Ayaw Tugoting ang mga Pagduhaduha Modaot sa Imong Pagtuo

Sa usa ka adlaw ikaw naghunahuna nga maayo ang imong panglawas. Pagkasunod adlaw ikaw nasakit. Sa kalit lang, ikaw nawad-an ug kusog o kalagsik. Labad ang imong ulo ug sakit kaayo ang imong kalawasan. Unsa may nahitabo? Ang peligrosong mga kagaw nakasulod ug nakapaluya sa mga sistema sa depensa sa imong lawas ug giatake ang hinungdanong mga organo sa lawas. Kon dili matambalan, kining miatake nga mga organismo basin permanenteng modaot sa imong lawas—mopatay pa gani kanimo.

SIYEMPRE, kon dili maayo ang imong panglawas inigtakboy sa usa ka impeksiyon, ikaw mas dali ra nga masakit. Pananglitan, kon luya ang imong lawas tungod sa malnutrisyon, ang imong resistensiya “mahimong huyang kaayo nga bisan ang gamayng impeksiyon tingalig makapatay kanimo,” nag-ingon ang medikal nga awtor nga si Peter Wingate.

Kon kana mao ang kahimtang, kinsa ang gustong walay kaonon kanunay? Lagmit gayod nga imong buhaton ang kutob sa imong maarangan nga mokaon pag-ayo ug magpabiling himsog. Tingali imong buhaton usab ang kutob sa imong maarangan nga mag-amping nga dili maimpeksiyon tungod sa virus o bakterya. Apan, gibuhat mo ba ang samang pag-amping maylabot sa pagpabiling “mahimsog sa pagtuo”? (Tito 2:2) Pananglitan, alisto ka ba sa kapeligrohan nga ipahinabo sa malinglahong mga pagduhaduha? Dali ra kaayo kining moatake sa imong hunahuna ug kasingkasing, nga modaot sa imong pagtuo ug sa imong relasyon kang Jehova. Ang uban daw wala makamatikod niini nga kapeligrohan. Gipasagdan nila ang ilang kaugalingon nga daling mabiktima sa mga pagduhaduha tungod sa pagtugot sa ilang kaugalingon nga magutman sa espirituwal. Posible kaha nga ikaw nagabuhat niana?

Pagduhaduha—Kanunay Bang Makadaot?

Siyempre, dili tanang pagduhaduha makadaot. May mga panahon nga kinahanglang dili ka una motuo sa usa ka butang hangtod nga matino mo ang mga kamatuoran. Ang mga pagdasig sa relihiyon nga ikaw angayng motuo ug dili angayng magduhaduha maoy peligroso ug malimbongon. Tinuod, ang Bibliya nag-ingon nga ang gugma “motuo sa tanang butang.” (1 Corinto 13:7) Andam gayong motuo ang mahigugmaong Kristohanon niadtong napamatud-ang kasaligan sa nangagi. Apan, ang Pulong sa Diyos nagpasidaan usab batok sa ‘pagtuo sa matag pulong.’ (Proverbio 14:15) Usahay ang nangaging rekord sa usa ka tawo mohatag ug balidong katarongan sa pagduhaduha. “Bisan pa kon himoon [sa malimbongong tigsulti] nga mapuangoron ang iyang tingog,” ang Bibliya nagpasidaan, “ayaw siya tuohi.”—Proverbio 26:24, 25.

Si apostol Juan nagpasidaan  usab sa mga Kristohanon batok sa pagtuo dayon nga walay pagsusi. “Ayaw ninyo tuohi ang matag inspiradong pahayag,” siya misulat. Hinunoa, “sulayi ang inspiradong mga pahayag aron masuta kon kini nagagikan ba gayod sa Diyos.” (1 Juan 4:1) Ang usa ka “pahayag,” o usa ka pagtulon-an o opinyon, mopatim-aw tingali nga naggikan sa Diyos. Apan naggikan ba gayod kini kaniya? Ang pagpakitag mga pagduhaduha, o ang dili dayon pagtuo, maoy usa gayod ka proteksiyon tungod kay, sama sa giingon ni apostol Juan, “daghang maglilimbong ang nagapanungha sa kalibotan.”—2 Juan 7.

Walay Pasikaranang mga Pagduhaduha

Oo, sagad gikinahanglan ang matinud-anon, mapainubsanong pagsusi sa mga butang aron masuta ang kamatuoran. Apan, dili kini sama sa pagtugot sa walay pasikaranan, makadaot nga mga pagduhaduha nga maugmad diha sa atong hunahuna ug kasingkasing—mga pagduhaduha nga makabungkag sa atong malig-ong pagkatukod nga mga tinuohan ug mga relasyon. Kini nga pagduhaduha gihubit ingon nga “pagkadili-tino sa gituohan o opinyon nga sagad makababag sa paghimog desisyon.” Nahinumdom ka ba kon sa unsang paagi gitisok ni Satanas diha sa hunahuna ni Eva ang pagduhaduha bahin kang Jehova? “Tinuod ba nga miingon ang Diyos nga dili gayod kamo makakaon gikan sa tanang kahoy sa tanaman?” siya nangutana. (Genesis 3:1) Ang namugna nga pagduhaduha tungod nianang daw inosenteng pangutana nakababag sa paghimog desisyon ni Eva. Mao kana ang kasagarang mga pamaagi ni Satanas. Sama sa usa ka tigpangdaot nga magsusulat, hanas siya sa paggamit ug pasumbingay, mga kamatuoran nga sinagolag bakak, ug mga pagpamakak. Si Satanas nakabungkag na sa daghang maayo, masaligong mga relasyon pinaagig malinglahong mga pagduhaduha nga gitisok nianang paagiha.—Galacia 5:7-9.

Ang tinun-ang si Santiago nakasabot pag-ayo sa makadaot nga epekto niining matanga sa pagduhaduha. Siya misulat bahin sa atong kahibulongang pribilehiyo nga makaduol sa Diyos kanunay alang sa pagpangayog tabang panahon sa pagsulay. Apan, si Santiago nagpasidaan, sa dihang ikaw magaampo sa Diyos, ‘magpadayon sa pagpangayo diha sa pagtuo, nga dili gayod magduhaduha.’ Ang mga pagduhaduha bahin sa atong relasyon sa Diyos maghimo kanatong “sama sa balod sa dagat nga ginakusokuso ug ginapadpad sa hangin.” Mahisama kita sa “usa ka tawong maduhaduhaon, mabalhinon sa tanan niyang mga dalan.” (Santiago 1:6, 8) Atong maugmad ang pagkadili-tino sa gituohan nga maghimo kanatong dili makadesisyon. Dayon, ingon sa nahitabo kang Eva, kita mahimong daling madutlan sa tanang matang sa demonyohanong mga pagtulon-an ug mga pilosopiya.

Paghupot ug Maayong Espirituwal nga Kahimsog

Busa sa unsang paagi atong mapanalipdan ang atong kaugalingon batok sa makadaot nga mga pagduhaduha? Ang tubag yano kaayo: pinaagi sa atong hugot nga pagsalikway sa satanikong propaganda ug sa atong bug-os nga pagpahimulos sa mga tagana sa Diyos sa paghimo kanatong “malig-on sa pagtuo.”—1 Pedro 5:8-10.

Hinungdanon kaayo ang maayong personal nga pagkaon sa espirituwal. Ang awtor nga si Wingate, nga gihisgotan ganina, nag-ingon: “Bisag nagpahulay, ang lawas nagkinahanglan gihapon ug padayong suplay sa enerhiya alang sa kemikal nga mga proseso ug alang sa paglihok sa hinungdanong mga organo sa lawas; ug ang mga sangkap sa daghang tisyu nagkinahanglan kanunay ug mga kapuli.” Sama niini ang atong espirituwal nga kahimsog. Kon walay padayong pagkaon sa espirituwal, ang atong pagtuo, sama sa lawas nga nahikawan sa pagkaon, mag-anam ug kadaot ug sa kataposan mamatay. Gipasiugda kini ni Jesu-Kristo sa dihang siya miingon: “Ang tawo mabuhi, dili sa tinapay lamang, kondili sa matag pulong nga magagula sa baba ni Jehova.”—Mateo 4:4.

Pamalandonga kini. Sa unsang paagi atong natukod ang lig-on nga pagtuo sa sinugdan? “Ang pagtuo mosunod sa butang nga nadungog,” misulat si apostol Pablo. (Roma 10:17) Iyang gipasabot nga sa sinugdan atong natukod ang atong pagtuo ug pagsalig kang Jehova, sa iyang mga saad, ug sa iyang organisasyon pinaagi sa pagkaon sa Pulong sa Diyos. Siyempre, wala kita motuo dayon sa tanan nga atong nadungog. Atong gisunod ang gibuhat sa mga tawo nga nagpuyo sa siyudad sa Berea. Atong ‘maampingong gisusi ang Kasulatan kon tinuod ba kining mga butanga.’ (Buhat 17:11) Atong ‘napamatud-an sa atong kaugalingon ang maayo ug dalawaton ug hingpit nga kabubut-on sa Diyos’ ug atong natino nga tinuod ang atong nadungog. (Roma 12:2; 1 Tesalonica 5:21) Sukad niadto, lagmit atong napalig-on ang atong pagtuo sa dihang mas klarong nasabtan nato nga ang Pulong sa Diyos ug ang iyang mga saad dili gayod mapakyas.—Josue 23:14; Isaias 55:10, 11.

 Likayi ang Pagkagutom sa Espirituwal

Ang hagit karon mao ang paghupot sa atong pagtuo ug sa paglikay sa bisan unsang pagduhaduha sa pagtuo nga makapaluya sa atong pagsalig kang Jehova ug sa iyang organisasyon. Sa pagbuhat niini kinahanglang ipadayon nato ang pagsusi sa Kasulatan sa adlaw-adlaw. Si apostol Pablo nagpasidaan nga “sa ulahing mga yugto sa panahon adunay pipila nga [daw lig-on sa pagtuo sa sinugdan] mangahulog gikan sa pagtuo, nga magtagad sa nagpahisalaag nga inspiradong mga pulong ug mga pagtulon-an sa mga demonyo.” (1 Timoteo 4:1) Kining malimbongong mga pahayag ug mga pagtulon-an magpatunghag mga pagduhaduha sa mga hunahuna sa pipila ug magpahimulag kanila gikan sa Diyos. Unsay makapanalipod kanato? Ang pagpadayon nga mahimong “inamoma sa mga pulong sa pagtuo ug sa maayong pagtulon-an nga [atong] gisunod pag-ayo.”—1 Timoteo 4:6.

Apan, ikasubo nga wala pilia sa uban karong adlawa nga mahimong “inamoma sa mga pulong sa pagtuo”—bisan pag ang maong pag-amoma dali nga mabatonan. Ingon sa gipakita sa usa sa mga magsusulat sa basahon sa Proverbio, posibleng malibotan kita ug maayong espirituwal nga pagkaon, usa ka espirituwal nga kombira, ingnon ta, ug sa gihapon wala mokaon ug motunaw sa pagkaon.—Proverbio 19:24; 26:15.

Kini maoy peligroso. Ang awtor nga si Wingate miingon: “Sa dihang ang lawas mosugod sa paggamit sa protina niini, mosugod usab pagkadaot ang kahimsog niini.” Sa dihang ikaw magutman, ang imong lawas mosugod sa paggamit sa reserbang mga sustansiya nga gitipigan sa tibuok lawas. Sa dihang kini mahurot na, ang lawas mosugod sa paggamit sa protina nga hinungdanon sa padayong pagtubo ug pag-ayom sa tisyu. Ang hinungdanong mga organo mosugod sa pagkadaot. Busa dali nang magkahugo ang imong panglawas.

Sa espirituwal nga diwa, kana maoy nahitabo sa pipila diha sa unang Kristohanong kongregasyon. Ilang gisulayang mabuhi lamang pinaagi sa ilang mga reserbang espirituwal nga mga sustansiya. Lagmit, ilang gipasagdan ang personal nga pagtuon, ug sila nagmaluyahon sa espirituwal. (Hebreohanon 5:12) Gipatin-aw ni apostol Pablo ang kapeligrohan sa pagbuhat niini sa dihang siya misulat ngadto sa Hebreohanong mga Kristohanon: “Kinahanglan kitang mohatag ug labaw pa kay sa kasagarang pagtagad sa mga butang nga atong nadungog, aron dili gayod kita maanod.” Siya nasayod nga dali ra gayod kitang maanod ngadto sa dili maayong mga batasan kon kita “wala manumbaling sa ingon kadako nga kaluwasan.”—Hebreohanon 2:1, 3.

Makaiikag, ang tawo nga nag-antos sa malnutrisyon dili kinahanglang masakiton o niwang tan-awon. Sa susama, dili dayon tingali makitang nag-antos ang usa ka tawo sa espirituwal nga kagutom. Mahimong tan-awon ka nga maayo sa espirituwal bisag wala ka mapakaon pag-ayo—apan sa mubong panahon lamang! Dili gayod nimo malikayan nga maluya sa espirituwal, nga daling madutlan sa walay pasikaranang mga pagduhaduha, ug dili na makaarang sa kusganong pagpakigbugno alang sa pagtuo. (Judas 3) Ikaw nahibalo—bisan pag wala mahibalo ang uban—sa tinuod nga gidaghanon sa imong personal nga pagkaon sa espirituwal.

Busa, ipadayon ang imong personal nga pagtuon. Sukli pag-ayo ang mga pagduhaduha. Ang dili pagpanumbaling sa daw gamayng impeksiyon, nga pasagdan ang mga pagduhaduha nga mohasol kanunay, mohatag ug makadaot nga mga sangpotanan. (2 Corinto 11:3) ‘Tinuod ba gayod nga kita nagkinabuhi na sa kataposang mga adlaw? Makatuo ka ba sa tanang gisulti sa Bibliya? Mao ba gayod kini ang organisasyon ni Jehova?’ Ampay kaayo ni Satanas nga motisok ug mga pagduhaduha nga sama niini diha sa imong hunahuna. Ayaw tugoti ang mapinasagdanong tinamdan maylabot sa pagkaon sa espirituwal nga maghimo kanimong sayon nga biktima sa iyang malimbongong mga pagtulon-an. (Colosas 2:4-7) Sunda ang tambag nga gihatag ngadto kang Timoteo. Mahimong usa ka maayong estudyante sa “balaang mga sinulat” aron nga “magpadayon ka sa mga butang nga imong nakat-onan ug nakakombinsir kanimo sa pagtuo.”—2 Timoteo 3:13-15.

 Imong gikinahanglan ang tabang sa pagbuhat niini. Ang magsusulat nga gikutlo ganina nagpadayon sa pag-ingon: “Tungod sa grabeng kagutom ang mga organo sa pagtunaw posibleng madaot pag-ayo tungod sa kakulang sa mga bitamina ug sa ubang mga kinahanglanon nga tungod niana dili na kini modawat ug ordinaryong mga pagkaon kon kini itagana. Ang mga tawo nga ingon niini ang kahimtang nagkinahanglan ug pagkaon nga daling tunawon sa igoigong panahon.” Gikinahanglan ang linaing pag-amping aron maulian ang lawas gikan sa mga epekto sa kagutom. Sa susama, ang usa nga mapinasagdanon kaayo sa iyang personal nga pagtuon sa Bibliya nagkinahanglan ug dakong tabang ug pagdasig aron mobalik ang iyang gana sa espirituwal. Kon kana maoy imong kahimtang, magpatabang ug malipayong dawata ang bisan unsang tabang nga itagana aron mahibalik ang imong espirituwal nga kahimsog ug kusog.—Santiago 5:14, 15.

Ayaw ‘Pagduhaduha sa Kawalay-Pagtuo’

Sa pagkonsiderar sa mga kahimtang sa patriarkang si Abraham, tingali gibati sa uban nga siya adunay makataronganong mga hinungdan sa pagduhaduha. Maorag makataronganon kaayo nga mohinapos nga siya ‘dili na malaoman nga mahimong amahan sa daghang kanasoran’—bisan pa sa saad sa Diyos. Ngano? Buweno, sa tinawhanon kaayong panglantaw, ang mga butang daw dili gayod malaoman. ‘Iyang giisip ang iyang kaugalingong lawas, nga patay na niadtong panahona, ug usab ang pagkapatay sa tagoangkan ni Sara,’ nag-ingon ang rekord sa Bibliya. Sa gihapon, determinado gayod siya nga dili tugotan ang mga pagduhaduha bahin sa Diyos ug sa iyang mga saad nga moturok diha sa iyang hunahuna ug kasingkasing. Si apostol Pablo misulat: “Wala siya maluya sa pagtuo,” o “magduhaduha sa kawalay-pagtuo.” Si Abraham nagpadayong “bug-os kombinsido nga kon unsa ang gisaad [sa Diyos] siya usab makahimo sa pagbuhat.” (Roma 4:18-21) Iyang natukod ang lig-on, personal, masaligong relasyon kang Jehova sulod sa daghang katuigan. Iyang gisalikway ang bisan unsang pagduhaduha nga magpaluya nianang relasyona.

Makahimo ka usab niana kon “magpadayon ka sa paghupot sa sumbanan sa makapahimsog nga mga pulong”—kon imong pakaonon pag-ayo ang imong kaugalingon sa espirituwal. (2 Timoteo 1:13) Isipa nga peligroso kaayo ang mga pagduhaduha. Si Satanas nakiggubat pinaagig gubat nga gigamit ang espirituwal nga bakterya. Kon dili ka mokaon sa maayong espirituwal nga pagkaon pinaagi sa personal nga pagtuon sa Bibliya ug pinaagi sa pagtambong sa Kristohanong mga tigom, imong gihimo ang imong kaugalingon nga daling madutlan sa maong mga pag-atake. Pahimusli pag-ayo ang dagaya ug tukma-sa-panahong suplay sa espirituwal nga pagkaon nga gitagana sa “matinumanon ug maalamong ulipon.” (Mateo 24:45) Padayong “mouyon sa makapahimsog nga mga pulong” ug pabiling “mahimsog sa pagtuo.” (1 Timoteo 6:3; Tito 2:2) Ayaw tugoting ang mga pagduhaduha modaot sa imong pagtuo.

[Mga hulagway sa panid 21]

Sa unsang paagi imong gipakaon pag-ayo ang imong kaugalingon sa espirituwal?