Nganong Tun-an ang Bibliya?

SI Bill maoy batan-on, atletiko, edukado, ug kuwartahan. Bisan pa niana, siya dili kontento. Ang iyang kinabuhi walay direksiyon, ug kana nagsamok gayod kaniya. Naningkamot nga makakaplag ug katuyoan sa kinabuhi, gisusi niya ang lainlaing mga relihiyon, apan wala niya makaplagi ang iyang gipangita. Niadtong 1991 nahimamat niya ang usa sa mga Saksi ni Jehova nga nakapahimutang kaniyag usa ka libro nga naghisgot sa giingon sa Bibliya bahin sa kahulogan sa kinabuhi. Gihikay ang usa ka pagtuon sa Bibliya aron matun-an ni Bill kining ulohana ingon man ang uban pang mga ulohan.

Nahinumdom si Bill: “Gihimo namo ang unang pagtuon, ug tungod kay gibuksan namo kanunay ang Bibliya, nahibalo ako nga mao kini ang akong gipangita. Makaiikag kaayo ang mga tubag sa Bibliya. Human sa maong pagtuon, miadto ako sa bukid, mikanaog sa akong trak, ug misinggit sa makusog tungod sa tumang kalipay. Nalipay ako nga sa kataposan nahibaloan ko ang mga tubag sa akong mga pangutana.”

Siyempre, dili tanan nga nakakaplag sa kamatuoran sa Bibliya sa literal mosinggit tungod sa kalipay.  Apan, ang pagkahibalo sa mga tubag sa hinungdanong mga pangutana sa kinabuhi maoy usa ka malipayong kasinatian alang sa daghan. Gibati nila ang sama sa gibati sa usa ka tawo sa sambingay ni Jesus nga nakakaplag sa natagong bahandi diha sa uma. Si Jesus miingon: “Tungod sa iyang kalipay siya molakaw ug magbaligya sa tanang butang nga iyang nabatonan ug mopalit niana nga uma.”—Mateo 13:44.

Ang Yawi sa Usa ka Makahuloganong Kinabuhi

Gipamalandong ni Bill ang usa ka sukaranang pangutana, Unsay katuyoan sa kinabuhi? Ang mga pilosopo, mga teologo, ug mga siyentipiko naningkamot pag-ayo nga matubag ang maong pangutana sulod sa daghang milenyo. Daghan kaayong basahon ang gisulat sa mga indibiduwal nga misulay sa pagtubag niana. Ang ilang mga paningkamot nakawang, ug daghan ang mihinapos nga ang pangutana dili matubag. Bisan pa niana, adunay tubag. Bisag lawom ang tubag, kini dili komplikado. Gipatin-aw kini diha sa Bibliya. Ang yawi sa usa ka malipayon, makahuloganong kinabuhi mao kini: Kinahanglang aduna kitay maayong relasyon uban kang Jehova, ang atong Maglalalang ug langitnong Amahan. Sa unsang paagi atong makab-ot kana?

Adunay duha ka daw nagkasumpaki nga mga bahin sa pagduol sa Diyos. Kadtong moduol sa Diyos kinahanglang mahadlok ug mahigugma kaniya. Tagdon nato ang duha ka teksto nga magpaluyo nianang mga pulonga. Dugay na kanhi, gitun-an pag-ayo sa maalamong Hari nga si Solomon ang bahin sa katawhan ug nagrekord sa iyang mga natun-an diha sa basahon sa Bibliya nga Ecclesiastes. Nagsumaryo sa iyang mga obserbasyon, siya misulat: “Ang kataposan sa butang, ang tanan nadungog na: Kahadloki ang matuod nga Diyos ug tumana ang iyang mga sugo. Kay kini mao ang tibuok nga obligasyon sa tawo.” (Ecclesiastes 12:13) Daghang siglo sa ulahi, sa dihang gipangutana kon unsa ang kinadak-ang sugo sa Balaod nga gihatag kang Moises, si Jesus mitubag: “Higugmaon mo si Jehova nga imong Diyos sa tibuok mong kasingkasing ug sa tibuok mong kalag ug sa tibuok mong kaisipan.” (Mateo 22:37) Katingad-an ba alang kanimo nga kita angayng mahadlok sa Diyos ug mahigugma kaniya? Susihon nato ang kahinungdanon sa kahadlok ug gugma ug kon sa unsang paagi kining duha motabang sa usa ka tawo aron makabaton ug makapatagbaw nga relasyon sa Diyos.

Kon Unsay Kahulogan sa Pagkahadlok sa Diyos

Ang usa ka matinahorong kahadlok maoy hinungdanon kon buot natong mosimba sa Diyos sa dalawatong paagi. Ang Bibliya nag-ingon: “Ang pagkahadlok kang Jehova mao ang sinugdanan sa kaalam.” (Salmo 111:10) Si apostol Pablo misulat: “Magpadayon kita sa pagbaton sa dili-takos nga kalulot, nga pinaagi niini kita makahatag ug sagradong pag-alagad nga dalawaton sa Diyos uban ang diyosnong kahadlok ug kalisang.” (Hebreohanon 12:28) Sa susama, ang manulonda sa kinatung-ang langit nga nakita diha sa panan-awon ni apostol Juan nagsugod sa iyang proklamasyon sa maayong balita pinaagi sa mga pulong: “Kahadloki ninyo ang Diyos ug ihatag kaniya ang himaya.”—Pinadayag 14:6, 7.

Kini nga kahadlok sa Diyos, hinungdanon kaayo alang sa makahuloganong kinabuhi, dili ingon sa daotang kahadlok. Bation tingali nato ang kahadlok kon kita gihulga sa usa ka mabangis ug makuyaw nga kriminal. Apan ang kahadlok sa Diyos—o diyosnong kahadlok—maoy kalisang ug halawom nga pagtahod alang sa Maglalalang. Naglakip usab kini sa maayong kahadlok nga dili makapahimuot sa Diyos tungod kay siya maoy Supremong Maghuhukom ug Labing Gamhanan, kinsa dunay gahom ug awtoridad sa pagsilot niadtong masinupakon.

Kahadlok ug Gugma Mag-uban

Apan, dili buot ni Jehova nga ang mga tawo mosimba kaniya tungod lamang kay sila nahadlok kaniya. Si Jehova maoy usa gayod ka Diyos sa gugma. Si apostol Juan natukmod sa pagsulat: “Ang Diyos gugma.” (1 Juan 4:8) Si Jehova nga Diyos mahigugmaon kaayong nakiglabot sa katawhan, ug buot niyang ang mga tawo mosanong pinaagi sa paghigugma usab kaniya. Nan, sa unsang paagi ang maong gugma nahiuyon sa diyosnong kahadlok?  Ang duha sa pagkatinuod nalanggikit. Ang salmista misulat: “Ang pagkasuod kang Jehova ila sa mga nahadlok kaniya.”—Salmo 25:14.

Hunahunaa lamang ang gibating pagtahod ug kahadlok sa usa ka bata alang sa usa ka kusgan ug maalamong amahan. Sa samang higayon, ang maong bata mosanong sa gugma sa amahan. Ang bata mosalig sa amahan ug modangop kaniya alang sa paggiya, masaligon nga kining maong paggiya mohatag ug mga kaayohan. Sa susama, kon kita mahigugma ug mahadlok kang Jehova, mosunod kita sa iyang pagtultol, ug kini mohatag kanato ug kaayohan. Matikdi ang gisulti ni Jehova labot sa mga Israelinhon: “Kon ugmaron lang unta nila ang ilang kasingkasing sa pagkahadlok kanako ug sa pagtuman kanunay sa tanan kong kasugoan, aron maayo ang ilang dangatan ug sa ilang mga anak hangtod sa panahong walay tino!”—Deuteronomio 5:29.

Oo, ang diyosnong kahadlok motultol dili sa pagkaulipon kondili sa kagawasan, dili sa kaguol kondili sa kalipay. Si Isaias mitagna bahin kang Jesus: “Siya magkalipay diha sa pagkahadlok kang Jehova.” (Isaias 11:3) Ug ang salmista misulat: “Malipayon ang tawo nga nahadlok kang Jehova, nga sa iyang mga sugo siya nahimuot sa hilabihan.”—Salmo 112:1.

Dayag, dili kita mahadlok sa Diyos ni mahigugma kaniya kon kita wala makaila kaniya. Mao nga hinungdanon kaayo ang pagtuon sa Bibliya. Ang maong pagtuon motabang kanato nga makasabot sa personalidad sa Diyos ug makapabili sa kaalam sa pagsunod sa iyang pagtultol. Samtang kita moduol sa Diyos, buot natong mobuhat sa iyang kabubut-on ug madasig kita sa pagtuman sa iyang mga sugo, kay nahibalo nga kini mohatag kanato ug kaayohan.—1 Juan 5:3.

Makapalipay ang pagkasayod nga ang usa ka tawo nagasubay sa hustong dalan sa kinabuhi. Tinuod kini alang kang Bill, nga gihisgotan sa sinugdan. Siya bag-o lang nga miingon: “Sa siyam ka tuig nga milabay sukad sa akong unang pagtuon sa Bibliya, midako ang akong relasyon kang Jehova. Ang unang pag-ulbo sa kalipay nga akong gibati nahimo gayong usa ka malipayong dalan sa kinabuhi. Malaomon kanunay ang akong panglantaw sa kinabuhi. Ang akong mga adlaw tugob sa makahuloganong kalihokan, dili sa walay-tumong nga pagpangita sa kalipayan. Si Jehova nahimong usa ka tinuod nga persona alang kanako, ug nahibalo ako nga siya interesado kaayo sa akong kaayohan.”

Sa mosunod nga artikulo, hisgotan natog dugang pa kon sa unsang paagi ang kahibalo bahin kang Jehova mohatag ug kalipay ug mga kaayohan alang niadtong kinsa mopadapat niini diha sa ilang mga kinabuhi.

[Blurb sa panid 5]

Ang pagduol sa diyos nagkahulogan nga kita nahigugma kaniya ug nahadlok kaniya

[Hulagway sa panid 6]

Si Jesus malipayon diha sa pagkahadlok kang Jehova