Pagtuon sa Bibliya—Kini ba Alang Kanimo?

“DILI angayng pagabasahon kon wala ang pari.” Kini nga pasidaan makita sa pasiuna sa pipila ka Bibliya nga gipanag-iya sa mga Katoliko. “Ingong mga Katoliko talagsa ra kaming makabasa ug Bibliya,” nag-ingon si Kay Murdy sa Catholic Bible Institute sa Los Angeles, “apan ang maong kahimtang nausab.” Sa dihang maamgohan sa mga Katoliko kon sa unsang paagi ang Balaang Kasulatan makaapektar sa ilang kinabuhi, siya miingon, “maugmad nila ang ilang kahidlaw alang sa Bibliya.”

Mahitungod niini nga kausaban, ang magasing U.S. Catholic mikutlo sa usa ka koordinetor sa edukasyon labot sa relihiyon kinsa miingon nga ang mga Katoliko nga miduyog sa mga klase sa pagtuon sa Bibliya mibati nga “sila gihikawan ingong mga Katoliko, ug nga niana ang Bibliya dagaya kaayo sa espirituwal nga bahandi. Buot nilang mabatonan ang pipila nianang espirituwal nga bahandi nga ilang gibating nasayloan.”

Bisan unsa pa ang kahimtang, unsang “espirituwal nga bahandi” nga buot kaplagon sa estudyante sa Bibliya? Tagda: Buot ba nimong mahibaloan kon unsaon sa pagsagubang nga malamposon ang mga kabalaka sa adlaw-adlawng kinabuhi? Sa unsang paagi imong mamentinar ang kalinaw sulod sa pamilya? Nganong daghan kaayo ang bastos ug may batok-sosyal nga tinamdan? Unsay hinungdan sa kapintasan taliwala sa mga batan-on karon? Ang kasaligang mga tubag alang niini ug sa uban pang makalibog nga mga pangutana makaplagan diha sa Pulong sa Diyos, ang Bibliya, ug sa pagkatinuod, kini mao ang “espirituwal nga bahandi,” dili lamang alang sa mga Katoliko o Protestante kondili alang usab sa mga Budhista, Hindu, Muslim, mga Shintoista, bisan gani sa mga ateyista ug mga agnostiko. Ingon sa gisulti sa salmista, ‘ang pulong sa Diyos maoy lampara sa akong tiil, ug kahayag sa akong alagianan.’ Mahimong matinuod kana kanimo.—Salmo 119:105.