Ang Pagtugot sa Diyos sa Pag-antos Hapit Nang Matapos

BISAN asa ka motan-aw, adunay pag-antos. Tinuyoan kini sa ubang tawo. Natakboyan silag mga sakit nga napasa sa sekso o nakasinatig mga epekto tungod sa pag-abuso sa droga o sa alkoholikong mga ilimnon o sa pagpanabako. O tingali aduna silay mga sakit sa panglawas tungod sa dili maayong mga batasan sa pagkaon. Ugaling, ang daghang pag-antos maoy resulta sa mga hinungdan o mga hitabo nga dili makontrolar sa kasarangang tawo: gubat, kapintasan tungod sa rasa, krimen, kakabos, kagutmanan, sakit. Ang lain pang pag-antos nga dili gayod makontrolar sa tawo mao ang pag-antos nga nalangkit sa pagkatigulang ug kamatayon.

Ang Bibliya nagpasalig kanato nga ang “Diyos gugma.” (1 Juan 4:8) Nan, nganong gitugotan sa mahigugmaong Diyos nga magpadayon sa daghang siglo kining tanang pag-antos? Kanus-a ba niya sulbaron ang kahimtang? Sa pagtubag sa maong mga pangutana, kinahanglan natong susihon ang katuyoan sa Diyos labot sa tawo. Motabang kini kanato sa pagsabot kon nganong gitugotan sa Diyos ang pag-antos ug kon unsay iyang buhaton labot niini.

Ang Gasa sa Kagawasan sa Pagpili

Sa dihang gilalang sa Diyos ang unang tawo, gihatagan niya kinig labaw pa sa usa ka lawas nga may utok. Dugang pa, wala lalanga sa Diyos si Adan ug Eva nga mahimong walay pangisip nga mga robot. Iyang gitugahan sila ug katakos sa kagawasan sa pagpili. Ug usa gayod kana ka maayong gasa, kay “nakita sa Diyos ang tanan nga iyang  gibuhat ug, tan-awa! kadto maayo kaayo.” (Genesis 1:31) Oo, “hingpit ang iyang kalihokan.” (Deuteronomio 32:4) Kitang tanan nagpabili niini nga gasa sa kagawasan sa pagpili tungod kay dili nato gustong but-an kita sa tanan natong hunahunaon ug buhaton nga dili na makapili sa bisan unsa.

Apan, mahimo bang gamiton ang maayong gasa sa kagawasan sa pagpili nga walay mga limitasyon? Sa pagtultol nga gihatag sa unang mga Kristohanon, ang Pulong sa Diyos mitubag: “Manig-ingon sa mga tawong may kagawasan, apan hupti ang inyong kagawasan, dili ingong takoban sa pagkadaotan, kondili ingong mga ulipon sa Diyos.” (1 Pedro 2:16) Alang sa kaayohan sa tanan, kinahanglang adunay mga limitasyon. Busa, ang kagawasan sa pagpili pagalimitahan sumala sa lagda sa balaod. Kay kon dili, kagubot ang moresulta.

Kansang Balaod?

Kansang balaod ang magtino sa hustong mga limitasyon sa kagawasan? Ang tubag niining pangutanaha naglangkit sa pasukaranang hinungdan kon nganong gitugotan sa Diyos ang pag-antos. Sanglit gilalang sa Diyos ang tawo, siya nahibalo pag-ayo sa mga balaod nga kinahanglan nilang sundon alang sa ilang kaayohan ug alang sa kaayohan sa uban. Gipahayag kini sa Bibliya niining paagiha: “Ako, si Jehova, mao ang imong Diyos, ang Usa nga nagtudlo kanimo aron ikaw makabaton ug kaayohan, ang Usa nga nagpalakaw kanimo sa dalan nga angay mong pagalaktan.”—Isaias 48:17.

Tin-aw, ang hinungdanong punto mao kini: Ang tawo wala lalanga nga mahimong independente sa Diyos. Gilalang niya sila sa paagi nga ang ilang kalamposan ug kalipay magdepende sa ilang pagsunod sa iyang matarong nga mga balaod. Ang manalagna sa Diyos nga si Jeremias miingon: “Ako nahibalo pag-ayo, Oh Jehova, nga dili iya sa yutan-ong tawo ang iyang dalan. Dili iya sa tawo nga nagalakaw bisan ang pagtultol sa iyang lakang.”—Jeremias 10:23.

Gilalang sa Diyos ang tawo nga magpasakop sa iyang pisikal nga mga balaod, sama sa balaod sa grabidad. Sa susama, iyang gilalang ang tawo nga magpasakop sa iyang moral nga mga balaod, nga gidisenyo aron magkahiusa ang katilingban. Nan, tungod sa maayong katarongan ang Pulong sa Diyos nag-awhag: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot.”—Proverbio 3:5.

Busa, ang tawhanong pamilya dili gayod magmalamposon sa pagdumala sa kaugalingon nga wala ang pagmando sa Diyos. Sa pagpaningkamot nga mahimong independente gikan kaniya, ang mga tawo mihimog sosyal, ekonomikanhon, politikanhon, ug relihiyosong mga sistema nga nagkabangi sa usag usa, ug “ang tawo nagmando sa tawo alang sa iyang kadaotan.”—Ecclesiastes 8:9.

Unsay Nakaingon Niini nga Kahimtang?

Gihatagan sa Diyos ang atong unang mga ginikanan, si Adan ug Eva, ug usa ka hingpit nga pagsugod. Sila may hingpit nga mga lawas ug mga hunahuna ug usa ka paraisong tanaman isip pinuy-anan. Kon sila nagpasakop pa unta sa pagmando sa Diyos, sila nagpabiling hingpit ug malipayon. Sa ngadtongadto, sila nahimo untang mga ginikanan sa tanang hingpit, malipayong  tawhanong pamilya nga nagkinabuhi diha sa usa ka paraisong yuta. Mao kana ang katuyoan sa Diyos alang sa tawhanong rasa.—Genesis 1:27-29; 2:15.

Ugaling, giabusohan sa atong orihinal nga mga katigulangan ang ilang kagawasan sa pagpili. Sayop nilang gihunahuna nga sila magmalamposon nga independente sa Diyos. Sa ilang kaugalingong kagawasan sa pagpili, gilapas nila ang mga limitasyon sa iyang mga balaod. (Genesis, kapitulo 3) Tungod kay gisalikway nila ang iyang pagmando, dili na siya obligado sa pagsustiner kanila diha sa kahingpitan. ‘Sila migawi sa ikadaot sa ilang bahin, wala magpabilin nga iyang mga anak, ug ang sayop ilaha.’—Deuteronomio 32:5.

Sukad sa panahong sila misupak sa Diyos, nagsugod pagkadaot ang lawas ug pangisip ni Adan ug Eva. Si Jehova ang tuboran sa kinabuhi. (Salmo 36:9) Busa tungod kay mibulag sila kang Jehova, ang unang tawhanong magtiayon nahimong dili hingpit ug sa ulahi namatay. (Genesis 3:19) Uyon sa mga balaod sa henetikanhong panulondon, ang ilang mga anak makadawat lamang kon unsay nabatonan sa ilang mga ginikanan. Ug unsa kana? Kana mao ang pagkadili-hingpit ug kamatayon. Busa si apostol Pablo misulat: “Ang sala misulod sa kalibotan pinaagi sa usa ka tawo [Adan] ug ang kamatayon pinaagi sa sala, ug sa ingon ang kamatayon mikaylap sa tanang tawo tungod kay silang tanan nakasala man.”—Roma 5:12.

Ang Pangunang Isyu—Pagkasoberano

Sa dihang mirebelde sa Diyos si Adan ug Eva, gihagit nila ang iyang pagkasoberano, nga mao, ang iyang katungod sa pagmando. Mahimo untang laglagon sila ni Jehova ug magsugod pag-usab pinaagi sa laing magtiayon, apan dili kana magsulbad sa isyu kon kansang pagmando ang matarong ug labing maayo alang sa tawo. Gihatagan ug panahon sa pag-ugmad sa ilang mga katilingban sumala sa ilang kaugalingong mga ideya, ang tawo makapasundayag nga walay bisan unsang pagduhaduha kon magmalamposon ba gayod ang ilang pagmando nga independente sa Diyos.

Unsay gibutyag sa libolibong katuigan sa kasaysayan sa tawo? Sulod sa tanang nanglabayng kasiglohan, gisulayan sa tawo ang daghang matang sa sosyal, ekonomikanhon, politikanhon, ug relihiyosong mga sistema. Ugaling, nagpadayon gihapon ang pagkadaotan ug pag-antos. Sa pagkatinuod, ‘ang mga tawong daotan misamot pa kangil-ad,’ ilabina sa atong panahon.—2 Timoteo 3:13.

Ang ika-20ng siglo nakasinatig talagsaong mga kahimoan labot sa siyensiya ug sa industriya. Apan nakasinati usab kini sa labing grabeng pag-antos sa tibuok kasaysayan sa tawhanong rasa. Ug bisan pa sa pag-uswag nga nahimo labot sa medisina, mapadapat gihapon ang balaod sa Diyos: Ang mga tawo nga mibulag sa Diyos—ang tuboran sa kinabuhi—masakit, matigulang, ug mamatay. Tin-aw gayong napamatud-an nga ang mga tawo dili ‘makatultol sa ilang kaugalingong mga lakang’!

Pagkasoberano sa Diyos Gipasiugda

Sa makausa ug sa tanang panahon, kining makasubo nga pag-eksperimento nga mag-independente gikan sa Diyos nagpasundayag nga ang pagmando sa mga tawo nga bulag kaniya dili gayod magmalamposon. Ang pagmando lamang sa Diyos ang makadalag kalipay, panaghiusa, kahimsog sa panglawas, ug kinabuhi. Dugang pa, ang dili masayop nga Pulong ni Jehova nga Diyos, ang Balaang Bibliya, nagpakita nga kita nagkinabuhi na “sa kataposang mga adlaw” sa pagmando sa tawo nga independente sa Diyos. (2 Timoteo 3:1-5) Ang pagtugot ni Jehova niini ug sa pagkadaotan ug sa pag-antos hapit nang matapos.

Ang Diyos sa dili madugay manginlabot sa tawhanong mga kalihokan. Ang Kasulatan nagsulti kanato: “Sa mga adlaw nianang mga haria [mga pagmando sa tawo nga karon naglungtad] ang Diyos sa langit magatukod ug usa ka gingharian [sa langit] nga dili gayod malumpag. Ug ang maong gingharian dili igapasa ngadto sa lain nga katawhan [dili na gayod magmando pa ang tawo sa yuta]. Kini magadugmok ug magatapos niining tanang gingharian [mga pagmando karon], ug kini mobarog hangtod sa panahong walay tino.”—Daniel 2:44.

Ang pagbindikar sa pagkasoberano ni Jehova nga Diyos pinaagi sa langitnong Gingharian mao ang tema sa Bibliya. Gihimo kini ni Jesus nga labing hinungdanon sa iyang pagpanudlo. Siya miingon: “Kining maayong balita sa gingharian igawali sa tibuok gipuy-ang yuta ingon nga pagpamatuod  ngadto sa tanang kanasoran; ug unya moabot ang kataposan.”—Mateo 24:14.

Sa dihang ilisan na sa pagmando sa Diyos ang pagmando sa tawo, kinsay maluwas ug kinsay dili maluwas? Sa Proverbio 2:21, 22, kita gipasaligan: “Ang mga matul-id [nga nagpaluyo sa pagmando sa Diyos] mao ang magapuyo sa yuta, ug ang walay-ikasaway mao ang magpabilin diha niana. Kon mahitungod sa mga daotan [nga wala mopaluyo sa pagmando sa Diyos], sila pagaputlon gikan sa yuta.” Ang dinasig sa Diyos nga salmista miawit: “Sa dili na madugay, ug ang daotan mawala na . . . Apan ang mga maaghop magapanag-iya sa yuta, ug sila makakaplag gayod sa ilang tumang kalipay sa kadagaya sa pakigdait. Ang mga matarong magapanag-iya sa yuta, ug sila magapuyo sa ibabaw niini hangtod sa kahangtoran.”—Salmo 37:10, 11, 29.

Usa ka Kahibulongang Bag-ong Kalibotan

Ubos sa pagmando sa Gingharian sa Diyos, ang mga maluwas sa kataposan sa karong sistema sa mga butang dad-on ngadto sa usa ka yuta nga nahinloan sa pagkadaotan ug pag-antos. Ang hinatag-sa-Diyos nga instruksiyon itagana alang sa katawhan, ug sa ngadtongadto “ang yuta mapuno sa kahibalo kang Jehova ingon sa katubigan nga nagtabon sa dagat mismo.” (Isaias 11:9) Kining makapalig-on, positibong pagpanudlo mosangpot sa usa ka tinuod nga malinawon, nagkahiusa nga katilingban sa tawo. Busa, wala na unyay gubat, pagbuno, kapintasan, panglugos, pagpangawat, o bisan unsang ubang krimen.

Ang kahibulongang pisikal nga mga kaayohan daling mabatonan sa masinugtanong katawhan nga nagkinabuhi sa bag-ong kalibotan sa Diyos. Mawagtang na unya ang tanang daotan nga mga sangpotanan sa pagrebelde batok sa pagmando sa Diyos. Ang pagkadili-hingpit, sakit, pagkatigulang, ug kamatayon mahimo na unyang mga butang sa nangagi. Ang Bibliya nagpasalig kanato: “Walay pumoluyo nga moingon: ‘Ako masakiton.’” Dugang pa, ang Bibliya nagsaad: “Nianang panahona ang mga mata sa mga buta mabuka, ug ang igdulungog sa mga bungol mabuksan. Nianang panahona ang bakol mosaka ingon sa laking osa, ug ang dila sa amang mosinggit sa kasadya.” (Isaias 33:24; 35:5, 6) Pagkadakong kalipay unya nga mapahimuslan ang mahimsog nga panglawas sa matag adlaw—sa walay kataposan!

Ubos sa mahigugmaong pagtultol sa Diyos, gamiton sa mga molupyo nianang bag-ong kalibotan ang ilang mga kusog ug mga katakos sa paghimo ug tibuok-yuta nga paraiso. Mawala na sa dayon ang kakabos, kagutmanan, ug kawalay-puloy-anan, kay ang tagna ni Isaias nag-ingon: “Sila gayod magtukod ug mga balay ug magpuyo niini; ug sila gayod magtanom ug kaparasan ug magkaon sa ilang mga bunga. Dili sila magtukod ug lain ang magpuyo; dili sila magtanom ug lain ang magkaon.” (Isaias 65:21, 22) Sa pagkatinuod, “sila manglingkod, ang tagsatagsa ilalom sa iyang paras ug ilalom sa iyang kahoyng igos, ug walay usa nga magpakurog kanila.”—Miqueas 4:4.

Ang yuta mosanong sa mahigugmaong pag-atiman sa Diyos ug sa masinugtanong mga tawo. Nakabaton kita niini nga pasalig sa Kasulatan: “Ang kamingawan ug ang walay-tubig nga rehiyon magsadya, ug ang desyertong kapatagan  magakalipay ug mamulak sama sa safron. . . . Sa kamingawan ang mga tubig mobugwak, ug ang mga sapa sa desyertong kapatagan.” (Isaias 35:1, 6) “Aduna unyay dagayang lugas sa ibabaw sa yuta; sa tumoy sa kabukiran adunay pagsugwak.”—Salmo 72:16.

Komosta na man ang bilyonbilyong tawo nga nangamatay? Kadtong anaa sa panumdoman sa Diyos bangonon ngadto sa kinabuhi, kay “aduna unyay pagkabanhaw sa mga matarong ug sa mga dili-matarong.” (Buhat 24:15) Oo, ang mga patay ipasig-uli sa kinabuhi. Sila pagatudloan sa kahibulongang mga kamatuoran labot sa pagmando sa Diyos ug pagahatagan ug kahigayonan nga mabuhing walay kataposan sa Paraiso.—Juan 5:28, 29.

Pinaagi niini, balihon sa bug-os ni Jehova nga Diyos ang makaluluoy nga kahimtang sa pag-antos, sakit, ug kamatayon nga nag-ulipon sa tawo sa libolibong katuigan. Wala nay sakit! Wala nay mga tawong may depekto! Wala nay kamatayon! “Pagapahiran [sa Diyos] ang tanang luha gikan sa ilang mga mata, ug ang kamatayon mawala na, ni may pagbangotan ni pagtiyabaw ni may kasakit pa. Ang unang mga butang nangagi na.”—Pinadayag 21:3, 4.

Mao kanay paagi sa Diyos sa pagtapos sa pag-antos. Iyang laglagon kining dunot nga kalibotan ug ipasulod ang usa ka bug-os bag-ong sistema sa mga butang nga niana “magpuyo ang pagkamatarong.” (2 Pedro 3:13) Pagkamaayong balita gayod kini! Gikinahanglan gayod nato kanang bag-ong kalibotan. Ug dili na kita kinahanglang magpaabot ug dugayng panahon aron makita kini. Sumala sa katumanan sa mga tagna sa Bibliya, kita nahibalo nga ang bag-ong kalibotan haduol na, ug ang pagtugot sa Diyos sa pag-antos hapit nang matapos.—Mateo 24:3-14.

[Kahon sa panid 8]

Ang Kapakyasan sa Pagmando sa Tawo

Mahitungod sa pagmando sa tawo, si kanhi Kansilyer Helmut Schmidt sa Alemanya nag-ingon: “Kitang mga tawo . . . sa kanunay nagmando lamang sa kalibotan sa dili-bug-os nga paagi, ug sa kadaghanang panahon sa daotan kaayong paagi. . . . Wala gayod kita makamando niini diha sa bug-os nga pakigdait.” Ang Human Development Report 1999 nag-ingon: “Ang tanang nasod nagtaho sa pagkakankan sa ilang katilingbanong gambalay, uban ang kagubot sa katilingban, dugang krimen, dugang kapintasan sa balay. . . . Ang mga hulga sa tibuok yuta nag-uswag, nga molabaw sa nasodnong mga katakos sa pagsulbad niini, ug paspas pa kay sa internasyonal nga mga pagsanong.”

[Mga hulagway sa panid 8]

“Sila makakaplag gayod sa ilang tumang kalipay sa kadagaya sa pakigdait.”—Salmo 37:11

[Picture Credit Lines sa panid 5]

Ikatulo gikan sa itaas, inahan ug bata: FAO photo/B. Imevbore; ubos, pagbuto: U.S. National Archive photo