Sugilanon sa Kinabuhi

Among Gisulayan si Jehova

SUMALA SA GIASOY NI PAUL SCRIBNER

“Maayong buntag, Gng. Stackhouse. Karong buntaga nanawat kog mga order sa mga keyk sa Easter, ug nakaseguro ko nga magustohan nimo ang pagbaton ug usa niini alang sa imong pamilya.” Sayo kadto sa tingpamulak sa 1938, ug didto ako sa Atco, New Jersey, T.B.A., nga nakig-estorya sa usa sa labing maayong kustomer sa akong ruta sa mga suki alang sa General Baking Company. Sa akong dakong katingala gibalibaran ako ni Gng. Stackhouse.

“DILI ko interesadong moorder,” siya miingon. “Dili kami mosaulog ug Easter.”

Nianang tungora nalibog ako. Dili mosaulog ug Easter? Siyempre, ang pangunang lagda sa pagpamaligya mao nga kanunayng husto ang kustomer. Busa unsay akong buhaton karon? “Buweno,” ako namasin, “lami kaayo ni nga keyk, ug nasayod ko nga magustohan nimo ang among mga baligya. Aw, sa imong hunahuna dili kaha kini magustohan sa imong pamilya bisan kamo dili mosaulog ug Easter?”

“Sa akong pagtuo dili,” siya misubli sa pag-ingon, “apan duna koy buot nga isulti kanimo, G. Scribner, ug tingali mao kini ang labing maayong higayon sa paghimo niini.” Ang maong panaghisgot bug-os nakausab sa akong kinabuhi! Si Gng. Stackhouse, usa ka membro sa kongregasyon sa mga Saksi ni Jehova sa Berlin, New Jersey, nagpatin-aw kon diin naggikan ang pagsaulog sa Easter ug naghatag kanako ug tulo ka pulyeto. Nag-ulohan kadtog Safety, Uncovered, ug Protection. Mipauli ako dala ang mga pulyeto, mausisahon apan may diyutayng kahadlok. May butang nga gisulti si Gng. Stackhouse nga pamilyar alang kanako, usa ka butang nga akong mahinumdoman sukad sa akong pagkabata.

Unang Pagkahibalag sa mga Estudyante sa Bibliya

Natawo ako niadtong Enero 31, 1907, ug sa 1915, sa nag-edad akog otso anyos, ang akong amahan namatay sa kanser. Ingong resulta, si Mama ug ako mipuyo uban sa iyang mga ginikanan sa usa ka dakong  balay sa Malden, Massachusetts. Si Benjamin Ransom, nga igsoon sa akong inahan, ug ang iyang asawa nagpuyo usab didto, sa ikatulong andana. Si Tiyo Ben nakig-uban na sa Internasyonal nga mga Estudyante sa Bibliya, ingon sa pagtawag kaniadto sa mga Saksi ni Jehova, sa wala pa mosugod ang ika-20ng siglo. Ganahan kaayo ko ni Tiyo Ben, apan ang uban sa pamilya ni Mama, kinsa mga Metodista, naghunahuna nga siya ray nalahi. Mga tuig sa ulahi, sa wala pa makigbulag kaniya ang iyang asawa, milampos ang iyang asawa sa pagpabutang kaniya sa makadiyot sa usa ka institusyon sa mga buang tungod sa iyang relihiyosong mga tinuohan! Sanglit nadiskitahan dayon sa mga doktor nga walay depekto ang hunahuna ni Tiyo Ben, ilang gipagawas siya nga nangayog pasaylo.

Kuyogon ako ni Tiyo Ben sa mga tigom sa Internasyonal nga mga Estudyante sa Bibliya sa Boston, ilabina kon adunay mga nagaduawng mga mamumulong o espesyal nga mga okasyon. Usa ka higayon, ang nagaduawng mamumulong mao ang iladong si Charles Taze Russell, nga maoy nagdumala sa buluhatong pagsangyaw niadtong mga adlawa. Sa laing panahon, ang espesyal nga okasyon mao ang pagpasalida sa “Photo-Drama of Creation.” Bisan pag kadto maoy balik niadtong 1915, hangtod karon tin-aw kong mahinumdoman ang pagkahulagway kang Abraham nga nagdala sa iyang anak nga si Isaac ngadto sa bukid aron itanyag siya ingong halad. (Genesis, kapitulo 22) Mahanduraw ko gihapon si Abraham ug si Isaac nga nagbaktas patungas sa bukid nga nagpas-an ug sugnod, sanglit si Abraham bug-os man nga misalig kang Jehova. Sanglit ako maoy usa ka batang nailo sa amahan, kadto nakatandog kaayo kanako.

Human niadto, si Tiyo Ben ug ang iyang asawa mibalhin sa Maine, ug si Mama nagminyo pag-usab ug naglalin sa among pamilya ngadto sa New Jersey. Busa ako wala na makakita kang Tiyo Ben sulod sa dugayng panahon. Sa akong pagkatin-edyer sa New Jersey, nahibalag ko si Marion Neff, usa sa walo ka anak sa pamilyang Presbiteriano nga akong ganahan nga bisitahan. Migugol ako ug daghang Dominggo sa gabii uban sa maong pamilya ug sa ilang grupo sa mga batan-on sa simbahan nga tungod niana ako nahimo ra gayong Presbiteriano. Bisan pa niana, mahinumdoman ko gihapon ang pipila ka butang nga akong nakat-onan sa mga tigom sa mga Estudyante sa Bibliya. Si Marion ug ako naminyo niadtong 1928, ug ang among mga anak nga babaye, si Doris ug Louise, natawo sa 1935 ug 1938. Kay adunay gamayng bata ug bag-ong nahimugso diha sa pamilya, naamgohan namo ang panginahanglan sa espirituwal nga direksiyon sa pagmatuto sa among pamilya.

Pagkakaplag sa Kamatuoran Pinaagi sa Maong mga Pulyeto

Si Marion ug ako nangitag usa ka simbahan nga among mapakig-aniban ug nagkasabot sa paghimog usa ka plano. Magpulihay kada Dominggo, ang usa kanamo magpabilin sa balay uban sa mga bata samtang ang usa mosimba sa iyang pilionon nga simbahan. Usa ka Dominggo niana turno ni Marion nga magpabilin sa balay, apan mipresentar ako nga maoy mobantay sa mga bata aron mabasa ko ang pulyetong Safety, ang una sa tulo ka pulyeto nga gihatag kanako ni Gng. Stackhouse. Sa dihang nasugdan ko na kini, dili ko kini maundangan ug basa! Misamot ako pagkakombinsido nga may nakaplagan akong butang nga dili ikahatag sa bisan unsang simbahan. Sa pagkasunod nga semana mao gihapon ang nahitabo, ug miboluntaryo ako nga magbantay sa mga bata samtang akong gibasa ang ikaduhang pulyeto nga Uncovered. Daw pamilyar kanako ang akong gibasa. Mao ba kini ang gituohan ni Tiyo Ben? Ang among pamilya nagtuo nga binuang ang iyang relihiyon. Unsa kahay hunahunaon  ni Marion? Dili ako kinahanglang mabalaka. Sa dihang mipauli ko gikan sa trabaho pipila ka adlaw human sa pagbasa sa Uncovered, gipakuratan ako ni Marion pinaagi sa pag-ingon, “Gibasa ko kadtong mga pulyeto nga imong gidala sa balay. Makaiikag gayod kini.” Nakapahupay gayod kadto kanako!

Sa likod sa mga pulyeto mao ang impormasyon bahin sa di pa dugayng giluwatan nga librong Enemies, usa ka mainitong pagyagyag sa bakak nga relihiyon. Nakadesidir kami sa pagbaton niini. Hinunoa, sa wala pa namo ikapadala ang among order pinaagi sa koreyo, usa ka Saksi nga lalaki nanuktok sa among pultahan ug nagtanyag kanamo sa mao mismo nga libro. Kadtong libroha nakatabang kanamo sa paghimog desisyon! Miundang kami sa pagsimba sa mga simbahan ug misugod sa pagtambong sa mga tigom sa Kongregasyon sa mga Saksi ni Jehova sa Camden, New Jersey. Mga pipila ka bulan lang sa ulahi, sa Dominggo, Hulyo 31, 1938, mga 50 kanamo ingong usa ka grupo nagtigom didto sa nataran ni Sister Stackhouse—sa balay diin misulay ako sa pagbaligyag mga keyk sa Easter—ug nagpatalinghog sa girekord nga pakigpulong ni Judge Rutherford bahin sa bawtismo. Unya nag-ilis mi ug sinina didto sa balay, ug 19 kanamo ang nabawtismohan didto sa usa ka sapa sa duol.

Determinado nga Mahimong Payunir

Sa wala madugay human sa akong bawtismo, usa sa mga sister sa kongregasyon nakigsulti kanako bahin  sa mga tawo nga gitawag ug mga payunir, nga naghimo sa publikong ministeryo nga ilang pangunang buluhaton. Ako nagmausisahon dihadiha bahin niini ug sa wala madugay may nakaila ako nga tibuok pamilya nga mga payunir. Usa ka tigulang, si Brader Konig, ang iyang asawa, ug ang iyang hamtong nga anak nga babaye pulos mga payunir sa silingan nga kongregasyon. Ingong usa ka amahan sa usa ka bag-o pang pamilya, nakadayeg ako sa dulot nga kalipay nga nabatonan sa pamilyang Konig diha sa ministeryo. Kanunay akong mohapit, moparking sa akong bakery truck, ug mogugol ug panahon uban kanila sa balaybalay nga ministeryo. Sa wala madugay gusto ko nga mahimong payunir. Apan sa unsang paagi? Si Marion ug ako dunay duha ka gagmayng anak, ug nagkinahanglag dakong panahon ang akong trabaho. Gani, sa dihang nagsugod sa Uropa ang Gubat sa Kalibotan II ug nagkadaghan ang mga batan-ong lalaki nga nagsundalo sa Tinipong Bansa, nagkadaghan ang buluhaton nga gisangon kanamo nga nahibilin sa sibilyan nga mga trabaho. Gidasig ako nga mohimog dugang nga mga ruta sa mga suki, ug nasayod ako nga dili gayod ako makapayunir tungod sa maong eskedyul.

Sa dihang gisulti ko kang Brader Konig ang bahin sa akong tinguha nga magpayunir, siya miingon: “Padayon lang sa pagpaningkamot sa pag-alagad kang Jehova, ug padayong iampo kaniya ang imong tumong. Tabangan ka niya sa pagkab-ot niini.” Sulod sa kapin sa usa ka tuig, padayon ko kanang gibuhat. Kanunay kong gipamalandong ang mga kasulatan sama sa Mateo 6:8, nga nagpasalig kanato nga si Jehova nahibalo sa atong mga panginahanglan bisan gani sa dili pa nato kini pangayoon kaniya. Ug padayon kong gipaningkamotan nga masunod ang tambag sa Mateo 6:33, nga padayong unahon sa pagpangita ang Gingharian sa Diyos ug ang iyang pagkamatarong. Gidasig usab ako ni Brader Melvin Winchester, usa ka alagad sa sona (karon gitawag ug magtatan-aw sa sirkito).

Gisultihan ko si Marion bahin sa akong mga tumong. Gihisgotan namo ang mga pulong sa Malaquias 3:10, nga nagdasig kanamo nga sulayan si Jehova ug tan-awon kon dili ba niya ibubo ang panalangin kanamo. Nadasig ako sa iyang sanong: “Kon buot ka nga magpayunir, ayaw paglangan tungod kanako. Makaatiman ako sa atong mga anak nga babaye samtang magpayunir ka. Wala bitaw ta magkinahanglan ug daghang materyal nga mga butang.” Human sa 12 ka tuig nga kaminyoon, nasayod na ako nga si Marion maoy daginotan ug makutihon nga ginang sa panimalay. Latas sa katuigan, nahimo ko siyang maayo kaayong kauban nga payunir, ug usa sa mga sekreto sa among kalamposan sulod sa halos 60 ka tuig sa bug-os-panahong pag-alagad mao ang iyang hiyas nga magmatagbaw sa diyutayng materyal nga butang ug isipon kining daw daghan.

Sa ting-init sa 1941, human sa daghang bulan sa mainampoong pagplano, si Marion ug ako nakatigom na ug dakodakong kuwarta, ug mipalit mi ug 5.5 metros nga treyler nga mapuy-an sa among pamilya. Miundang ako sa akong trabaho ug nahimong usa ka regular payunir niadtong Hulyo 1941, ug ako anaa sa bug-os-panahong pag-alagad sukad niadto. Ang akong unang asaynment mao ang napulo ka hunonganan sa bus didto sa Route 50 tali sa New Jersey ug St. Louis, Missouri, diin didto himoon ang among kombensiyon sa sayong bahin sa Agosto. Gipadad-an akog mga ngalan ug mga adres sa mga igsoon nga akong maagian, ug misulat ako nga abante, nga misulti kanila kon kanus-a ako moabot. Sa dihang nakaabot na kami sa kombensiyon, gipangita ko ang departamento sa payunir ug mikuhag laing asaynment.

“Sulayan Ko si Jehova”

Gikargahan namo ang among gamayng treyler ug literatura ug mitambong sa among kataposang tigom sa Camden aron manamilit sa mga igsoon. Uban sa duha ka gagmay pa kaayong mga anak nga babaye nga atimanonon ug wala pay tinong destinasyon human sa kombensiyon, ang among mga plano daw dili-realistikanhon alang sa pipila ka igsoon, ug ubay-ubay kanila miingon: “Mamalik kamo sa dili madugay.” Nahinumdom ako nga miingon: “Aw, wala ko moingon nga kami dili na mamalik. Miingon si Jehova nga siya moatiman kanako, ug sulayan ko si Jehova.”

Human sa unom ka dekada nga pagpayunir sa 20 ka lungsod gikan sa Massachusetts ngadto sa Mississippi, kami makaingon nga si Jehova naghimo ug labaw pa kay sa pagtuman sa iyang saad. Ang mga panalangin nga iyang gibubo kang Marion, kanako, ug sa among duha ka anak nga babaye maoy labaw sa bisan unsang butang nga akong gilaoman balik niadtong 1941. Naglakip kini sa pagkahimong matinumanong mga payunir sa among mga anak nga babaye nga nag-alagad sa silingang mga kongregasyon, ug (sa kinaulahiang ihap) ang pagkabaton ug duolan sa usa ka gatos ka espirituwal nga mga anak nga lalaki ug babaye lukop sa East Coast sa Tinipong Bansa. Nakadumala ako ug pagtuon sa 52 ka tawo nga nagpahinungod sa ilang kinabuhi ngadto kang Jehova nga Diyos ug si Marion sa 48 ka tawo.

Sa Agosto 1941, nakaabot kami sa St. Louis, ug didto nahibalag ko si Brader T. J. Sullivan gikan sa  Bethel. Dala niya ang akong sertipikasyon sa pagkahimong ordinadong ministro, nga akong gikinahanglan tungod sa nagsingabot nga gubat ug tungod sa pagreklutag mga sundalo alang sa gubat. Gisultihan ko si Brader Sullivan nga ang akong asawa naggugol ug parehong gidaghanon sa akong oras diha sa ministeryo ug buot niya nga magpayunir uban kanako. Bisan ug wala pa maandam ang departamento alang sa mga payunir sa kombensiyon, gipapirma dihadiha ni Brader Sullivan si Marion ingong usa ka payunir ug nangutana kanamo: “Asa man mo magpayunir human sa kombensiyon?” Wala kami masayod. “Buweno, ayawg kabalaka,” siya miingon: “Mahimamat ninyo sa kombensiyon ang usa ka igsoon gikan sa dapit nga nagkinahanglag mga payunir, ug masulbad ang inyong suliran. Sulati lang kami ug sultihi kami kon asa kamo, ug magpadala kami ug sulat bahin sa inyong asaynment.” Mao kana ang nahitabo. Kini diay si Brader Jack DeWitt, usa ka alagad sa sona kanhi, may nahibal-an nga pipila ka tawo sa New Market, Virginia, nga dunay puy-anan sa mga payunir nga nagkinahanglan ug dugang pipila ka payunir. Busa pagkahuman sa kombensiyon, mibiyahe mi paingon sa New Market.

Didto sa New Market gibati namo ang talagsaong kalipay. Kinsa ba god ang magdahom nga ang moabot gikan sa Philadelphia aron moduyog kanamo sa pagpayunir mao diay si Benjamin Ransom! Oo, si Tiyo Ben. Pagkadakong kalipay sa pagpakig-uban kaniya diha sa ministeryo sa balaybalay kapin sa 25 ka tuig human niya itisok sa akong kasingkasing ang mga binhi sa kamatuoran didto pa sa Boston! Bisan pag nakasinatig mga tuig nga wala tagda, gibiaybiay, ug gilutos pa gani sa pamilya, wala gayod mahanaw ang gugma ni Tiyo Ben kang Jehova ug sa ministeryo.

Napahimuslan namo ang walo ka bulan nga pag-estar sa puy-anan sa mga payunir didto sa New Market. Nianang tungora, usa sa mga butang nga among nakat-onan mao ang pagpakigbaylo ug mga manok ug mga itlog alang sa literatura. Human niadto si Tiyo Ben, si Marion, ug ako, uban sa usa ka magtiayon ug ilang anak nga babaye, giasayn sa pag-alagad ingong mga payunir sa Hanover, Pennsylvania—ang una sa unom ka asaynment nga among nadawat sa Pennsylvania gikan sa 1942 hangtod sa 1945.

Mga Espesyal Payunir Panahon sa Gubat sa Kalibotan II

Dihay mga panahon sa Gubat sa Kalibotan II nga kinahanglan namong antoson ang pagkamabatokon tungod sa among neyutral nga baroganan, apan wala gayod mapakyas si Jehova sa pagpaluyo kanamo. Usa ka higayon sa Provincetown, Massachusetts, ang among karaang Buick nga awto naguba, ug kinahanglan kong molakaw ug daghang kilometros agi sa lugar nga daghag nagpuyo nga manggiawayong mga Katoliko aron sa paghimog balikduaw. Miagi ako sa usa ka grupo sa mga bugoy nga nakaila kanako ug gisinggitan ako. Midali ako pagdagan nga nanghadyong ang mga bato sa akong mga dalunggan, nga naglaom nga ang mga batan-on wala na mogukod kanako. Nakaabot ra ako nga wala maunsa sa balay sa interesadong tawo. Apan ang tagbalay, usa ka dungganong membro sa American Legion, nangayog pasaylo, nga nag-ingon: “Dili ko ikaw matagad karong gabhiona kay nalimot ako nga moadto kami sa poblasyon aron sa pagtan-aw ug sine.” Gikuyawan ako tungod kay akong nahinumdoman ang gang sa tiglabayg mga bato nga nag-atang sa eskina, nga naghulat sa akong pagbalik. Hinunoa, nalipay ako sa dihang nagkanayon ang buotan nga tagbalay: “Nganong dili ka na lang makig-uban kanamo? Mahimo tang mag-estoryahanay sa dalan.” Busa nakahatag akog pamatuod kaniya, ug hilwas ako nga milabay sa delikadong agianan.

Pagbalanse sa Pamilya ug Ministeryo

Human sa gubat, daghan kami ug asaynment sa Virginia, apil ang walo ka tuig nga pagpabilin ingong mga espesyal ug regular payunir sa Charlottesville. Pagka-1956 ang among mga anak nga babaye nanagko na ug nangaminyo, ug si Marion ug ako namalhin na usab, nga nag-alagad ingong mga payunir sa Harrisonburg, Virginia, ug ingong mga espesyal payunir sa Lincolnton, North Carolina.

Sa 1966, gitudlo ako sa buluhaton sa sirkito, nga nagduaw sa lainlaing mga kongregasyon ug nagdasig sa mga igsoon, sama sa gibuhat kanako ni Brader Winchester didto sa New Jersey sa katuigang 1930. Sulod sa duha ka tuig nag-alagad ako sa usa ka sirkito sa mga kongregasyon sa Tennessee. Unya si Marion ug ako gihangyo nga mobalik sa among kinadak-ang gugma, nga mao ang pag-alagad ingong espesyal payunir. Gikan sa 1968 hangtod sa 1977, nag-alagad kami ingong mga espesyal payunir sa habagatang Tinipong Bansa, sa nagkalainlaing mga dapit gikan sa Georgia hangtod sa Mississippi.

Sa Eastman, Georgia, gitudlo ako ingong magtatan-aw sa kongregasyon (nga karon gitawag ug nagadumalang magtatan-aw) aron sa pagpuli kang Powell Kirkland, usa ka minahal, tigulang nga igsoong lalaki nga nag-alagad sa daghang katuigan ingong magtatan-aw sa sirkito apan nagmaluyahon  na sa panglawas. Siya mapabilhon kaayo ug mapaluyohon. Ang iyang pagpaluyo hinungdanon tungod kay dihay pipila ka panagbangi sulod sa kongregasyon ug dihay pipila ka prominenteng mga igsoon nga nalangkit. Ang isyu miinit, ug migugol ako ug daghang panahon sa pag-ampo kang Jehova. Ang mga kasulatan sama sa Proverbio 3:5, 6 akong nahinumdoman: “Salig kang Jehova sa bug-os mong kasingkasing ug ayaw pagsalig sa kaugalingon mong pagsabot. Sa tanan mong mga dalan tagda siya, ug siya magatul-id sa imong mga alagianan.” Pinaagi sa pagpaningkamot pag-ayo nga magpabiling bukas ang linya sa komunikasyon, among nahiusa ang kongregasyon nga may maayong mga resulta alang sa tanan.

Pagka-1977 sugod namong namatikdag diyutay ang epekto sa among pangedaron, ug kami giasayn pagbalik sa dapit sa Charlottesville, diin nagpuyo ang among duha ka anak nga babaye uban sa ilang mga pamilya. Sa milabayng 23 ka tuig, nabatonan namo ang kalipay sa pagsangyaw niining dapita, nga nakatabang sa pagpundar sa kongregasyon sa Ruckersville, Virginia, ug nakakita sa pag-uswag sa mga anak ug mga apo sa among unang mga estudyante sa Bibliya nga nahimong mga ansiyano sa kongregasyon, mga payunir, ug mga Bethelite. Si Marion ug ako makahimo gihapon sa pagmentinar ug usa ka maayong eskedyul sa pag-alagad sa kanataran, ug ako adunay pribilehiyo sa pag-alagad nga aktibo ingong ansiyano sa East Congregation sa Charlottesville, nga nagdumalag pagtuon sa libro ug naghatag ug mga pakigpulong publiko.

 Latas sa katuigan, nakasinati kamig mga problema, sama sa nasinatian sa tanan. Pananglitan, bisan pa sa among mga paningkamot, dihay panahon nga si Doris nagmaluyahon sa espirituwal sa ulahing mga tuig sa iyang pagkatin-edyer ug nagminyo sa dili-Saksi. Apan ang iyang gugma kang Jehova wala mahanaw sa bug-os, ug ang iyang anak nga lalaking si Bill nag-alagad sulod na sa 15 ka tuig sa Bethel sa Wallkill, New York. Si Doris ug Louise pulos na mga balo karon, apan sila nag-alagad nga malipayon nga duol kanamo ingong mga regular payunir.

Mga Leksiyon nga Nakat-onan Latas sa Katuigan

Nakat-onan ko ang pagpadapat sa pipila ka yanong mga lagda aron magmalamposon sa pag-alagad kang Jehova: Himoang yano ang imong kinabuhi. Magpakitag maayong panig-ingnan sa tanan nimong ginabuhat, lakip sa imong pribadong kinabuhi. Ipadapat ang pagtultol sa “matinumanon ug maalamong ulipon” diha sa tanang butang.—Mateo 24:45.

Nakahimo si Marion ug mubo apan epektibong listahan sa mga sugyot alang sa malamposong pagpayunir samtang nagmatuto ug mga anak: Himoa ug sunda ang praktikal nga eskedyul. Himoang tinuod nga karera ang payunir nga ministeryo. Kaon kanunay ug makapahimsog nga pagkaon. Batoni ang hustong pahulay. Ayaw pasobrahi ang paglingawlingaw. Himoa ang kamatuoran, lakip ang tanang bahin sa ministeryo, nga usa ka makapalipayng kasinatian sa kinabuhi sa imong mga anak. Himoa ang ministeryo nga usa ka makaiikag nga kasinatian alang kanila sa tanang panahon.

Karon kapin na kami sa 90 anyos. Milabay na ang 62 ka tuig sukad nga among nadungog ang pakigpulong sa bawtismo didto sa nataran sa balay sa mga Stackhouse, ug kami nakagugol na ug 60 ka tuig sa bug-os-panahong pag-alagad. Si Marion ug ako sa pagkamatinud-anon makaingon nga kami bug-os ug dulot nga natagbaw sa among kahimtang sa kinabuhi. Ako mapasalamaton kaayo sa pagdasig nga akong nadawat ingong batan-ong amahan sa pag-una sa espirituwal nga mga tumong ug sa pagpadayon sa pagpanlimbasog sa pagkab-ot niini, ug ako mapasalamaton sa akong minahal nga asawa, si Marion, ug sa akong mga anak nga babaye sa ilang pagpaluyo latas sa katuigan. Bisan tuod wala kamiy materyal nga mga bahandi, kanunay kong gipadapat ang Ecclesiastes 2:25 sa akong kaugalingon: “Kinsay nagakaon ug nagainom nga labi pang maayo kay kanako?”

Sa pagkatinuod, sa among kahimtang madagayaon kaayong gituman ni Jehova ang iyang saad nga makaplagan sa Malaquias 3:10. Iya gayong ‘gibubo nganhi kanamo ang panalangin hangtod nga wala nay panginahanglan’!

[Kahon/Hulagway sa panid 29]

MGA HANDOMANAN SA MGA TUIG SA GUBAT

Duolan sa 60 ka tuig human sa gubat, ang tibuok pamilya may tin-awng mga panumdoman niadtong mga tuiga.

“Dunay panahong tugnaw kaayo ang Pennsylvania,” nahinumdom si Doris. “Usa ka gabii niana ang katugnaw maoy 35 Celsius ubos sa sero.” Si Louise midugang, “Lingkoran namo ni Doris ang among isigkatiil diha sa luyong lingkoranan sa among karaang Buick nga awto aron dili mabugnawan ang among mga tiil.”

“Apan wala namo batia nga kabos ug hinikawan,” nag-ingon si Doris. “Nasayod kami nga mas sige mig balhinbalhin ug pinuy-anan kay sa ubang mga tawo, apan kanunay ming daghag pagkaon, ug nakabaton kamig maayong matang sa mga besti nga hinatag kanamo gikan sa ubang mga higala sa Ohio, kinsa may mga anak nga babaye nga magulang ug diyutay kanamo.”

“Kanunayng gipabati kanamo ni Mama ug Papa nga kami gihigugma ug gipabilhan,” matod ni Louise, “ug kami kanunayng kauban nila sa ministeryo. Tungod niini gibati namo nga kami pinangga ug suod kaayo kanila.”

“Duna koy Buick Special nga 1936 nga modelo,” nahinumdom si Paul, “ug kadto nga matang sa mga awto nabantog nga dali ra kaayong mabaliag mga ehe. Sa akong hunahuna ang makina mas kusog ra kaayo alang sa tibuok awto. Morag kanunayng maguba kini panahon sa kinatugnawang gabii sa bulan, ug unya kinahanglang moadto ako sa junkyard aron mangitag laing ehe. Nahimo akong eksperto sa pagpuli ug ehe.”

“Ayaw kalimti ang mga kard alang sa rasyon,” miingon si Marion. “Ang tanang butang girasyon—karne, gasolina, mga ligid alang sa awto, ang tanang butang. Sa matag higayon nga kami moabot ngadto sa among bag-ong asaynment, kinahanglang moadto una mi sa lokal nga departamento sa gobyerno ug moaplay alang sa kard sa rasyon. Mahimong mokabat ug daghang bulan aron makakuhag kard sa rasyon, ug mipatim-aw nga sa matag higayon nga makadawat na kami sa among kard, ipadala na hinuon kami ngadto sa sunod nga asaynment, ug kinahanglan nga magsugod na usab kami sa sinugdan. Apan si Jehova kanunayng nag-atiman kanamo.”

[Hulagway]

Si Marion ug ako uban kang Doris (wala) ug Louise, 2000

[Hulagway sa panid 25]

Uban sa akong inahan niadtong 1918, sa dihang ako 11 anyos

[Hulagway sa panid 26]

Uban kang Louise, Marion, ug Doris niadtong 1948 sa dihang ang among mga anak nga babaye nabawtismohan

[Hulagway sa panid 26]

Among letrato sa kasal, Oktubre 1928

[Hulagway sa panid 26]

Akong mga anak nga babaye (halayong wala ug halayong tuo) ug ako didto sa Yankee Stadium, 1955