Ang Imong Katungod nga Motuo

Lagmit gipabilhan nimo ang imong katungod nga motuo sa bisan unsa nga gusto nimong tuohan. Mao usab kana ang gibati sa halos tanan. Pinaagi sa paggamit niini nga katungod, nakapatunghag makapahinganghang kadaiyahan sa pagtuo ang unom ka bilyong molupyo sa yuta. Sama sa kadaiyahan sa kolor, porma, grano, lami, baho, ug tingog diha sa kalalangan, ang kalahian sa mga pagtuo sagad makadugang ug kaikag, kahinam, ug kalipay sa kinabuhi. Sa pagkatinuod, ang maong kadaiyahan mahimong lamas sa kinabuhi.—Salmo 104:24.

APAN kinahanglang magbantay. Ang pipila ka pagtuo dili lamang lahi kondili peligroso usab. Pananglitan, sayo sa ika-20ng siglo ang pipila ka tawo nagtuo nga ang mga Hudiyo ug mga Freemason nagplano sa “pagbungkag sa Kristohanong sibilisasyon ug pagtukod ug usa ka estado sa kalibotan ilalom sa ilang hiniusang pagmando.” Ang usa ka tinubdan niini nga pagtuo mao ang kontra-Hudiyo nga tract nga nag-ulohang Protocols of the Learned Elders of Zion. Ang tract nangangkon nga ang mga plano naglakip sa pagpaluyo sa hinobrang pagpamuhis, pagpalambo sa paggamag mga armas, pagdasig sa pagmonopoliya sa tanang negosyo aron ang ‘bahandi sa mga Hentil kalit lang mahapay.’ Ang mga alegasyon naglakip usab sa pagmaniobra sa sistema sa edukasyon aron ‘ang mga Hentil mahimong ingon sa walay-hunahuna nga mga mananap,’ ug bisan gani pagtukod ug mga riles sa ilalom sa yuta sa pagkonektar sa kaulohang mga siyudad aron ang Hudiyong mga tigulang ‘makabuntog ni bisan kinsang mga magsusupak pinaagi sa pagpatay kanila.’

Siyempre, kini maoy kabakakan—gilaraw sa pagpasilaob sa kontra-Hudiyo nga mga pagbati. ‘Kining binuang nga tumotumo,’ matod ni Mark Jones sa British Museum, ‘mikaylap sa laing nasod gikan sa Rusya,’ diin kini unang migawas diha sa artikulo sa mantalaan niadtong 1903. Kini napatik sa The Times sa London niadtong Mayo 8, 1920. Kapin sa usa ka tuig sa ulahi, giyagyag sa The Times nga mini ang dokumento. Sa kasamtangan, nahimo na ang kadaot. ‘Ang kabakakan nga sama niini,’ matod ni Jones, ‘maoy lisod nga sumpoon.’ Sa dihang dawaton kini sa mga tawo, kini magpatunghag pipila ka mabatokon, makahilo, ug peligroso kaayong mga pagtuo—sagad uban sa malaglagong mga sangpotanan, sumala sa gipakita sa kasaysayan sa ika-20ng siglo.—Proverbio 6:16-19.

Pagtuo Batok Kamatuoran

Siyempre, ang sayop nga mga pagtuo mahimong maugmad bisan walay tinuyong mga kabakakan. Usahay, sayop lang ang atong pagsabot sa mga butang. Pila ba ka tawo ang nangamatay nga wala sa panahon tungod sa pagbuhat sa usa ka butang nga ilang gituohang husto? Unya dugang pa, sagad gituohan nato ang usa ka butang tungod lang kay buot natong tuohan kana. Usa ka propesor nag-ingon nga bisan ang mga siyentipiko “sagad nagpabili pag-ayo sa ilang kaugalingong mga teoriya ug mga konklusyon.” Ang ilang mga pagtuo naghimo kanilang dili-makaarang  sa pagtimbangtimbang sa mga butang nga dili mapihigon. Unya mogugol tingali sila ug tibuok kinabuhi sa kawang nga pagpaningkamot sa pagpaluyo sa sayop nga mga pagtuo.—Jeremias 17:9.

Ang susamang mga butang nahitabo sa relihiyosong mga pagtuo—diin naglungtad ang daghan kaayong panagsumpaki. (1 Timoteo 4:1; 2 Timoteo 4:3, 4) Ang usa ka tawo adunay lig-ong pagtuo sa Diyos. Ang lain moingon nga kanang tawhana nagtuo lamang sa Diyos nga walay bisan unsang ebidensiya nga mopaluyo nianang pagtuoha. Ang usa mangatarongan nga ikaw adunay dili-mamatay nga kalag nga magpabiling buhi human sa kamatayon. Ang lain nagtuo nga inigkamatay nimo ikaw dili na maglungtad, sa bug-os gayod. Dayag, ang nagkasumpaking mga pagtuo nga sama niini dili mahimong tinuod tanan. Nan, dili ba maalamon ang pagseguro nga ang imong gituohan maoy tinuod gayod ug dili lamang kay buot nimong tuohan kana? (Proverbio 1:5) Sa unsang paagi mahimo nimo kana? Ang mosunod nga artikulo mag-usisa niini nga ulohan.

[Hulagway sa panid 3]

Ang 1921 nga artikulong nagyagyag sa “Protocols of the Learned Elders of Zion”