Pakig-ambit sa Kalipay sa Paghatag!
Pakig-ambit sa Kalipay sa Paghatag!
“Adunay labaw nga kalipay sa paghatag kay sa pagdawat.”—BUHAT 20:35.
1. Giunsa pagpasundayag ni Jehova ang kalipay sa paghatag?
ANG kalipay tungod sa pagkahibalo sa kamatuoran ug sa mga kaayohang mosangpot maoy bililhong mga gasa gikan sa Diyos. Kadtong nakadangat sa pagkaila kang Jehova may daghang katarongan nga maglipay. Apan bisan pag adunay kalipay sa pagdawat ug gasa, adunay kalipay usab sa paghatag ug gasa. Si Jehova mao ang Maghahatag sa “matag maayong gasa ug matag hingpit nga regalo,” ug siya mao “ang malipayong Diyos.” (Santiago 1:17; 1 Timoteo 1:11) Siya mohatag ug maayong mga pagtulon-an sa tanan nga magpatalinghog, ug siya malipay sa pagkamasinundanon niadtong iyang tudloan, sama rang ang mga ginikanan malipay sa dihang ang ilang mga anak mosanong sa mahigugmaong pagtudlo.—Proverbio 27:11.
2. (a) Unsay giingon ni Jesus bahin sa paghatag? (b) Unsang kalipay ang atong madawat sa dihang tudloan nato ang uban sa kamatuoran sa Bibliya?
2 Sa susamang paagi, sa dinhi pa sa yuta, si Jesus nalipay sa pagkakita nga ang mga tawo positibong misanong sa iyang gitudlo. Si apostol Pablo mikutlo kang Jesus nga nag-ingon: “Adunay labaw nga kalipay sa paghatag kay sa pagdawat.” (Buhat 20:35) Ang kalipay nga atong madawat sa dihang tudloan nato ang uban sa kamatuoran sa Bibliya dili lamang katagbawan nga may mouyon sa atong relihiyosong mga tinuohan. Labaw pa gayod niana, kini ang kalipay sa pagkahibalong nagahatag kitag butang nga tinuod nga bililhon ug malungtaron. Pinaagi sa paghatag ug bililhong espirituwal nga butang, makatabang kita sa mga tawo nga makabatog kaayohan sa pagkakaron ug sa walay kataposan.—1 Timoteo 4:8.
Ang Paghatag Makapalipay
3. (a) Sa unsang paagi gipahayag sa mga apostoles nga si Pablo ug si Juan ang ilang kalipay sa pagtabang sa uban sa espirituwal nga paagi? (b) Nganong ang pagpaambit sa kamatuoran sa Bibliya ngadto sa atong mga anak usa ka pagpahayag ug gugma?
3 Oo, ingong si Jehova ug si Jesus malipay nga mohatag ug espirituwal nga mga gasa, ang mga Kristohanon malipay usab. Si apostol Pablo nalipay sa pagkahibalong nakatabang siya sa uban nga makakat-on sa kamatuoran sa Pulong sa Diyos. Ngadto sa kongregasyon sa Tesalonica, siya misulat: “Unsa ba ang among paglaom o kalipay o purongpurong sa kasadya—aw, dili ba sa pagkatinuod kamo?—atubangan sa atong Ginoong Jesus diha sa iyang presensiya? Kamo mao gayod ang among himaya ug kalipay.” (1 Tesalonica 2:19, 20) Sa samang paagi si apostol Juan, sa pagtumong sa iyang espirituwal nga mga anak, misulat: “Wala nay labaw nga hinungdan sa akong pagkamapasalamaton kay niining mga butanga, nga akong madungog nga ang akong mga anak nagpadayon sa paglakaw diha sa kamatuoran.” (3 Juan 4) Hunahunaa, usab, ang kalipay sa pagtabang sa atong kaugalingong mga anak nga mahimong atong espirituwal nga mga anak! Ang pagmatutog mga anak diha sa “disiplina ug sa pagdumala-sa-kaisipan ni Jehova,” maoy pagpahayag ug gugma sa bahin sa mga ginikanan. (Efeso 6:4) Sa ingon gipakita sa mga ginikanan nga sila mabalak-on bahin sa dumalayong kaayohan sa bata pa nilang mga anak. Sa dihang sila mosanong, ang mga ginikanan mobatig dakong kalipay ug katagbawan.
4. Unsang kasinatian ang nagpasundayag sa kalipay sa paghatag ug bililhong espirituwal nga butang?
4 Si Dell maoy bug-os-panahong payunir nga ministro ug inahan sa lima ka anak. Matod niya: “Masabtan ko gayod ang pagbati luyo sa mga pulong ni apostol Juan kay ako mapasalamaton pag-ayo nga upat sa akong mga anak ‘nagalakaw diha sa kamatuoran.’ Ako nahibalo nga makahatag ug kadungganan ug himaya kang Jehova sa dihang ang mga pamilya magkausa sa matuod nga pagsimba, busa gibati ko ang dulot nga katagbawan sa pagkakita nga iyang gipanalanginan ang akong mga paningkamot sa pagsilsil sa kamatuoran diha sa akong mga anak. Ang matahom nga kalaoman sa walay-kataposang kinabuhi diha sa Paraiso uban sa akong pamilya naghupong kanakog paglaom ug nagdasig kanako sa paglahutay bisan pa sa mga kalisdanan ug kababagan.” Ikasubo, usa sa mga anak nga babaye ni Dell napalagpot gikan sa kongregasyon tungod sa pagsubay sa di-Kristohanong dalan. Bisan pa niana, si Dell naningkamot pag-ayo nga makapadayon sa paghupot ug positibong tinamdan. “Ako naglaom nga may adlaw rang ang akong anak babaye sa kamapaubsanon ug katim-os mobalik kang Jehova,” matod niya. “Apan ako nagpasalamat sa Diyos nga kadaghanan sa akong mga anak nagpadayon sa pag-alagad nga matinumanon kaniya. Ang kalipay nga akong gibati maoy dakong tinubdan sa kalig-on alang kanako.”—Nehemias 8:10.
Paghimog Walay-Kataposang mga Higala
5. Samtang magkugi kita sa buluhaton sa paghimog mga tinun-an, ang pagkasayod sa unsa mohatag kanatog katagbawan?
5 Si Jesus nagsugo sa iyang mga sumusunod sa paghimog Kristohanong mga tinun-an ug sa pagtudlo kanila bahin kang Jehova ug sa iyang mga kinahanglanon. (Mateo 28:19, 20) Si Jehova ug si Jesus sa kadili-mahakogon nagtabang sa mga tawo aron makakat-on sa dalan sa kamatuoran. Busa samtang magkugi kita sa buluhaton sa paghimog mga tinun-an, kita matagbawon sa pagkasayod nga kita nagasundog sa panig-ingnan ni Jehova ug ni Jesus, sama sa gihimo sa unang mga Kristohanon. (1 Corinto 11:1) Kon kita makigtambayayong sa maong paagi sa Diyos nga Labing Gamhanan ug sa iyang minahal nga Anak, ang atong mga kinabuhi makabaton ug tinuod nga kahulogan. Pagkadakong panalangin nga isipong apil sa “mga isigkamagbubuhat” sa Diyos! (1 Corinto 3:9) Ug dili ba makapahinam nga bisan ang mga manulonda adunay bahin niining kalihokan sa pagwali sa maayong balita?—Pinadayag 14:6, 7.
6. Samtang makig-ambit kita sa paghatag ug bililhong espirituwal nga butang, kinsa ang mahimong atong mga higala?
6 Sa tinuoray, pinaagi sa pagpakig-ambit niining buluhaton sa paghatag ug bililhong espirituwal nga butang, kita dili lamang mga isigkamagbubuhat sa Diyos—kita makadangat sa walay-kataposang pakighigalaay kaniya. Tungod sa iyang pagtuo, si Abraham gitawag ug higala ni Jehova. (Santiago 2:23) Samtang maningkamot kita sa pagbuhat sa kabubut-on sa Diyos, kita mahimong mga higala usab sa Diyos. Kon atong himoon kana, mahimong mga higala usab kita ni Jesus. Siya miingon ngadto sa iyang mga tinun-an: “Gitawag ko kamong mga higala, tungod kay ang tanang butang nga akong nadungog gikan sa akong Amahan gipahibalo ko kaninyo.” (Juan 15:15) Daghan ang malipay nga isipong mga higala sa impluwensiyadong mga tawo o sa tag-as-ug-ranggong opisyales, apan kita mahimong isipong mga higala sa duha ka kinalabwang mga personalidad sa tibuok uniberso!
7. (a) Sa unsang paagi ang usa ka babaye nakabatog usa ka tinuod nga higala? (b) Nakabaton ka ba ug susamang kasinatian?
7 Dugang pa, sa dihang kita motabang sa mga tawo sa pagkaila sa Diyos, sila usab mahimong atong mga higala, nga makahatag ug linaing kalipay kanato. Si Joan, kinsa nagpuyo sa Tinipong Bansa, misugod pagtuon sa Bibliya uban sa usa ka babaye nga ginganlag Thelma. Bisan pag si Thelma nakasinatig pagsupak sa pamilya sa iyang pagtuon, siya milahutay ug nabawtismohan usa ka tuig sa ulahi. Si Joan misulat: “Ang among panag-uban dili lang kutob diha; hinunoa, kana nahimong panaghigalaay nga milungtad na karon ug mga 35 ka tuig. Subsob kaming magkauban sa pagsangyaw ug sa mga kombensiyon. Sa ngadtongadto, ako mibalhin sa usa ka bag-ong balay nga may gilay-ong 800 kilometros. Apan gipadayon ni Thelma ang pagpadala kanakog labing mahigugmaon ug makapalipayng mga sulat, nga nag-ingong siya gimingaw kanako ug nagpasalamat kanako tungod sa akong pakighigala ug panig-ingnan ug pagtudlo kaniya sa kamatuoran gikan sa Bibliya. Ang pagbaton ug ingon ka suod ug mahigugmaong higala maoy kahibulongang ganti sa akong paningkamot nga tabangan siyang makakat-on bahin kang Jehova.”
8. Unsang positibong tinamdan ang makatabang kanato diha sa ministeryo?
8 Ang paglaom nga makakaplag ug tawong buot makakat-on sa kamatuoran makatabang kanato sa paglahutay bisan pag daghan sa mga tawong mahibalag nato magpakitag gamay o kaha walay interes sa Pulong ni Jehova. Ang maong pagkadili-matinagdanon mahimong hagit sa atong pagtuo ug paglahutay. Bisan pa niana, ang positibong tinamdan makatabang kanato. Si Fausto, nga taga-Guatemala, miingon: “Sa dihang ako mosangyaw sa uban, akong hunahunaon nga pagkatalagsaon unta kon ang tawong akong gikaestorya mahimong espirituwal nga igsoong lalaki o babaye. Ako mangatarongan nga labing menos usa ka tawo unta nga akong mahibalag ngadtongadto modawat sa kamatuoran sa Pulong sa Diyos. Kanang hunahunaa makatabang nako sa pagpadayon sa pagsangyaw ug makahatag kanakog tinuod nga kalipay.”
Pagtigom ug mga Bahandi sa Langit
9. Unsay giingon ni Jesus bahin sa mga bahandi sa langit, ug unsay atong makat-onan gikan niini?
9 Ang paghimog mga tinun-an, atong mga anak kaha o ubang mga tawo, dili sayon sa kanunay. Mahimong gikinahanglan ang panahon, pailob, ug pagkamalugoton. Hinuon, hinumdomi nga ang daghan andam maghago aron sa pagtigom ug daghang materyal nga mga butang, mga butang nga kasagarang dili makahatag ug kalipay kanila ug dili molungtad sa walay kataposan. Giingnan ni Jesus ang iyang mga tigpatalinghog nga labi pang maayo ang pagbuhat alang sa espirituwal nga mga butang. Matod niya: “Hunong na kamo sa pagtigom ug mga bahandi alang kaninyo dinhi sa yuta, diin ang tangkob ug taya magakutkot, ug diin ang mga kawatan magalungkab ug magapangawat. Hinunoa, pagtigom kamo ug mga bahandi alang kaninyo sa langit, diin walay tangkob ni taya nga magakutkot, ug diin walay mga kawatan nga magalungkab ug magapangawat.” (Mateo 6:19, 20) Pinaagi sa pagpangagpas ug espirituwal nga mga tumong—nga naglakip sa pagpakig-ambit sa hinungdanong buluhaton sa paghimog tinun-an—makabaton kitag katagbawan sa pagkahibalo nga kita nagabuhat sa kabubut-on sa Diyos ug siya magaganti kanato. Si apostol Pablo misulat: “Ang Diyos dili kay dili-matarong nga kalimtan ang inyong buhat ug ang gugma nga inyong gipakita alang sa iyang ngalan.”—Hebreohanon 6:10.
10. (a) Nganong si Jesus adunay espirituwal nga mga bahandi? (b) Sa unsang paagi gihatag ni Jesus ang iyang kaugalingon, ug uban ang unsang dakong kaayohan alang sa uban?
10 Kon kita magkugi sa paghimog mga tinun-an, kita magtigom alang sa atong kaugalingon ug “mga bahandi sa langit,” nga nahiuyon sa gisulti ni Jesus. Kini makahatag kanatog kalipay diha sa pagdawat. Kon sa kadili-mahakogon kita magahatag, mosangpot nga kita mahimong bahandianon sa atong kaugalingon. Si Jesus mismo matinumanong nag-alagad kang Jehova sulod sa binilyong katuigan. Hunahunaa ang mga bahanding natigom niya sa langit! Bisan pa niana, si Jesus wala mangita sa iyang kaugalingong intereses. Si apostol Pablo misulat: “Gihatag [ni Jesus] ang iyang kaugalingon alang sa atong mga sala aron kita iyang ikapahigawas gikan niining daotang sistema sa mga butang sumala sa kabubut-on sa atong Diyos ug Amahan.” (Galacia 1:4) Dili lamang kay si Jesus sa kadili-mahakogon naghatag sa iyang kaugalingon diha sa iyang ministeryo kondili iyang gihatag ang iyang kinabuhi mismo ingong usa ka lukat aron ang uban makahigayon sa pagtigom ug mga bahandi sa langit.
11. Nganong ang espirituwal nga mga gasa labaw pa kay sa materyal nga mga gasa?
11 Pinaagi sa pagtudlo sa katawhan bahin sa Diyos, atong matabangan sila sa pagsabot kon sa unsang paagi sila makatigom usab ug dili-madunot nga mga bahanding espirituwal. Unsa ang labaw pang gasa nga imong ikahatag? Kon mohatag ka ug mahal nga relo, kotse, o bisan balay sa usa ka higala, ang maong higala lagmit nga magpasalamat ug malipay, ug ikaw makabatog kalipay diha sa paghatag. Apan unsa unya ang kondisyon nianang gasaha paglabay sa 20 ka tuig? Sa 200 ka tuig? Sa 2,000 ka tuig? Sa laing bahin, kon ikaw maghago aron sa pagtabang sa usa ka tawo nga makaalagad kang Jehova, siya makabatog kaayohan gikan sa maong gasa hangtod sa kahangtoran.
Pagpangita Niadtong Gusto sa Kamatuoran
12. Sa unsang paagi ang daghan naghago aron tabangan ang uban sa espirituwal nga paagi?
12 Aron makaambit sa kalipay sa paghatag ug bililhong espirituwal nga butang, ang katawhan ni Jehova nangadto sa mga kinatumyan sa yuta. Libolibo ang mibiya sa balay ug pamilya aron himoon ang misyonaryong buluhaton diha sa mga nasod diin sila kinahanglang magpahiuyon sa bag-ong mga pinulongan ug mga kultura. Ang uban namalhin ngadto sa mga dapit diha sa ilang kaugalingong mga nasod diin adunay dakong panginahanglan alang sa mga magmamantala sa Gingharian. Ang uban pa gayod nagtuon ug langyawng pinulongan, nga nag-ablig bag-ong mga kahigayonan sa pagsangyaw sa imigranteng katawhan diha sa ilang kaugalingong mga dapit. Pananglitan, human sa pagmatuto ug duha ka anak nga karon nagaalagad sa tibuok-kalibotang hedkuwarter sa mga Saksi ni Jehova, usa ka magtiayon sa New Jersey, T.B.A., misugod sa pagpayunir ug nagtuon ug Ininsek. Latas sa tulo ka tuig nga yugto, sila nagdumalag mga pagtuon sa Bibliya uban sa 74 ka nagsultig-Ininsek nga mga tawong nagtungha sa usa ka kolehiyo sa duol. Makaarang ka ba sa pagpauswag sa imong ministeryo sa usa ka paagi aron makakaplag ug mas dakong kalipay diha sa buluhaton sa paghimog tinun-an?
13. Unsa ang mahimong buhaton nimo kon buot nimong makabaton ug mas mabungahong ministeryo?
13 Tingali nangandoy ka sa pagdumalag usa ka pagtuon sa Bibliya apan wala pa makahimo niana. Sa pipila ka nasod lisod ang pagkaplag ug mga tawong interesado. Tingali ang mga tawong imong mahibalag dili interesado sa Bibliya. Kon maohon, tingali makahisgot kang mas subsob sa imong tinguha diha sa pag-ampo, kay nahibalong si Jehova ug si Jesu-Kristo dulot nga interesado sa buluhaton ug tingali motultol kanimo ngadto sa usa ka karnerohong tawo. Pangayog mga sugyot gikan niadtong mas eksperyensiyado o kansang ministeryo mas mabungahon sa inyong kongregasyon. Pahimusli ang pagbansay ug mga sugyot nga ihatag diha sa Kristohanong mga tigom. Ipadapat ang tambag sa nagapanawng mga magtatan-aw ug ilang mga asawa. Labaw sa tanan, ayaw gayod ug hunong. Ang maalamong tawo misulat: “Sa buntag ipugas ang imong binhi ug hangtod sa gabii ayaw papahulaya ang imong kamot; kay ikaw wala masayod kon diin kini magmalamposon.” (Ecclesiastes 11:6) Kasamtangan, hinumdomi ang matinumanong mga tawo nga sama kang Noe ug Jeremias. Bisan pag diyutay ra kaayo ang paborableng misanong sa ilang pagwali, milampos ang ilang ministeryo. Labaw sa tanan, kadto nakapahimuot kang Jehova.
Pagbuhat sa Imong Maarangan
14. Unsay pag-isip ni Jehova niadtong nanigulang na sa pag-alagad kaniya?
14 Tingali tungod sa imong mga kahimtang dili daghan ang imong mahimo diha sa ministeryo sumala sa imo untang gusto. Pananglitan, tungod sa pagkatigulang limitado ang imong mahimo diha sa pag-alagad kang Jehova. Bisan pa niana, hinumdomi ang gisulat sa maalamong tawo: “Ang pagkaubanon maoy usa ka purongpurong sa katahom sa dihang makaplagan kini sa dalan sa pagkamatarong.” (Proverbio 16:31) Alang kang Jehova, ang kinabuhing gigugol sa pag-alagad kaniya maoy kahimut-anan alang kaniya. Dugang pa, ang Kasulatan nag-ingon: “Bisan hangtod sa pagkatigulang sa usa ako [Jehova] mao gihapon Siya; ug hangtod sa pagkaubanon sa usa ako magpadayon sa pagpas-an. Ako molihok gayod, aron ako magdala ug aron ako magpas-an ug maghatag ug kaikyasan.” (Isaias 46:4) Ang atong langitnong Amahan nagsaad sa pagpalig-on ug pagsuportar sa mga maunongon kaniya.
15. Nagtuo ka ba nga si Jehova nakasabot sa imong mga kahimtang? Ngano?
15 Tingali nag-antos ka sa sakit, pagsupak sa dili-magtutuo nga kapikas, bug-at nga mga kaakohan sa pamilya, o laing lisod nga suliran. Nahibalo si Jehova sa atong mga limitasyon ug mga kahimtang, ug siya nahigugma kanato tungod sa atong sinserong mga paningkamot sa pag-alagad kaniya. Matuod kana bisan pag gamay tingali ang atong mahimo kay sa uban. (Galacia 6:4) Si Jehova nahibalo nga kita dili hingpit, ug siya realistiko diha sa iyang gidahom gikan kanato. (Salmo 147:11) Kon buhaton nato ang atong maarangan, kita makasalig gayod nga kita maoy bililhon sa panan-aw sa Diyos ug siya dili makalimot sa atong mga binuhatan sa pagtuo.—Lucas 21:1-4.
16. Sa unsang paagi ang tibuok kongregasyon nagapakig-ambit sa paghimog usa ka tinun-an?
16 Hinumdomi, usab, nga ang buluhaton sa paghimog tinun-an maoy paningkamot sa tem. Walay usa ka tawo ang makahimog tinun-an, sama rang ang usa ka tinulo sa ulan dili makapabuhi sa tanom. Tinuod, ang usa ka Saksi tingali makakaplag ug usa ka tawong interesado ug magdumalag pagtuon sa Bibliya. Apan sa dihang ang maong bag-ohan moanha sa Kingdom Hall, ang tibuok kongregasyon motabang kaniya sa pag-ila sa kamatuoran. Ang pagkamainiton sa mga igsoon magpadayag sa epekto sa espiritu sa Diyos. (1 Corinto 14:24, 25) Ang mga bata ug mga tin-edyer mohatag ug makapadasig nga mga komento, nga magpakita sa bag-ohan nga ang atong mga batan-on maoy lahi sa mga batan-on sa kalibotan. Ang mga masakiton, mga maluyahon, ug mga tigulang diha sa kongregasyon magtudlo sa mga bag-ohan kon unsay nalangkit sa paglahutay. Walay sapayan sa atong edad o mga limitasyon, kitang tanan adunay usa ka hinungdanong bahin sa pagtabang sa mga bag-ohan samtang ang ilang gugma sa kamatuoran sa Bibliya molalom ug sila mouswag padulong sa bawtismo. Ang matag takna nga atong gugolon diha sa ministeryo, matag balikduaw, matag pakigkabildo sa usa ka tawong interesado sa Kingdom Hall, sa kaugalingon tingali dili bililhon, apan kini bahin sa usa ka gamhanang buluhaton nga ginapalampos ni Jehova.
17, 18. (a) Dugang pa sa pagpakig-ambit sa buluhaton sa paghimog tinun-an, sa unsang paagi kita mahimong makaambit sa kalipay sa paghatag? (b) Pinaagi sa pagpakig-ambit sa kalipay sa paghatag, kinsay atong ginasundog?
17 Hinuon, gawas sa pagpakig-ambit sa hinungdanong buluhaton sa paghimog tinun-an, kitang mga Kristohanon nagapakig-ambit usab sa kalipay sa paghatag diha sa ubang mga paagi. Makagahin kitag salapi nga iamot sa pagsuportar sa maputling pagsimba ug pagtabang niadtong anaa sa kawalad-on. (Lucas 16:9; 1 Corinto 16:1, 2) Makapangita kitag mga kahigayonan sa pagpakitag pagkamaabiabihon ngadto sa uban. (Roma 12:13) Makapaningkamot kita nga ‘buhaton ang maayo ngadto sa tanan, apan ilabina kanila nga atong kabanay sa pagtuo.’ (Galacia 6:10) Ug, sa yano apan hinungdanong mga paagi, makahatag kita sa uban—usa ka sulat, usa ka pagtawag sa telepono, usa ka gasa, pag-ayuda, usa ka pulong sa pagdasig.
18 Pinaagi sa paghatag, atong ipakita nga kita nagsundog sa atong langitnong Amahan. Gipasundayag usab nato ang atong inigsoong gugma, ang ilhanan sa matuod nga mga Kristohanon. (Juan 13:35) Ang paghinumdom niining mga butanga makatabang kanato sa pagpakig-ambit sa kalipay sa paghatag.
Makapatin-aw Ka Ba?
• Sa unsang paagi si Jehova ug si Jesus naghatag ug panig-ingnan sa paghatag ug bililhong espirituwal nga butang?
• Sa unsang paagi makahimo kitag walay-kataposang mga higala?
• Unsang mga lakang ang mahimo nato aron mas molampos ang atong ministeryo?
• Sa unsang paagi ang tanan sa kongregasyon makaambit sa kalipay sa paghatag?
[Mga Pangutana sa Pagtuon]
[Mga hulagway sa panid 13]
Sa dihang mosanong ang mga anak sa pagbansay, ang mga ginikanan mobatig dakong kalipay ug katagbawan
[Hulagway sa panid 15]
Sa paghimog mga tinun-an, kita makahimog tinuod nga mga higala
[Hulagway sa panid 16]
Si Jehova magasuportar kanato diha sa pagkatigulang
[Mga hulagway sa panid 17]
Sa yano apan hinungdanong mga paagi, kita makakaplag ug kalipay sa paghatag