Ayaw Paghunong sa Pagbuhat ug Maayo
Ayaw Paghunong sa Pagbuhat ug Maayo
“Dili kita mohunong sa pagbuhat ug maayo, kay sa takdang panahon kita moani kon kita dili molunga.”—GALACIA 6:9.
1, 2. (a) Nganong gikinahanglan ang pagkamalahutayon aron makaalagad sa Diyos? (b) Giunsa pagpakita ni Abraham ang pagkamalahutayon, ug unsay nakatabang kaniya sa paglahutay niana?
INGONG mga Saksi ni Jehova, malipay kita sa pagtuman sa kabubut-on sa Diyos. Makakaplag usab kitag kahayahay sa pagsangon sa “yugo” sa pagkatinun-an. (Mateo 11:29) Bisan pa niana, ang pag-alagad kang Jehova uban kang Kristo dili kanunayng sayon. Gipatin-aw kini ni apostol Pablo sa dihang giawhag niya ang iyang mga isigka-Kristohanon: “Gikinahanglan nga kamo molahutay, aron nga, human kamo makabuhat sa kabubut-on sa Diyos, kamo makadawat sa katumanan sa saad.” (Hebreohanon 10:36) Ang paglahutay gikinahanglan tungod kay mahimong malisod ang pag-alagad sa Diyos.
2 Ang kinabuhi ni Abraham mao gayoy pamatuod nianang kamatuorana. Daghang higayon nga nag-atubang siya ug malisod nga mga pagpili ug makapahigwaos nga mga kahimtang. Ang pagsugo kaniya nga mobiya sa haruhay nga kinabuhi sa Ur maoy sinugdanan lamang. Wala madugay nag-atubang siya ug kagutom, kasuko sa iyang mga silingan, posibilidad nga mailog ang iyang asawa, kasilag gikan sa pipila ka paryente, ug kapintasan sa gubat. Hinunoa anaa pa sa unahan ang mas grabeng mga pagsulay. Apan wala gayod mohunong si Abraham sa pagbuhat ug maayo. Talagsaon kini kon imong hunahunaon nga wala niya mabatoni ang kompletong Pulong sa Diyos, sama kanato karon. Bisan pa niana, sa walay duhaduha nahibalo siya sa unang tagna, nga niana miingon ang Diyos: “Ibutang ko ang panag-away tali kanimo ug sa babaye ug tali sa imong binhi ug sa iyang binhi.” (Genesis 3:15) Tungod kay pinaagi kaniya moabot ang Binhi, natural lamang nga si Abraham mao ang gitumong sa kasuko ni Satanas. Ang pagkasabot niining kamatuorana sa walay duhaduha nakatabang kang Abraham sa paglahutay nga malipayon sa iyang mga pagsulay.
3. (a) Nganong ang katawhan ni Jehova karon magdahom ug mga kasakitan? (b) Unsang pagdasig ang gihatag kanato sa Galacia 6:9?
3 Ang katawhan ni Jehova karon angay usab magdahom ug mga kasakitan. (1 Pedro 1:6, 7) Hinumdomi, ang Pinadayag 12:17 nagpasidaan kanato nga si Satanas “nakiggubat” sa mga dinihogang nanghibilin. Tungod sa ilang suod nga pagpakig-uban sa mga dinihogan, ang “ubang mga karnero” nahimong puntirya usab sa kapungot ni Satanas. (Juan 10:16) Gawas pa sa paglutos nga atubangon tingali sa mga Kristohanon diha sa ilang publikong ministeryo, sila tingali makaagom usab ug masulayong mga pagpit-os diha sa ilang personal nga kinabuhi. Gitambagan kita ni Pablo: “Dili kita mohunong sa pagbuhat ug maayo, kay sa takdang panahon kita moani kon kita dili molunga.” (Galacia 6:9) Oo, bisag maoy tinguha ni Satanas nga bungkagon ang atong pagtuo, kinahanglang mobarog kita batok kaniya, nga malig-on sa pagtuo. (1 Pedro 5:8, 9) Unsay mahimong moresulta tungod sa atong matinumanong dalan? Nag-ingon ang Santiago 1:2, 3: “Mga igsoon ko, isipa nga maoy bug-os kalipay kon makasagubang kamo ug nagkadaiyang mga pagsulay, kay nahibalo kamo nga kining sinulayang kalidad sa inyong pagtuo mosangpot ug pagkamainantoson.”
Direktang Pag-atake
4. Sa unsang paagi gigamit ni Satanas ang direktang mga pag-atake sa pagsulay nga bungkagon ang integridad sa katawhan sa Diyos?
4 Ang kinabuhi ni Abraham nag-ilustrar gayod sa “nagkadaiyang mga pagsulay” nga maatubang karon sa usa ka Kristohanon. Pananglitan, kinahanglang mosukol siya sa pag-atake sa mga manunulong gikan sa Sinar. (Genesis 14:11-16) Dili ikatingala, si Satanas nagpadayon sa paggamit ug direktang mga pag-atake sa matang sa paglutos. Sukad sa pagkatapos sa Gubat sa Kalibotan II, daghang nasod ang nagpahamtang ug mga pagdili sa gobyerno diha sa Kristohanong edukasyonal nga buluhaton sa mga Saksi ni Jehova. Ang 2001 Yearbook of Jehovah’s Witnesses nagtaho bahin sa kapintasan nga giantos sa mga Kristohanon sa Angola diha sa mga kamot sa ilang mga kaaway. Nagsalig kang Jehova, ang atong mga igsoon sa maong mga nasod wala gayod mohunong! Sila misukol, dili pinaagi sa kapintasan o rebelyon, kondili pinaagi sa mabinantayong pagpadayon sa buluhatong pagwali.—Mateo 24:14.
5. Sa unsang paagi ang Kristohanong mga batan-on mahimong mga biktima sa paglutos diha sa tunghaan?
5 Apan, ang paglutos dili kanunayng maglangkit ug kapintasan. Ngadtongadto gipanalanginan si Abraham ug duha ka anak nga lalaki—si Ismael ug Isaac. Giasoy kanato sa Genesis 21:8-12 nga usa ka higayon niana si Ismael “nagbugalbugal” kang Isaac. Sa iyang sulat sa mga taga-Galacia, gipakita ni Pablo nga kini mas grabe pa kay sa binata lamang nga pagsulogsulog, kay gihubit niya si Ismael nga naglutos kang Isaac! (Galacia 4:29) Busa ang pagbiaybiay gikan sa mga kauban sa tunghaan ug mga panginsulto gikan sa mga magsusupak hustong tawgon nga paglutos. Usa ka batan-ong Kristohanon nga ginganlag Ryan nahinumdom sa pagsakit nga iyang giantos sa mga kamot sa iyang mga klasmet: “Ang 15-minutos nga biyahe sa bus paingon sa tunghaan ug sa pagpauli morag dugay kaayo tungod kay ako ilang insultohon. Pasoan nila ako ginamit ang mga kimpit sa papel nga ilang gipainit pinaagig mga layter sa sigarilyo.” Ang rason niining maong pagdagmal? “Ang akong teokratikanhong pagbansay nagpalahi kanako gikan sa ubang mga batan-on sa tunghaan.” Bisan pa niana, pinaagi sa tabang sa iyang mga ginikanan, si Ryan nakaantos nga matinumanon. Mga batan-on, ang mga pagtamay ba sa inyong mga katalirongan nakapahigawad kaninyo? Aw, ayaw paghunong! Pinaagi sa pag-antos nga matinumanon, masinati ninyo ang katumanan sa mga pulong ni Jesus: “Malipayon kamo sa dihang pakaulawan kamo sa mga tawo ug pagalutoson kamo ug sa binakak sultihan kamo sa tanang matang sa kadaotan tungod kanako.”—Mateo 5:11.
Adlaw-Adlaw nga mga Kabalaka
6. Unsang mga butanga ang makadaot sa mga relasyon taliwala sa mga isigka-Kristohanon karon?
6 Kadaghanan sa mga pagsulay nga atong giatubang karon naglangkit sa naandang adlaw-adlaw nga mga kabalaka. Si Abraham mismo kinahanglang moantos sa mga panagbangi nga mitungha tali sa iyang mga tig-alima sa kahayopan ug niadtong sa iyang pag-umangkon nga si Lot. (Genesis 13:5-7) Sa susamang paagi karon, ang mga kalainan sa personalidad ug ang ginagmayng mga pangabugho makadaot sa mga relasyon ug makapameligro pa gani sa kalinaw sa kongregasyon. “Kon diin anaa ang pangabugho ug pagkamatigion, anaa ang kasamok ug ang tanang mangil-ad nga butang.” (Santiago 3:16) Pagkahinungdanon gayod nga dili kita mohunong kondili ipatigbabaw ang kalinaw inay ang garbo, sama kang Abraham, ug tinguhaon ang kaayohan sa uban!—1 Corinto 13:5; Santiago 3:17.
7. (a) Unsay angayng buhaton sa usa ka tawo kon nasilo siya sa usa ka isigka-Kristohanon? (b) Sa unsang paagi nagpakitag maayong panig-ingnan si Abraham sa paghupot ug maayong relasyon sa uban?
7 Ang pagkamakigdaiton mahimong malisod sa dihang gibati nato nga gitratar kita nga mapihigon sa usa ka isigkamagtutuo. Ang Proverbio 12:18 nag-ingon: “Adunay nagapamulong nga walay paghunahuna sama sa mga dunggab sa espada.” Ang wala-hunahunaang mga pulong, bisan pag gisulti nga walay daotang tuyo, makapahinabog hilabihang kasakit. Ang kasakit mas grabe pa gani kon bation nato nga kita gibutangbutangan o nahimong sumsoman sa masakit nga tabitabi. (Salmo 6:6, 7) Apan dili angayng mohunong ang usa ka Kristohanon tungod lang sa kasilo! Kon anaa ka sa maong kahimtang, himoa ang unang lakang sa paghusay sa problema pinaagi sa pagpakigsulti sa nakapasilo kanimo diha sa malulotong paagi. (Mateo 5:23, 24; Efeso 4:26) Pasayloa kanang tawhana. (Colosas 3:13) Pinaagi sa pagwagtang sa kayugot, gipaposible nato nga maalim ang atong kaugalingong emosyon ug mahibalik ang atong maayong relasyon sa atong igsoon. Si Abraham wala maghambin ug bisan unsang kayugot nga mahimong gibati niya ngadto kang Lot. Gani, si Abraham nagdalidali pag-agpas aron sa pagpanalipod kang Lot ug sa iyang pamilya!—Genesis 14:12-16.
Gipahamtang-sa-Kaugalingon nga mga Pagsulay
8. (a) Sa unsang paagi tingali ‘gitusaktusak sa mga Kristohanon ang ilang kaugalingon sa daghang kasakitan’? (b) Nganong nakahimo si Abraham sa paghupot ug timbang nga panglantaw sa materyal nga mga butang?
8 Tinuod, ang pipila ka pagsulay gipahamtang sa kaugalingon. Pananglitan, gisugo ni Jesus ang iyang mga sumusunod: “Hunong na kamo sa pagtigom ug mga bahandi alang kaninyo dinhi sa yuta, diin ang tangkob ug taya magakutkot, ug diin ang mga kawatan magalungkab ug magapangawat.” (Mateo 6:19) Bisan pa niana, ang ubang mga igsoon “nagtusaktusak sa ilang kaugalingon sa daghang kasakitan” pinaagi sa pag-una sa materyal nga mga intereses kay sa mga intereses sa Gingharian. (1 Timoteo 6:9, 10) Si Abraham andam nga mosakripisyo sa materyal nga mga kaharuhay aron sa pagpahimuot sa Diyos. “Tungod sa pagtuo siya mipuyo ingon nga usa ka langyaw sa yuta sa saad nga samag diha sa langyaw nga yuta, ug mipuyo sa mga tolda uban kang Isaac ug kang Jacob, ang kauban niyang mga manununod sa mao ra nga saad. Kay siya nagpaabot sa siyudad nga may tinuod nga mga patukoranan, nga ang magtutukod ug magbubuhat niini nga siyudad mao ang Diyos.” (Hebreohanon 11:9, 10) Ang pagtuo ni Abraham sa usa ka umaabot nga “siyudad,” o kagamhanan sa Diyos, nakatabang kaniya nga dili mosalig sa mga bahandi. Dili ba maalamon nga buhaton usab nato kana?
9, 10. (a) Sa unsang paagi ang tinguha nga mainila magpatunghag pagsulay? (b) Sa unsang paagi ang usa ka igsoon karon magagawi ingong “mas ubos”?
9 Tagda ang laing bahin. Ang Bibliya naghatag niining puwersadong sugo: “Kon ang usa naghunahuna nga siya mahinungdanon samtang siya walay pulos, siya naglimbong sa iyang kaugalingong hunahuna.” (Galacia 6:3) Dugang pa, giawhag kita nga “dili magabuhat ug bisan unsa tungod sa pagkamatigion o tungod sa pagpaimportante sa kaugalingon, kondili uban sa pagpaubos sa hunahuna.” (Filipos 2:3) Ang uban nagpahinabog mga pagsulay sa ilang kaugalingon tungod kay wala ipadapat kining tambaga. Kay natukmod sa tinguha nga mainila inay kay sa tinguha nga mohimog “maayong buhat,” sila nahigawad ug nagbagulbol sa dihang wala sila makadawat ug mga pribilehiyo diha sa kongregasyon.—1 Timoteo 3:1.
10 Si Abraham nagpakita ug maayong panig-ingnan sa ‘dili paghunahuna ug labaw bahin sa iyang kaugalingon kay sa angay nga hunahunaon.’ (Roma 12:3) Sa dihang nahibalag niya si Melquisedek, si Abraham wala molihok nga daw ang iyang pagkapinaboran sa Diyos naghimo kaniyang labaw. Sa kasukwahi, giila niya ang labaw nga kahimtang ni Melquisedek ingong saserdote pinaagi sa pagbayad kaniya ug ikapulo. (Hebreohanon 7:4-7) Ang mga Kristohanon karon sa susama angayng magmaandam sa paggawi ingong “mas ubos” ug dili moinsistir nga mahimong sentro sa pagtagad. (Lucas 9:48) Kon kadtong nanguna sa kongregasyon daw naghikaw kanimo sa pipila ka pribilehiyo, himoa ang matinud-anong pagsusi-sa-kaugalingon sa pagtino kon unsang mga pagpauswag ang mahimo pa nimo sa imong personalidad o sa paagi sa pagdumala sa mga butang. Inay kay mayugot tungod sa mga pribilehiyo nga wala nimo mabatoni, pahimusli sa bug-os ang pribilehiyo nga imong nabatonan—ang pribilehiyo sa pagtabang sa uban nga makaila kang Jehova. Oo, “ipaubos ang inyong kaugalingon ilalom sa gamhanang kamot sa Diyos, aron nga kamo iyang bayawon sa takdang panahon.”—1 Pedro 5:6.
Pagtuo sa mga Butang nga Dili Makita
11, 12. (a) Nganong ang pipila diha sa kongregasyon nawad-an na sa ilang pagbati sa pagkadinalian? (b) Sa unsang paagi si Abraham nagpakita ug maayong panig-ingnan sa pagsentro sa iyang kinabuhi diha sa pagtuo sa mga saad sa Diyos?
11 Ang laing pagsulay mahimong maglangkit sa morag pagkalangan sa kataposan niining daotang sistema sa mga butang. Sumala sa 2 Pedro 3:12, ang mga Kristohanon kinahanglang ‘magapaabot ug magabutang kanunay sa hunahuna sa presensiya sa adlaw ni Jehova.’ Apan, daghan ang nagpaabot niining maong “adlaw” sulod na sa daghang tuig, ang uban sulod na sa mga dekada. Tungod niini, ang uban tingali nahigawad ug nawad-an na sa ilang pagbati sa pagkadinalian.
12 Sa makausa pa, tagda ang panig-ingnan ni Abraham. Gisentro niya ang iyang tibuok kinabuhi diha sa pagtuo sa mga saad sa Diyos, bisan tuod ug walay posibilidad nga kining tanan matuman sulod sa iyang panahon. Tinuod, nabuhi siya ug dugaydugay pa nga nakita niya nga midako ang iyang anak nga si Isaac. Apan milabay una ang mga kasiglohan una pa ikatandi ang kaliwat ni Abraham sa “mga bituon sa kalangitan” o sa “mga lugas sa balas nga anaa sa baybayon.” (Genesis 22:17) Apan, si Abraham wala mayugot o mahigawad. Busa si apostol Pablo miingon bahin kang Abraham ug sa ubang mga patriarka: “Diha sa pagtuo kini silang tanan nangamatay, bisan ug wala sila makabaton sa katumanan sa mga saad, apan sila nakakita niini sa halayo ug nahinangop niini ug nagpahayag sa dayag nga sila mga estranyo ug temporaryong mga pumoluyo sa yuta.”—Hebreohanon 11:13.
13. (a) Sa unsang paagi ang mga Kristohanon karon maoy sama sa “temporaryong mga molupyo”? (b) Nganong taposon ni Jehova kining sistemaha sa mga butang?
13 Kon nasentro ni Abraham ang iyang kinabuhi diha sa mga saad nga ang katumanan niana maoy sa “halayo” pa, labi pa gayod kita karon, nga ang katumanan niining mga butanga haduol na kaayo! Sama kang Abraham, kinahanglang lantawon nato ang atong kaugalingon ingong “temporaryong mga pumoluyo” sa sistema ni Satanas, nga dili magkinabuhi diha sa mapatuyangon-sa-kaugalingon nga estilo sa kinabuhi. Siyempre, mas gusto nato nga kining “kataposan sa tanang butang” moabot na, dili lang kay haduol na. (1 Pedro 4:7) Tingali nag-antos kita sa grabeng mga sakit. O tingali nabug-atan kita pag-ayo sa mga kalisod sa ekonomiya. Apan, angay natong hinumdoman nga ipahinabo ni Jehova ang kataposan dili lamang aron luwason kita gikan sa makapaguol nga mga kahimtang kondili aron sa pagbalaan sa iyang ngalan. (Ezequiel 36:23; Mateo 6:9, 10) Ang kataposan moabot, dili tingali sa panahon nga kombenyente alang kanato, kondili sa panahon nga magtuman sa mga katuyoan ni Jehova sa labing maayong paagi.
14. Sa usang paagi ang pagpailob sa Diyos nakabenepisyo sa mga Kristohanon karon?
14 Hinumdomi usab nga “si Jehova dili langaylangayan mahitungod sa iyang saad, sumala sa pag-isip sa pipila ka tawo nga paglangaylangay, kondili siya mapailobon kaninyo tungod kay siya wala magtinguha nga adunay malaglag apan nagtinguha nga ang tanan makakab-ot sa paghinulsol.” (2 Pedro 3:9) Matikdi nga ang Diyos “mapailobon kaninyo”—mga membro sa Kristohanong kongregasyon. Lagmit, ang pipila kanato nagkinahanglag dugang panahon sa paghimog mga kausaban aron nga “sa kataposan makaplagan . . . niya nga walay buling ug walay lama ug anaa sa pakigdait.” (2 Pedro 3:14) Nan, dili ba kita magpasalamat nga ang Diyos nagpailob pag-ayo?
Pagkaplag ug Kalipay Bisan pa sa Kababagan
15. Sa unsang paagi nahuptan ni Jesus ang iyang kalipay atubangan sa mga pagsulay, ug sa unsang paagi ang pagsundog kaniya makabenepisyo sa mga Kristohanon karon?
15 Ang mga Kristohanon karon daghang mapupo nga mga pagtulon-an gikan sa kinabuhi ni Abraham. Siya wala lamang magpakitag pagtuo kondili nagpakita usab siya ug pagkamapailobon, lantip nga panabot, kaisog, ug dili-mahakogong gugma. Iyang giuna sa iyang kinabuhi ang pagsimba kang Jehova. Apan, angayng hinumdoman nga ang labing maayong panig-ingnan nga atong sundogon gipakita ni Jesu-Kristo. Siya usab nag-atubang ug daghang pagsulay, apan latas nianang tanan, wala gayod siya mawad-i sa iyang kalipay. Ngano? Tungod kay gisentro niya ang iyang hunahuna sa paglaom sa unahan. (Hebreohanon 12:2, 3) Busa si Pablo miampo: “Karon hinaot ang Diyos nga naghatag ug pag-antos ug paghupay magtugot kaninyo nga mabatonan sa inyong taliwala ang samang tinamdan sa pangisip nga nabatonan ni Kristo Jesus.” (Roma 15:5) Uban sa hustong tinamdan sa hunahuna, makakaplag kitag kalipay bisan pa sa kababagan nga ibutang ni Satanas sa atong atubangan.
16. Unsay atong mahimo sa dihang morag lisod buntogon ang atong mga problema?
16 Sa dihang morag lisod buntogon ang mga problema, pahinumdomi ang imong kaugalingon nga gihigugma ka ni Jehova, maingon nga gihigugma niya si Abraham. Buot niyang molampos ka. (Filipos 1:6) Ibutang ang imong bug-os nga pagsalig kang Jehova, nga masaligon nga “dili niya itugot nga tentalon kamo nga labaw sa inyong maantos, apan uban sa tentasyon siya usab magtaganag kalingkawasan aron kamo makahimo sa pag-antos niini.” (1 Corinto 10:13) Ugmara ang batasan sa pagbasa sa Pulong sa Diyos sa adlaw-adlaw. (Salmo 1:2) Lumahutay sa pag-ampo, nga mangamuyo kang Jehova aron matabangan kang makaantos. (Filipos 4:6) Siya “mohatag ug balaang espiritu niadtong nagapangayo kaniya.” (Lucas 11:13) Pahimusli ang mga tagana nga gihimo ni Jehova sa pagpalig-on kanimo sa espirituwal, sama sa atong binase-sa-Bibliya nga mga publikasyon. Dugang pa, pangayoa ang pagpaluyo sa kapunongan sa mga igsoon. (1 Pedro 2:17) Tambong kanunay sa Kristohanong mga tigom, kay didto madawat nimo ang pagdasig nga imong gikinahanglan aron makalahutay. (Hebreohanon 10:24, 25) Pagmaya diha sa kombiksiyong ang imong pag-antos motultol ngadto sa inuyonan nga kahimtang sa panan-aw sa Diyos ug nga ang imong pagkamatinumanon makapalipay sa iyang kasingkasing!—Proverbio 27:11; Roma 5:3-5.
17. Nganong ang mga Kristohanon dili magpadala sa pagbati nga wala nay paglaom?
17 Si Abraham gihigugma sa Diyos ingong iyang “higala.” (Santiago 2:23) Bisan pa niana, ang kinabuhi ni Abraham napuno sa makapahigwaos nga mga pagsulay ug mga kasakitan. Busa ang mga Kristohanon makadahom sa susamang mga kasinatian sulod niining daotang “kataposang mga adlaw.” Gani, gipasidan-an kita sa Bibliya nga “ang mga tawong daotan ug mga impostor mosamot pa ka ngil-ad.” (2 Timoteo 3:1, 13) Inay kay magpadala sa pagbati nga wala nay paglaom, hibaloi nga ang mga pagpit-os nga atong giatubang nagpamatuod nga ang kataposan sa daotang sistema ni Satanas haduol na. Apan gipahinumdoman kita ni Jesus nga “siya nga nakalahutay hangtod sa kataposan mao ang maluwas.” (Mateo 24:13) Busa, ‘ayaw paghunong sa pagbuhat ug maayo!’ Sundoga si Abraham, ug malakip ka niadtong kinsa “pinaagi sa pagtuo ug pailob nagapanunod sa mga saad.”—Hebreohanon 6:12.
Nakamatikod Ka Ba?
• Nganong ang katawhan ni Jehova karon magdahom ug mga pagsulay ug kasakitan?
• Sa unsang mga paagi tingali gamiton ni Satanas ang direktang mga pag-atake?
• Sa unsang paagi mahusay ang personal nga mga kasungian taliwala sa mga Kristohanon?
• Sa unsang paagi ang garbo ug sobrang pagpabili sa kaugalingon makapatunghag mga pagsulay?
• Sa unsang paagi si Abraham naghatag ug maayong panig-ingnan sa pagpaabot sa katumanan sa mga saad sa Diyos?
[Mga Pangutana sa Pagtuon]
[Hulagway sa panid 26]
Daghang Kristohanon nga mga batan-on ang nakaagom ug paglutos, nga gitamay sa ilang mga katalirongan
[Hulagway sa panid 29]
Sa adlaw ni Abraham ang katumanan sa mga saad sa Diyos anaa pa sa “halayo,” apan iyang gisentro ang iyang kinabuhi diha niana