Sugilanon sa Kinabuhi

Malipayon ug Mapasalamaton Bisan pa sa Makapasubo nga Pagkawala

SUMALA SA GIASOY NI NANCY E. PORTER

Kadto maoy Hunyo 5, 1947, usa ka mainit nga gabii sa Bahamas, mga isla nga haduol sa habagatan-sidlakang baybayon sa Tinipong Bansa. Usa ka opisyal sa imigrasyon ang wala damhang miduaw kanako ug sa akong bana, si George. Gitunol niya kanamo ang usa ka sulat nga nag-ingon nga ang among presensiya sa isla wala na kahinangpi ug nga kami kinahanglang “mobiya gilayon sa maong lugar!”

KAMI ni George mao ang unang mga misyonaryo sa mga Saksi ni Jehova nga nakaabot sa Nassau, ang kinadak-ang siyudad sa Bahamas. Human makagraduwar sa ikawalong klase sa Gilead, usa ka misyonaryong tunghaan sa amihanang bahin sa New York, giasayn kami dinhi. Unsay among nabuhat nga gihinginlan man kami human sa tulo-ka-bulan lang nga pagpuyo? Ug sa unsang paagi nga ania gihapon ako dinhi bisag kapin na sa 50 anyos ang milabay?

Gibansay Alang sa Ministeryo

Ang akong amahan, si Harry Kilner, maoy usa ka dakong impluwensiya sa paagi sa akong pagkinabuhi. Siya naghatag ug maayo kaayong sulondan alang kanako, nga naghimog daghang pagsakripisyo aron mahimong usa sa mga Saksi ni Jehova. Bisag dili maayo ang iyang panglawas, siya mosangyaw gayod halos kada hinapos sa semana, nga madasigong nag-una sa mga intereses sa Gingharian. (Mateo 6:33) Limitado kaayo kami sa  pinansiyal, apan ang iyang sapatosan mao ang sentro sa espirituwal nga kalihokan sa Lethbridge, Alberta, Canada, sa katuigang 1930. Ang una ko nga mahinumdoman mao ang bug-os-panahong mga ministro sa mga Saksi ni Jehova, nga gitawag ug mga payunir, nga moduaw sa among balay ug mag-asoy ug mga kasinatian.

Sa 1943, nagsugod ako sa akong pag-alagad ingong payunir duol sa Fort Macleod ug Claresholm, Alberta. Niadtong panahona ang among buluhatong pagsangyaw gidili sa Canada tungod sa bakak nga impormasyong gisabwag sa mga magsusupak panahon sa Gubat sa Kalibotan II. Ang among teritoryo may gilapdong 100 kilometros gikan sa isigkatumoy, apan kay batan-on pa ug abtik, wala ra namo panumbalinga ang pagbisikleta o ang pagbaklay aron makaabot sa kabaryohan ug kaumahan sa maong lugar. Niining panahona, nakahigayon ako sa pagpakighinabi sa pipila ka graduwado sa Gilead, ug ang ilang mga kasinatian nagpukaw diha sa sulod nako ug usa ka tinguha nga mahimong usa ka misyonaryo.

Sa 1945, ako naminyo kang George Porter, nga taga-Saskatchewan, Canada. Ang iyang mga ginikanan maoy madasigong mga Saksi sukad pa sa 1916, ug siya usab nagpili sa bug-os-panahong ministeryo ingon nga iyang karera. Ang una namong asaynment mao ang matahom nga Lynn Valley sa Amihanang Vancouver, Canada. Wala madugay human niadto gidapit kami ngadto sa Gilead.

Nakapakig-estorya ako ug mga graduwado sa nagkalainlaing mga seminaryo sa teolohiya sa katuigang nanglabay ug nakita ko kon sa unsang paagi ang ilang pagbansay sa teolohiya nakahatag ug kadaot sa ilang pagtuo sa Diyos ug sa iyang Pulong, ang Bibliya. Sa kasukwahi, ang among nakat-onan sa Gilead nagpahait sa among katakos sa panghunahuna ug labaw sa tanan nagpalig-on sa among pagtuo kang Jehova nga Diyos ug sa iyang Pulong. Ang among mga klasmet giasayn sa Tsina, Singapore, India, sa mga nasod sa Aprika, Amerika del Sur, ug sa uban pang dapit. Nahinumdoman pa nako ang kahinam dihang nahibaloan namo nga ang among asaynment mao ang tropikal nga mga isla sa Bahamas.

Kon sa Unsang Paagi Kami Nakapabilin

Kon itandi sa mga asaynment sa among mga klasmet, ang among biyahe paingon sa Bahamas dali ra. Wala madugay naanad ra kami sa init nga klima, asul nga kalangitan, asul-berde nga tubig, nagkalainlaing mga tinukod nga hilaw ug mga kolor, ug sa daghang bisikleta. Apan, ang una nga dili gayod nako makalimtan mao ang gamayng grupo sa lima ka Saksi nga naghulat kanamo hangtod miabot ang among barko nga gisakyan. Wala madugay among nahibaloan nga ang kultura niining dapita lahi kaayo kay sa among naandan. Pananglitan, ang akong bana gibadlong sa pagtawag kanako ug sweetheart diha sa publiko, kay kanang pulonga angay lamang sa relasyon gawas sa kaminyoon.

Sa wala madugay ang pari nga tingali nahadlok sa among librelibreng pagpakig-uban sa mga tawo, binakak nga nag-akusar kanamo ingong mga Komunista. Tungod niini, nakadawat kami ug mando  sa pagbiya sa nasod. Apan ang mga Saksi—niadtong panahona wala pay 20 ang gidaghanon sa tanang isla—dihadiha nagkuhag libolibong pirma nga naghangyo nga tugotan kami sa pagpabilin. Busa, ang mando sa pagpalagpot nabalit-ad.

Ngadto sa Usa ka Bag-ong Teritoryo

Ang kamatuoran sa Bibliya daling miturok diha sa mga kasingkasing nga nahigugma sa Diyos, busa dugang mga misyonaryo sa Gilead ang gipadala ngadto sa Bahamas. Dayon, sa 1950, usa ka sangang buhatan ang natukod. Napulo ka tuig sa ulahi, si Milton Henschel, usa ka membro sa mga kawani sa hedkuwarter sa Brooklyn, New York, miduaw sa Bahamas ug nangutana sa mga misyonaryo kon aduna bay gustong mobalhin ug sugdan ang buluhatong pagsangyaw sa laing isla sa Bahamas. Miboluntaryo kami ni George, ug busa nagsugod ang among 11-ka-tuig nga pagpuyo sa Long Island.

Kining islaha, nga usa sa mga isla nga naglangkob sa Bahamas, maoy 140 kilometros ang gitas-on ug 6 kilometros ang gilapdon, ug niadtong panahona, kini walay naandang mga lungsod. Ang kaulohan, ang Clarence Town, dunay mga 50 ka panimalay. Kinaraan ang paagi sa pagkinabuhi—walay elektrisidad, walay tubig nga gikan sa gripo, o pasilidad sa pagluto o gripo sulod sa balay. Busa kinahanglang magpahiangay kami sa gitawag nga halayong-islahanon nga kinabuhi. Ang panglawas sa mga tawo mao ang paboritong tema niining islaha. Sa among pagpangomosta nakakat-on kami sa dili pagpangutana, “Komosta ka na karon?” tungod kay tubagon ka gayod ug taas nga asoy sa iyang kompletong medikal nga kasaysayan.

Kadaghanan sa among pagsangyaw maoy kosina ngadto sa kosina tungod kay ang mga tawo kasagarang makit-an diha sa ilang pawod ug atop nga kosina ug abohan nga kahoy ang sugnod. Ang kadaghanan diha sa komunidad maoy kabos apan buotan kaayong mga mag-uuma o mangingisda. Kadaghanan kanila dili lang kay relihiyoso kondili matuotuohon usab kaayo. Ang talagsaong mga hitabo sagad sabton nga mga tilimad-on.

Sayonsayonon lang ug sulod sa pari ang mga balay sa mga tawo ug panggision ang literatura sa Bibliya nga among napahimutang didto. Busa malisang kanila ang mga hadlokan, apan dili tanan ang nahadlok kanila. Pananglitan, usa ka isog nga 70-anyos nga tigulang babaye wala magpadala sa hulga. Gusto niyang masabtan ang Bibliya, ug sa ngadtongadto siya nahimong Saksi dungan sa daghan pang uban. Sa nakakita kami ug dugang interes diha sa mga tawo, may mga Dominggo nga kinahanglang magmaneho si George ug 300 kilometros, nga tabangan sila nga makatambong sa among mga tigom.

Panahon sa unang mga bulan diin wala pay laing mga Saksi, giatiman namo ni George ang among espirituwalidad pinaagi sa paghimo sa tanang regular nga Kristohanong mga tigom. Dugang pa, gisunod gayod namo ang programa matag Lunes sa gabii sa pagtuon sa leksiyon sa magasing Bantayanang Torre ug ang pagbasa namo sa Bibliya. Basahon usab namo dayon ang tanang isyu sa Ang Bantayanang Torre ug Pagmata! inigdawat namo niini.

Ang akong amahan namatay samtang didto pa kami sa Long Island. Sa misunod nga ting-init, sa 1963, gihikay namo nga si Mama makaanhi dinhi ug makapuyo duol namo. Bisag tigulang na siya, nakapahiangay ra gihapon siya sa kahimtang ug nagkinabuhi sa Long Island hangtod siya namatay  niadtong 1971. Karon, ang Long Island aduna nay usa ka kongregasyon nga may bag-ong Kingdom Hall.

Usa ka Makapasubo nga Suliran

Sa 1980, namatikdan ni George nga nagkahugo ang iyang panglawas. Sa ingon nagsugod ang usa sa labing sakit nga kasinatian sa akong kinabuhi—ang pagsud-ong sa akong minahal nga bana, isigkamagbubuhat, ug kauban nga gidaog sa sakit nga Alzheimer. Nausab ang tibuok niyang personalidad. Ang kataposan ug ang labing makapahugnong bahin midangat ug mga upat ka tuig sa wala pa siya mamatay niadtong 1987. Iya akong ubanan sa ministeryo ug sa mga tigom kutob sa iyang mahimo, bisag sa daghang higayon makahilak ako sa iyang paningkamot. Ang dakong gugma nga gipasundayag sa among Kristohanong mga igsoon human sa iyang kamatayon makapahupay gayod, apan mingawon gihapon ko pag-ayo niya.

Usa sa labing bililhong bahin sa among panagtiayon ni George mao ang among makanunayon ug makapalipayng panagsultihay. Karon nga wala na si George, labaw nga mapasalamaton ako nga si Jehova nagdapit sa iyang mga alagad sa “pag-ampo nga walay hunong,” sa ‘paglahutay sa pag-ampo,’ ug sa pagpahimulos sa “tanang matang sa pag-ampo.” (1 Tesalonica 5:17; Roma 12:12; Efeso 6:18) Makapahupay kaayo ang pagkasayod nga si Jehova nagtagad sa atong kaayohan. Gibati ko gayod ang sama sa gibati sa salmista kinsa miawit: “Dalayegon si Jehova, nga sa adlaw-adlaw nagapas-an sa atong luwan.” (Salmo 68:19) Ang pag-atubang sa usa ka adlaw sa usa ka panahon, nga nagdawat sa akong mga limitasyon, ug pinaagi sa pagkamapasalamaton sa mga panalangin nga itagana sa matag adlaw, ingon sa gitambag ni Jesus, sa pagkatinuod mao ang labing maayong paagi sa pagkinabuhi.—Mateo 6:34.

Makapalipayng mga Ganti sa Ministeryo

Ang pagkapuliki kanunay diha sa Kristohanong ministeryo nakatabang kanako nga dili sobrang maghunahuna sa nangagi. Busa ako nakahimo sa pagsagubang sa matang sa pagbati nga mahimong mohatod sa sobrang kaguol. Ang pagtudlo sa uban sa kamatuoran sa Bibliya nahimong usa ka linaing tinubdan sa kalipay. Kini nakataganag hapsay nga espirituwal nga rutina nga nakahatag ug gambalay ug kalig-on sa akong kinabuhi.—Filipos 3:16.

Kas-a, nakadawat akog usa ka tawag sa telepono gikan sa usa ka babaye nga akong napaambitan sa mensahe sa Gingharian mga 47 ka tuig kanhi. Siya ang anak sa usa sa una namong mga gitun-an sa Bibliya sa dihang miabot kami sa Bahamas niadtong 1947. Ang iyang inahan, amahan, ug ang tanan niyang mga igsoong lalaki ug babaye nangahimong mga Saksi ni Jehova maingon man usab ang kadaghanan sa ilang mga anak ug mga apo. Sa pagkatinuod, kapin sa 60 ka membro sa pamilya niining babayhana maoy mga Saksi. Apan wala gayod siya modawat sa kamatuoran sa Bibliya. Hinunoa,  sa kataposan andam na siya karon nga mahimong usa ka alagad ni Jehova nga Diyos. Pagkadakong kalipay nga makita ang pipila lang ka Saksi nga diha sa Bahamas sa miabot kami ni George nga miuswag ngadto sa kapin sa 1,400!

Usahay ang mga tawo mangutana kanako kon nagmahay ba ako nga ako walay mga anak. Siyempre, ang pagbaton ug mga anak mahimong usa ka panalangin. Apan, ang gugma nga kanunayng gipakita kanako sa akong espirituwal nga mga anak, mga apo, ug mga apo-sa-tuhod maoy usa ka butang nga tingali wala masinati sa tanang tinuod nga mga ginikanan. Sa pagkatinuod, kadtong “magbuhat sa maayo” ug nga ‘dato sa maayong mga buhat’ mao ang labing malipayon nga mga tawo. (1 Timoteo 6:18) Mao kanay hinungdan kon nganong padayon akong puliki diha sa ministeryo ingon sa itugot sa akong panglawas.

Usa ka adlaw diha sa opisina sa dentista, usa ka batan-ong babaye miduol kanako ug miingon, “Wala ka makaila nako, apan ako nakaila nimo, ug buot ko lang nga imong masayran nga gimahal ko ikaw.” Dayon siya miasoy kon sa unsang paagi nakakat-on siya sa kamatuoran gikan sa Bibliya ug kon unsa ka dako sa iyang pagpasalamat nga kami nga mga misyonaryo mianhi sa Bahamas.

Sa laing okasyon dihang nahibalik ako gikan sa bakasyon, nakita ko nga dihay usa ka buok rosas sa pultahan sa lawak nga ako karong gipuy-an sa sangang buhatan sa mga Saksi ni Jehova sa Nassau. Kini may sulat nga, “Nalipay kami nga nahiuli ka na.” Mapasalamaton kaayo ang akong kasingkasing, ug kini nakatukmod kanako sa paghigugma pa gayod kang Jehova sa dihang makita ko ang matang sa mga tawo nga napatungha sa iyang Pulong, organisasyon, ug espiritu! Sa pagkatinuod, ang nagapalig-on nga kamot ni Jehova kanunayng gipasundayag niadtong anaa sa atong palibot.

Mapasalamaton Kaayo

Ang akong kinabuhi dili kanunayng sayon, ni ang mga bahin niini sayon na karon. Apan ako adunay daghang katarongan nga magmapasalamaton—ang mga kalipay sa ministeryo, ang gugma ug pagmahal sa daghang Kristohanong mga igsoong lalaki ug babaye, ang mahigugmaong pag-atiman sa organisasyon ni Jehova, ang maanindot nga kamatuoran sa Bibliya, ang paglaom nga makauban ang mga minahal sa dihang sila pagabanhawon, ug ang mga panumdoman sulod sa 42 anyos nga kaminyoon uban sa usa ka matinumanong alagad ni Jehova. Sa wala pa kami maminyo, nakaampo ko nga mahimo akong katabang kanunay sa akong bana aron makapabilin diha sa bug-os-panahong ministeryo, nga gimahal niya pag-ayo. Mapuangorong gitubag ni Jehova ang maong pag-ampo. Busa buot kong ipahayag ang akong pagkamapasalamaton kang Jehova pinaagi sa pagpabiling matinumanon ngadto kaniya.

Ang Bahamas maoy popular nga destinasyon sa mga turista, nga mogastog libolibong dolyar aron makaduaw ug kalipayan ang maanindot nga mga lugar sa tropiko. Tungod kay mipili sa pag-alagad kang Jehova bisan asa itudlo sa iyang organisasyon, ako adunay makapalipayng mga kasinatian sa pagbiyahe gikan sa usa ka tumoy niining mga islaha ngadto sa lain, nga nagmantala sa maayong balita sa Gingharian sa Diyos. Apan mas hinungdanon, akong nailhan ug gipakahamili ang gugma sa kinamaayohan sa mahigalaong mga taga-Bahamas.

Mapasalamaton kaayo ako niadtong naghatod sa kamatuoran ngadto sa akong mga ginikanan, nga sa baylo nagtisok diha sa akong linghod nga hunahuna ug kasingkasing sa dulot nga tinguha sa pag-una sa pagpangita sa Gingharian sa Diyos. Mahimong madawat usab sa batan-ong mga alagad ni Jehova karon ang daghang panalangin kon mosulod sila sa “dakong pultahan” nga motultol ngadto sa dagkong mga kahigayonan sa gipasangkad nga ministeryo. (1 Corinto 16:9) Ikaw usab mahimong mapasalamaton kaayo kon gamiton nimo ang imong kinabuhi sa pagpasidungog sa “Diyos sa mga diyos,” si Jehova.—Deuteronomio 10:17; Daniel 2:47.

[Hulagway sa panid 24]

Nagsangyaw sa kadalanan sa Victoria, B.C., sa 1944

[Hulagway sa panid 24]

Si George ug ako mieskuyla sa Tunghaan sa Gilead sa 1946

[Hulagway sa panid 25]

Uban kang George atubangan sa balay sa misyonaryo sa Nassau, Bahamas, sa 1955

[Hulagway sa panid 26]

Ang balay sa misyonaryo sa Deadman’s Cay, diin kami nag-alagad sukad sa 1961 hangtod sa 1972