan ug mga apohan, kay kini maoy dalawaton sa panan-aw sa Diyos.”—1 Timoteo 5:4.

Sa daghang kahimtang, ang pinansiyal nga suporta o “balos” mahimong wala na kinahanglana. Ang pipila ka balo may igong pondong salapi sa pag-atiman sa ilang mga panginahanglan, ug ang uban mikuwalipikar sa mga tabang nga gipasiugda sa gobyerno, nga mabatonan diha sa pipila ka  nasod. Apan kon nanginahanglan ang mga balo, kinahanglang motabang gayod ang mga membro sa pamilya. Kon ang usa ka balo walay suod nga kabanay nga motabang o ang maong mga kabanay walay ikatabang, gidasig sa Kasulatan ang mga isigkamagtutuo nga motabang niya: “Ang dagway sa pagsimba nga hinlo ug wala mahugawi sa panglantaw sa atong Diyos ug Amahan mao kini: ang pag-atiman sa mga ilo ug sa mga babayeng balo sa ilang kasakitan.”—Santiago 1:27.

Kadtong nagabuhat niining mga prinsipyoha sa Bibliya sa pagkatinuod ‘nagpasidungog sa mga babayeng balo.’ (1 Timoteo 5:3) Sa pagkatinuod, ang pagpasidungog sa usa ka tawo maoy pagpasundayag ug pagtahod kaniya. Ang mga tawong gipasidunggan mobating gipabilhan, gimahal, gitahod. Dili sila mobati nga mitabang ang uban tungod lang kay obligasyon nila kini. Si Ruth, bisag siya mismo usa ka balo sa makadiyot nga panahon, tinuorayng nagpasidungog kang Naomi pinaagi sa kinabubut-on ug mahigugmaon nga pagseguro nga ang pisikal ug emosyonal nga mga panginahanglan ni Naomi naatiman. Sa pagkatinuod, tungod sa tinamdan ni Ruth dali ra niyang naangkon ang usa ka maayong reputasyon, mao nga ang umaabot niyang bana miingon kaniya: “Ang tanan nga anaa sa ganghaan [“siyudad,” potnot sa Iningles] sa akong katawhan nasayod nga ikaw maayo kaayo nga babaye.” (Ruth 3:11) Sa samang panahon, ang gugma ni Naomi sa Diyos, ang iyang pagkamakataronganon, ug ang iyang halawom nga pagpabili sa mga paningkamot ni Ruth alang kaniya walay duhaduhang nagpahimo kang Ruth nga motabang kaniyang may kahimuot. Pagkamaayong panig-ingnan si Naomi alang sa mga balo karong adlawa!

Duol sa Diyos

Siyempre, ang mga membro sa pamilya ug mga higala dili makahulip sa kahaw-ang nga gibilin sa namatay nga kapikas. Tungod niining katarongana, mahinungdanon alang sa usang namatyan nga moduol ilabina ngadto sa ‘Amahan sa malumong mga kaluoy ug sa Diyos sa tanang paghupay, kinsa nagahupay kanato sa tanan natong kasakitan.’ (2 Corinto 1:3, 4) Tagda pananglitan si Ana, usa ka debotadang balo kinsa 84 anyos na ang edad sa pagkatawo ni Jesus.

Sa dihang namatay ang bana ni Ana human sa pito lang ka tuig nga kaminyoon, midangop siya kang Jehova alang sa paghupay. “[Siya] wala gayod mopalta sa templo, nga nagahatag ug sagradong pag-alagad adlaw ug gabii uban ang mga pagpuasa ug mga pangamuyo.” (Lucas 2:36, 37) Gibalosan ba ni Jehova ang diyosnong pagkamahinalaron ni Ana? Oo! Gipakita ni Jehova ang iyang gugma kaniya diha sa usa ka linain kaayong paagi pinaagi sa pagtugot kaniya nga makakita sa bata nga mao ang mahimong Manluluwas sa kalibotan. Nakapahinam ug nakapahupay kaayo kini kang Ana! Dayag, nasinati niya ang kamatuoran sa Salmo 37:4: ‘Magbaton ka ug tumang kalipay diha kang Jehova, ug ihatag niya kanimo ang mga hangyo sa imong kasingkasing.’

Ang Diyos Motabang Pinaagi sa mga Isigka-Kristohanon

Si Elaine miingon: “Sa taastaas nga panahon human mamatay si David, duna akoy gibating sakit sa lawas, nga samag kutsilyo nga mikulikot sa akong dughan. Nagtuo akong wala lang ko kahilisi. Usa ka adlaw niana migrabe kini nga kinahanglang magpakonsulta na ako ug doktor. Ang usa ka masinabotong espirituwal nga sister ug higala misugyot nga ang akong kaguol mao tingaliy usa ka hinungdan ug nagdasig kanakong mangayog tabang ug paghupay kang Jehova. Gidawat nako dihadiha ang iyang tambag ug mitanyag ug usa ka hilom apan kinasingkasing nga pag-ampo, nga mihangyong palig-onon ako ni Jehova sa akong kaguol. Ug gipalig-on gayod ko niya!” Miarang-arang ang gibati ni Elaine, ug human dayon niadto bisan ang gibati niyang sakit sa lawas nahanaw.

Ang mga ansiyano sa kongregasyon ilabinang makapakighigala sa nagbangotang mga balo sa malulotong paagi. Pinaagi sa pagtaganag makanunayong espirituwal nga suporta ug paghupay diha sa mataktikanhon ug masinabotong paagi, makatabang ang mga ansiyano kanila nga magpabiling suod kang Jehova bisan pa sa ilang mga pagsulay. Diin gikinahanglan, makatabang usab ang mga ansiyano kanila sa paghikay ug materyal nga suporta. Ang maong mabination, masinabotong mga ansiyano sa tinuoray mahimong “usa ka tagoanang dapit sa hangin.”—Isaias 32:2; Buhat 6:1-3.

Permanenteng Kahupayan Gikan sa Bag-ong Hari sa Yuta

Ang usa nga gikahimut-ang makita sa tigulang nga si Ana mga duha ka libo ka tuig kanhi nahimo na karon nga Mesiyanikong Hari sa langitnong Gingharian sa Diyos. Sa dili madugay kini nga kagamhanan  magpapas sa tanang hinungdan sa kagul-anan, lakip na sa kamatayon. Maylabot niini, ang Pinadayag 21:3, 4 miingon: “Tan-awa! Ang tolda sa Diyos anaa uban sa mga tawo . . . Ug iyang pagapahiran ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.” Namatikdan ba nimo nga kining tekstoha nagtumong sa “mga tawo”? Oo, ang katawhan mapahigawas gikan sa kamatayon ug sa tanang pagbangotan ug pagtiyabaw nga ipahinabo niini.

Apan aduna pay dugang maayong balita! Ang Bibliya nagsaad usab ug usa ka pagkabanhaw sa mga patay. “Ang takna nagsingabot nga ang tanan nga anaa sa handomanang mga lubnganan makadungog sa iyang [kang Jesus] tingog ug manggula.” (Juan 5:28, 29) Sama kang Lazaro, kinsa gibanhaw ni Jesus gikan sa mga patay, manggula sila ingong mga tawo, dili espiritung mga linalang. (Juan 11:43, 44) Kadtong kinsa ‘magabuhat ug maayong mga butang’ human niana makakab-ot sa tawhanong kahingpitan ug personal nga makasinati sa amahanong pag-atiman ni Jehova sa dihang iyang ‘bukharon ang iyang kamot ug tagbawon ang tinguha sa tanang buhing butang.’—Salmo 145:16.

Kadtong namatyag minahal ug nagtuo niining seguradong paglaom mahupayan gayod niini. (1 Tesalonica 4:13) Busa kon ikaw usa ka balo, paneguroang ‘mag-ampo nga walay-hunong’ alang sa kahupayan ug tabang nga gikinahanglan nimo adlaw-adlaw sa pagpas-an sa nagkadaiya nimong mga palas-anon. (1 Tesalonica 5:17; 1 Pedro 5:7) Ug paggahin ug panahon matag adlaw sa pagbasa sa Pulong sa Diyos aron ang mga hunahuna sa Diyos makahupay kanimo. Kon buhaton nimo kining mga butanga, ikaw mismo ang makasinati kon sa unsang paagi, bisan pa sa tanang pagsulay ug mga hagit nga imong giatubang ingong balo, tabangan ka gayod ni Jehova sa pagkaplag ug kalinaw.

[Blurb sa panid 5]

Ang pagkamatinabangon nagkahulogang maghupot ug timbang nga panghunahuna tali sa pagtahod sa pribasiya sa uban ug sa pagkaandam kanunay sa pagtabang kon gikinahanglan

[Hulagway sa panid 7]

Ang tigulang nga balong si Ana gipanalanginan sa Diyos