Mga Kahoy nga Molahutay ug Dugayng Panahon

Ang usa ka pangpang dili tingali maayong tukoran sa imong balay, ilabina kon kini anaa sa tumoy sa kabukiran. apan, bisan pa sa dayag nga mga disbentaha, ang pipila ka alpine nga mga kahoy migamot pag-ayo niining batoong mga pangpang, nga nakigbisog sa hilabihang kabugnaw sa tingtugnaw ug nakalahutay sa mga hulaw sa ting-init.

KASAGARAN, kining lig-ong mga kahoy dili sama ka dagko sa mga ig-agaw niini nga nanubo sa kapatagan. Hayan bukohon ug baliko ang mga punoan niini ug nasalot kini pag-ayo. Ang uban gani morag kinaiyanhong mga bonsai—giporma ug gipul-ongan sa dili maayong klima ug sa panas nga yuta nga gituboan niini.

Tungod kay makalahutay kini diha sa usa sa labing umaw nga mga dapit sa yuta, basin maghunahuna ka nga kining mga kahoya mugbo rag kinabuhi. Apan ang kasukwahi niana maoy tinuod. Nag-ingon ang uban nga ang Methuselah, usa ka bristlecone nga pino nga nabuhi sa gihabogong 3,000 metros diha sa White Mountains sa California, maoy 4,700 anyos na. Nag-ingon ang The Guinness Book of Records 1997 nga kining kahoya mao ang labing gulang nga buhing kahoy sa atong planeta. Si Edmund Schulman, nga nagtuon bahin niining gulang nga mga kahoy, nag-ingon: “Ang bristlecone nga pino . . . morag mas mabuhi sa malisod nga kahimtang. Ang tanang mas gulang nga mga kahoyng pino sa White Mountains nabuhi diha sa umaw, batoon nga kamingawan sa gihabogong duolan sa 3,000 metros.” Nadiskobrehan usab ni Schulman nga ang ubang labing gulang nga mga pino nabuhi usab diha sa malisod nga mga kahimtang.

Bisan pag kinahanglang sagubangon niini ang kalisdanan, kining malahutayong mga kahoy nakapahimulos pag-ayo gikan sa duha ka bentaha nga nabatonan niini. Kay nabuhi diha sa hilit nga dapit, diin diyutay ra ang mga tanom, kini protektado gikan sa mga sunog sa lasang, nga maoy usa sa labing dakong mga kapeligrohan sa gulang nga mga kahoy. Ug nakagamot kini pag-ayo sa batoong pangpang nga tungod niana linog lang ang makatarog niini.

Sa Bibliya ang matinumanong mga alagad sa Diyos gipakasama sa mga kahoy. (Salmo 1:1-3; Jeremias 17:7, 8) Nagsagubang usab sila ug mga kalisdanan nga resulta sa mga kahimtang nga ilang naagoman.  Ang paglutos, dili maayong panglawas, o pag-ilaid sa kakabos makasulay pag-ayo sa atong pagtuo, ilabina sa dihang ang mga pagsulay magpadayon tuigtuig. Bisan pa niana, ang ilang Maglalalang, nga maoy nagdisenyo sa mga kahoy nga makalahutay pag-ayo sa kalisdanan, nagpasalig sa iyang mga magsisimba nga iyang suportahan sila. Ang Bibliya nagsaad niadtong magpabiling maunongon: “Siya magpalig-on kaninyo, siya magpakusgan kaninyo.”—1 Pedro 5:9, 10.

Ang ‘pagbarog nga malig-on, o pagpabiling maunongon’ mao ang ideya sa Gregong berbo nga kasagarang gihubad diha sa Bibliya ug “paglahutay.” Sama sa alpine nga mga kahoy, ang pagkagamot pag-ayo mao ang sekreto sa paglahutay. Sa kahimtang sa mga Kristohanon, gikinahanglan nga sila lig-ong makagamot diha kang Jesu-Kristo aron makabarog nga malig-on. “Ingon nga inyong gidawat si Kristo Jesus nga Ginoo,” si Pablo misulat, “magpadayon sa paglakaw nga nahiusa kaniya, nga gipagamot ug ginatukod diha kaniya ug ginapalig-on diha sa pagtuo, ingon sa gitudlo kaninyo, nga manag-awas sa pagtuo diha sa pagpasalamat.”—Colosas 2:6, 7.

Nasabtan ni Pablo ang panginahanglan sa lig-ong espirituwal nga mga gamot. Siya mismo nakigbugno sa “usa ka tunok sa unod,” ug siya nakalahutay sa mapait nga paglutos sa tibuok niyang ministeryo. (2 Corinto 11:23-27; 12:7) Apan nasayran niya nga pinaagi sa kusog sa Diyos siya makapadayon. “Sa tanang butang ako adunay kusog pinaagi kaniya nga naghatag ug gahom kanako,” siya miingon.—Filipos 4:13.

Ingon sa gipakita sa panig-ingnan ni Pablo, ang kalamposan sa Kristohanong pagkamalahutayon wala magdepende sa maayong mga kahimtang. Sama sa alpine nga mga kahoy nga malamposong nakaagwanta sa mga bagyo sa daghang kasiglohan, kita lig-ong makabarog kon kita nakagamot diha kang Kristo ug nagasalig sa gahom nga ihatag sa Diyos. Dugang pa, kon kita molahutay hangtod sa kataposan, kita makalaom nga atong masinati ang katumanan sa laing balaang saad: “Ang mga adlaw sa akong katawhan mahisama sa mga adlaw sa usa ka kahoy.”—Isaias 65:22; Mateo 24:13.