Tabang Aron Masabtan ang Bibliya

ANG Bibliya maoy usa ka talagsaong basahon. Ang mga magsusulat niini nangangkon nga sila inspirado sa Diyos, ug ang mga kaundan niini naghatag ug daghang pamatuod nga ang maong pangangkon maoy tinuod. (2 Timoteo 3:16) Lakip sa ubang mga butang, gipakita sa Bibliya kon diin kita gikan, kon nganong ania kita dinhi, ug asa kita paingon. Sa pagkatinuod kini maoy usa ka basahon nga takos natong tagdon!

Gisulayan mo na tingali ang pagbasa sa Bibliya apan nakakaplag niini nga lisod sabton. Wala ka tingali masayod kon asa modangop aron makakaplag ug mga tubag sa imong mga pangutana. Kon mao, wala ka mag-inusara. Ang imong kahimtang maoy susama nianang sa usa ka tawo nga nabuhi sa unang siglo. Nagsakay siya sa usa ka karwahe, gikan sa Jerusalem paingon sa iyang yutang natawhan, sa Etiopia. Gibasa sa makusog niining Etiopianhong opisyal ang tagna sa Bibliya sa basahon ni Isaias, nga gisulat kapin sa pito ka gatos ka tuig kanhi.

Sa kalit lang, gikomosta siya sa usa ka tawong midagan paabay sa iyang karwahe. Ang tawo mao si Felipe, usa ka tinun-an ni Jesus, ug iyang gipangutana ang Etiopianhon: “Nakasabot ka ba gayod sa imong ginabasa?” Ang Etiopianhon mitubag: “Sa pagkatinuod, unsaon ko man pagkasabot, gawas kon adunay magtudlo kanako?” Dayon iyang gidapit si Felipe nga mosakay sa karwahe. Gipatin-aw ni Felipe ang kahulogan sa kasulatan nga gibasa sa maong tawo ug gipahayag kaniya “ang maayong balita bahin kang Jesus.”—Buhat 8:30-35.

 Ingon nga gitabangan kanhi ni Felipe ang Etiopianhon aron makasabot sa Pulong sa Diyos, ang mga Saksi ni Jehova karon nagtabang sa mga tawo aron makasabot sa Bibliya. Malipay usab sila sa pagtabang kanimo. Kasagaran, labing maayong tun-an ang Bibliya sa sistematikong paagi, nga magsugod sa pangunang mga pagtulon-an sa Kasulatan. (Hebreohanon 6:1) Samtang mouswag ka, makasabot ka sa gitawag ni apostol Pablo nga “gahing pagkaon”—sa ato pa, mas lawom nga mga kamatuoran. (Hebreohanon 5:14) Bisag ang Bibliya mao ang imong ginatun-an, ang ubang mga publikasyon—mga tabang sa pagtuon sa Bibliya—makatabang kanimo sa pagkakaplag ug sa pagkasabot sa mga teksto sa Bibliya sa nagkalainlaing mga ulohan.

Ang pagtuon kasagarang mahikay sa usa ka panahon ug dapit nga kombenyente kanimo. Ang pipila nagtuon gani ginamit ang telepono. Ang pagtuon wala himoa sama sa pag-eskuyla sa tunghaan; usa kini ka pribadong kahikayan nga gipasibo sa imong personal nga mga kahimtang, lakip ang imong kagikan ug edukasyon. Dili ka kinahanglang mobayad alang sa maong pagtuon sa Bibliya. (Mateo 10:8) Walay mga pasulit, ug wala kay angayng kabalak-an. Ang imong mga pangutana pagatubagon, ug imong makat-onan kon sa unsang paagi masuod sa Diyos. Apan, nganong angay mong tun-an ang Bibliya? Tagda ang pipila ka mosunod nga mga katarongan kon nganong ang pagtuon sa Bibliya makadugang sa kalipay sa imong kinabuhi.