Mga Pangutana Gikan sa mga Magbabasa

Kanus-a gidihogan ang “Balaan sa mga Balaan,” ingon sa gitagna sa Daniel 9:24?

Ang Daniel 9:24-27 maoy usa ka tagna mahitungod sa pagtungha sa “Mesiyas nga Pangulo”—ang Kristo. Busa, ang gitagnang pagdihog sa “Balaan sa mga Balaan” wala magtumong sa pagdihog sa Labing Balaang lawak sa templo sa Jerusalem. Hinunoa, ang ekspresyon nga “Balaan sa mga Balaan” nagtumong sa langitnong sangtuwaryo sa Diyos—ang langitnong Labing Balaan—sa dakong espirituwal nga templo ni Jehova. a—Hebreohanon 8:1-5; 9:2-10, 23.

Kanus-a nagsugod sa paglihok ang espirituwal nga templo sa Diyos? Buweno, tagda kon unsay nahitabo sa dihang gipresentar ni Jesus ang iyang kaugalingon alang sa bawtismo niadtong 29 K.P. Sukad nianang tungora sa iyang kinabuhi padayon, gituman ni Jesus ang mga pulong sa Salmo 40:6-8. Gipakita ni apostol Pablo sa ulahi nga si Jesus nag-ampo sa Diyos: “Ang halad ug gasa wala nimo tinguhaa, apan ikaw nag-andam ug lawas alang kanako.” (Hebreohanon 10:5) Si Jesus nahibalo nga ang Diyos ‘wala magtinguha’ nga ang mga halad nga hayop padayong igatanyag diha sa templo sa Jerusalem. Hinunoa, si Jehova nag-andam ug usa ka hingpit nga tawhanong lawas nga itanyag ni Jesus ingong usa ka halad. Nagpahayag sa iyang kinasingkasing nga tinguha, si Jesus nagpadayon: “Tan-awa! Ako mianhi (sa linukot nga basahon kini nahisulat bahin kanako) sa pagbuhat sa imong kabubut-on, Oh Diyos.” (Hebreohanon 10:7) Ug unsay sanong ni Jehova? Ang Ebanghelyo ni Mateo nag-ingon: “Human mabawtismohi, si Jesus mihaw-as gilayon sa tubig; ug, tan-awa! ang mga langit nabuksan, ug iyang nakita nga mikunsad diha kaniya ang espiritu sa Diyos ingon sa usa ka salampati. Tan-awa! Dihay tingog usab gikan sa mga langit nga nag-ingon: ‘Kini mao ang akong Anak, ang hinigugma, nga akong giuyonan.’”—Mateo 3:16, 17.

Ang pagdawat ni Jehova nga Diyos sa pagtanyag sa lawas ni Jesus alang sa halad nagkahulogan nga naglungtad na ang usa ka halaran nga mas dako kay sa literal nga halaran sa templo sa Jerusalem. Kini maoy halaran sa “kabubut-on” sa Diyos, o kahikayan alang sa pagdawat sa tawhanong kinabuhi ni Jesus ingong usa ka halad. (Hebreohanon 10:10) Ang pagdihog kang Jesus sa balaang espiritu nagkahulogang ang Diyos nagpatungha na karon sa iyang tibuok nga kahikayan sa espirituwal nga templo. b Busa, sa panahon sa pagbawtismo ni Jesus, ang langitnong puloy-anan sa Diyos gidihogan, o gilain, ingong “Balaan sa mga Balaan” diha sa dakong kahikayan sa espirituwal nga templo.

[Mga footnote]

[Hulagway sa panid 27]

“Ang Balaan sa mga Balaan” gidihogan sa dihang gibawtismohan si Jesus