Nagaabante Paingon sa Kataposang Kadaogan!
Nagaabante Paingon sa Kataposang Kadaogan!
“Tan-awa! usa ka puting kabayo; ug ang nagsakay niini may usa ka pana; ug gihatag kaniya ang usa ka korona, ug siya miasdang nga nagapangdaog ug sa pagtapos sa iyang pagpangdaog.”—PINADAYAG 6:2.
1. Unsang umaabot nga mga hitabo ang nakita ni Juan sa panan-awon?
PINAAGI sa pagdasig sa Diyos nakita ni apostol Juan ang mahitabo sa duolan sa 1,800 ka tuig sa umaabot ug gihubit ang pagkaentrono ni Kristo ingong Hari. Si Juan nagkinahanglag pagtuo aron makatuo sa iyang nakita diha sa panan-awon. Kita karon adunay klarong ebidensiya nga kining gitagnang pagkaentrono nahitabo sa 1914. Pinaagi sa mga mata sa pagtuo, atong nakita si Jesu-Kristo nga miasdang nga “nagapangdaog ug sa pagtapos sa iyang pagpangdaog.”
2. Unsay reaksiyon sa Yawa sa pagkatukod sa Gingharian, ug sa unsa kini nagpamatuod?
2 Human natukod ang Gingharian, gitambog si Satanas gikan sa langit, ug tungod niini mas nangusog siya sa pagpakiggubat nga may dakong kasuko apan wala gayoy purohan nga siya makadaog. (Pinadayag 12:7-12) Tungod sa iyang kasuko ang kahimtang sa kalibotan misamot pa ka lisod. Ang tawhanong katilingban morag nagkabungkag. Alang sa mga Saksi ni Jehova kini maoy klarong pamatuod nga ang ilang Hari nagaabante sa “pagtapos sa iyang pagpangdaog.”
Usa ka Bag-ong Kalibotan nga Katilingban Ginatukod
3, 4. (a) Unsang mga kausaban sa organisasyon ang nahimo sa Kristohanong kongregasyon sukad sa pagkatukod sa Gingharian, ug nganong hinungdanon kini? (b) Unsay mga kaayohan nga nahimo niini nga mga kausaban, ingon sa gitagna ni Isaias?
3 Sa dihang natukod ang Gingharian, kadto maoy panahon sa pagpasig-uli sa Kristohanong kongregasyon—nga karon dunay dugang mga kaakohan maylabot sa Gingharian—nga mas nahiuyon sa sumbanan sa unang-siglong Kristohanong kongregasyon. Busa, diha sa mga gula niini sa Hunyo 1 ug 15, 1938, gisusi sa The Watchtower kon unsaon pagdumala sa Kristohanong kongregasyon. Sa ulahi, klarong gipaila sa gula sa Disyembre 15, 1971, ang modernong-adlawng Nagamandong Lawas diha sa artikulong “Usa ka Nagamandong Lawas Lahi Gikan sa Legal nga Korporasyon.” Sa 1972, ang mga lawas sa mga ansiyano gitudlo sa pagtaganag tabang ug pagtultol alang sa lokal nga mga kongregasyon.
4 Ang pagpasig-uli sa hustong pagdumala nakapalig-on ug dako sa Kristohanong kongregasyon. Nakatabang usab niini ang mga tagana nga gihikay sa Nagamandong Lawas sa paghatag ug instruksiyon sa mga ansiyano sa ilang mga katungdanan, apil ang pagbansay kanila labot sa hudisyal nga mga butang. Ang anam-anam nga kauswagan labot sa yutan-ong mga kahikayan sa organisasyon sa Diyos ug ang maayong mga resulta niini gitagna diha sa Isaias 60:17: “Inay tumbaga ako magdalag bulawan, ug inay puthaw ako magdalag plata, ug inay kahoy, tumbaga, ug inay mga bato, puthaw; ug igatudlo ko ang pakigdait ingong imong mga magtatan-aw ug ang pagkamatarong ingong imong mga tighatag ug buluhaton.” Kini nga mga kauswagan nagpabanaag sa panalangin sa Diyos ug nagpamatuod sa pag-uyon sa Diyos niadtong masibotong nagpaluyo sa iyang Gingharian.
5. (a) Unsay reaksiyon ni Satanas sa dihang gipanalanginan ni Jehova ang Iyang katawhan? (b) Nahiuyon sa Filipos 1:7, unsay reaksiyon sa katawhan ni Jehova sa kasuko ni Satanas?
5 Ang mahigugmaong pagtagad ug pagtultol nga gihatag sa Diyos ngadto sa iyang katawhan human natukod ang Gingharian namatikdan ni Satanas. Pananglitan, sa 1931 kining gamayng pundok sa mga Kristohanon nagpahibalo sa publiko nga sila maoy labaw pa kay sa mga Estudyante sa Bibliya. Sumala sa Isaias 43:10, sila maoy mga Saksi ni Jehova! Naatol man o wala, ang Yawa nagpagawas ug daghang paglutos nga walay sama diha sa tibuok kalibotan. Bisan diha sa kayutaan nga nailhan nga dunay relihiyosong kagawasan, sama sa Tinipong Bansa, Canada, ug Alemanya, ang mga Saksi subsob nga napugos sa pagpakig-away pinaagig legal nga mga pagpakiggubat aron mapatunhay ang ilang kagawasan sa pagsimba. Sa pagka-1988, girepaso pag-usab sa Korte Suprema sa T.B. ang 71 ka kaso nga nalangkit ang mga Saksi ni Jehova, diin dos-tersiya niini gipakanaogan ug desisyon nga pabor kanila. Karon, sa tibuok kalibotan, ang legal nga mga gubat nagpadayon aron nga, sama sa unang siglo, ‘madepensahan ug matukod sa legal nga paagi ang maayong balita.’—Filipos 1:7.
6. Ang mga pagdili nakapugong ba sa katawhan ni Jehova sa pag-uswag? Iilustrar.
6 Sa mga tuig sa 1930, sa wala pa ang Gubat sa Kalibotan II, gidili sa gobyernong gimandoan ug diktador ang buluhaton sa mga Saksi ni Jehova sa Alemanya, Espanya, ug Hapon, nga magngalan lamang ug tulo. Apan sa tuig 2000, naabot niining tulo ka nasod lamang ang duolan sa 500,000 ka aktibong mga magwawali sa Gingharian sa Diyos. Kana maoy halos napulo ka pilo nga gidaghanon sa mga Saksi sa tibuok kalibotan sa 1936! Tin-aw, ang mga pagdili dili makapugong sa katawhan ni Jehova sa pag-uswag ilalom sa ilang madaogong Pangulo, si Jesu-Kristo.
7. Unsang talagsaong okasyon ang nahitabo sa 1958, ug unsang dakong kausaban ang nahitabo sukad niadto?
7 Pagkadako kaayo nga pamatuod kini alang niining nagaabanteng kahikayan sa dihang, sa 1958, gihimo diha sa New York City ang kinadak-ang kombensiyon nga nahimo sukad sa mga Saksi ni Jehova, ang Diyosnong Kabubut-on nga Internasyonal nga Asembliya, nga may kinatas-ang tumatambong nga 253,922. Sa pagka-1970 ang ilang buluhaton nabuksan diha sa tulo ka nasod nga gihisgotan sa ibabaw, gawas sa gitawag kaniadto ingong Sidlakang Alemanya. Apan gidili gihapon ang mga Saksi diha sa dako kaayong Unyon Sobyet ug diha sa alyadong mga nasod niini sa Warsaw Pact. Karon, niining Komunista kanhi nga mga nasod, dunay kapin sa tunga sa milyon ang aktibong mga Saksi.
8. Unsay resulta sa pagpanalangin ni Jehova sa iyang katawhan, ug unsay giingon sa Ang Bantayanang Torre sa 1950 bahin niini?
8 Ang mga Saksi ni Jehova gipanalanginan ug kauswagan tungod kay sila nagpadayon sa “pagpangita pag-una sa gingharian ug sa pagkamatarong [sa Diyos].” (Mateo 6:33) Sa literal nga paagi, ang tagna ni Isaias natuman: “Ang diyutay mahimong usa ka libo, ug ang gamay usa ka gamhanang nasod. Ako, si Jehova, magpadali niini sa kaugalingong panahon niini.” (Isaias 60:22) Ug nagpadayon kini sa pag-uswag. Sa miaging dekada lamang, ang gidaghanon sa aktibong mga tigpaluyo sa pagmando sa Gingharian mitubo ug kapin sa 1,750,000 ka tawo. Sila kinabubut-on nga nahimong bahin sa usa ka pundok nga mahitungod kanila ang 1950 nga Bantayanang Torre nag-ingon: “Ang Diyos karon nangandam ug usa ka bag-ong kalibotan nga katilingban. . . . Kining pundoka makalatas sa Armagedon, . . . ang una diha sa natad sa kalihokan diha sa ‘bag-ong yuta’ . . . , nga giorganisar sa teokratikanhong paagi, nga may kasinatian sa mga palakaw sa organisasyon.” Ang artikulo mihinapos: “Nan, magdungan kitang tanan sa pag-abante sa unahan nga malahutayon, ingong usa ka bag-ong kalibotan nga katilingban!”
9. Sa unsang paagi ang mga butang nga nakat-onan sa mga Saksi ni Jehova sulod sa daghang katuigan nakahatag ug kaayohan?
9 Kasamtangan, kining padayong nagtubo nga bag-ong kalibotang katilingban nakabaton ug kahibalo nga napamatud-ang bililhon kaayo karon ug tingali bisan sa buluhatong pagpasig-uli human sa Armagedon. Pananglitan, ang mga Saksi nakakat-on sa pagdumala ug dagkong mga kombensiyon, sa paghatag ug emerhensiyang tabang dihadiha, ug sa daling mahuman nga buluhatong pagpanukod. Tungod niining buluhatona daghan ang napukaw sa pagdayeg ug pagtahod sa mga Saksi ni Jehova.
Pagtul-id sa Sayop nga mga Hunahuna
10, 11. Iilustrar kon sa unsang paagi natul-id ang sayop nga mga hunahuna bahin sa mga Saksi ni Jehova.
10 Bisan pa niana, may mga tawo nga nangakusar sa mga Saksi ni Jehova nga lahi sa tawhanong katilingban. Ang dakong hinungdan niini maoy tungod sa pinasukad-sa-Bibliya nga baroganan sa mga Saksi labot sa mga butang sama sa pag-abono ug dugo, neyutralidad, pagtabako, ug moral. Apan ang mga tawo nagpakaamgo nga ang mga panglantaw sa mga Saksi angay palandongon. Pananglitan, giteleponohan sa usa ka doktor sa Polandia ang pamunoan nga opisina sa mga Saksi ni Jehova ug miingon nga siya ug ang iyang mga kauban sa ospital nagdebate sa daghang oras bahin sa pag-abono ug dugo. Ang debate naugkat tungod sa usa ka artikulo nga migula nianang adlawa diha sa matag adlaw nga mantalaang Dziennik Zachodni sa Polandia. “Naguol ako sa pag-abuso sa medikal nga natad sa paggamit sa dugo,” miadmitir ang doktor. “Kinahanglang bag-ohon kini, ug nalipay ako nga adunay miuna paghisgot niini. Buot kong mangayog dugang impormasyon.”
11 Diha sa komperensiya nga gihimo sa miaging tuig, ang mga awtoridad sa medisina nga gikan sa Canada, Israel, Tinipong Bansa, ug Uropa naghisgot bahin sa ulohan nga gilaraw sa pagtabang sa mga doktor sa pagtambal sa mga pasyente nga walay paggamit ug dugo. Gihisgotan niining tigoma, nga gihimo sa Switzerland, nga lahi sa hunahuna sa kadaghanan, ang mga pasyenteng nangamatay nga giabonohan ug dugo mas daghan kay sa mga pasyenteng wala abonohi. Ang mga pasyenteng Saksi kasagarang maoy unang makagawas sa ospital kay sa niadtong giabonohan ug dugo, diin sa baylo makamenos gayod sa gastos sa pagpatambal.
12. Paghatag ug pananglitan kon sa unsang paagi nakadayeg ang prominenteng mga tawo sa baroganan sa mga Saksi ni Jehova maylabot sa pagkahimong neyutral sa politika.
12 Daghan ang mipahayag usab ug maayong mga komento bahin sa neyutral nga baroganan sa mga Saksi ni Jehova una pa ug sa panahon sa Gubat sa Kalibotan II sa dihang sila nag-antos ilalom sa grabeng pag-atake sa mga Nazi. Nakapukaw ug daghang maayong mga komento ang video nga Jehovah’s Witnesses Stand Firm Against Nazi Assault, nga gihimo sa mga Saksi ni Jehova ug nahiangay nga unang gipasalida diha sa kampo konsentrasyon sa Ravensbrück sa Alemanya sa Nobyembre 6, 1996. Sa gipasalida kini diha sa iladong kampo konsentrasyon sa Bergen-Belsen sa Abril 18, 1998, ang direktor sa Center for Political Education sa Lower Saxony, si Dr. Wolfgang Scheel, miadmitir: “Ang usa sa makauulaw nga mga hitabo sa kasaysayan mao nga mas malig-on ang mga Saksi ni Jehova sa pagsalikway sa National Socialism kay sa mga iglesyang Kristiyano. . . . Bisag unsa pay atong pagtuo bahin sa mga doktrina ug pagkarelihiyoso sa mga Saksi ni Jehova, ang ilang kalig-on panahon sa rehimen sa Nazi takos sa pagtahod.”
13, 14. (a) Unsang maalamong komento mahitungod sa unang mga Kristohanon ang gipamulong sa wala damhang tinubdan? (b) Paghatag ug mga pananglitan sa maayong mga komento nga gipamulong mahitungod sa katawhan sa Diyos karon.
13 Kon ang prominenteng mga tawo o mga desisyon sa korte mopabor sa mga Saksi ni Jehova labot sa kontrobersiyal nga mga isyu, posible nga makawagtang kini sa mga pagpihig ug sa dili maayong mga hunahuna bahin sa mga Saksi. Kini sagad makabukas sa dalan aron makahimo sila sa pagpakigsulti sa mga tawo nga dili gayod mamati kaniadto. Busa ang maong mga buhat gipasalamatan, ug giapresyar gayod kini sa mga Saksi ni Jehova. Kini magpahinumdom kanato nianang nahitabo sa unang siglo sa Jerusalem. Sa dihang ang Sanhedrin, ang hataas nga hukmanang Hudiyohanon, nagplano sa pagpatay sa mga Kristohanon tungod sa ilang masibotong pagwali, si Gamaliel, nga “usa ka magtutudlo sa Balaod nga tinamod sa tanang katawhan,” nagpasidaan ug miingon: “Mga tawo sa Israel, magbantay kamo sa buot ninyong pagabuhaton niining mga tawhana. . . . Ayaw panghilabot niining mga tawhana, hinunoa pasagdi lang sila; (tungod kay, kon kining larawa o kining buhata gikan man sa mga tawo, kini mapukan; apan kon kini gikan sa Diyos, kamo dili makahimo sa pagpukan kanila;) kay kon dili, basin baya hinuon nga makaplagan kamo nga mga kaaway diay sa Diyos.”—Buhat 5:33-39.
14 Sama kang Gamaliel, ang prominenteng mga tawo karon misulti nga walay likoliko pabor sa relihiyosong kagawasan alang sa mga Saksi ni Jehova. Pananglitan, ang tsirman kanhi sa International Academy for Freedom of Religion and Belief nangatarongan: “Ang relihiyosong mga katungod sa usa ka relihiyon dili angay nga idili tungod lang kay giisip sa katilingban ang ilang pagtuo ingong lain o lahi.” Ug nagpatugbaw ug hinungdanong pangutana ang usa ka propesor sa siyentipikanhong pagtuon sa relihiyon sa unibersidad sa Leipzig labot sa pundok nga gitukod sa ahensiya sa kagamhanang Aleman aron sa pag-imbestigar sa gitawag kono nga relihiyosong mga sekta, nga nangutana: “Nganong ang minoriyang grupo lang ang imbestigahon apan dili ang duha ka dagkong mga iglesya [ang Iglesya Romana Katolika ug ang Luteranong Iglesya]?” Makita dayon nato ang tubag niini diha sa mga pulong sa kanhi Alemang opisyal, kinsa misulat: “Tino nga sa likod niining tanan, ang mga panatiko kaayo sulod sa mga iglesya ang nagdiktar sa lakat sa politika nga gisubay sa ahensiya sa kagamhanan.”
Ngadto Kang Kinsa Kita Modangop Alang sa Kahupayan?
15, 16. (a) Nganong ang gibuhat ni Gamaliel limitado sa pagkaepektibo niini? (b) Sa unsang paagi ang laing tulo pa ka impluwensiyal nga mga tawo limitado sa ilang mahimo alang kang Jesus?
15 Ang giingon ni Gamaliel nagpasiugda lamang sa kamatuoran nga ang buluhaton nga gipaluyohan sa Diyos dili gayod mapakyas. Tino nga ang unang mga Kristohanon nakabaton ug kaayohan gikan sa iyang mga pulong ngadto sa Sanhedrin, apan sila wala malimot nga tinuod usab ang mga pulong ni Jesus nga ang iyang mga sumusunod pagalutoson. Ang gibuhat ni Gamaliel nakasanta sa mga plano sa relihiyosong mga pangulo sa pagpatay kanila, apan kana wala sa bug-os makawagtang sa paglutos, kay atong mabasa: “Niini sila nagpatalinghog kaniya, ug ilang gipatawag ang mga apostoles, gibunalan sila, ug gimandoan sila nga mohunong na sa pagsulti pinasukad sa ngalan ni Jesus, ug gibuhian sila.”—Buhat 5:40.
16 Sa dihang gihusay si Jesus, si Poncio Pilato, kay walay nakita nga siya sad-an, misulay sa pagbuhi kang Jesus. Apan napakyas siya. (Juan 18:38, 39; 19:4, 6, 12-16) Bisan ang duha ka membro sa Sanhedrin, si Nicodemo ug si Jose sa Arimatea, kinsa milaban kang Jesus, limitado sa ilang mahimo sa pagsanta sa hukmanan sa paglihok batok kang Jesus. (Lucas 23:50-52; Juan 7:45-52; 19:38-40) Ang kahupayan nga makab-ot sa mga tawo sa dihang sila mobarog sa pagdepensa sa katawhan ni Jehova—bisag unsa pay katarongan—limitado usab. Ang kalibotan magpadayon sa pagdumot sa tinuod nga mga sumusunod ni Kristo, sama sa ilang pagdumot kaniya. Si Jehova lamang ang bugtong makahatag ug bug-os nga kahupayan.—Buhat 2:24.
17. Unsa ang realistikanhong panghunahuna sa mga Saksi ni Jehova, apan nganong nagpabilin silang malig-on sa ilang hukom nga magpadayon sa pagwali sa maayong balita?
17 Sa realistikanhon, ang mga Saksi ni Jehova nahibalo nga magpadayon ang paglutos. Ang pagsupak mohunong lamang sa dihang ang sistema ni Satanas mapukan sa kataposan. Bisan pa niana, kini nga paglutos, bisan tuod dili tilinguhaon, dili makapugong sa mga Saksi sa pagtuman sa ilang buluhaton sa pagwali sa Gingharian. Nganong mapugngan man, nga gipaluyohan man sila sa Diyos? Sila naglantaw sa ilang maisog nga Pangulo, si Jesu-Kristo, ingong maayong panig-ingnan.—Buhat 5:17-21, 27-32.
18. Unsang kalisod ang anaa pa sa unahan alang sa katawhan ni Jehova, apan kombinsido sila nga moresulta kini sa unsa?
18 Sukad pa sa sinugdanan niini, ang tinuod nga relihiyon nakaatubang ug grabeng pagsupak. Sa dili madugay, kini mahimong tumong sa bug-os nga pag-atake ni Gog, si Satanas diha sa iyang ubos nga kahimtang sukad nga gitambog siya gikan sa langit. Apan ang tinuod nga relihiyon magpabilin. (Ezequiel 38:14-16) “Ang mga hari sa tibuok gipuy-ang yuta,” ilalom sa paggiya ni Satanas, “makiggubat sa Kordero, apan, tungod kay siya Ginoo man sa mga ginoo ug Hari sa mga hari, sila pagadag-on sa Kordero.” (Pinadayag 16:14; 17:14) Oo, ang atong Hari nagaabante ngadto sa kataposang kadaogan ug sa dili madugay “magbug-os sa iyang pagpangdaog.” Pagkadakong pribilehiyo ang pag-abante uban kaniya, kay nahibalo nga sa dili madugay wala nay mosupak sa mga magsisimba ni Jehova sa dihang sila moingon: “Ang Diyos dapig kanato”!—Roma 8:31; Filipos 1:27, 28.
Makapatin-aw Ka Ba?
• Unsay nahimo ni Jehova sa paglig-on sa Kristohanong kongregasyon sukad natukod ang Gingharian?
• Unsay nahimo ni Satanas sa pagsulay sa pagsanta kang Kristo sa pagbug-os sa iyang pagpangdaog, ug unsa ang mga resulta?
• Unsang timbang nga panghunahuna ang angay natong batonan bahin sa maayong buhat sa dili mga Saksi?
• Unsay himoon ni Satanas sa dili madugay, ug uban sa unsang resulta?
[Mga Pangutana sa Pagtuon]
[Hulagway sa panid 18]
Ang mga kombensiyon maoy pamatuod sa nagauswag nga kalihokan sa katawhan ni Jehova
[Mga hulagway sa panid 20]
Ang neyutralidad sa mga Saksi panahon sa Gubat sa Kalibotan II nakahatag gihapon ug kadayeganan kang Jehova