Malungtarong mga Epekto

MATAG tuig, ang mga Saksi ni Jehova magtigom diha sa Kristohanong mga asembliya ug mga kombensiyon sa kaugalingon nilang mga nasod. Ginahimo nila kini aron pahimuslan ang makapalig-on sa espirituwal nga mga instruksiyon ug panag-ubanay. Apan ang ubang mga bahin sa ilang mga panagkatigom mahimong makahatag usab ug malungtarong epekto diha sa mga bisita.

Pananglitan, niadtong Hulyo 1999 libolibo ka Saksi sa Mozambique ang nagkatigom alang sa tulo ka makapatagbawng mga adlaw sa “Matagnaong Pulong sa Diyos” nga Distritong mga Kombensiyon. Daghan sa nanambong didto mao pay pagtambong ug kombensiyon. Nakadayeg sila dili lang sa mga pulong nga ilang nabatian gikan sa plataporma kondili sa nakita usab nila sa ilang palibot.

Mao kini ang komento nga gihatag didto sa Maputo Assembly Hall: “Wala pa ako sukad makakita ug sama niini ka nindot nga dapit sa tibuok kong kinabuhi! Ang mga kaligoanan may mga sabon ug mga salamin, ug wala manimaho. Malinawon ang palibot nga walay kabanha sa mga batang nanag-away. Ug walay nagtuloray! Nakita ko ang malipayong mga batan-on nga miapil sa makapadasig nga mga panagsultihay. Nakadayeg usab ako sa maayo kaayong pamesti sa matag usa. Sa sunod higayon, dalhon ko ang akong mga anak ug kombinsihon ko ang akong bana nga motambong ming tanan niining kombensiyona.”

Oo, ang pagkamatinud-anon, integridad, ug pisikal nga kahinlo sa mga Saksi ni Jehova mamatikdan gayod. Nganong lahi man ang mga Saksi? Tungod kay gipaningkamotan gayod nila nga ipadapat ang ilang nakat-onan sa Bibliya. Nganong dili ka makigtigom kanila niining tuiga sa ilang nasodnong mga kombensiyon o sa ilang senemanang mga tigom sa Kingdom Hall sa inyong dapit aron imong masuta mismo?

[Hulagway sa panid 32]

ZAMBIA

[Hulagway sa panid 32]

KENYA

[Hulagway sa panid 32]

MOZAMBIQUE