Ikaw ba Tinuod nga Matugoton?

MIBATI ka na ba sukad nga naaligutgot tungod sa dili hustong panggawi sa usa ka tawo? Ikaw ba molihok dayon sa dihang ang makadaot nga mga impluwensiya seryosong makaapektar sa imong suod nga mga kauban?

Ang walay-langan ug determinadong aksiyon usahay gikinahanglan aron masumpo ang pagkaylap sa seryosong sala. Pananglitan, sa dihang ang makauulawng buhat nga daotan naghulga sa paghugaw sa mga Israelinhon sa ika-15 nga siglo W.K.P., ang apo ni Aaron nga si Pinehas mihimog mahukmanong aksiyon sa pagpatay sa daotan. Giuyonan ni Jehova nga Diyos ang iyang gibuhat, nga nag-ingon: “Si Pinehas . . . nagpahilayo sa akong kapungot gikan sa mga anak sa Israel tungod kay siya wala motugot nga may makig-indig kanako sa ilang taliwala.”—Numeros 25:1-11.

Gihimo ni Pinehas ang haom nga aksiyon sa pagpahunong sa pagkaylap sa kahugawan. Apan komosta ang bahin sa sobrang pagkaaligutgot sa mga sayop sa uban? Kon molihok kita nga madalidalion o walay makataronganong hinungdan, dili gayod kita mahimong tigdepensa sa pagkamatarong, hinunoa, usa ka tawo nga dili-matugoton—usa nga dili makamaong mopalabay sa mga pagkadili-hingpit sa uban. Unsay makatabang kanato aron malikayan kining lit-aga?

‘Si Jehova Nagapasaylo sa Tanan Mong Kasaypanan’

Si Jehova maoy “usa ka Diyos nga abughoan (masiboton); usa ka Diyos nga dili motugot sa panag-indigay.” (Exodo 20:5, potnot) Ingong Maglalalang, siya adunay katungod sa pagpangayo sa atong bug-os nga pagkamahinalaron. (Pinadayag 4:11) Apan, si Jehova naghatag ug luna sa tawhanong mga kahuyangan. Busa, mahitungod kaniya ang salmistang si David miawit: “Si Jehova maluluy-on ug mapuangoron, mahinay sa kasuko ug dagaya sa mahigugmaong-kalulot. Siya dili mangitag sayop sa tanang panahon . . . Wala niya buhata kanato ang angay sa atong kasal-anan; ni nagpahamtang siya kon unsay angay kanato pinasukad sa atong kasaypanan.” Oo, kon kita mahinulsolon, ang Diyos ‘magapasaylo sa tanan natong kasaypanan.’—Salmo 103:3, 8-10.

Tungod kay iyang nasabtan ang makasasalang kinaiya sa mga tawo, si Jehova dili “mangitag sayop sa tanang panahon” sa mahinulsolong mga mamumuhat ug daotan. (Salmo 51:5; Roma 5:12) Sa pagkatinuod, maoy iyang katuyoan ang pagwagtang sa sala ug pagkadili-hingpit. Hangtod nga matuman kini sa bug-os, inay kay ipahamtang kanato kon unsay “angay kanato,” ang Diyos mapuangorong mopasaylo pinasukad sa halad lukat ni Jesu-Kristo. Walay usa kanato ang mahukmang takos sa kaluwasan kon si Jehova dili magpakitag kaluoy kon nahiangay. (Salmo 130:3) Pagkamapasalamaton gayod nato nga ang atong langitnong Amahan, nga may katungod nga mangayog bug-os nga pagkamahinalaron, maoy usa ka maluluy-ong Diyos!

Gikinahanglan ang Pagkatimbang

Sanglit ang Soberanong Ginoo sa uniberso nagpakitag pagkamatugoton sa pagpakiglabot sa dili-hingpit nga mga tawo, dili ba angayng buhaton nato ang ingon? Ang pagkamatugoton gihubit ingong “ang tinamdan nga magmapailobon sa mga opinyon o mga batasan sa uban.” Kita ba sa personal adunay ingon niana nga tinamdan—ang pagkabuot mopailob ug moantos sa dihang ang uban mosulti ug mohimog mga butang nga dili gayod tataw nga daotan kondili tingali maoy dili-nahiangay nga pulong o buhat?

Siyempre, gikinahanglan natong likayan nga mahimong sobra ka matugoton. Pananglitan, hilabihan nga kadaot ang mahimo kon tugotan lang sa relihiyosong mga awtoridad ang mga pari nga kanunayng nag-among-among sa mga batang lalaki ug babaye. “Kay giisip ang nahitabo sa mga bata ingong mga hitabo lamang gumikan sa sala,” mikomento ang usa ka tigbalita sa Irlandia, “ibalhin lamang sa mga awtoridad sa simbahan ang nakasalang pari [ngadto sa laing dapit].”

Ang basta pagbalhin ba lamang sa maong tawo maoy usa ka pananglitan sa hustong  pagkamatugoton? Dili gayod! Pananglitan ang hunta mediko magtugot sa usa ka iresponsableng siruhano sa pagpadayon sa pagpangopera, nga magbalhin kaniya gikan sa usa ka ospital ngadto sa lain, bisan pag siya nagpatay ug nag-angol sa iyang mga pasyente. Tungod sa maong “pagkamatugoton” lagmit motungha ang sayop nga hunahuna nga dili angayng putlon ang bugkos tali sa mga propesyonal sa mediko. Apan komosta ang mga biktima kansang kinabuhi nakalas o grabeng naapektohan tungod sa pagpasagad o bisan gani kriminal nga mga buhat?

Adunay kapeligrohan usab sa pagpasundayag ug diyutay ra kaayong pagkamatugoton. Sa dihang si Jesus dinhi sa yuta, ang pipila ka Hudiyo nga nailhan ingong mga Zealot sayop nga migamit sa panig-ingnan ni Pinehas sa pagsulay nga ipakamatarong ang ilang kaugalingong mga kalihokan. Ang usa ka kinagrabehan nga gihimo sa pipila ka Zealot mao ang “pagpakig-ipon uban sa panon sa katawhan sa Jerusalem panahon sa mga kapistahan ug sa susamang mga okasyon ug sa pagdunggab sa ilang walay kalibotang mga kaaway ginamit ang mga baraw.”

Ingong mga Kristohanon, dili gayod nato himoon ang sama sa gibuhat sa mga Zealot sa pisikal nga pag-atake niadtong nakapasuko kanato. Apan ang diyutay nga pagkadili-matugoton makapaaghat ba kanato sa pag-atake sa laing mga paagi niadtong dili nato mauyonan—lagmit pinaagi sa pagsulting mapasipalahon kanila? Kon kita tinuod nga matugoton, dili kita modangop sa paggamit nianang makapasakit nga sinultihan.

Ang unang-siglong mga Pariseo maoy laing dili-matugoton nga grupo. Kanunay nilang gihusgahan ang uban ug wala magpakitag konsiderasyon sa tawhanong pagkadili-hingpit. Gitamay sa mapahitas-ong mga Pariseo ang ordinaryong mga tawo, nga nagpanamastamas kanila ingong “tinunglong katawhan.” (Juan 7:49) Tungod niana, gisaway ni Jesus ang maong nagpakamatarong-sa-kaugalingong mga tawo, nga nag-ingon: “Alaot kamo, mga eskriba ug mga Pariseo, mga salingkapaw! tungod kay naghatag kamo sa ikapulo sa yerbabuyna ug sa eneldo ug sa cumino, apan wala kamo magtagad sa mas bug-at nga mga butang sa Balaod, nga mao, ang hustisya ug ang kaluoy ug ang pagkamatinumanon. Obligado ang pagbuhat niining mga butanga, apan dili kay dili tagdon ang ubang mga butang.”—Mateo 23:23.

Sa pagsulti niining mga pulonga, wala ipakawaybili ni Jesus ang kahinungdanon sa pagbantay sa Moisesnong Balaod. Gipakita lamang niya nga ang “mas bug-at,” o mas hinungdanon, nga mga bahin sa Balaod kinahanglan ipadapat uban sa pagkamakataronganon ug pagkamaluluy-on. Pagkalahi gayod ni Jesus ug sa iyang mga tinun-an gikan sa dili-matugotong mga Pariseo ug mga Zealot!

Dili mokonsentir si Jehova ni si Jesus sa pagkadaotan. Sa dili madugay, ‘ipahamtang ang panimalos kanilang wala makaila sa Diyos ug kanilang wala magsunod sa maayong balita.’ (2 Tesalonica 1:6-10) Apan, tungod sa iyang kasibot alang sa pagkamatarong, wala gayod mapakyas si Jesus sa pagpabanaag sa mapailobon, maluluy-on, ug mahigugmaong pagtagad sa iyang langitnong amahan alang niadtong tanan nga buot mobuhat kon unsay maayo. (Isaias 42:1-3; Mateo 11:28-30; 12:18-21) Pagkamaayong panig-ingnan ang gihatag ni Jesus alang kanato!

Mag-inantosay sa Usag Usa

Bisan pag tingali kita adunay dakong kasibot kon unsay matarong, ipadapat nato ang tambag ni apostol Pablo: “Magpadayon sa pag-antos sa usag usa ug kinabubut-on nga magpasaylo sa usag usa kon ang usa adunay reklamo batok sa lain. Ingon nga si Jehova kinabubut-on nga nagpasaylo kaninyo, buhata usab ninyo ang ingon.” (Colosas 3:13; Mateo 6:14, 15) Ang pagkamatugoton nagpasabot nga moantos kita sa mga kakulangan ug kasaypanan sa uban niining dili-hingpit nga kalibotan. Kinahanglang magmakataronganon kita bahin sa atong mga gidahom sa uban.—Filipos 4:5.

Ang pagkamatugoton wala gayod magpasabot sa pag-uyon sa buhat nga daotan o pagpakabuta sa mga sayop. Ang pipila ka bahin sa panghunahuna o panggawi sa usa ka isigkamagtutuo tingali morag dili kaharmonya sa mga sukdanan ni Jehova. Bisan kon ang sayop dili pa tingali kaayo seryoso nga motultol sa pagsalikway sa Diyos, kini mahimong maghatag ug pasidaang ilhanan nga nagpaila nga gikinahanglan ang pipila ka pagpasibo. (Genesis 4:6, 7) Pagkamahigugmaon gayod sa dihang kadtong may espirituwal  nga mga katakos maningkamot nga ipasibo pag-usab ang tawong nakasala diha sa espiritu sa kalumo! (Galacia 6:1) Apan, aron magmalamposon niini nga paningkamot, gikinahanglan nga molihok kita tungod sa kahangawa inay kay tungod sa hinawayong espiritu.

“Uban ang Kalumo sa Buot ug Halawom nga Pagtahod”

Komosta ang pagpakitag pailob ngadto sa mga tawo kansang relihiyosong mga hunahuna lahi sa atoa? Ang “Katibuk-ang Leksiyon” nga gipaskin sa tanang Nasodnong mga Eskuylahan nga gitukod sa Irlandia niadtong 1831 mabasa: “Dili katuyoan ni Jesu-Kristo nga ang iyang relihiyon ipugos sa mga tawo sa mapintasong paagi. . . . Ang pagpakig-away sa atong mga silingan ug pag-abuso kanila dili mao ang paagi sa pagkombinsir kanila nga kita maoy husto ug sila maoy sayop. Lagmit gayod hinuon nga makombinsir sila nga wala kanato ang Kristohanong espiritu.”

Nagtudlo ug naggawi si Jesus sa paagi nga nagpakabig sa mga tawo ngadto sa Pulong sa Diyos, ug busa angay natong buhaton ang ingon. (Marcos 6:34; Lucas 4:22, 32; 1 Pedro 2:21) Ingong hingpit nga tawo nga may linaing hinatag-sa-Diyos nga pagsabot, makabasa siya sa mga kasingkasing. Busa, sa dihang gikinahanglan, gipahayag ni Jesus ang masakit nga mga pagsaway sa mga kaaway ni Jehova. (Mateo 23:13-33) Ang pagbuhat niini wala magpasabot nga siya dili-matugoton.

Dili sama kang Jesus, wala kitay katakos sa pagbasa sa mga kasingkasing. Busa, angay natong sundon ang tambag ni apostol Pedro: “Balaana si Kristo ingong Ginoo diha sa inyong mga kasingkasing, nga andam kanunay sa pagdepensa atubangan sa tanan nga mangayo kaninyog katarongan sa paglaom nga anaa kaninyo, apan magabuhat niini uban ang kalumo sa buot.” (1 Pedro 3:15) Ingong mga alagad ni Jehova, angay natong depensahan ang atong gituohan tungod kay kini lig-ong gipasukad diha sa Pulong sa Diyos. Apan kinahanglan natong buhaton kini sa paaging magpakitag pagtahod sa uban ug sa ilang sinserong gibarogang mga tinuohan. Si Pablo misulat: “Himoa ang inyong sinultihan nga kanunayng madanihon, tinimplahan ug asin, aron mahibaloan ninyo kon unsaon pagtubag sa matag usa.”—Colosas 4:6.

Diha sa iyang bantog nga Wali sa Bukid, si Jesus miingon: “Ang tanang butang nga buot ninyo nga pagabuhaton sa mga tawo nganha kaninyo, kinahanglang pagabuhaton usab ninyo sa ingon ngadto kanila.” (Mateo 7:12) Busa, mapailobong mag-inantosay usab kita sa usag usa ug magpakitag pagtahod niadtong atong gisangyawan sa maayong balita. Pinaagi sa pagbalanse sa atong kasibot alang sa pagkamatarong sa pinasukad-sa-Bibliyang pagkamatugoton, atong mapahimut-an si Jehova ug kita mahimong tinuod nga matugoton.

[Hulagway sa panid 23]

Likayi ang dili-matugotong tinamdan sa mga Pariseo

[Hulagway sa panid 23]

Gipabanaag ni Jesus ang matugotong espiritu sa iyang Amahan. Gibanaag mo ba usab?