Palig-ona ang Imong Pagsalig Kang Jehova

Ginalaraw ang usa ka pagpatay. Ang tanang hataas nga opisyal sa nasod nagsabotsabot ug nakahukom nga iduso ang usa ka bag-ong balaod. Gusto nilang silotan ug kamatayon si bisan kinsa nga malangkit sa pagsimba nga wala uyoni sa Estado.

NAKADUNGOG ka na ba niini? Ang kasaysayan daghag pananglitan sa mga tawo nga nagmugnag kasamok pinaagi sa balaod. Ang pananglitan nga gihisgotan sa ibabaw nahitabo sa Imperyo sa Persia sa mga adlaw sa manalagnang si Daniel. Ang balaod, nga gipatuman ni Haring Dario, nagbaod: “Si bisan kinsa nga mangaliya ngadto kang bisan kinsa nga diyos o tawo sulod sa katloan ka adlaw gawas lamang [sa] hari, itambog sa gahong sa mga leyon.”—Daniel 6:7-9.

Unsay buhaton ni Daniel ilalom sa hulga sa kamatayon? Magpadayon ba siya sa pagsalig sa iyang Diyos, si Jehova, o mokompromiso ba siya ug motuman sa gimando sa hari? Ang rekord nagtug-an kanato: “Si Daniel, sa pagkahibalo niya nga ang sinulat gipirmahan, misulod sa iyang balay, ug, ang mga bentana sa iyang lawak-sa-atop giablihan niya paingon sa Jerusalem, sa makatulo sa usa ka adlaw siya miluhod ug nag-ampo ug naghatag ug pagdayeg sa atubangan sa iyang Diyos, ingon sa iyang ginahimo una pa niana.” (Daniel 6:10) Ang ubang bahin sa asoy nahibaloan na kaayo. Si Daniel gitambog sa langob sa mga leyon tungod sa iyang pagtuo, apan si Jehova “nagtak-om sa baba sa mga  leyon” ug nagluwas sa iyang maunongong alagad.—Hebreohanon 11:33; Daniel 6:16-22.

Panahon sa Pagsusi sa Kaugalingon

Karon, ang mga alagad ni Jehova nagkinabuhi sa mabatokon nga kalibotan, nga nag-atubang ug daghang hulga sa ilang pisikal ug espirituwal nga kaayohan. Pananglitan, sa mabangis nga pag-ulbo sa rasanhong pagdumot diha sa pipila ka nasod, daghang Saksi ang gipamatay. Sa laing dapit, ang mga alagad ni Jehova nag-atubang ug kanihit sa pagkaon, kalisdanan sa ekonomiya, kinaiyanhong mga katalagman, grabeng sakit, ug uban pang mga kahimtang nga nagpameligro sa kinabuhi. Dugang pa, kinahanglang antoson nila ang paglutos, mga pagpit-os gikan sa trabahoan, ug lainlaing mga tentasyon sa pagbuhat ug daotan, nga ang tanan mahimong magpameligro sa ilang espirituwalidad. Sa pagkatinuod, ang dakong Kaaway, si Satanas, determinadong molaglag sa mga alagad ni Jehova pinaagi sa bisan unsang mga metodo nga mosaler.—1 Pedro 5:8.

Kon nag-atubang sa maong mga kahimtang, unsay atong mahimo? Bisan tuod natural lang nga mobatig kahadlok sa dihang gihulga ang kinabuhi sa usa ka tawo, mahimong hinumdoman nato ang mapasaligong mga pulong ni apostol Pablo: “[Si Jehova] nag-ingon: ‘Dili ko gayod ikaw pagabiyaan ni sa bisan unsang paagi pagatalikdan.’ Sa ingon kita magmaisogon ug makaingon: ‘Si Jehova ang akong magtatabang; dili ako mahadlok. Unsay arang mabuhat sa tawo kanako?’” (Hebreohanon 13:5, 6) Makasalig kita nga mao usab kana ang gibati ni Jehova bahin sa iyang mga alagad karon. Apan, ang pagkahibalo sa saad ni Jehova lahi sa pagkakombinsido nga siya molihok alang kanato. Busa hinungdanon kaayo nga atong susihon ang sukaranan sa atong pagsalig kang Jehova ug nga buhaton nato ang tanan nga atong maarangan sa pagpalig-on ug pagmentinar sa maong pagsalig. Kon buhaton nato kana, “ang kalinaw sa Diyos nga labaw sa tanang panghunahuna magbantay sa [atong] mga kasingkasing ug sa [atong] mga gahom sa pangisip pinaagi kang Kristo Jesus.” (Filipos 4:7) Unya sa dihang moabot na ang mga pagsulay, makahunahuna kita pag-ayo ug makasagubang niana sa maalamong paagi.

Sukaranan sa Pagsalig Kang Jehova

Daghan gayod kitag mga rason nga mosalig sa atong Maglalalang, si Jehova. Ang una niana mao ang kamatuoran nga si Jehova maoy mahigugmaong Diyos nga tinuod nga may pagtagad sa iyang mga alagad. Dunay daghang pananglitan nga gisulat diha sa Bibliya nga nagsugid bahin sa mahigugmaong pag-atiman ni Jehova sa iyang mga alagad. Naghubit sa mga pakiglabot ni Jehova sa iyang piniling katawhan, ang Israel, si Moises misulat: “Iyang nakaplagan siya sa yuta sa kamingawan, ug sa usa ka haw-ang, nagdaguhong nga desyerto. Siya naglibot kaniya, sa pag-atiman kaniya, aron panalipdan siya ingon sa tawotawo sa iyang mata.” (Deuteronomio 32:10) Sa modernong kapanahonan, si Jehova nagpadayon sa pag-atiman sa iyang mga alagad, ingong usa ka pundok ug ingong mga indibiduwal. Pananglitan, sa dihang ang pipila ka Saksi nakasinati ug grabeng kanihit sa pagkaon panahon sa sibil nga gubat sa Bosnia, gitino ni Jehova nga makadawat sila sa gikinahanglan kaayo nga mga abiyo pinaagi sa maisogong paningkamot sa ilang mga igsoon gikan sa Croatia ug Austria, kinsa nagpameligro sa ilang kinabuhi aron mobiyahe agi sa peligroso kaayong teritoryo aron sa pagdalag hinabang ngadto sa ilang mga igsoon. a

Tungod kay si Jehova nga Diyos mao ang Labing Gamhanan, tinong makaarang siya sa pagpanalipod sa iyang mga alagad ilalom sa bisan unsang kahimtang. (Isaias 33:22; Pinadayag 4:8) Apan bisan sa dihang tugotan ni Jehova ang pipila sa iyang mga alagad nga magmatinumanon hangtod sa kamatayon, lig-onon ug tabangan gihapon niya sila sa paghupot sa ilang integridad, nga magpaarang kanila sa pagpabiling matinumanon, malipayon, ug kalmado hangtod sa kataposan. Busa mabatonan nato ang samang pagsalig nga nabatonan sa salmista: “Ang Diyos mao ang atong dalangpanan ug kusog, usa ka katabang nga daling hikaplagan panahon sa mga kasakitan. Mao nga dili kita mahadlok, bisan ang yuta moagig kausaban ug bisan ang kabukiran matarog ngadto sa kinapusoran sa halapad nga kadagatan.”—Salmo 46:1, 2.

Nagbutyag usab ang Bibliya nga si Jehova mao ang Diyos sa kamatuoran. Nagpasabot kini nga siya kanunayng motuman sa iyang mga saad. Gani, gihubit siya sa Bibliya ingong Diyos nga “dili makabakak.” (Tito 1:2) Tungod kay gisublisubli pagsulti ni Jehova ang iyang pagkaandam sa pagpanalipod ug pagluwas sa iyang mga alagad, kita makaseguro gayod nga siya dili lamang makaarang kondili andam usab nga motuman sa iyang mga saad.—Job 42:2.

 Mga Paagi sa Pagpalig-on sa Atong Pagsalig

Bisan tuod duna kitay daghang katarongan sa pagsalig kang Jehova, kinahanglang dili nato hunahunaon nga kanunay natong mabatonan kana. Tungod kini kay ang kalibotan sa katibuk-an diyutayg pagtuo sa Diyos, ug ang maong tinamdan dali rang makapaluya sa atong pagsalig kang Jehova. Busa, kinahanglang maningkamot kita pag-ayo sa pagpalig-on ug paghupot nianang maong pagsalig. Nahibalo gayod si Jehova niini, ug gitagana niya ang mga paagi aron nga kita makasalig kaniya.

Una sa tanan, iyang gitagana ang iyang sinulat nga Pulong, ang Bibliya, nga naundan sa daghang gamhanang mga buhat nga iyang gihimo alang sa iyang mga alagad. Hunahunaa ra, unsa ka dako ang pagsalig nimo sa usa ka tawo kon ang imo lamang nahibaloan mao ang iyang ngalan? Tingali diyutay ra kaayo, kon duna man. Kinahanglang mahibaloan nimo ang iyang mga paagi sa paghimo sa mga butang ug ang iyang mga binuhatan aron makasalig kaniya, dili ba? Samtang kita mobasa ug mamalandong sa maong mga asoy sa Bibliya, ang atong kahibalo bahin kang Jehova ug sa iyang kahibulongang mga paagi molalom, ug mas maapresyar pa nato kon unsa siya ka kasaligan. Busa ang atong pagsalig kaniya mapalig-on. Ang salmista naghatag ug maayo kaayong panig-ingnan sa dihang siya miingon diha sa kinasingkasing nga pag-ampo ngadto sa Diyos: “Pagahinumdoman ko ang mga binuhatan ni Jah; kay hinumdoman ko ang imong kahibulongang buhat sa dugay na kanhi. Ug palandongon ko gayod ang tanan mong kalihokan, ug ang imong mga pakiglabot akong hatagag pagtagad.”—Salmo 77:11, 12.

Gawas pa sa Bibliya, kita dunay dagayang tinubdan sa espirituwal nga pagkaon diha sa mga publikasyon sa Bibliya nga gipatik sa organisasyon ni Jehova. Lakip sa ubang mga butang, kining maong mga publikasyon kasagarang adunay makapatandog nga mga asoy bahin sa mga alagad sa Diyos sa modernong kapanahonan, nga nagpakita kon sa unsang paagi si Jehova nakaarang sa pagtaganag tabang ug kahupayan sa dihang masugamak sila sa mga kahimtang nga walay paglaom. Pananglitan, si Martin Poetzinger, kinsa sa ulahi nahimong membro sa Nagamandong Lawas sa mga Saksi ni Jehova, grabeng nasakit samtang nag-alagad ingong payunir sa mga dapit sa Uropa nga layo sa iyang yutang natawhan. Wala siyay kuwarta, ug walay doktor nga gustong mohiling kaniya. Apan wala siya pasagdi ni Jehova. Sa kataposan, nakontak ang usa ka espesyalista diha sa lokal nga ospital. Tungod kay hugot nga nagtuo sa Bibliya, kining malulotong tawo nag-atiman kang Brader Poetzinger sama sa iyang pag-atiman sa usa ka anak, nga naghimo niana nga walay bayad. Ang pagbasa sa personal nga mga sugilanon nga sama niana tinong makapalig-on sa atong pagsalig sa atong langitnong Amahan.

Ang laing hinungdanong tabang nga gitagana ni Jehova sa pagpalig-on sa atong pagsalig kaniya mao ang bililhong pribilehiyo sa pag-ampo. Si apostol Pablo mahigugmaong nagsulti kanato: “Ayaw kabalaka sa bisan unsang butang, apan sa tanang butang pinaagi sa pag-ampo ug pangamuyo uban ang pagpasalamat ipahibalo ang inyong mga pangaliya sa Diyos.” (Filipos 4:6) Ang “tanang butang” mahimong maglakip sa atong mga pagbati, panginahanglan, kahadlok, ug kabalaka. Kon mas makanunayon ug kinasingkasing ang atong mga pag-ampo, mas molig-on ang atong pagsalig kang Jehova.

Sa dinhi pa si Jesu-Kristo sa yuta, usahay moadto siya sa usa ka mingaw nga dapit nga siyasiya ra aron mag-ampo nga dili matugaw. (Mateo 14:23; Marcos 1:35) Sa wala pa mohimog dagkong mga desisyon, migugol gani siya ug tibuok gabii sa pag-ampo ngadto sa iyang Amahan. (Lucas 6:12, 13) Dili ikatingala nga lig-on kaayo ang pagsalig ni Jesus kang Jehova nga nakaarang siya sa paglahutay sa labing makalilisang nga pagsulay nga midangat kang bisan kinsa. Ang iyang kataposang mga pulong diha sa estaka sa pagsakit mao: “Amahan, sa imong mga kamot itugyan ko ang akong espiritu.” Kanang maong pahayag sa pagsalig nagpasundayag nga hangtod sa kataposan ang iyang pagsalig sa iyang Amahan wala matibhangi, bisan tuod si Jehova wala mangilabot aron sa pagluwas kaniya.—Lucas 23:46.

Ang lain pang paagi sa pagpalig-on sa atong  pagsalig kang Jehova mao ang regular nga pagpakig-uban niadtong tibuok-kasingkasing nga nagasalig kaniya. Gisugo ni Jehova ang iyang katawhan sa pagtigom nga regular aron makakat-on bahin kaniya ug sa pagdinasigay sa usag usa. (Deuteronomio 31:12; Hebreohanon 10:24, 25) Ang maong panag-ubanay nagpalig-on sa ilang pagsalig kang Jehova, nga nakapaarang kanila sa paglahutay sa malisod nga mga pagsulay sa pagtuo. Sa usa ka nasod sa Aprika diin gidili ang buluhatong pagsangyaw, ang mga Saksi ni Jehova gihikawan sa panalipod sa kapolisan, sa mga dokumento sa pagbiyahe, sa mga sertipiko sa kaminyoon, sa pagpatambal sa ospital, ug sa pagpangempleyo. Sa dihang miulbo ang sibil nga gubat sa usa ka dapit, 39 ka membro, lakip ang mga bata, sa usa ka sikbit nga kongregasyon nagpuyo sulod sa mga upat ka bulan ilalom sa ubos kaayo nga taytayan diha sa desyerto aron makaikyas sa pagpamomba sa ilang lungsod. Ilalom nianang grabeng kalisod, ang ilang adlaw-adlaw nga panaghisgot sa teksto sa Bibliya ug sa ubang mga tigom nakapalig-on pag-ayo kanila. Busa sila nakalahutay sa kalisdanan nga wala maunsa ang ilang espirituwalidad. Kining maong eksperyensiya tin-awng nagpakita sa kahinungdanon sa regular nga pagpakigtigom uban sa katawhan ni Jehova.

Sa kataposan, aron mapalig-on ang atong pagsalig kang Jehova, kinahanglang magmaaktibo kita kanunay diha sa buluhatong pagsangyaw sa Gingharian, nga andam kanunay sa pagpaambit sa maayong balita ngadto sa uban. Gipasundayag kini sa makapatandog nga eksperyensiya sa usa ka masiboton nga batan-ong magmamantala sa Canada kinsa gitakboyan sa makamatayng balatian nga leukemia. Bisan pa sa iyang grabeng sakit, gusto niyang mahimong regular payunir, sa ato pa, bug-os-panahong ministro. Sulod sa makadiyot nga pagkalma sa iyang sakit, medyo mibaskog ang iyang panglawas nga nakahimo siya sa paggugol ug usa ka bulan diha sa ministeryo ingong oksilyare payunir. Unya migrabe ang iyang sakit, ug namatay siya pipila ka bulan sa ulahi. Bisan pa niana, nagpabilin siyang lig-on sa espirituwal hangtod sa kataposan, ang iyang pagsalig kang Jehova wala gayod matarog bisan sa daklit lamang. Nahinumdom ang iyang inahan: “Hangtod sa kataposan, mas nabalaka siya sa uban kay sa iyang kaugalingon. Dasigon niya sila nga magtuon sa Bibliya, nga giingnan sila, ‘Magkauban kita sa Paraiso.’”

Pagpamatuod sa Atong Pagsalig Kang Jehova

“Maingon nga patay ang lawas nga walay espiritu, sa ingon usab patay ang pagtuo nga walay binuhatan.” (Santiago 2:26) Ang giingon ni Santiago bahin sa pagtuo sa Diyos ikaingon usab bahin sa atong pagsalig Kaniya. Bisan pag sa makadaghan kita moingon nga kita nagsalig sa Diyos, wala kiniy kapuslanan gawas kon ipasundayag nato ang maong pagsalig pinaagi sa atong mga binuhatan. Si Abraham bug-os nga misalig kang Jehova ug nagpamatuod sa maong pagsalig pinaagi sa walay-pagpanukong pagkamasinugtanon sa iyang mga sugo, bisan hangtod sa punto nga andam niyang ihalad ang iyang anak, si Isaac. Tungod sa maong talagsaong pagsalig ug pagkamasinugtanon, si Abraham nailhan ingong higala ni Jehova.—Hebreohanon 11:8-10, 17-19; Santiago 2:23.

Dili na kinahanglang maghulat pa kita nga modangat kanato ang usa ka grabeng pagsulay una pa nato ipakita ang atong pagsalig kang Jehova. Giingnan ni Jesus ang iyang mga tinun-an: “Ang tawo nga kasaligan sa labing gamay kasaligan usab sa dako, ug ang tawo nga dili-matarong sa gamay dili-matarong usab sa dako.” (Lucas 16:10) Kinahanglang makakat-on kita sa pagsalig kang Jehova diha sa tanan natong adlaw-adlaw nga mga kalihokan, nga magmasinugtanon kaniya bisan sa mga butang nga morag dili hinungdanon. Sa dihang makita nato ang mga benepisyo nga naggikan sa maong pagkamasinugtanon, ang atong pagsalig sa atong langitnong Amahan mapalig-on, nga makapaarang kanato sa pag-atubang sa mas dagko o mas lisod nga mga pagsulay.

Samtang nagpadulong ang kalibotan sa malaglagong kataposan niini, ang katawhan ni Jehova seguradong makaagom sa dugang mga pagsulay ug mga kapeligrohan. (Buhat 14:22; 2 Timoteo 3:12) Pinaagi sa pagtukod ug lig-on ug bug-os nga pagsalig kang Jehova karon, makalaom kita nga maluwas ngadto sa iyang gisaad nga bag-ong kalibotan—kaha pinaagi sa paglabang-buhi sa dakong kasakitan o pinaagi sa pagkabanhaw. (2 Pedro 3:13) Hinaot nga dili nato tugotan ang bisan unsang kakulang sa pagsalig sa atong bahin nga makadaot sa atong bililhong relasyon kang Jehova. Unya, ang giingon bahin kang Daniel human siya maluwas gikan sa langob sa mga leyon ikaingon usab kanato: “Wala gayoy nakaplagan nga kadaot diha kaniya, tungod kay siya misalig man sa iyang Diyos.”—Daniel 6:23.

[Footnote]

[Hulagway sa panid 9]

Ang pagbasa sa mga asoy bahin sa matinumanong mga alagad ni Jehova, sama kang Martin Poetzinger, makapalig-on sa pagtuo