Barog nga Bug-os ug May Hugot nga Pagtuo

‘Tan-awa! Ang Dakong Panon!’

KADTO maoy usa ka pangutana nga nakapalibog sa mga alagad ni Jehova sulod sa daghang dekada. Dugay na kining gipaningkamotang masulbad sa Kasulatanhong paagi. Ang maong ulohan nakapatunghag daghang diskusyon. Apan ang Biblikanhong tubag nakaplagan sa kataposan, ug kini hilabihang nakapaukyab sa mga mamiminaw sa kombensiyon sa Washington, D.C., sa tuig 1935.

Ang hinungdan sa maong diskusyon mao ang usa ka komon nga pangutana: Unsa ang ilhanan sa “dakong pundok” (King James Version), o “dakong panon” (Bag-ong Kalibotang Hubad), nga gihisgotan sa Pinadayag 7:9? Kini bang grupoha sa mga magtutuo mopuyo sa langit?

Usa ka Dugay Nang Pangutana

Sukad sa panahon ni apostol Juan hangtod sa atong adlaw, ang mga Kristohanon nalibog mahitungod sa ilhanan sa “dakong pundok.” Ang mga Estudyante sa Bibliya nag-isip sa dakong panon ingon nga segundaryong langitnon nga matang, usa ka grupo nga may kahibalo sa kamatuoran sa Bibliya apan wala kaayoy nahimo sa pagsabwag niini.

Hinunoa, dihay pipila ka kaubanan sa dinihogang mga Kristohanon nga masiboton kaayo sa buluhatong pagsangyaw. Wala sila magtinguha nga moadto sa langit. Sa pagkatinuod, ang ilang paglaom nahiuyon sa pakigpulong publiko nga “Minilyong Buhi Karon Dili na Gayod Mamatay,” nga gipasiugda sa katawhan ni Jehova gikan sa 1918 hangtod sa 1922. Ang maong mga indibiduwal pagapanalanginan ug kinabuhing walay kataposan ibabaw sa yuta.

Ang The Watch Tower sa Oktubre 15, 1923, naghisgot sa sambingay ni Jesus bahin sa mga karnero ug mga kanding ug miingon: “Ang mga karnero naghawas sa tanang katawhan sa mga nasod, dili inanak-sa-espiritu apan nakiling alang sa pagkamatarong, kinsa diha sa hunahuna nagaila kang Jesu-Kristo ingong Ginoo ug kinsa nagapaabot ug nagalaom sa usa ka mas maayong panahon ilalom sa iyang pagmando.”—Mateo 25:31-46.

Dugang Bidlisiw sa Kahayag

Sa tuig 1931, ang Vindication, Unang Tomo, naghisgot sa Ezequiel kapitulo 9 ug nagpaila niadtong minarkahan sa agtang alang sa kaluwasan sa kataposan sa kalibotan ingong ang mga karnero sa sambingay ni Jesus. Ang Vindication, Ikatulong Tomo (gipatik sa 1932), naghubit sa matul-id nga tinamdan sa kasingkasing sa dili-Israelinhong lalaki nga si Jehonadab, kinsa misakay sa karo sa dinihogang Haring Jehu sa Israel ug miuban aron sa pagsaksi sa kasibot ni Jehu sa pagpamatay sa bakak nga mga magsisimba. (2 Hari 10:15-28) Ang maong basahon nag-ingon: “Si Jehonadab naghawas o naglandong sa matang sa mga tawo nga ania karon sa yuta [kinsa] wala mopahiuyon sa organisasyon ni Satanas, kinsa mibarog dapig sa pagkamatarong, ug mao ang mga tawo nga pagatipigang buhi sa Ginoo panahon sa Armagedon, nga magluwas kanila latas sa maong kasakitan, ug maghatag kanila ug kinabuhing walay kataposan ibabaw sa yuta. Sila ang maglangkob sa ‘karnero’ nga matang.”

Sa 1934, gipatin-aw sa The Watchtower nga ang mga Kristohanon nga may yutan-ong paglaom kinahanglang magpahinungod kang Jehova ug magpabawtismo. Ang kahayag mahitungod niining yutan-ong matang nag-anam-anam gayod ka dan-ag!—Proverbio 4:18.

Usa ka Mahayag nga Dan-ag sa Pagsabot

Ang pagsabot sa Pinadayag 7:9-17 hapit nang mosidlak diha sa naggilakgilak nga kadan-ag. (Salmo 97:11) Gipahayag sa The Watchtower ang paglaom nga ang usa ka kombensiyon nga gieskedyul sa Mayo 30 hangtod sa Hunyo 3, 1935, sa Washington, D.C., T.B.A., mahimong “usa ka tinuod nga kahupayan ug kaayohan” alang niadtong gilarawanan ni Jehonadab. Ug kadto natuman gayod!

Diha sa makapapukaw nga pakigpulong nga “Ang Dakong Pundok,” nga gipahayag  ngadto sa duolag 20,000 ka kombensiyonista, si J. F. Rutherford nagpakitag Kasulatanhong pamatuod nga ang modernong-adlaw nga “ubang mga karnero” managsama ra sa “dakong panon” sa Pinadayag 7:9. (Juan 10:16) Sa kinatayuktokan niini nga pakigpulong, ang mamumulong nangutana: “Mahimo bang motindog palihog ang tanang naghambin sa paglaom nga mabuhing walay kataposan sa yuta?” Sa dihang mitindog ang kadaghanan sa mga mamiminaw, si Rutherford miingon: “Tan-awa! Ang dakong pundok!” Dihay kahilom, nga gisundan sa lanog nga pagpamakpak. Sa pagkasunod adlaw, 840 ka bag-ong mga Saksi ni Jehova ang nabawtismohan, nga kadaghanan kanila nagpahayag nga bahin sa dakong panon.

Usa ka Talagsaong Presensiya

Sa wala pa ang 1935, ang nag-uswag nga gidaghanon niadtong misanong sa mensahe sa Bibliya ug nagpakitag kasibot sa pagsangyaw sa maayong balita nagpadayag ug interes nga mabuhing walay kataposan sa Paraisong yuta. Wala silay tinguha nga moadto sa langit, tungod kay wala ihatag kanila sa Diyos ang paglaom sa langitnong kinabuhi. Ang pagpaila nila sa ilang kaugalingon duyog sa dakong panon sa ubang mga karnero nagpakita nga niadtong 1935 halos nakompleto na ang pagtawag sa 144,000 ka dinihogang mga Kristohanon.—Pinadayag 7:4.

Sa dihang miulbo ang Gubat sa Kalibotan II, si Satanas nga Yawa naningkamot pag-ayo nga mahunong ang pagpanigom niadtong maglangkob sa dakong panon. Ang buluhatong pagsangyaw sa Gingharian gipig-otan sa daghang nasod. Sulod niadtong mangiob nga mga adlaw, ug sa wala madugay ayha pa sa iyang kamatayon niadtong Enero 1942, si J. F. Rutherford nag-ingon: “Morag mipakita nga ang ‘dakong pundok’ dili ra gayod diay dako.”

Apan tungod sa panalangin sa Diyos, lahi ang nahitabo. Kay ‘nagabarog nga bug-os ug may hugot nga pagtuo,’ ang mga dinihogan ug ang ilang mga kauban, ang ubang mga karnero, nagtuman sa paghimog-tinun-an nga buluhaton. (Colosas 4:12; Mateo 24:14; 28:19, 20) Sa 1946, ang gidaghanon sa mga Saksi ni Jehova nga nagsangyaw sa tibuok kalibotan maoy 176,456—nga ang kadaghanan kanila sakop sa dakong panon. Sa 2000, kapin sa 6,000,000 ka Saksi ang nag-alagad nga matinumanon kang Jehova diha sa 235 ka kayutaan—usa gayod ka dakong panon! Ug ang gidaghanon padayon pang nagauswag.