Magmalipayon Uban ang Paglaom sa Gingharian!

KADTO maoy usa ka malipayong okasyon nga nagtigom sa mamiminaw nga may gidaghanong 5,784 niadtong Marso 10, 2001, sa tulo ka dagkong bilding nga gigamit sa dakong pamilyang Bethel sa New York. Ang okasyon mao ang graduwasyon sa ika-110 nga klase sa misyonaryong tunghaan sa Gilead.

Si Carey Barber, usa ka membro sa Nagamandong Lawas sa mga Saksi ni Jehova, ang nag-abiabi sa tanan ug nagbukas sa programa, nga nag-ingon: “Malipay kitang masayod nga 110 nga mga klase sa mga estudyante sa Gilead ang nabansay na karon ingong mga misyonaryo ug naasayn sa mga teritoryo sa tibuok kalibotan.”

Kon Unsaon sa Pagpabiling Malipayon

Human sa pangbukas nga mga komento ni Brader Barber, si Don Adams nagpahayag sa mamiminaw, lakip sa 48 ka mograduwar nga mga estudyante, sa ulohang “Ang Panalangin ni Jehova Makapadato Kanato.” Nga nagbase sa iyang pakigpulong sa Proverbio 10:22, iyang gipahinumdoman ang iyang mamiminaw nga si Jehova molig-on ug mopanalangin sa iyang mga alagad sa dihang ilang unahon ang intereses sa Gingharian diha sa ilang kinabuhi. Iyang gidasig ang mga estudyante nga dawaton ang ilang bag-ong mga asaynment uban ang espiritu sa pagkaandam ingon sa gipasundayag ni apostol Pablo sa dihang siya giawhag sa ‘pag-adto sa Macedonia ug sa pagtabang.’ (Buhat 16:9) Bisag dihay mga kalisdanan nga pagasagubangon, ang pagkaandam ni Pablo nga mosangyaw diin siya gitudlo miresultag daghang makapalipayng mga panalangin.

Ang mga membro sa mograduwar nga klase nakatapos sa ilang lima-ka-bulan nga pagtuon sa Bibliya ug pagbansay ingong pagpangandam sa ilang misyonaryong buluhaton. Bisan pa niana, si Daniel Sydlik, usa ka membro sa Nagamandong Lawas sa mga Saksi ni Jehova, nagdasig kanila sa pagpadayon sa pagkahimong mga tumutuon. Nagpahayag sa temang “Mahimong Tinuod nga mga Tinun-an,” siya mikomento: “Ang pagkatinun-an nagkahulogan ug kanunayng pagtuman sa mga pulong ni Jesus. Kini nagpasabot nga kita kanunayng andam nga mopatalinghog sa iyang mga pulong, sa iyang mensahe, sa iyang pagtudlo.” Iyang gipasiugda nga ang mga tinun-an ni Kristo dili mohimog mga desisyon nga dili magpatalinghog sa tingog sa ilang Agalon; ang kaalam sa Diyos nalanggikit diha sa kinabuhi ni Kristo. (Colosas 2:3) Walay usa kanato nga kas-ang makadungog sa pulong ni Jesus ug dayon manghinapos nga natugkad na nato ang tanan bahin kaniya, busa gidasig ni Brader Sydlik ang mga mograduwar nga magpadayon sa pagtuon, sa pagpadapat, ug sa pagtudlo sa Kristohanong kamatuoran, nga mosangpot sa kagawasan.—Juan 8:31, 32.

Aron magpabiling malipayon diha sa pag-alagad sa Diyos, ang usa kinahanglang andam nga modawat sa disiplina ug pagtul-id. “Ang Inyong mga Rinyon Magtul-id ba Kaninyo?” mao ang gipatungha nga pangutana sa instruktor sa Gilead nga si Lawrence Bowen. Iyang gipakita nga sa Bibliya ang mahulagwayong mga rinyon nagpasabot sa kinailadmang mga hunahuna ug pagbati sa usa ka tawo. Kini mahimong motul-id sa usa ka tawo kon ang dinasig nga tambag gikan sa Pulong sa Diyos makatuhop sa kinahiladmang mga bahin  sa iyang pagkatawo. (Salmo 16:7; Jeremias 17:10) Ngani ang pagkamatinumanon sa usa ka tawo makapatandog gayod kang Jehova. Human mabasa ang Proverbio 23:15, 16, ang mamumulong nangutana: “Ang inyong mga rinyon magtul-id ba kaninyo?” Siya midugang: “Manghinaot mi nga kini magtul-id kaninyo, ug sa ingon kamo makahatag kang Jehova ug tumang kalipay diha sa iyang kahiladman. Mapukaw ninyo ang iyang kinailadmang mga pagbati. Oo, kamo makapasadya sa rinyon sa Diyos samtang kamo maunongong magpabilin sa inyong mga asaynment.”

Ang kataposang pakigpulong niining bahina sa programa gihatag ni Mark Noumair, nga nag-alagad nga misyonaryo sa Kenya una pa mahimong instruktor sa Gilead. Ang iyang pakigpulong nga nag-ulohang “Mas Maayo ang Pagtan-aw Pinaagi sa mga Mata” nagpasiugda sa kahinungdanon sa pag-ugmad sa pagkakontento. Uyon sa Ecclesiastes 6:9, si Brader Noumair nag-awhag: “Dawata ang kamatuoran. Kana maoy ‘pagtan-aw pinaagi sa mga mata.’ Inay nga mangandoy sa usa ka butang nga buot nimong buhaton apan wala buhata, hatagig bug-os nga pagtagad kon unsay imong mahimo sa imong presenteng mga kahimtang. Ang pagkinabuhi sa usa ka kalibotan sa damgo, ug pagbaton ug dili-makataronganong mga pagdahom, o ang paghunahuna kanunay sa negatibong mga butang bahin sa imong asaynment makapahimo lamang nimo nga dili-malipayon ug dili-kontento.” Oo, bisan pag asa kita o bisan unsa ang mga kahimtang, ang pag-ugmad sa diyosnong pagkakontento sa atong mga kahimtang makahatag ug malipayong espiritu sa pag-alagad sa atong Dakong Maglalalang.

 Malipayong mga Kasinatian sa Pag-alagad sa Gingharian ug sa Gilead

Human niadtong praktikal nga tambag gikan sa mga pakigpulong, giasoy sa mga estudyante ang pipila ka kasinatian nga ilang naagian samtang nakig-ambit sa publikong ministeryo panahon sa ilang lima-ka-bulan nga kurso. Ubos sa pagdumala ni Wallace Liverance, ang registrar sa Tunghaang Gilead, gisugilon sa mograduwar nga mga estudyante kon sa unsang paagi girekomendar nila ang ilang kaugalingon ingong mga ministro sa Diyos. (2 Corinto 4:2) Sila nakatandog sa hinatag-Diyos nga tanlag sa pipila ka tawo. Ang mga kasinatian sa mga estudyante nagpakita kon sa unsang paagi nasugdan ang mga pagtuon sa Bibliya uban sa sinserong mga tawo nga ilang nahibalag sa kadalanan, sa balaybalay nga ministeryo, ug sa uban pang mga okasyon. Sa lainlaing mga higayon, ang mga interesadong mga tawo miingon nga ang kamatuoran makaplagan diha sa gipasukad-sa-Bibliyang mga publikasyon sa organisasyon ni Jehova. Usa ka tagbalay misanong nga positibo kaayo sa usa ka partikular nga teksto sa Bibliya. Siya karon nagatuon sa Bibliya uban sa mga Saksi ni Jehova.

Unya, giinterbiyo ni Joel Adams ang mga migraduwar sa kanhing mga klase sa Gilead. Ang iyang tema maoy “Ayaw Gayod Paghunong sa Pagtuon, Ayaw Gayod Paghunong sa Pag-alagad Kang Jehova.” Ang mga giinterbiyo may tukma-sa-panahong tambag alang sa bag-ong mga misyonaryo. Naghinumdom sa iyang mga adlaw ingong membro sa ika-26 nga klase sa Gilead, si Harry Johnson miingon: “Kita gitudloan nga kanunayng gitultolan ni Jehova ang iyang katawhan ug siya kanunayng magatultol sa iyang katawhan. Kana nga pasalig nakadasig kanako latas sa katuigan.” Si William Nonkes, usa ka membro sa ika-53 nga klase sa Gilead, nagtambag sa mga mograduwar: “Labaw sa tanan, isilsil sa alimpatakan ang mga prinsipyo sa Bibliya, ug ipadapat kini sa tanang desisyon nga imong himoon sa imong kinabuhi karon ug sa walay kataposan. Tungod niana, ikaw makapabilin sa imong asaynment, ug ang dagayang mga panalangin ni Jehova maanaa kanimo.”

“Napalig-on sa Pagtuman sa Kabubut-on ni Jehova” maoy tema nga gipili ni Richard Rian alang sa iyang bahin sa programa. Usa sa iyang giinterbiyo mao si John Kurtz, graduwado sa ika-30 nga klase, nga nakagugol ug kapin sa 41 ka tuig ingong misyonaryo sa Espanya. Sa dihang gipangutana bahin sa kurikulum sa Gilead, si Brader Kurtz miingon: “Ang pangunang teksbok mao ang Bibliya. Ug unya duna kamiy mga giya sa pagtuon nga motabang kanamo sa pagsabot sa Bibliya. Mabatonan kadto sa tanan. Sa Gilead walay sekretong impormasyon nga gihatag. Dili gayod ako mohunong sa pagpasiugda niini tungod kay ang tanang Saksi sayon rang makabaton sa impormasyon nga gitagana sa Gilead.”

Si Brader Gerrit Lösch, usa ka membro sa Nagamandong Lawas sa mga Saksi ni Jehova, nagtapos sa espirituwal nga programa pinaagi sa pagpahayag sa ulohang “Ibabaw ug Ilalom sa mga Pako ni Jehova.” Iyang gisaysay kon sa unsang paagi ang panalipod ug pagpaluyo sa Diyos sa iyang matinumanong mga alagad gihulagway sa Bibliya pinaagi sa mga pako sa agila. (Deuteronomio 32:11, 12; Salmo 91:4) Usahay bukharon sa hamtong nga agila ang mga pako niini sulod sa daghang oras aron panalipdan ang mga piso niini. May mga panahon gani nga itabon sa inahan nga agila ang iyang mga pako nganha sa iyang mga piso aron protektahan kini gikan sa bugnawng hangin. Sa susamang paagi ug uyon sa iyang katuyoan, si Jehova makatabang sa iyang matinumanong mga alagad, ilabina kon sila nag-atubang sa mga pagsulay sa espirituwal. Dili itugot ni Jehova nga tentalon ang iyang mga alagad nga labaw sa ilang maantos apan magtaganag kalingkawasan aron sila makahimo sa pag-antos niini. (1 Corinto 10:13) Gitapos kini ni Brader Lösch pinaagi sa pag-ingon: “Aron magpabiling mapanalipdan sa espirituwal, kinahanglang magpabilin kita nga magpasilong ilalom sa pako ni Jehova. Kini nagpasabot nga dili gayod nato ugmaron ang espiritu sa pagkaindependente. Hinaot nga magpabilin kitang suod kang Jehova ug sa iyang samag-inahang organisasyon, nga dili magpahilayo sa atong kaugalingon gikan sa ilang pagtultol ug mahigugmaong tambag.”

Gibasa sa tsirman ang mga telegrama ug mga pangomosta gikan sa mga nagpahalipay sa tibuok kalibotan. Pagkahuman gipanghatag ang mga diploma. Sa dihang gitukod ang Tunghaang Gilead, tuyo lamang niadto nga adunay limitadong gidaghanon sa mga klase sulod sa lima-ka-tuig nga yugto. Apan sulod sa 58 ka tuig gipapadayon ni Jehova nga Diyos ang tunghaan. Sumala sa giingon ni Brader Barber sa iyang pangbukas nga mga komento: “Pagkamaayo gayod nga rekord ang nahimo sa mga migraduwar sa Gilead sukad niadtong 1943 sa dihang ang Gilead giinagurahan! Ang ilang hiniusang mga paningkamot miresulta sa pagdugang sa literal nga paagi sa ginatos ka libo sa mga maaghop sa yuta ngadto sa mahimayaong organisasyon ni Jehova.” Oo, kining tunghaan sa misyonaryo nakatabang nga magmalipayon ang milyonmilyon uban ang paglaom sa Gingharian.

[Kahon sa panid 24]

MGA ESTADISTIKA SA KLASE

Gidaghanon sa mga nasod nga gihawasan: 8

Gidaghanon sa mga nasod nga gipadalhan: 18

Total nga gidaghanon sa mga estudyante: 48

Aberids nga edad: 34

Aberids nga katuigan sa kamatuoran: 18

Aberids nga katuigan sa bug-os-panahong ministeryo: 13

[Hulagway sa panid 25]

Ika-110 nga Migraduwar nga Klase sa Watchtower Bible School of Gilead

Sa listahan sa ubos, ang mga laray ginumerohan gikan sa atubang ngadto sa likod, ug ang mga ngalan gilista gikan sa wala ngadto sa tuo sa matag laray.

(1) Vacek, E.; Madelin, L.; Evans, G.; Watanabe, K. (2) Trafford, P.; Turfa, J.; Wilson, P.; Williams, R.; Weber, A. (3) Johnson, T.; Hanau, K.; Mourlhou, F.; Charpentier, F.; Peckham, R.; Androsoff, P. (4) Seegers, T.; Seegers, D.; Bailey, P.; Bailey, M.; Madelin, K.; Lippold, E.; Lippold, T. (5) Evans, N.; Gold, R.; Bollmann, I.; Vacek, R.; Oundjian, J.; Wilson, N. (6) Turfa, J.; Zuidema, L.; Zuidema, R.; Bengtsson, C.; Bengtsson, J.; Galano, M.; Galano, L. (7) Peckham, T.; Mourlhou, J.; Charpentier, C.; Gold, M.; Bollmann, R.; Oundjian, F. (8) Weber, R.; Johnson, B.; Hanau, D.; Watanabe, Y.; Williams, R.; Trafford, G.; Androsoff, T.