Mga Pangutana Gikan sa mga Magbabasa

Diin man si Daniel sa dihang ang tulo ka Hebreohanon gisulayan atubangan sa dakong imahen nga gipatindog ni Nabucodonosor sa kapatagan sa Dura?

Ang Bibliya walay giingon, busa walay tawo karon ang makapamatuod kon diin si Daniel sa panahon sa maong pagsulay sa integridad.

Ang pipila nagsugyot nga ang opisyal nga ranggo ni Daniel o ang espesyal nga mga pribilehiyo nga iyang nadawat gikan kang Nabucodonosor mas taas kay sa iya ni Sadrak, Mesak, ug Abednego ug busa si Daniel dili obligadong moadto sa kapatagan sa Dura. Tinuod ang Daniel 2:49 nagpaila nga sa usa ka higayon siya nakabatog posisyon nga mas taas kay sa iyang tulo ka kauban. Apan dili kita makapamatuod nga kini ang nagpahigawas kaniya gikan sa pagpakigtigom uban sa mga tawo atubangan sa imahen.

Nagsulay sa pagpatin-aw sa pagkawala-diha ni Daniel, ang uban nag-ingon nga tingali siya atua sa halayo sa usa ka opisyal nga asaynment o kaha nasakit ug busa wala makatambong. Hinunoa, ang Bibliya wala mag-ingon niana. Bisan unsa pay kahimtang, ang dalan nga gisubay ni Daniel dili gayod masaway, tungod kay kon mao pa, ang nasinang mga opisyal sa Babilonya sa walay duhaduha naggamit unta niini aron akusahan siya. (Daniel 3:8) Sa wala pa ug human niini nga hitabo, gipamatud-an ni Daniel ang iyang kaugalingon ingong tighupot sa integridad, maunongon sa Diyos bisan unsa pang pagsulay ang iyang giatubang. (Daniel 1:8; 5:17; 6:4, 10, 11) Busa bisag walay giingon ang Bibliya kon nganong si Daniel wala didto sa kapatagan sa Dura, makaseguro kita nga siya walay pagkompromisong nagmatinumanon kang Jehova nga Diyos.—Ezequiel 14:14; Hebreohanon 11:33.