“Ang mga Samad sa Usa ka Higala”

NAKITA ni apostol Pablo ang panginahanglan sa paghatag ug mga pagtul-id ngadto sa unang-siglong mga Kristohanon sa Galacia. Lagmit aron malikayan ang bisan unsang kasuko, nangutana siya: “Nan, ako ba nahimo na ninyong kaaway tungod kay ako nagsulti kaninyo sa kamatuoran?”—Galacia 4:16.

Sa ‘pagsulti sa kamatuoran,’ si Pablo wala mahimong ilang kaaway. Sa pagkatinuod, siya milihok nga kaharmonya sa prinsipyo sa Bibliya: “Matinumanon ang mga samad sa usa ka higala.” (Proverbio 27:6, King James Version) Siya nahibalo nga ang garbo sa mga nakahimog sayop mahimong matandog. Apan, siya nakaamgo nga ang paghikaw sa disiplina nga gikinahanglan sa nakasala mahimong moresulta nga dili ikapasundayag ni Jehova nga Diyos ang iyang gugma ngadto sa nakasala. (Hebreohanon 12:5-7) Busa, ingong usa ka matinumanong higala nga interesado gayod sa dumalayong mga kaayohan sa kongregasyon, si Pablo wala mosibog sa paghatag ug tambag alang sa pagtul-id.

Karon, ang mga Saksi ni Jehova nagatuman sa sugo ‘nga maghimog mga tinun-an sa katawhan sa tanang kanasoran, . . . nga magatudlo kanila sa pagtuman sa tanang butang nga gisugo [ni Jesu-Kristo].’ Sa pagbuhat niana, dili ikompromiso niining sinserong mga Kristohanon ang mga kamatuoran sa Bibliya nga nagladlad ug nagsaway sa sayop nga doktrina ug dili-Kristohanong panggawi. (Mateo 15:9; 23:9; 28:19, 20; 1 Corinto 6:9, 10) Inay mahimong mga kaaway nga isalikway, sila nagpasundayag ug kahingawa sa tiunay nga mga higala.

Uban sa hait nga salabotan nga dinasig sa Diyos, ang salmista misulat: “Kon hampakon ako sa matarong, kana maoy mahigugmaong-kalulot; ug kon badlongon niya ako, kana maoy lana sa ibabaw sa akong ulo, nga dili dumilian sa akong ulo.”—Salmo 141:5.