“Si Jehova Maayo Kaayo Kanako!”

SA USA ka maanindot nga gabii niadtong Marso 1985, ang mga lalaki ug mga babaye sa Departamento sa Pagsulat sa hedkuwarter sa mga Saksi ni Jehova sa New York, T.B.A, nakakita sa hinungdanong hitabo. Si Karl F. Klein nakaalagad na niadtong tungora ug 60 ka tuig sa bug-os-panahong ministeryo. Sa pagkamadasigon, si Brader Klein miingon: “Si Jehova maayo kaayo kanako!” Siya miingon nga ang Salmo 37:4 maoy iyang paboritong teksto sa Bibliya. Human niana, iyang gilingaw ang tanan pinaagi sa pagpatokar sa iyang biyolin.

Sa misunod nga 15 ka tuig, nagpadayon pagtrabaho si Brader Klein ingong sakop sa kawani sa pagsulat ug sa pag-alagad sa Nagamandong Lawas sa mga Saksi ni Jehova. Unya, niadtong Enero 3, 2001, sa edad nga 95, natapos nga matinumanon ni Karl Klein ang iyang yutan-ong kurso.

Natawo si Karl sa Alemanya. Mibalhin ang iyang pamilya sa Tinipong Bansa, ug si Karl nagdako sa kanait sa siyudad sa Chicago, Illinois. Samtang bata pa, si Karl ug ang iyang manghod nga lalaking si Ted interesado kaayo sa Bibliya. Si Karl nabawtismohan niadtong 1918, ug ang makapaikag nga mga butang nga iyang nadungog sa usa ka kombensiyon sa mga Estudyante sa Bibliya niadtong 1922 nakapukaw diha kaniya sa usa ka tibuok-kinabuhing pagpabili sa ministeryo sa kanataran. Dili niya buot nga molabay ang usa ka semana nga dili makapakig-ambit sa buluhatong pagsangyaw, nga nagbuhat niana bisan hangtod sa kataposang mga semana sa iyang kinabuhi.

Si Karl nahimong sakop sa kawani sa hedkuwarter niadtong 1925, nga unang nagtrabaho sa imprentahan. Siya mahigugmaon kaayo sa musika, ug sa daghang katuigan tigtugtog siya sa biyolin diha sa orkestra nga gipatokar sa Kristohanong mga sibya sa radyo. Human niadto, siya nagtrabaho sa Departamento sa Pag-alagad, nga ilabinang nalipay sa pagpakig-uban sa magtatan-aw niini nga si T. J. Sullivan. Sa kasamtangan, si Ted nagminyo ug uban sa iyang asawa, si Doris, misulod sa misyonaryong pag-alagad sa Puerto Rico.

Sulod sa tunga sa siglo, si Karl Klein nagtrabaho sa Departamento sa Pagsulat, diin dako siyag naamot tungod kay siya kugihan nga manukiduki ug may halawom nga kahibalo sa Bibliya. Sa 1963, naminyo si Karl kang Margareta, usa ka misyonaryang Aleman nga nag-alagad sa Bolivia. Pinaagi sa iyang mahigugmaong pagpaluyo, ilabina sa dihang si Karl nakasinatig mga suliran sa panglawas, siya nakahimo gihapon sa pagtrabaho nga mabungahon bisag tigulang na kaayo nga ang kadaghanang sama kaniya miretiro na. Ang kinaiyanhong pagkamatinud-anon ni Karl, dinuyogan sa kadasig sa pagkamaghohoni, nakaamot sa halandomong mga pakigpulong sa mga kongregasyon ug sa mga kombensiyon. Dili pa dugay una sa iyang kamatayon, nagdumala siya sa panaghisgot sa teksto sa buntag alang sa dakong pamilyang Bethel sa New York, nga nakapalipay ug nakabenepisyo sa tanan.

Daghang regular nga mga magbabasa sa Ang Bantayanang Torre makahinumdom sa sugilanon sa kinabuhi ni Brader Klein, usa ka makaiikag nga asoy sa iyang mga kasinatian nga gipatik sa gula sa Oktubre 1, 1984. Malipay ka sa pagbasa o sa pagbasa pag-usab sa maong asoy, nga maghinumdom nga ang magsusulat niini nakagugol pa ug laing dekada ug tunga ingong matinumanon ug debotadong Kristohanon.

Ingong usa ka dinihogan sa Ginoo, si Brader Klein nagtinguha uban sa tibuok niyang kasingkasing sa paghari uban kang Kristo sa langit. Aduna kitay dakong katarongan sa pagtuo nga si Jehova nagtuman na karon niana nga tinguha.—Lucas 22:28-30.

[Hulagway sa panid 31]

Si Karl niadtong 1943 uban kang T. J. Sullivan ug Ted ug Doris

[Hulagway sa panid 31]

Si Karl ug Margareta, Oktubre 2000