“Kon ang Diyos Dapig Kanato, Kinsa ang Batok Kanato?”
“Kon ang Diyos Dapig Kanato, Kinsa ang Batok Kanato?”
“Nan, unsay atong ikaingon niining mga butanga? Kon ang Diyos dapig kanato, kinsa ang batok kanato?”—ROMA 8:31.
1. Kinsay miuban sa mga Israelinhon sa pagbiya gikan sa Ehipto, ug unsay nakaaghat kanila sa pagbiya?
SA DIHANG ang mga Israelinhon nagpanaw paingon sa kagawasan human nakapuyo ug 215 ka tuig sa Ehipto, nga ang kadaghanan nianang mga tuiga ingong ulipon, “usa ka dakong panon sa nagkasagol nga panon sa katawhan miuban usab kanila.” (Exodo 12:38) Kining mga dili-Israelinhon nakaagom ug napulo ka makahahadlok nga mga hampak nga nakahatag ug dakong kadaot sa Ehipto ug nakahatag kinig kaulawan sa iyang mga diyosdiyos. Sa samang higayon, ilang nakita—ilabina gikan sa ikaupat nga hampak hangtod sa ikanapulo—ang katakos ni Jehova sa pagpanalipod sa iyang katawhan. (Exodo 8:23, 24) Bisan tuod limitado ang ilang kahibalo bahin sa mga katuyoan ni Jehova, sila segurado sa usa ka butang: Ang mga diyos sa Ehipto wala makapanalipod sa mga Ehiptohanon, samtang napamatud-an ni Jehova ang iyang kaugalingon nga gamhanan alang sa mga Israelinhon.
2. Nganong gitabangan ni Rahab ang Israelinhong mga espiya, ug nganong wala masayop ang iyang pagsalig sa ilang Diyos?
2 Kap-atan ka tuig sa ulahi, sa wala pa mosulod ang mga Israelinhon sa Yutang Saad, ang manununod ni Moises nga si Josue nagpadalag duha ka tawo sa pagpangespiya sa yuta. Didto ilang nakaila si Rahab, usa ka molupyo sa Jerico. Segun sa iyang nadungog bahin sa gamhanang mga buhat ni Jehova sa pagpanalipod sa mga Israelinhon sa 40 ka tuig sukad nga mibiya sila sa Ehipto, siya nahibalo nga kon siya buot nga makadawat ug panalangin sa Diyos, kinahanglang motabang siya sa katawhan sa Diyos. Tungod sa iyang maalamong desisyon, siya ug ang iyang panimalay wala laglaga sa dihang giilog sa mga Israelinhon ang siyudad. Ang milagrosong paagi sa pagluwas kanila maoy usa ka klarong pamatuod mismo nga ang Diyos nagauban kanila. Busa, wala masayop si Rahab sa pagsalig sa Diyos sa mga Israelinhon.—Josue 2:1, 9-13; 6:15-17, 25.
3. (a) Unsang milagro ang gihimo ni Jesus duol sa gitukod pag-usab nga siyudad sa Jerico, ug unsay reaksiyon sa klerong Hudiyo? (b) Unsay naamgohan sa ubang mga Hudiyo, ug sa ulahi sa daghang dili-Hudiyo?
3 Napulog-lima ka siglo sa ulahi, giayo ni Jesu-Kristo ang usa ka buta nga makililimos duol sa gitukod pag-usab nga siyudad sa Jerico. (Marcos 10:46-52; Lucas 18:35-43) Kining tawhana nangaliyupo kang Jesus nga kaluy-an siya, nga nagpakita nga siya nahibalo nga si Jesus gipaluyohan sa Diyos. Ang Hudiyong mga pangulo sa relihiyon ug ang ilang mga sumusunod, sa laing bahin, sa katibuk-an wala motuo sa mga milagro nga gihimo ni Jesus ingong pamatuod nga siya naghimo sa buluhaton sa Diyos. Hinunoa, ilang gipangitaan siya ug sayop. (Marcos 2:15, 16; 3:1-6; Lucas 7:31-35) Bisan sa panahon nga ilang nahibaloan nga si Jesus nabanhaw human nga ilang gipapatay siya, sila dili gihapon modawat nga kini buhat sa Diyos. Hinunoa, nanguna sila sa paglutos sa mga sumusunod ni Jesus, nga naningkamot sa pagpahunong sa ilang buluhaton nga ‘pagpahayag sa maayong balita bahin sa Ginoong Jesus.’ Apan ang ubang mga Hudiyo, ug sa ulahi ang daghang dili-Hudiyo, nakamatikod niining mga hitaboa ug giayo kini pagtimbangtimbang. Alang kanila dayag nga gisalikway sa Diyos ang nagpakamatarong sa kaugalingon nga Hudiyong mga pangulo ug nagpaluyo sa mapainubsanong mga sumusunod ni Jesu-Kristo.—Buhat 11:19-21.
Kinsa Karon ang Gipaluyohan sa Diyos?
4, 5. (a) Unsay gibati sa ubang mga tawo bahin sa pagpili ug relihiyon? (b) Sa pag-ila sa tinuod nga relihiyon, unsa ang hinungdanon kaayong pangutana?
4 Kon bahin sa pangutana mahitungod sa tinuod nga relihiyon, usa ka klerigo miingon sa di pa dugayng interbiyo diha sa TV: “Iinsistir nako nga tinuod ang relihiyon kon kini makapabuotan ug tawo kon siya nagkinabuhi nga nahiuyon niana.” Bitaw, ang tinuod nga relihiyon makapabuotan ug mga tawo. Apan usa ka pamatuod na ba nga gipaluyohan kini sa Diyos tungod kay kini nakapatungha ug mga tawong buotan? Mao ba lamang kana ang sukdanan sa pagtino kon tinuod ang usa ka relihiyon?
5 Giapresyar sa matag usa nga sila makapili kon unsay ilang gusto, apil ang pagpili sa relihiyon nga aniban. Apan ang pagkabaton ug kagawasan sa pagpili dili garantiya nga ang tawo makahimog hustong pagpili. Ang ubang mga tawo, pananglitan, mopili ug relihiyon pinasukad sa gidaghanon, bahandi, maluho nga mga rituwal niini, o sa ilang kaparyentehan. Walay usa niining mga butanga sa bisan unsang paagi ang makatino kon tinuod ba o dili ang usa ka relihiyon. Ang hinungdanon kaayong pangutana niining bahina mao: Unsang relihiyona ang nag-agda sa mga sumusunod niini sa pagtuman sa kabubut-on sa Diyos ug naghatag ug lig-ong pamatuod nga nagpaluyo ang Diyos, nga sa ingon ang mga sumusunod niini masaligong makaingon, “ang Diyos dapig kanato”?
6. Unsang mga pulong ni Jesus ang nakahatag ug katin-awan bahin sa tinuod ug bakak nga relihiyon?
6 Si Jesus naghatag ug lagda sa pag-ila sa matuod nga pagsimba gikan sa bakak sa dihang siya miingon: “Pagbantay sa mini nga mga manalagna nga manganha kaninyo nga nagsapot sa pagkakarnero, apan sa sulod sila maoy mga lobo nga manunukob. Pinaagi sa ilang mga bunga kamo makaila kanila.” (Mateo 7:15, 16; Malaquias 3:18) Atong susihon pag-usab ang pipila sa “mga bunga,” o mga timaan, sa tinuod nga relihiyon aron matino nato kon kinsa karon ang gipaluyohan sa Diyos.
Mga Timaan Niadtong Gipaluyohan sa Diyos
7. Unsay kahulogan sa pagtudlo pinasukad lamang sa kon unsay gipadayag sa Bibliya?
7 Ilang gipasukad ang ilang mga doktrina diha sa Bibliya. Si Jesus miingon: “Ang gitudlo ko dili akoa, kondili iya sa nagpadala kanako. Kon si bisan kinsa magtinguha sa pagbuhat sa Iyang kabubut-on, mahibalo siya mahitungod sa pagtulon-an kon kini gikan ba sa Diyos o nagsulti ba ako sa akoa rang kaugalingon.” Ug usab: “Siya nga gikan sa Diyos magapatalinghog sa mga pulong sa Diyos.” (Juan 7:16, 17; 8:47) Sa makataronganon, aron matagamtam ang pagpaluyo sa Diyos, kinahanglang magtudlo lamang kon unsay gipadayag sa Diyos diha sa iyang Pulong ug dili motuo sa mga pagtulon-an nga gipasukad sa tawhanong kaalam o tradisyon.—Isaias 29:13; Mateo 15:3-9; Colosas 2:8.
8. Nganong hinungdanong gamiton ang ngalan sa Diyos sa pagsimba?
8 Ilang gigamit ug gimantala ang ngalan sa Diyos, si Jehova. Si Isaias nagtagna: “Nianang adlawa kamo tinong moingon: ‘Pagpasalamat kamo kang Jehova! Tawga ang iyang ngalan. Ipahibalo taliwala sa mga katawhan ang iyang mga pakiglabot. Hisgoti nga ang iyang ngalan gibayaw. Magaawit kamo ug mga pagdayeg kang Jehova, kay nakabuhat siya nga labaw gayod. Gipahibalo kini sa tibuok yuta.’” (Isaias 12:4, 5) Gitudloan ni Jesus ang iyang mga tinun-an sa pag-ampo: “Amahan namo nga anaa sa mga langit, pagabalaanon unta ang imong ngalan.” (Mateo 6:9) Busa, Hudiyo man o dili-Hudiyo, ang mga Kristohanon angayng moalagad ingong ‘usa ka katawhan alang sa ngalan’ sa Diyos. (Buhat 15:14) Dayag nga malipayng mopaluyo ang Diyos niadtong magarbohon nga mahimong “usa ka katawhan alang sa iyang ngalan.”
9. (a) Nganong ang kangaya magpaila sa mga sakop sa tinuod nga relihiyon? (b) Sa unsang paagi gitandi ni Isaias ang tinuod nga relihiyon batok sa bakak?
9 Ilang gipabanaag ang mangayaong personalidad sa Diyos. Ingong awtor sa “maayong balita,” si Jehova mao ang “malipayong Diyos.” (1 Timoteo 1:11) Busa sa unsang paagi mahitabo nga ang iyang mga magsisimba mahimong dili malipayon o kanunayng negatibo ug panglantaw? Bisan pa sa kagubot sa kalibotan ug personal nga mga problema, ang tinuod nga mga Kristohanon naghupot ug mangayaong espiritu tungod kay sila regular nga nagakaon ug dagayang espirituwal nga pagkaon. Gitandi sila ni Isaias niadtong nagsubayg bakak nga relihiyon: “Mao kini ang giingon sa Soberanong Ginoong Jehova: ‘Tan-awa! Ang akong mga alagad mangaon, apan kamo panggutomon. Tan-awa! Ang akong mga alagad manginom, apan kamo pang-uhawon. Tan-awa! Ang akong mga alagad managmaya, apan kamo manag-antos sa kaulawan. Tan-awa! Ang akong mga alagad managhugyaw sa kalipay tungod sa maayong kahimtang sa kasingkasing, apan kamo managtuaw tungod sa kasakit sa kasingkasing ug kamo motiyabaw tungod sa bug-os nga pagkahugno sa espiritu.’”—Isaias 65:13, 14.
10. Sa unsang paagi kadtong naghupot sa tinuod nga relihiyon maglikay nga makakat-on pinaagi sa pag-eksperimento?
10 Ilang gipasukad ang ilang paggawi ug ilang mga desisyon sa mga prinsipyo sa Bibliya. “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot,” ang magsusulat sa Proverbio nagtambag kanato, “sa tanan mong mga dalan tagda siya, ug siya magatul-id sa imong mga alagianan.” (Proverbio 3:5, 6) Paluyohan sa Diyos kadtong modangop kaniya alang sa giya imbes mosalig sa nagkasumpaking mga teoriya sa mga tawo nga nagsalikway sa kaalam sa Diyos. Kon unsa ang sukod sa pagkaandam sa tawo sa pagpahiuyon sa iyang kinabuhi sumala sa Pulong sa Diyos, sa ingon usab nga sukod nga siya maglikay sa pagkakat-on pinaagi sa pag-eksperimento.—Salmo 119:33; 1 Corinto 1:19-21.
11. (a) Nganong ang mga sakop sa tinuod nga relihiyon dili mahimong bahinon sa klero ug layko nga matang? (b) Unsang panig-ingnan niadtong nagapanguna sa katawhan sa Diyos ang gipakita alang sa panon?
11 Sila organisado sa paagi sa pagkaorganisar sa unang-siglo nga Kristohanong kongregasyon. Si Jesus naglatid ug prinsipyo: “Ayaw kamo pagpatawag nga Rabbi, kay usa ra ang inyong magtutudlo, samtang kamong tanan mga igsoon. Dugang pa, ayaw ninyo tawgang amahan si bisan kinsa dinhi sa yuta, kay usa ra ang inyong Amahan, ang langitnong Usa. Ayaw kamo pagpatawag nga ‘mga pangulo,’ kay usa ra ang inyong Pangulo, si Kristo. Apan ang labing dako taliwala kaninyo kinahanglang mahimong inyong alagad.” (Mateo 23:8-11) Ang kongregasyon sa mga igsoon dili moangay ug hambogirong klero nga matang nga nagpasidungog sa ilang kaugalingon pinaagi sa magarbohong mga titulo ug nagtuboy sa kaugalingon labaw sa layko. (Job 32:21, 22) Kadtong nagbantay sa panon sa Diyos gisugo sa pagbantay “dili nga pinugos, kondili kinabubut-on; ni tungod sa gugma sa kinitaan pinaagig limbong, apan maikagon; ni mahariharion ibabaw niadtong panulondon sa Diyos, apan mahimong mga panig-ingnan alang sa panon.” (1 Pedro 5:2, 3) Ang tinuod nga Kristohanong mga magbalantay magpugong sa paghimo sa ilang kaugalingon nga mga agalon sa pagtuo sa uban. Ingong mga isigkamagbubuhat sa pag-alagad sa Diyos, maningkamot hinuon sila nga magpakitag maayong panig-ingnan.—2 Corinto 1:24.
12. Unsang timbang nga baroganan bahin sa tawhanong mga kagamhanan ang gipangayo sa Diyos niadtong nagtinguha nga paluyohan sa Diyos?
12 Sila mapinasakopon sa tawhanong mga kagamhanan apan magpabiling neyutral. Siya nga dili ‘magpasakop sa labaw nga mga awtoridad’ dili makapaabot nga paluyohan sa Diyos. Ngano? Tungod kay “ang nagalungtad nga mga awtoridad napahimutang sa ilang relatibong mga posisyon pinaagi sa Diyos. Busa siya nga mosukol sa awtoridad misukol sa kahikayan sa Diyos.” (Roma 13:1, 2) Apan, si Jesus miila nga posibleng may panagsukwahi sa intereses sa dihang siya miingon: “Ibayad ninyo kang Cesar ang mga butang ni Cesar, apan ang mga butang sa Diyos ngadto sa Diyos.” (Marcos 12:17) Kadtong nagtinguha nga paluyohan sila sa Diyos kinahanglang “magpadayon sa pagpangita pag-una sa gingharian [sa Diyos] ug sa iyang pagkamatarong,” samtang sa samang panahon motuman sa mga balaod sa nasod nga nahisubay sa ilang mas dako nga mga kaakohan ngadto sa Diyos. (Mateo 6:33; Buhat 5:29) Gipasiugda ni Jesus ang neyutralidad sa dihang siya miingon bahin sa iyang mga tinun-an: “Sila dili bahin sa kalibotan, ingon nga ako dili bahin sa kalibotan.” Siya sa ulahi midugang: “Ang akong gingharian dili bahin niining kalibotana.”—Juan 17:16; 18:36.
13. Unsay papel sa gugma diha sa pag-ila sa katawhan sa Diyos?
13 Sila dili mapihigon sa pagbuhat ug “maayo ngadto sa tanan.” (Galacia 6:10) Ang Kristohanong gugma dili mapihigon, modawat sa tanang tawo bisag unsa pay ilang kolor sa panit, pagkabutang o edukasyon, nasyonalidad, o pinulongan. Ang pagbuhat ug maayo ngadto sa tanan ug ilabina ngadto sa ilang mga isigkamagtutuo makatabang sa pag-ila niadtong gipaluyohan sa Diyos. Si Jesus nag-ingon: “Pinaagi niini ang tanan makaila nga kamo akong mga tinun-an, kon kamo adunay gugma sa inyong taliwala.”—Juan 13:35; Buhat 10:34, 35.
14. Ang mga tawo nga gipaluyohan sa Diyos kinahanglan bang pagauyonan sa kadaghanan? Ipatin-aw.
14 Sila andam moantos sa paglutos tungod sa pagtuman sa kabubut-on sa Diyos. Gipasidan-an ni Jesus ang iyang mga sumusunod: “Kon sila naglutos kanako, sila magalutos usab kaninyo; kon sila nagbantay sa akong pulong, sila magbantay usab sa inyoha.” (Juan 15:20; Mateo 5:11, 12; 2 Timoteo 3:12) Kadtong gipaluyohan sa Diyos sukad pa sa una gikasilagan, sama kang Noe, kinsa naghukom sa kalibotan pinaagi sa iyang pagtuo. (Hebreohanon 11:7) Karon, kadtong buot nga paluyohan sa Diyos dili magsambog sa pulong sa Diyos o dili ikompromiso ang mga prinsipyo sa Diyos aron lang makalikay sa paglutos. Basta matinumanon sila nga moalagad sa Diyos, sila nahibalo nga ang mga tawo ‘mahibulong ug magpadayon sa pagsulti nga mapasipalahon’ mahitungod kanila.—1 Pedro 2:12; 3:16; 4:4.
Panahon sa Pagtimbangtimbang sa mga Kamatuoran
15, 16. (a) Unsang mga pangutana ang makatabang kanato sa pag-ila sa relihiyosong pundok nga gipaluyohan sa Diyos? (b) Unsa ang nahukom sa minilyong tawo, ug ngano?
15 Pangutan-a ang imong kaugalingon, ‘Unsang relihiyosong pundok ang giila nga nagsunod gayod sa Pulong sa Diyos, bisan pag ang mga pagtulon-an niini lahi sa gituohan sa kadaghanang tawo? Kinsa ang nagpasiugda sa pagkahinungdanon sa personal nga ngalan sa Diyos, nga naggamit gani niini sa pag-ila kanila? Kinsa ang positibong nagtudlo sa Gingharian sa Diyos ingong ang bugtong solusyon sa tanang problema sa tawo? Kinsa ang nagsunod sa mga sukdanan sa Bibliya sa paggawi, bisan pag isipong kinaraan? Unsang pundoka ang inila nga walay gisuweldohan nga klero, diin ang tanang sakop niini maoy mga magwawali? Kinsay gidayeg sa pagkahimong mga masinundanon sa balaod nga mga lungsoranon, bisan pag dili sila mag-apil-apil sa politika? Kinsa sa pagkamahigugmaon ang naggahin ug panahon ug salapi aron matabangan ang uban nga makakat-on bahin sa Diyos ug sa iyang mga katuyoan? Ug bisan pa niining dalayegong mga butang, kinsa ang padayong gibiaybiay, gibugalbugalan, ug gilutos?’
16 Minilyong tawo sa tibuok kalibotan ang nakatimbangtimbang sa mga kamatuoran ug kombinsido nga ang mga Saksi ni Jehova lamang ang nagsunod sa tinuod nga relihiyon. Kini ang ilang nahukom pinasukad sa gitudlo sa mga Saksi ni Jehova ug sa paggawi nila sa ilang kaugalingon, maingon man pinasukad sa mga kaayohan nga nahatag sa ilang relihiyon. (Isaias 48:17) Busa, minilyon ang nag-ingon, sumala sa gitagna diha sa Zacarias 8:23: “Mouban kami kaninyo, kay kami nakadungog nga ang Diyos nagauban kaninyo.”
17. Nganong dili pagpangahas ang pangangkon sa mga Saksi ni Jehova nga sila ang nakabaton sa tinuod nga relihiyon?
17 Mapangahason ba ang mga Saksi ni Jehova sa pag-ingon nga sila lamang ang gipaluyohan sa Diyos? Sa pagkatinuod, ang ilang pangangkon walay kalainan sa gipangangkon sa mga Israelinhon sa Ehipto nga sila gipaluyohan sa Diyos bisan pa sa gituohan sa mga Ehiptohanon, o sa dihang ang unang-siglong mga Kristohanon nangangkon nga sila gipaluyohan sa Diyos dili ang mga relihiyonistang Hudiyo. Ang mga kamatuoran nagpamatuod nga tinuod kanang maong pangangkon. Diha sa 235 ka kayutaan ang mga Saksi ni Jehova nagabuhat sa buluhaton nga gitagna ni Jesus nga pagabuhaton sa iyang tinuod nga mga sumusunod sa panahon sa kataposan: “Kining maayong balita sa gingharian igawali sa tibuok gipuy-ang yuta ingon nga pagpamatuod ngadto sa tanang kanasoran; ug unya moabot ang kataposan.”—Mateo 24:14.
18, 19. (a) Nganong walay katarongan nga mohunong ang mga Saksi ni Jehova sa ilang buluhaton sa pagsangyaw, bisan pag sila gisupak? (b) Sa unsang paagi ang Salmo 41:11 nagpamatuod nga gipaluyohan sa Diyos ang mga Saksi?
18 Ang mga Saksi ni Jehova magpadayon sa pagtuman niining maong sugo, nga dili gayod motugot nga mababagan sa paglutos o pagsupak ang ilang buluhaton. Ang buluhaton ni Jehova kinahanglang pagahimoon. Ang tanang pagsulay nga gihimo sa uban sulod niining miaging siglo sa pagbabag sa mga Saksi sa pagtuman sa buluhaton sa Diyos napakyas, kay si Jehova nagsaad: “Bisan unsa nga hinagiban nga buhaton batok kanimo dili magmalamposon, ug ang matag dila nga mosulti batok kanimo sa paghukom imong pagahukman. Mao kini ang panulondon sa mga alagad ni Jehova, ug ang ilang pagkamatarong maoy gikan kanako.”—Isaias 54:17.
19 Ang kamatuoran nga mas kusganon ug mas aktibo ang mga Saksi ni Jehova karon—bisan pa sa tibuok-kalibotan nga pagsupak—maoy pamatuod nga si Jehova nalipay sa ilang ginabuhat. Si Haring David miingon: “Pinaagi niini mahibalo ako nga ikaw nahimuot kanako, kay ang akong kaaway dili mosinggit sa kadaogan sa ibabaw nako.” (Salmo 41:11; 56:9, 11) Dili gayod makasinggit ang mga kaaway sa Diyos ug kadaogan batok sa katawhan ni Jehova, kay ang ilang Pangulo, si Jesu-Kristo, nagaabante paingon sa kataposang kadaogan!
Makatubag Ka Ba?
• Unsa ang pipila ka karaang mga panig-ingnan sa mga tawo nga gipaluyohan sa Diyos?
• Unsa ang pipila ka timaan sa tinuod nga relihiyon?
• Nganong kombinsido ka nga gipaluyohan sa Diyos ang mga Saksi ni Jehova?
[Mga Pangutana sa Pagtuon]
[Hulagway sa panid 13]
Kadtong nagtinguha nga paluyohan sa Diyos kinahanglang magbase sa ilang mga pagtulon-an diha lamang sa iyang Pulong
[Hulagway sa panid 15]
Ang Kristohanong mga ansiyano magsilbing mga panig-ingnan sa panon