Kadaogan—Diha sa Pederal nga Konstitusyonal nga Korte

NAANGKON sa mga Saksi ni Jehova sa Alemanya ang talagsaong kadaogan diha sa Pederal nga Konstitusyonal nga Korte sa Karlsruhe. Sa ingon sila nakahimog hinungdanong lakang may kalabotan sa legal nga pag-ila kanila.

Ang mga Saksi ni Jehova aktibo sa Alemanya kapin na sa 100 ka tuig. Sila padayong naglungtad bisan pa sa grabeng paglutos diha sa mga kamot sa duha ka diktador sa ika-20ng siglo—ang Nasodnong mga Sosyalista ug ang mga Komunista. Sukad sa 1990, ang mga Saksi naningkamot nga maangkon ang legal nga pag-ila ingong usa ka korporasyon nga giila sa gobyerno. Human sa duha ka paborableng mga desisyon ug usa ka desisyon nga gibali sa korte, ang mga Saksi miapelar sa Pederal nga Konstitusyonal nga Korte, kinsa nag-anunsiyo sa desisyon niini niadtong Disyembre 19, 2000.

Gikauyonang Desisyon Alang sa mga Saksi ni Jehova

Ang tanang pito ka huwes sa korte midesisyon pabor sa mga Saksi. Giusab sa mga huwes ang desisyon niadtong 1997 sa Pederal nga Administratibong Korte ug gisugo ang maong korte sa pagkonsiderar pag-usab sa hangyo sa mga Saksi.

Gigamit sa Pederal nga Konstitusyonal nga Korte ang maong okasyon aron komentohan ang pasukaranang relasyon tali sa Estado ug sa relihiyosong mga grupo. Sa paninugdan, ang baroganan sa relihiyon “matino, dili pinaagi sa mga tinuohan niini, kondili pinaagi sa panggawi niini.”

Namatikdan usab sa korte nga sa dihang ipadapat sa mga Saksi ang “Kristohanong pagkaneyutral,” sila “wala mag-atake sa mga prinsipyo sa demokrasya” ug “wala mangandoy nga pulihan ang demokrasya ug laing matang sa kagamhanan.” Busa, ang dili pagpakigbahin sa politikanhong mga eleksiyon dili angayng isipon nga pamatuod batok sa mga Saksi sa ilang paghangyo ug legal nga pag-ila.—Juan 18:36; Roma 13:1.

Miingon pa ang korte nga usahay makaplagan sa usa ka magtutuo—Saksi man siya o membro sa laing relihiyon—ang iyang kaugalingon nga anaa sa kahimtang diin magkasumpaki ang gipangayo sa Estado ug ang mga kinahanglanon sa iyang relihiyon. Kon sundon sa maong indibiduwal ang iyang tanlag pinaagi sa “pagtuman sa relihiyosong tinuohan imbes sa balaod,” mahimo kining isipon sa Estado nga makataronganon ug bahin sa relihiyosong kagawasan.—Buhat 5:29.

Ang desisyon sa korte nahimong ulohan sa mga balita. Halos tanang mantalaan sa Alemanya dunay taho sa maong kaso. Ang tanang dagkong mga estasyon sa telebisyon ug radyo nagsibya sa mga taho o mga interbiyo. Wala pa gayod mahatagig ingon niana ka kaylap nga publisidad ang ngalan ni Jehova sa Alemanya sukad masukad.

[Picture Credit Line sa panid 8]

AP Photo/Daniel Maurer