Pagmaya Diha sa Kahibalo Bahin Kang Jehova
Pagmaya Diha sa Kahibalo Bahin Kang Jehova
“Malipayon kadtong nagapatalinghog sa pulong sa Diyos ug nagasunod niini!”—LUCAS 11:28.
1. Kanus-a nagsugod si Jehova pagpakigsulti sa mga tawo?
SI Jehova nahigugma sa mga tawo ug dulot nga interesado sa ilang kaayohan. Busa, dili katingalahang siya makigsulti kanila. Nagsugod ang maong pagpakigsulti sa tanaman sa Eden. Sumala sa Genesis 3:8, sa usa ka higayon “sa mahuyohoy nga bahin sa adlaw,” si Adan ug Eva ‘nakadungog sa tingog ni Jehova nga Diyos.’ Gisugyot sa pipila nga nagpasabot kini nga batasan ni Jehova ang pagpakigsulti kang Adan niining taknaa, lagmit kada adlaw. Bisan kon unsay kahimtang, gitin-aw sa Bibliya nga migahin ang Diyos ug panahon dili lang aron paghatag ug mga instruksiyon ngadto sa unang tawo kondili aron pagtudlo usab kaniya sa gikinahanglang kasayoran aron makatuman sa iyang mga kaakohan.—Genesis 1:28-30.
2. Sa unsang paagi ang unang magtiayon mibulag gikan sa paggiya ni Jehova, ug unsay sangpotanan?
2 Gihatag ni Jehova kang Adan ug Eva ang kinabuhi, gahom ibabaw sa kahayopan, ug pagbulot-an ibabaw sa tibuok yuta. Usa lang ang gidili—sila dili angayng mokaon gikan sa kahoy sa kahibalo sa maayo ug daotan. Kay naimpluwensiyahan ni Satanas, si Adan ug Eva misupak sa sugo sa Diyos. (Genesis 2:16, 17; 3:1-6) Ilang gipili nga molihok nga independente, pinaagi sa paghukom sa ilang kaugalingon kon unsay matarong ug kon unsay daotan. Sa pagbuhat niana, sa kabinuang mibulag sila gikan sa paggiya sa ilang mahigugmaong Maglalalang. Ang mga sangpotanan nakadaot kanila ug sa ilang wala-pa-matawong mga anak. Si Adan ug Eva natigulang ug sa kadugayan namatay nga walay paglaom sa pagkabanhaw. Ang ilang mga kaliwat nakapanunod sa sala ug sa sangpotanan niana, ang kamatayon.—Roma 5:12.
3. Nganong si Jehova nakigsulti kang Cain, ug unsay sanong ni Cain?
3 Bisan pa sa pagrebelde sa Eden, si Jehova nagpadayon sa pagpakigsulti sa iyang tawhanong mga linalang. Si Cain, ang panganay nga anak ni Adan ug Eva, nameligro niadto nga madaog sa sala. Si Jehova nagpasidaan kaniya nga siya nagpadulong sa kadaotan ug nagtambag kaniya nga ‘magbuhat siya ug maayo.’ Gisalikway ni Cain ang maong mahigugmaong tambag ug gipatay ang iyang igsoon. (Genesis 4:3-8) Busa, ang unang tulo ka tawo sa yuta pulos nagsalikway sa tin-awng pagtultol nga gihatag sa usa nga naghatag kanilag kinabuhi, ang Diyos nga mohatag ug instruksiyon sa iyang katawhan aron sila makabaton ug kaayohan sa ilang kaugalingon. (Isaias 48:17) Nakapahigawad gayod kadto kang Jehova!
Si Jehova Nagpadayag sa Kaugalingon Ngadto sa Matinumanong mga Tawo sa Kakaraanan
4. Mahitungod sa mga kaliwat ni Adan, bahin sa unsa nga may pagsalig si Jehova, ug unsang mensahe sa paglaom ang iyang gihatag uban niana sa hunahuna?
4 Bisan pag siya may bug-os nga katungod sa paghunong sa pagpakigsulti sa mga tawo, kana wala himoa ni Jehova. May pagsalig siya nga ang pipila ka kaliwat ni Adan sa kamaalamon mosunod sa Iyang pagtultol. Pananglitan, sa gipahayag ang paghukom kang Adan ug Eva, gitagna ni Jehova ang pag-abot sa usa ka “binhi” nga maoy mobatok sa Serpente, si Satanas nga Yawa. Sa nahaigong panahon, si Satanas pagasamaran sa ulo nga ikamatay. (Genesis 3:15) Kining tagnaa maoy makapalipay nga mensahe sa paglaom alang ‘niadtong nagapatalinghog sa pulong sa Diyos ug nagasunod niini.’—Lucas 11:28.
5, 6. Sa unsang mga paagi si Jehova nakigsulti sa iyang katawhan sa wala pa ang unang siglo K.P., ug sa unsang paagi nakahatag kanag kaayohan kanila?
5 Gisulti ni Jehova ang iyang kabubut-on ngadto sa matinumanong mga patriarka sa kakaraanan, sama kang Noe, Abraham, Isaac, Jacob, ug Job. (Genesis 6:13; Exodo 33:1; Job 38:1-3) Sa ulahi, pinaagi ni Moises iyang gipahayag ang tibuok kodigo sa mga balaod alang sa nasod sa Israel. Ang Moisesnong Balaod naghatag kanilag kaayohan sa daghang paagi. Pinaagi sa pagsunod niadto, ang Israel nabulag gikan sa tanang ubang nasod isip linaing katawhan sa Diyos. Ang Diyos nagpasalig sa mga Israelinhon nga kon sila mosunod sa Balaod, iyang panalanginan sila dili lamang sa materyal nga paagi kondili sa espirituwal nga paagi usab, nga himoon silang usa ka gingharian sa mga saserdote, usa ka balaang nasod. Ang Balaod naghatag ganig mga lagda bahin sa pagkaon ug panghinlo nga nagpausbaw sa maayong panglawas. Hinuon, si Jehova nagpasidaan usab bahin sa daotang mga sangpotanan gumikan sa dili pagsunod.—Exodo 19:5, 6; Deuteronomio 28:1-68.
6 Sa ngadtongadto, ang ubang dinasig nga mga basahon nadugang sa inilang talaan sa mga basahon sa Bibliya. Ang makasaysayanhong mga asoy nagsugid bahin sa mga pagpakiglabot ni Jehova uban sa mga nasod ug sa mga katawhan. Ang balaknong mga basahon nagbatbat sa iyang mga hiyas sa matahom nga paagi. Ang matagnaong mga basahon nagtagna sa umaabot nga pagkatuman sa kabubut-on ni Jehova. Ang matinumanong mga tawo sa karaang panahon mainampingong nagtuon ug nagpadapat niining dinasig nga mga sinulat. Ang usa misulat: “Ang imong pulong maoy lampara sa akong tiil, ug kahayag sa akong alagianan.” (Salmo 119:105) Alang kanilang andam nga magpatalinghog, si Jehova nagtaganag edukasyon ug kalamdagan.
Ang Kahayag Nahimong Mas Sanag
7. Bisan pag si Jesus naghimog mga milagro, sa panguna nailhan siyang unsa, ug ngano?
7 Sa unang siglo, ang Hudiyo nga relihiyosong mga pundok nagdugang ug tawhanong mga tradisyon sa Balaod. Ang Balaod sayop nga gipadapat, ug inay nga tinubdan sa kalamdagan, kadto nahimong bug-at tungod niadtong mga tradisyon. (Mateo 23:2-4) Bisan pa niana, sa 29 K.P., si Jesus mitungha isip ang Mesiyas. Ang iyang katuyoan mao nga dili lamang ihatag ang iyang kinabuhi alang sa kaayohan sa katawhan kondili aron usab “magpamatuod sa kamatuoran.” Bisan pag naghimo siyag mga milagro, sa panguna nailhan siyang “ang Magtutudlo.” Ang iyang pagpanudlo maoy samag kahayag nga mitadlas sa espirituwal nga kangitngit nga nagbukot sa mga kaisipan sa mga tawo. Si Jesus sa tukma miingon: “Ako mao ang kahayag sa kalibotan.”—Juan 8:12; 11:28; 18:37.
8. Unsang dinasig nga mga basahon ang gisulat sa unang siglo K.P., ug sa unsang paagi nakabatog kaayohan niadto ang unang mga Kristohanon?
8 Sa ulahi gidugang ang Mga Ebanghelyo, nga maoy upat ka sinulat nga asoy sa kinabuhi ni Jesus, ug ang basahon sa Mga Buhat, nga maoy asoy sa pagkaylap sa Kristiyanidad human sa pagkamatay ni Jesus. Diha usab ang dinasig nga mga sulat nga sinulat sa mga tinun-an ni Jesus, ingon man sa matagnaong basahon sa Pinadayag. Ang maong mga sinulat, nga giipon sa Hebreohanong Kasulatan, nagkompleto sa inilang talaan sa mga basahon sa Bibliya. Sa tabang niining dinasig nga mga basahon, ang mga Kristohanon ‘makasabot uban sa tanang balaan kon unsa ang gilapdon ug gitas-on ug gihabogon ug giladmon’ sa kamatuoran. (Efeso 3:14-18) Mahimong ilang nabatonan “ang hunahuna ni Kristo.” (1 Corinto 2:16) Bisan pa niana, kadtong unang mga Kristohanon wala makasabot sa bug-os sa tanang bahin sa mga katuyoan ni Jehova. Si apostol Pablo misulat ngadto sa mga isigkamagtutuo: “Sa pagkakaron kita nagpakakita sa hanap nga dagway pinaagig metal nga salamin.” (1 Corinto 13:12) Ipabanaag sa maong salamin ang usa ka laraw apan dili ang tanang detalye. Ang bug-os nga pagsabot sa Pulong sa Diyos maoy umaabot pa.
9. Unsang kalamdagan ang nahitabo panahon sa “kataposang mga adlaw”?
9 Karong adlawa, nagkinabuhi kita sa panahong gitawag ang “kataposang mga adlaw,” usa ka panahon nga nailhan ingong “makuyaw nga mga panahong lisod sagubangon.” (2 Timoteo 3:1) Ang manalagnang si Daniel mitagna nga niining panahona “ang matuod nga kahibalo modagaya.” (Daniel 12:4) Busa, si Jehova, ang Dakong Tigsulti, nagtabang sa mga tawong matinud-anon ug kasingkasing sa pagsabot sa kahulogan sa iyang Pulong. Ang kapid-ang mga tawo karon nakasabot nga si Kristo Jesus gientrono na sa dili-makitang mga langit niadtong 1914. Sila nahibalo usab nga sa dili na madugay iyang pagalaglagon ang tanang pagkadaotan ug himoon ang yuta nga tibuok-yutang paraiso. Kining hinungdanong bahin sa maayong balita sa Gingharian ginawali na karon sa tibuok yuta.—Mateo 24:14.
10. Latas sa kasiglohan, unsay sanong sa katawhan nganha sa tambag ni Jehova?
10 Oo, sa tibuok kasaysayan gisulti ni Jehova ang iyang kabubut-on ug katuyoan sa mga tawo sa yuta. Ang talaan sa Bibliya nagbatbat nga ang daghan nagpatalinghog, nagpadapat sa diyosnong kaalam, ug gipanalanginan tungod niana. Kini nagsugid mahitungod sa uban nga nagsalikway sa mahigugmaong tambag sa Diyos, nga misunod sa makadaot nga dalan ni Adan ug Eva. Gihulagway ni Jesus ang maong kahimtang sa naghisgot siya mahitungod sa duha ka simbolikong mga dalan. Ang usa mosangko sa kalaglagan. Kay halapad ug haluag, kini gisubay sa daghan nga nagsalikway sa Pulong sa Diyos. Ang laing dalan mosangko sa kinabuhing walay kataposan. Bisan pag pig-ot, kini mao ang giagian sa pipila nga nagdawat sa Bibliya tungod sa kon unsa kini, ang Pulong sa Diyos, ug nagkinabuhing nahiuyon niini.—Mateo 7:13, 14.
Magmapasalamaton sa Kon Unsay Atong Nabatonan
11. Ang atong kahibalo ug pagtuo sa Bibliya maoy pamatuod sa unsa?
11 Nahiapil ka ba niadtong nagpili sa dalan paingon sa kinabuhi? Kon mao, sa walay duhaduha gusto nimong magpabilin niini. Sa unsang paagi makapabilin ka niini? Palandonga nga regular ug mapasalamaton ang mga panalangin nga gihatag sa pagkahibalo sa mga kamatuoran sa Bibliya nganha sa imong kinabuhi. Ang kamatuoran mismo nga ikaw misanong sa maayong balita maoy pamatuod nga gipanalanginan ka sa Diyos. Si Jesus nagpaila niini sa miampo siya ngadto sa iyang Amahan niining mga pulonga: “Ako sa dayag nagadayeg kanimo, Amahan, Ginoo sa langit ug sa yuta, tungod kay gitago mo kining mga butanga gikan sa mga maalamon ug sa mga makinaadmanon ug gipadayag kini ngadto sa mga bata.” (Mateo 11:25) Ang mga mangingisda ug mga maniningil ug buhis nakasabot sa gitudlo ni Jesus, samtang ang edukado kaayo nga relihiyosong mga pangulo wala makasabot. Si Jesus dugang miingon: “Walay tawo nga makaari kanako gawas kon ang Amahan, kinsa nagpadala kanako, magkabig kaniya.” (Juan 6:44) Kon ikaw nakadangat sa pagkahibalo sa Bibliya ug ikaw nagtuo ug nagsunod sa mga pagtulon-an niini, kini pamatuod nga si Jehova nagkabig kanimo. Kini usa ka katarongan sa paglipay.
12. Sa unsang mga paagi ang Bibliya mohatag ug kalamdagan?
12 Ang Pulong sa Diyos nasudlan sa makapahigawas nga mga kamatuoran ug mohatag ug kalamdagan. Kadtong nagkinabuhi sumala sa kahibalo sa Bibliya nahigawas na gikan sa mga patuotuo, bakak nga mga pagtulon-an, ug kawalay-alamag nga naghari sa mga kinabuhi sa minilyong tawo. Pananglitan, ang pagkahibalo sa kamatuoran bahin sa kalag magpahigawas kanato gikan sa bisan unsang kahadlok nga ang mga patay makahimog kadaot kanato o nga ang atong patayng mga minahal nagaantos. (Ezequiel 18:4) Ang pagkahibalo sa kamatuoran bahin sa daotang mga manulonda motabang kanato sa paglikay sa mga kapeligrohan sa espiritismo. Ang pagtulon-an sa pagkabanhaw makahupay alang niadtong namatyag mga minahal. (Juan 11:25) Ang mga tagna sa Bibliya nagpakita kanato kon diin na kita sa agos sa panahon ug mohatag kanatog pagsalig diha sa mga saad sa Diyos alang sa umaabot. Kini makapalig-on usab sa atong paglaom nga mabuhi sa walay kataposan.
13. Sa unsang paagi ang pagsunod sa Pulong sa Diyos makapaayo sa atong panglawas?
13 Ang diyosnong mga prinsipyo diha sa Bibliya magtudlo kanato sa pagkinabuhi sa paagi nga makapaayo sa atong panglawas. Pananglitan, kita nakakat-on sa paglikay sa mga bisyong makapahugaw sa atong mga lawas, sama sa sayop nga paggamit sa tabako ug sa ubang mga droga. Kita naglikay sa pag-abuso sa alkoholikong ilimnon. (2 Corinto 7:1) Ang pagsunod sa moral nga mga balaod sa Diyos magsilbing panalipod batok sa mga sakit nga ikatakod sa pagpakigsekso. (1 Corinto 6:18) Pinaagi sa pagsunod sa tambag sa Diyos nga likayan ang paghigugma sa salapi, kita dili makadaot sa kalinaw sa atong hunahuna, sama sa gihimo sa daghan, tungod sa pagpangagpas ug bahandi. (1 Timoteo 6:10) Sa unsang mga paagi nakapaayo sa imong panglawas ang pagpadapat sa Pulong sa Diyos diha sa imong kinabuhi?
14. Unsay epekto sa balaang espiritu sa atong mga kinabuhi?
14 Kon magkinabuhi kita sumala sa Pulong sa Diyos, atong madawat ang balaang espiritu ni Jehova. Maugmad nato ang samag-Kristo nga personalidad, nga gitiman-an sa madanihong mga hiyas sama sa kaluoy ug kahangawa. (Efeso 4:24, 32) Ang espiritu sa Diyos usab magpatungha sa mga bunga niini diha kanato—gugma, kalipay, pakigdait, hataas-nga-pailob, kalulot, pagkamaayo, pagtuo, kalumo, ug pagpugong-sa-kaugalingon. (Galacia 5:22, 23) Kining mga hiyasa makatabang sa malipayon ug mapuslanong mga relasyon sa uban, lakip sa mga membro sa pamilya. Makabaton kita ug kalig-on sa kahiladman nga makatabang nato sa pag-atubang nga maisogon sa mga kalisdanan. Nailhan mo ba kon sa unsang paagi naapektahan sa maayong paagi sa balaang espiritu ang imong kinabuhi?
15. Samtang ipahiuyon nato ang atong mga kinabuhi sa kabubut-on sa Diyos, sa unsang paagi makabaton kitag kaayohan?
15 Samtang ipahiuyon nato ang atong mga kinabuhi sa kabubut-on sa Diyos, mapalig-on nato ang atong relasyon uban kang Jehova. Modako ang atong pagtuo nga siya nakasabot ug nahigugma kanato. Atong makat-onan pinaagi sa kasinatian nga siya mosuportar kanato sa lisod nga kapanahonan. (Salmo 18:18) Atong masabtan nga siya tinuod nga nagpatalinghog sa atong mga pag-ampo. (Salmo 65:2) Kita makasalig sa iyang paggiya, nga may kompiyansa nga kini makaayo kanato. Ug atong nabatonan ang kahibulongang paglaom nga sa gitakdang panahon ang Diyos magtuboy sa iyang matinumanong katawhan ngadto sa kahingpitan ug mohatag kanila sa iyang gasa nga walay-kataposang kinabuhi. (Roma 6:23) “Duol sa Diyos, ug siya moduol kaninyo,” misulat ang tinun-ang si Santiago. (Santiago 4:8) Gibati mo bang nalig-on ang imong relasyon uban kang Jehova samtang nagpaduol ka kaniya?
Usa ka Bahandi nga Walay Makatandi
16. Unsang mga kausaban ang gihimo sa pipila ka Kristohanon sa unang siglo?
16 Gipahinumdoman ni Pablo ang dinihogan-sa-espiritung mga Kristohanon sa unang siglo nga ang pipila kanila sa nangagi maoy mga makihilawason, mananapaw, mga lalaking makigdulog sa mga lalaki, kawatan, mga tawong dalo, palahubog, tigsultig pasipala, ug mga mangingilkil. (1 Corinto 6:9-11) Tungod sa kamatuoran sa Bibliya ilang gihimo ang dagkong mga kausaban; sila “nahugasan na.” Sulayi ang paghanduraw kon unsay imong kinabuhi kon wala pa ang makapahigawas nga mga kamatuoran nga imong nakat-onan gikan sa Bibliya. Seguradong ang kamatuoran maoy usa ka bahandi nga walay makatandi. Malipayon gayod kita nga si Jehova nakigsulti kanato!
17. Sa unsang paagi gipakaon sa espirituwal nga paagi ang mga Saksi ni Jehova panahon sa Kristohanong mga tigom?
17 Dugang pa, hunahunaa ang panalangin nga atong nabatonan tungod sa atong daghag-rasa nga kapunongan! “Ang matinumanon ug maalamong ulipon” nagtaganag espirituwal nga pagkaon sa hustong panahon, lakip ang mga Bibliya, mga magasin, ug ubang publikasyon diha sa daghan kaayong pinulongan. (Mateo 24:45-47) Panahon sa mga tigom sa kongregasyon sa tuig 2000, ang mga Saksi ni Jehova sa daghang kayutaan nagrepaso sa dagkong mga punto gikan sa walo ka dagkong mga basahon sa Hebreohanong Kasulatan. Ilang gipalandong ang mga kinabuhi sa 40 ka karakter sa Bibliya nga gihisgotan sa Insight on the Scriptures. Ilang gitun-an ang mga un-kuwarto sa librong Ang Labing Bantogang Tawo nga Nabuhi Sukad ug ang halos tibuok basahong Pagpatalinghog sa Tagna ni Daniel! Katloag-unom ka segundaryong mga artikulo ang gitun-an gikan sa magasing Bantayanang Torre gawas pa sa 52 ka artikulong tun-anan. Dugang pa, ang katawhan ni Jehova gipalig-on sa 12 ka isyu sa Atong Ministeryo sa Gingharian ug sa senemanang mga pakigpulong publiko bahin sa nagkadaiyang ulohan sa Bibliya. Dagaya gayong espirituwal nga kahibalo ang gitagana!
18. Sa unsang mga paagi gitabangan kita sulod sa Kristohanong kongregasyon?
18 Sa tibuok kalibotan, kapig 91,000 ka kongregasyon naghatag ug suportar ug pagpalig-on pinaagi sa mga tigom ug sa pakig-ubanay. Gipahimuslan usab nato ang pagpaluyo sa hamtong nga mga isigka-Kristohanon nga andam motabang kanato sa espirituwal nga paagi. (Efeso 4:11-13) Oo, nakakuha kitag dakong kaayohan tungod sa pagkadawat sa kahibalo sa kamatuoran. Makapalipay nga makaila ug mag-alagad kang Jehova. Pagkamatuod gayod ang mga pulong sa salmista nga misulat: “Malipayon ang katawhan kansang Diyos mao si Jehova!”—Salmo 144:15.
Nahinumdom Ka Ba?
• Kang kinsa nakigsulti si Jehova sa una-Kristohanong mga panahon?
• Sa unsang paagi ang espirituwal nga kahayag nahimong mas sanag sa unang siglo? sa modernong mga panahon?
• Unsang mga kaayohan ang mosangpot sa pagkinabuhi sumala sa kahibalo bahin kang Jehova?
• Nganong maglipay kita diha sa atong kahibalo bahin sa Diyos?
[Mga Pangutana sa Pagtuon]
[Mga hulagway sa panid 8]
Gisulti ni Jehova ang iyang kabubut-on kang Moises, Noe, ug Abraham
[Hulagway sa panid 9]
Sa atong adlaw, si Jehova naghatag ug kalamdagan bahin sa iyang Pulong
[Mga hulagway sa panid 10]
Hunahunaa ang panalangin nga atong nabatonan tungod sa atong daghag-rasa nga kapunongan!