Pagbuntog sa mga Babag sa Imong Pag-uswag!

HUNAHUNAA nga ang imong sakyanan enggansado, ug nag-andar ang makina, apan dili kini moabante. May problema ang makina? Wala, usa ka dakong bato ang gibangil sa atubangan sa usa sa mga ligid niini. Ang pagkuha niini mao ray gikinahanglan aron makaabante ang sakyanan.

Sa susamang paagi, ang pipila nga nagtuon sa Bibliya uban sa mga Saksi ni Jehova dunay mga babag sa ilang pag-uswag sa espirituwal. Pananglitan, si Jesus nagpasidaan nga ang mga butang sama sa “kabalaka niining sistema sa mga butang ug ang malimbongong gahom sa mga bahandi” mahimong “motuok sa pulong” sa kamatuoran ug mopukgo sa pagtubo.—Mateo 13:22.

Alang sa uban, ang nakagamot na nga mga bisyo o mga kahuyangan maoy nakapugong sa ilang pag-uswag. Usa ka Hapones nga ginganlag Yutaka ang nakaangay sa mensahe sa Bibliya, apan duna siyay seryosong problema sa pagpanugal. Kanunay na niyang gisulayan pagbuntog kining maong daotang bisyo apan napakyas siya. Tungod sa iyang pagkagiyan, nawala kaniya ang dakong kantidad sa salapi, tulo ka balay, ang pagtahod sa iyang pamilya, ug ang kaugalingon niyang dignidad. Mawagtang kaha niya kining maong kabaldahan ug mahimong usa ka Kristohanon?

O palandonga ang usa ka babaye nga ginganlag Keiko. Uban sa tabang sa Bibliya, nakahunong siya sa mga bisyong sama sa idolatriya, imoralidad, ug pagpanag-an. Apan, giangkon ni  Keiko: “Ang labing dakong babag alang kanako mao ang pagpanabako. Gisulayan ko sa makadaghan ang pag-undang apan dili ako makahimo.”

Mahimong aduna kay susamang daw dili-matarog nga babag sa imong pag-uswag. Bisan unsa pa kini, magmasaligon nga uban sa tabang sa Diyos, kini mabuntog.

Hinumdomi ang tambag ni Jesus ngadto sa iyang mga tinun-an human sila mapakyas sa paghingilin sa demonyo gikan sa usa ka patolon nga tawo. Human molampos si Jesus diin sila napakyas, giingnan niya ang iyang mga tinun-an: “Kon kamo adunay pagtuo nga ang gidak-on ingon sa lugas sa mustasa, sultihan ninyo kining bukira, ‘Balhin gikan dinhi paingon didto,’ ug mobalhin kini, ug walay mahimong imposible alang kaninyo.” (Mateo 17:14-20; Marcos 9:17-29) Oo, ang usa ka problema nga ingon ug nagbuntaog nga bukid alang kanato gamay lang kaayo ug dili lisod alang sa atong labing gamhanan nga Maglalalang.—Genesis 18:14; Marcos 10:27.

Pag-ila sa mga Babag sa Pag-uswag

Sa dili pa nimo mabuntog ang imong mga babag, angay nimong mailhan kon unsa ang maong mga babag. Sa unsang paagi mahimo nimo kana? Usahay usa ka membro sa kongregasyon, sama sa usa ka ansiyano o sa tawo nga maoy nagtuon sa Bibliya uban nimo, ang magpunting sa imong pagtagad sa usa ka butang. Inay mayugot sa maong mahigugmaong tambag, angay kang mapainubsanong ‘magpatalinghog sa disiplina ug mahimong maalamon.’ (Proverbio 8:33) Sa ubang mga higayon, mahimong maamgohan nimo ang imong mga kahuyangan pinaagi sa imong pagtuon sa Bibliya. Oo, ang pulong sa Diyos “buhi ug gamhanan.” (Hebreohanon 4:12) Ang pagbasa sa Bibliya ug sa mga binase-sa-Bibliyang mga publikasyon makabutyag sa imong kinailadmang hunahuna, pagbati, ug motibo. Kini motabang kanimo sa pagtimbangtimbang sa imong kaugalingon sumala sa hataas nga mga sukdanan ni Jehova. Kini magpadayag ug magpaila sa mga butang nga makapugong sa imong pag-uswag sa espirituwal.—Santiago 1:23-25.

Pananglitan, batasan sa usa ka estudyante sa Bibliya ang paghunahunag imoral nga mga handurawan. Mahimong wala siyay nakitang kadaot sa paghimo niana, nga mangatarongan nga sa pagkatinuod wala siyay gibuhat nga daotan. Sa lakat sa iyang pagtuon, mabasahan niya ang mga pulong sa Santiago 1:14, 15: “Ang matag usa masulayan pinaagi sa pagkaganoy ug pagkahaylo sa iyang kaugalingong tinguha. Unya ang tinguha, sa dihang kini makapanamkon na, manganak ug sala; unya, ang sala, sa dihang kini mahingpit na, manganak ug kamatayon.” Masabtan niya karon kon unsa ka makadaot sa iyang pag-uswag ang pagpadayon niining dalana! Sa unsang paagi mawagtang niya kining babaga?—Marcos 7:21-23.

Pagbuntog sa mga Babag

Tingali uban sa tabang sa usa ka hamtong nga Kristohanon, ang estudyante basin manukiduki sa Pulong sa Diyos, ginamit ang Watch Tower Publications Index. a Ang ulohang “Thoughts,” pananglitan, magtultol sa magbabasa ngadto sa daghang napatik na nga mga publikasyon nga naghisgot sa pagbuntog sa makadaot nga mga handurawan. Kining mga artikuloha nagpasiugda sa makatabang nga mga teksto sa Bibliya, sama sa Filipos 4:8, nga nag-ingon: “Bisan unsang butang matuod, bisan unsang butang nga maugdang, bisan unsang butang matarong, bisan unsang butang maputli, bisan unsang butang hiligugmaon, bisan unsang butang dungganon, kon aduna may pagkahamili ug kon aduna may butang nga dalayegon, magpadayon sa pagpalandong niining mga butanga.” Oo, ang imoral nga mga hunahuna angayng hulipan ug putli, makapalig-on nga mga hunahuna!

Panahon sa iyang pagpanukiduki, walay duhaduha nga makaplagan sa estudyante ang ubang mga prinsipyo sa Bibliya nga motabang kaniya sa paglikay nga mograbe ang iyang problema. Pananglitan, ang Proverbio 6:27 ug Mateo 5:28 nagpasidaan batok sa pagpasulod sa hunahuna sa makapukaw sa seksong mga materyal. “Ilikay ang akong mga mata gikan sa pagtan-aw sa butang nga walay-pulos,” miampo ang salmista. (Salmo 119:37) Siyempre, dili igo ang pagbasa lang niining mga tekstoha sa Bibliya. “Ang kasingkasing sa matarong nagapamalandong,” nag-ingon ang maalamong tawo. (Proverbio 15:28) Pinaagi sa pagpamalandong dili lang kon unsay gisugo sa Diyos kondili kon nganong nagsugo siya niini, mabatonan sa estudyante ang mas lawom nga pagsabot sa kaalam ug pagkamakataronganon sa mga dalan ni Jehova.

Sa kataposan, ang usa nga naningkamot sa  pagbuntog niini nga kabaldahan sa iyang pag-uswag angayng mangayo gilayon sa tabang ni Jehova. Kon buot hunahunaon, nasayod pag-ayo ang Diyos sa atong pagkagama, nga kita dili-hingpit, hinimo gikan sa abog. (Salmo 103:14) Ang walay-hunong nga mga pag-ampo ngadto sa Diyos alang sa tabang, dinuyogan sa kusganong mga paningkamot sa paglikay nga maghunahuna sa imoral nga mga handurawan, sa ngadtongadto mopatungha ug usa ka tilinguhaong resulta—usa ka mahinlo, wala mahasol nga tanlag.—Hebreohanon 9:14.

Ayaw Paghunong

Bisan unsa pang mga kalisdanan ang imong gipakigbisogan, hunahunaa nga mahitabo usahay ang pagbalik sa naandan. Kon mahitabo kana, natural lamang nga mobatig kapakyasan ug kahigawad. Apan, hinumdomi ang mga pulong sa Galacia 6:9: “Dili kita mohunong sa pagbuhat ug maayo, kay sa takdang panahon kita moani kon kita dili molunga.” Ang debotadong mga alagad sa Diyos sama kang David ug Pedro nakasinatig susamang makauulaw nga mga kapakyasan. Apan wala sila moundang. Sila mapainubsanong midawat sa tambag, naghimog gikinahanglang mga kausaban, ug nagpadayon sa pagpamatuod sa ilang kaugalingon nga talagsaong mga alagad sa Diyos. (Proverbio 24:16) Bisan pa sa kasaypanan ni David, gitawag siya ni Jehova nga “usa ka tawo nga gikahimut-an sa akong kasingkasing, nga maoy mobuhat sa tanang butang nga akong ginatinguha.” (Buhat 13:22) Si Pedro usab nakabuntog sa iyang kasaypanan ug nahimong haligi sa Kristohanong kongregasyon.

Daghan karon ang nakatagamtam ug susamang kalamposan sa pagbuntog sa mga babag. Si Yutaka nga gihisgotan ganina, midawat sa tanyag sa usa ka pagtuon sa Bibliya. Siya nag-asoy: “Ang pagpaluyo ug panalangin ni Jehova sa matag pag-uswag nga akong nahimo nakatabang kanako sa pagbuntog sa akong problema sa pagpanugal. Hilabihan ang akong kalipay sa pagsinati sa kamatuoran sa mga pulong ni Jesus—nga uban sa pagtuo, bisan ang ‘kabukiran’ mabalhin.” Ngadtongadto, si Yutaka nahimong usa ka ministeryal nga alagad sa kongregasyon.

Komosta na man si Keiko, kinsa nagiyan sa tabako? Ang sister nga maoy nagtuon uban kaniya misugyot nga magbasa siya ug lainlaing mga artikulo sa Pagmata! nga may ulohan bahin sa pagkagiyan sa tabako. Gipaskin pa gani ni Keiko ang teksto sa 2 Corinto 7:1 diha sa iyang awto aron mapahinumdoman siya sa adlaw-adlaw nga magpabiling hinlo sa mga mata ni Jehova. Bisan pa niana, dili siya makaundang. “Nahigawad kaayo ako,” matod ni Keiko. “Busa misugod ako sa pagpangutana sa akong kaugalingon kon unsa gayod ang akong gusto—buot ba nakong moalagad kang Jehova o kang Satanas?” Sa dihang nakahukom na siya nga si Jehova ang buot niyang alagaran, hugot siyang miampo alang sa tabang. “Sa akong katingala,” matod niya, “nakahunong ako sa pagpanabako nga wala mag-antos sa hilabihan. Ang gibasolan ko lang mao nga wala ko molihok dayon.”

Ikaw usab mahimong molampos sa pagbuntog sa mga babag sa imong pag-uswag. Kon mas pa nimong ipahiuyon ang imong mga hunahuna, tinguha, pulong, ug mga lihok ngadto sa mga sukdanan sa Bibliya, mas maangkon nimo ang pagtahod sa kaugalingon ug kompiyansa. Ang imong espirituwal nga mga igsoong lalaki ug babaye, maingon man ang mga membro sa pamilya, mapalagsik ug madasig sa dihang makig-uban sila kanimo. Labing hinungdanon sa tanan, mas mapalalom pa nimo ang imong relasyon kang Jehova nga Diyos. Siya nagsaad nga iyang ‘kuhaon ang bisan unsang babag gikan sa dalan sa iyang katawhan’ sa paglingkawas sa pagkontrolar ni Satanas. (Isaias 57:14) Ug makaseguro ka nga kon maningkamot ka sa pagkuha ug pagbuntog sa mga babag sa imong pag-uswag sa espirituwal, si Jehova dagayang magapanalangin kanimo.

[Footnote]

[Hulagway sa panid 28]

Gisaad ni Jesus nga uban sa pagtuo, ang samag-bukid nga mga babag mabuntog

[Hulagway sa panid 30]

Ang pagbasa sa Bibliya magpalig-on sa atong mga paningkamot sa pagbuntog sa mga depekto sa espirituwal