Mas Durable kay sa Lunsay nga Bulawan

ANG bulawan maoy labing pinangita tungod sa katahom ug kadurable niini. Ang pagkatilinguhaon niini sa dakong bahin maoy tungod sa kamatuoran nga magpabilin kining magilakon ug daw dili-molubad hangtod sa hangtod. Tungod kini kay ang bulawan dili madutlan sa kadaot nga ipahinabo sa tubig, oksiheno, asupre, ug halos sa bisan unsang butang. Daghang butang nga ginama sa bulawan nga nadiskobrehan diha sa nalunod nga mga barko ug sa bisan diin magilakon gihapon sa paglabay sa gatosan ka tuig.

Apan, makaiikag nga ang Bibliya nag-ingon nga dunay usa ka butang nga mas durable ug “labi pang bililhon kay sa bulawan nga madugta ra bisan tuod nga nasulayan na kini pinaagig kalayo.” (1 Pedro 1:7) Ang bulawan nga ‘gisulayan,’ o gilunsay, pinaagi sa kalayo ug sa ubang mga proseso mahimong makadangat sa 99.9 porsiyentong kalunsay. Apan, bisan ang gilunsay nga bulawan madugta, o matunaw, sa dihang maladlad sa aqua regia (harianong tubig), usa ka sinagol sa tulo ka bahin sa hydrochloric acid ug usa ka bahin sa nitric acid. Busa, ang Bibliya husto sa siyentipikanhong paagi sa pag-ingon niini nga ang ‘bulawan madugta.’

Agig pagtandi, ang matuod nga Kristohanong pagtuo ‘nagatipig nga buhi sa kalag.’ (Hebreohanon 10:39) Mapatay sa mga tawo ang usa ka tawo nga may lig-ong pagtuo, sama sa ilang gihimo kang Jesu-Kristo. Apan ang mga maghuhupot sa tinuod nga pagtuo gihatagan niini nga saad: “Pamatud-i ang imong kaugalingon nga matinumanon bisan hangtod sa kamatayon, ug igahatag ko kanimo ang purongpurong sa kinabuhi.” (Pinadayag 2:10) Kadtong nangamatay diha sa pagtuo magpabilin sa panumdoman sa Diyos, ug siya magabanhaw kanila. (Juan 5:28, 29) Walay kantidad sa bulawan ang makahimo niana. Niining bahina, ang pagtuo mas labaw gayod ug bili kay sa bulawan. Apan, aron mahimong bililhon kaayo ang pagtuo kinahanglan usab nga masulayan kini. Sa pagkatinuod, ang ‘sinulayang kalidad sa pagtuo’ nga giingon ni Pedro mas bililhon pa kay sa bulawan. Ang mga Saksi ni Jehova malipay sa pagtabang kanimo sa pagtuon sa Bibliya aron imong maugmad ug mahuptan ang lig-ong pagtuo sa matuod nga Diyos, si Jehova, ug sa iyang Anak, si Jesu-Kristo. Matod ni Jesus, kini “nagkahulogan ug kinabuhing walay kataposan.”—Juan 17:3.