Dayega si Jehova Tungod sa Iyang Dagkong mga Buhat!
Dayega si Jehova Tungod sa Iyang Dagkong mga Buhat!
“Pagapadakoon sa akong kalag si Jehova . . . tungod kay ang gamhanang Usa nagbuhat ug dagkong mga buhat alang kanako.”—LUCAS 1:46-49.
1. Tungod sa unsang dagkong mga buhat nga kita angayng modayeg kang Jehova?
SI Jehova takos dayegon tungod sa iyang dagkong mga buhat. Sa dihang ang manalagnang si Moises nag-asoy bahin sa pagkaluwas sa Israel gikan sa Ehipto, siya miingon: “Ang inyong mga mata mao ang nakakita sa tanang dagkong mga buhat ni Jehova nga iyang gihimo.” (Deuteronomio 11:1-7) Sa susama, sa dihang ang ulay nga si Maria gipahibalo sa manulondang si Gabriel bahin sa umaabot nga pagkatawo ni Jesus, siya miingon: “Pagapadakoon sa akong kalag si Jehova . . . tungod kay ang gamhanang Usa nagbuhat ug dagkong mga buhat alang kanako.” (Lucas 1:46-49) Ingong mga Saksi ni Jehova, dayegon nato siya tungod sa dagkong mga buhat sama sa pagpagawas sa Israel gikan sa pagkaulipon sa Ehipto ug sa milagrosong pagsamkon ni Maria sa iyang pinalanggang Anak.
2. (a) Unsay kahulogan sa “walay kataposang katuyoan” sa Diyos alang sa masinugtanong katawhan? (b) Unsay nasinati ni Juan didto sa isla sa Patmos?
2 Daghang dagkong mga buhat ni Jehova ang may kalambigitan sa iyang “walay kataposang katuyoan” sa pagpanalangin sa masinugtanong katawhan pinaagi sa Mesiyas ug sa pagmando sa iyang Gingharian. (Efeso 3:8-13) Kanang maong katuyoan anam-anam nga nagakatuman sa dihang ang tigulang nga si apostol Juan gitugotan sa pagtan-aw sa usa ka binuksan nga pultahan sa langit pinaagi sa panan-awon. Nadungog niya ang usa ka tingog nga samag trompeta nga nag-ingon: “Saka ngari, ug akong ipakita kanimo ang mga butang nga kinahanglang mahitabo.” (Pinadayag 4:1) Samtang gidestiyero sa Romanhong gobyerno ngadto sa isla sa Patmos “tungod sa pagsulti bahin sa Diyos ug sa pagpamatuod bahin kang Jesus,” si Juan nakadawat ug “usa ka pinadayag ni Jesu-Kristo.” Ang nakita ug nadungog sa apostol daghag gibutyag bahin sa walay-kataposang katuyoan sa Diyos, sa ingon nagtagana ug espirituwal nga kalamdagan ug tukma-sa-panahon nga pagdasig alang sa tanang matuod nga mga Kristohanon.—Pinadayag 1:1, 9, 10.
3. Kinsa ang gihawasan sa 24 ka ansiyano nga nakita ni Juan sa panan-awon?
3 Pinaagi nianang binuksan nga pultahan sa langit, nakita ni Juan ang 24 ka ansiyano, naentrono ug gipurongpurongan samag mga hari. Sila mihapa sa atubangan sa Diyos ug miingon: “Takos ikaw, Jehova, nga among Diyos, nga modawat sa himaya ug sa dungog ug sa gahom, tungod kay imong gilalang ang tanang butang, ug tungod sa imong kabubut-on sila milungtad ug nalalang.” (Pinadayag 4:11) Ang maong mga ansiyano naghawas sa tanang binanhaw nga dinihogang mga Kristohanon diha sa binayaw nga katungdanan nga gisaad sa Diyos kanila. Sila napalihok sa pagdayeg kang Jehova tungod sa iyang dagkong mga buhat nga may kalambigitan sa paglalang. Kita usab mahibulong sa pamatuod sa “walay kataposang gahom ug pagka-Diyos” ni Jehova. (Roma 1:20) Ug kon mas daghan kitag makat-onan bahin kang Jehova, mas daghan usab ang atong rason nga dayegon siya tungod sa iyang dagkong mga buhat.
Imantala ang Dalayegong mga Buhat ni Jehova!
4, 5. Paghatag ug mga pananglitan kon sa unsang paagi gidayeg ni David si Jehova.
4 Ang salmistang si David nagdayeg sa Diyos tungod sa Iyang dagkong mga buhat. Pananglitan, si David miawit: “Magaawit kamo ug mga pagdayeg kang Jehova, nga nagapuyo sa Zion; isaysay ang iyang mga buhat taliwala sa mga katawhan. Pakitai ako ug kaluoy, Oh Jehova; tan-awa ang akong kasakitan tungod kanilang nagadumot kanako, Oh ikaw nga nagatuboy kanako gikan sa mga ganghaan sa kamatayon, aron ikapahayag ko ang tanan nimong mga buhat nga dalayegon sa mga ganghaan sa anak nga babaye sa Zion.” (Salmo 9:11, 13, 14) Human ihatag ngadto sa iyang anak nga si Solomon ang arkitektural nga plano sa templo, gidayeg ug gihimaya ni David ang Diyos, nga nag-ingon: “Imo, Oh Jehova, ang pagkadako ug ang pagkagamhanan ug ang katahom ug ang kahalangdon ug ang dignidad . . . Imo ang gingharian, Oh Jehova, ang Usa usab nga nagpataas sa imong kaugalingon ingong pangulo ibabaw sa tanan. . . . Ug karon, Oh among Diyos, kami nagapasalamat kanimo ug nagadayeg sa imong maanindot nga ngalan.”—1 Cronicas 29:10-13.
5 Ang Kasulatan sublisubling nag-awhag—oo, nag-aghat—kanato sa pagdayeg sa Diyos, sama sa gibuhat ni David. Ang basahon sa Mga Salmo adunay daghang pahayag sa pagdayeg sa Diyos, ug halos katunga niining mga awita giisip nga iya ni David. Kanunay siyang nagdayeg ug nagpasalamat kang Jehova. (Salmo 69:30) Dugang pa, sukad sa unang kapanahonan, ang dinasig sa Diyos nga mga komposisyon ni David ug sa uban pa gigamit sa pagdayeg kang Jehova.
6. Sa unsang paagi ang dinasig nga Mga Salmo mapuslanon alang kanato?
6 Pagkamapuslanon gayod sa Mga Salmo alang sa mga magsisimba ni Jehova! Kon buot natong pasalamatan ang Diyos tungod sa tanan niyang dagkong mga buhat alang kanato, maayong hunahunaon nato ang maanindot nga mga pulong nga makita diha sa Mga Salmo. Pananglitan, inigbangon sa buntag mapalihok tingali kita sa pagsultig susama niini: “Maayo nga magpasalamat kang Jehova ug magaawit ug mga pagdayeg sa imong ngalan, Oh Labing Hataas; sa pagsaysay mahitungod sa imong mahigugmaong-kalulot sa kabuntagon ug sa imong pagkamatinumanon sa mga panahon sa kagabhion, . . . kay gilipay mo ako, Oh Jehova, tungod sa imong buhat; tungod sa mga buhat sa imong mga kamot magahugyaw ako sa kalipay.” (Salmo 92:1-4) Sa dihang mabuntog nato ang usa ka babag sa atong espirituwal nga pag-uswag, tingali buot natong ipakita ang kalipay ug pasalamat pinaagi sa pag-ampo, sama sa gibuhat sa salmista sa dihang siya miawit: “Dali kamo, manghugyaw kita sa kalipay kang Jehova! Maninggit kita sa kadaogan alang sa atong Bato sa kaluwasan. Manuol kita sa iyang atubangan uban ang pagpasalamat; uban ang mga awit sa pagdayeg maninggit kita sa kadaogan alang kaniya.”—Salmo 95:1, 2.
7. (a) Unsay takos tagdon bahin sa daghang awit nga giawit sa mga Kristohanon? (b) Unsay usa ka rason nga moabot ug sayo sa mga panagkatigom ug magpabilin hangtod mahuman kini?
7 Kasagaran ipatugbaw nato ang atong mga tingog pinaagi sa mga awit sa pagdayeg kang Jehova diha sa mga tigom sa kongregasyon, mga asembliya, ug mga kombensiyon. Takos tagdon nga daghan niining mga awita gipasukad sa dinasig nga mga hunahuna diha sa basahon sa Mga Salmo. Pagkamalipayon nato nga nakabaton ug tukma-sa-panahon nga koleksiyon sa makapadasig nga mga awit sa pagdayeg kang Jehova! Ang pag-awit ug mga pagdayeg sa Diyos maoy usa ka maayong rason nga moabot ug sayo sa atong mga panagkatigom ug magpabilin hangtod mahuman kini, sa ingon makig-ambit sa mga isigkamagsisimba sa pagdayeg kang Jehova pinaagi sa awit ug pag-ampo.
“Dayega Ninyo si Jah!”
8. Unsay diwa sa pulong “Aleluya,” ug sa unsang paagi kini kasagarang gihubad?
8 Ang pagdayeg kang Jehova maoy diwa sa pulong “Aleluya,” usa ka transliterasyon sa Hebreohanong ekspresyon nga halos kanunayng hubaron nga “Dayega ninyo si Jah.” Pananglitan, sa Salmo 135:1-3, atong makita kining mainiton, puwersado nga pagdapit: “Dayega ninyo si Jah! Dayega ang ngalan ni Jehova, ihatag ang pagdayeg, Oh mga alagad ni Jehova, kamo nga nagabarog sa balay ni Jehova, diha sa mga sawang sa balay sa atong Diyos. Dayega ninyo si Jah, kay si Jehova maayo. Magaawit kamo ug mga pagdayeg sa iyang ngalan, kay kini makalilipay.”
9. Unsay magtukmod kanato sa pagdayeg kang Jehova?
9 Samtang hunahunaon nato ang kahibulongang mga buhat sa Diyos sa paglalang ug ang tanan niyang mga buhat alang kanato, ang kinasingkasing nga pagpabili mopalihok kanato sa pagdayeg kaniya. Sa dihang hinuktokan nato ang milagrosong mga butang nga nahimo ni Jehova alang sa iyang katawhan sa kanhiayng mga panahon, ang atong kasingkasing magtukmod kanato sa pagdayeg kaniya. Ug samtang palandongon nato ang mga saad bahin sa dagkong mga butang nga pagabuhaton pa ni Jehova, mangita kitag mga paagi nga makapahayag ug pagdayeg ug pasalamat.
10, 11. Sa unsang paagi ang atong paglungtad mismo maghatag kanato ug rason nga modayeg sa Diyos?
10 Ang atong paglungtad mismo maghatag kanato ug maayong rason nga modayeg kang Jehova. Si David miawit: “Pagadayegon ko ikaw [Jehova] tungod kay sa makalilisang nga paagi ako katingalahan nga pagkabuhat. Ang imong mga buhat katingalahan, ingon sa nasayran pag-ayo sa akong kalag.” (Salmo 139:14) Oo, kita “katingalahan nga pagkabuhat” ug dunay bililhong mga gasa sama sa panan-aw, pandungog, ug katakos sa paghunahuna. Busa, dili ba angay kitang magkinabuhi sa paagi nga magdayeg sa atong Magbubuhat? Gipahayag ni Pablo ang susamang mga hunahuna sa dihang siya misulat: “Kon kamo magakaon o magainom o magabuhat sa bisan unsa, himoa ang tanang butang alang sa kahimayaan sa Diyos.”—1 Corinto 10:31.
11 Buhaton nato ang tanang butang alang sa kahimayaan ni Jehova kon kita tinuod nga nahigugma kaniya. Si Jesus nag-ingon nga ang unang sugo mao: “Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan ug sa tibuok mong kusog.” (Marcos 12:30; Deuteronomio 6:5) Angay gayod natong higugmaon si Jehova ug dayegon siya ingong atong Magbubuhat ug Maghahatag sa “matag maayong gasa ug matag hingpit nga regalo.” (Santiago 1:17; Isaias 51:13; Buhat 17:28) Makataronganong buhaton nato kana tungod kay ang atong mga katakos sa pagpangatarongan, atong espirituwal nga kapasidad, ug ang atong pisikal nga kusog—ang tanan natong mga hiyas ug mga katakos—gikan kang Jehova. Ingong atong Maglalalang, takos siya sa atong paghigugma ug pagdayeg.
12. Unsay imong pagbati bahin sa dagkong mga buhat ni Jehova ug sa mga pulong sa Salmo 40:5?
12 Ang dagkong mga buhat ni Jehova naghatag kanato ug daghang rason nga mahigugma ug modayeg kaniya! “Daghang butang ang imong nabuhat, Oh Jehova nga Diyos ko, bisan ang imong katingalahang mga buhat ug ang imong mga hunahuna nganhi kanamo,” miawit si David. “Walay mausa nga ikatandi kanimo. Sa dihang buot ko nga isaysay ug hisgotan sila, daghan pa sila kay sa akong ikabatbat.” (Salmo 40:5) Dili ikabatbat ni David ang tanang katingalahang mga buhat ni Jehova, ug mao man usab kita. Apan dayegon nato kanunay ang Diyos sa dihang ipatagad kanato ang bisan hain sa iyang dagkong mga buhat.
Mga Buhat nga Nalangkit sa Walay-Kataposang Katuyoan sa Diyos
13. Sa unsang paagi ang atong paglaom nalangkit pag-ayo sa dagkong mga buhat sa Diyos?
13 Ang atong paglaom alang sa umaabot nalangkit pag-ayo sa dagko ug dalayegon nga mga buhat nga nalambigit sa walay-kataposang katuyoan sa Diyos. Human sa rebelyon didto sa Eden, gihatag ni Jehova ang unang tagna nga tugob sa paglaom. Nagpahayag sa hukom ngadto sa bitin, ang Diyos miingon: “Ibutang ko ang panag-away tali kanimo ug sa babaye ug tali sa imong binhi ug sa iyang binhi. Siya magsamad kanimo sa ulo ug ikaw magsamad kaniya sa tikod.” (Genesis 3:15) Ang paglaom sa gisaad nga Binhi sa babaye nagpabilin diha sa kasingkasing sa matinumanong mga tawo human himoa ni Jehova ang usa ka dakong buhat pinaagi sa pagtipig kang Noe ug sa iyang pamilya latas sa tibuok-yuta nga Lunop nga nagpapha sa daotan nga kalibotan. (2 Pedro 2:5) Ang matagnaong mga saad ngadto sa mga tawo sa pagtuo sama kang Abraham ug David naghatag ug dugang pagsabot sa kon unsay palamposon ni Jehova pinaagi nianang maong Binhi.—Genesis 22:15-18; 2 Samuel 7:12.
14. Unsa ang kinalabwang pananglitan sa dagkong mga buhat ni Jehova alang sa katawhan?
14 Ang kinalabwang pagpadayag ni Jehova ingong usa nga nagahimo ug dagkong mga buhat alang sa katawhan nahitabo sa dihang iyang gihatag ang iyang bugtong Anak—ang gisaad nga Binhi, si Jesu-Kristo—ingong halad lukat. (Juan 3:16; Buhat 2:29-36) Ang lukat nagtaganag pasukaranan sa pagpasig-uli ngadto sa Diyos. (Mateo 20:28; Roma 5:11) Gitigom ni Jehova ang unang mga napasig-uli diha sa Kristohanong kongregasyon, nga natukod sa Pentekostes 33 K.P. Sa tabang sa balaang espiritu, sila nagsangyaw sa maayong balita sa tanang dapit, nga nagpakita kon sa unsang paagi ang kamatayon ug pagkabanhaw ni Jesus nagbukas sa dalan aron ang masinugtanong katawhan makatagamtam ug walay-kataposang mga panalangin ilalom sa pagmando sa langitnong Gingharian sa Diyos.
15. Sa unsang paagi milihok si Jehova sa katingalahang paagi sa atong adlaw?
15 Sa atong adlaw, si Jehova milihok sa katingalahang paagi sa pagtigom sa nanghibiling dinihogan nga mga Kristohanon. Ang mga hangin sa kalaglagan gipugngan sa paghatag ug higayon nga matimrehan ang mga nanghibilin sa 144,000, kinsa magamando uban kang Kristo sa langit. (Pinadayag 7:1-4; 20:6) Gitino sa Diyos nga ang dinihogang mga Kristohanon mapagawas gikan sa espirituwal nga pagkaulipon sa “Dakong Babilonya,” ang tibuok-kalibotang imperyo sa bakak nga relihiyon. (Pinadayag 17:1-5) Kanang maong pagpagawas sa 1919 ug ang panalipod sa Diyos nga ilang nasinati sukad niadto nagtugot sa dinihogang nanghibilin sa pagbuhat sa unsa? Sa pagsidlak pinaagi sa paghatag sa kataposang pamatuod sa dili pa taposon ni Jehova ang daotang sistema sa mga butang ni Satanas sa tuling nagasingabot nga “dakong kasakitan.”—Mateo 24:21; Daniel 12:3; Pinadayag 7:14.
16. Unsay nagakahitabo ingong resulta sa presenteng-adlaw nga tibuok-kalibotang buluhaton nga pagsangyaw sa Gingharian?
16 Ang dinihogang mga Saksi ni Jehova masibotong nanguna sa tibuok-kalibotang buluhaton nga pagsangyaw sa Gingharian. Ingong resulta, sa pagkakaron ang nagkadaghan nga “ubang mga karnero” nangahimong mga magsisimba ni Jehova. (Juan 10:16) Kita nalipay nga bukas pa gihapon ang kahigayonan aron ang mga maaghop sa yuta makaduyog kanato sa pagdayeg kang Jehova. Kadtong mosanong sa awhag nga “umari ka” maanaa sa kahimtang nga pagatipigang-buhi latas sa dakong kasakitan, uban ang paglaom nga magdayeg kang Jehova hangtod sa kahangtoran.—Pinadayag 22:17.
Linibo ang Nagpanon Ngadto sa Matuod nga Pagsimba
17. (a) Sa unsang paagi nagahimo si Jehova ug dagkong mga buhat maylabot sa atong kalihokang pagsangyaw? (b) Sa unsang paagi nagakatuman ang Zacarias 8:23?
17 Sa pagkakaron si Jehova nagahimog dagko ug dalayegong mga buhat maylabot sa atong kalihokang pagsangyaw. (Marcos 13:10) Sa di pa dugayng katuigan, iyang ‘gibuksan ang dagkong mga pultahan nga nagatultol ngadto sa kalihokan.’ (1 Corinto 16:9) Nagpaposible kini nga ang maayong balita ikamantala latas sa dagkong mga teritoryo diin ang mga kaaway sa kamatuoran mibabag kaniadto. Daghan nga nagpuyo kanhi sa espirituwal nga kangitngit sa pagkakaron misanong na sa awhag nga mosimba kang Jehova. Ilang ginatuman kining matagnaong mga pulong: “Mao kini ang giingon ni Jehova sa mga panon, ‘Mahitabo unya niadtong mga adlawa nga napulo ka tawo gikan sa tanang pinulongan sa mga nasod mokupot, oo, sila gayod mokupot sa sidsid sa tawo nga usa ka Hudiyo, nga magaingon: “Mouban kami kaninyo, kay kami nakadungog nga ang Diyos nagauban kaninyo.”’” (Zacarias 8:23) Ang giingnan sa “napulo ka tawo” mao ang espirituwal nga mga Hudiyo, ang presenteng-adlaw nga nanghibilin sa dinihogang mga Kristohanon. Tungod kay ang napulo naghawas sa pagkabug-os sa yutan-ong diwa, ang “napulo ka tawo” naghawas sa “dakong panon,” nga gihiusa uban “sa Israel sa Diyos,” nga uban kanila sila mahimong “usa ka panon.” (Pinadayag 7:9, 10; Galacia 6:16) Pagkamakalilipay nga makita ang daghan kaayo karon nga nahiusang nagahatag ug sagradong pag-alagad ingong mga magsisimba ni Jehova nga Diyos!
18, 19. Unsay pamatuod nga si Jehova nagapanalangin sa buluhatong pagsangyaw?
18 Kita nalipay nga tinagpulo ka libo—gani, gatosan ka libo—ang misagop sa matuod nga pagsimba diha sa mga nasod nga kaniadto gidominar pag-ayo sa bakak nga relihiyon nga morag ang mga tawo dili gayod modawat sa maayong balita. Tan-awa ang bag-ong Yearbook of Jehovah’s Witnesses, ug matikdi ang mga nasod nga sa pagkakaron nagtaho ug gikan sa 100,000 ngadto sa duolan sa 1,000,000 ka magmamantala sa Gingharian. Kini maoy dakong pamatuod nga ang buluhatong pagsangyaw sa Gingharian ginapanalanginan ni Jehova.—Proverbio 10:22.
19 Ingong katawhan ni Jehova, atong dayegon ug pasalamatan ang atong langitnong Amahan tungod sa paghatag kanato ug tinuod nga katuyoan sa kinabuhi, magantihong buluhaton diha sa pag-alagad kaniya, ug usa ka masanag nga panglantaw sa umaabot. Kita nagkinabuhi nga mahinamong nagpaabot sa katumanan sa tanang saad sa Diyos ug determinadong ‘magpabilin diha sa gugma sa Diyos, nga nagapanglantaw sa kinabuhing walay kataposan.’ (Judas 20, 21) Pagkamalipayon nato sa pagkakita nga ang dakong panon nga nagadayeg sa Diyos karon mikabat na ug mga 6,000,000! Uban sa dayag nga panalangin ni Jehova, ang dinihogang nanghibilin duyog sa ubang mga karnero giorganisar diha sa mga 91,000 ka kongregasyon sa 235 ka kayutaan. Kitang tanan maayong pagkapakaon sa espirituwal pinaagi sa malahutayong mga paningkamot sa “matinumanon ug maalamong ulipon.” (Mateo 24:45) Ang mauswagon nga teokratikanhong organisasyon mahigugmaong nagdumala sa buluhaton sa Gingharian pinaagi sa 110 ka sangang buhatan sa mga Saksi ni Jehova. Kita mapasalamaton nga gipalihok ni Jehova ang kasingkasing sa iyang katawhan sa ‘pagpasidungog kaniya pinaagi sa ilang bililhong mga butang.’ (Proverbio 3:9, 10) Busa, ang atong tibuok-kalibotang buluhaton nga pagsangyaw nagpadayon, nga nagapanukod ug mga pasilidad sa pag-imprenta, mga puy-anang Bethel ug mga puy-anan sa mga misyonaryo, mga Kingdom Hall, ug mga Assembly Hall segun sa gikinahanglan.
20. Sa unsang paagi ang pagpamalandong sa dagko ug dalayegong mga buhat ni Jehova makaapektar kanato?
20 Imposible nga mahisgotan nato ang tanang dagko ug dalayegong mga buhat sa atong langitnong Amahan. Apan aduna bay tawo nga matul-id ug kasingkasing nga makaakong dili moduyog sa panon sa mga magdadayeg ni Jehova? Siyempre wala! Busa, hinaot ang tanang nahigugma sa Diyos mohugyaw sa kalipay: “Dayega ninyo si Jah! Dayega ninyo si Jehova gikan sa kalangitan, dayega ninyo siya diha sa mga kahitas-an. Dayega ninyo siya, kamong tanan niyang mga manulonda . . . , kamong mga batan-ong lalaki ug kamong mga ulay usab, kamong mga tigulang nga lalaki uban sa mga batang lalaki. Padayega sila sa ngalan ni Jehova, kay ang iyang ngalan lamang maoy hataas uyamot. Ang iyang dignidad maoy labaw pa sa yuta ug sa langit.” (Salmo 148:1, 2, 12, 13) Oo, karon ug sa walay kataposan, dayegon nato si Jehova tungod sa iyang dagkong mga buhat!
Unsaon Nimo Pagtubag?
• Unsa ang pipila sa dalayegong mga buhat ni Jehova?
• Nganong natukmod ka sa pagdayeg kang Jehova?
• Sa unsang paagi ang atong paglaom nalangkit sa dagkong mga buhat sa Diyos?
• Sa unsang paagi si Jehova nagahimo ug dalayegong mga buhat maylabot sa buluhaton nga pagsangyaw sa Gingharian?
[Mga Pangutana sa Pagtuon]
[Hulagway sa panid 10]
Ikaw ba kinasingkasing nga moduyog sa pag-awit ug mga pagdayeg kang Jehova?
[Mga hulagway sa panid 13]
Kita nalipay nga bukas pa gihapon ang kahigayonan aron ang mga maaghop makaduyog kanato sa pagdayeg kang Jehova