Mga Pangutana Gikan sa mga Magbabasa

Unsa ka dugay ang pag-antos ni Job?

Ang ubang mga tawo naghunahuna nga ang mga pagsulay ni Job mikabat ug daghang tuig, apan ang basahon sa Job wala magpunting nianang dugay nga pag-antos.

Ang unang hugna sa mga pagsulay ni Job, ang pagkahanaw sa mga membro sa pamilya ug mga manggad, morag wala magdugay. Atong mabasa: “Karon miabot ang adlaw sa dihang ang mga anak nga lalaki ug mga anak nga babaye [ni Job] nangaon ug nanginom ug bino didto sa balay sa ilang igsoong lalaki nga panganay.” Nadawat ni Job ang sunodsunod nga taho nga nakaagom siyag kapildihan—sa iyang mga baka, iyang mga asno, iyang mga karnero, iyang mga kamelyo, ug sa mga sulugoon nga nag-atiman sa maong mga kahayopan. Dayag nga human gayod niana nga nahibalo si Job sa kamatayon sa iyang mga anak nga lalaki ug babaye, kinsa “nangaon ug nanginom ug bino didto sa balay sa ilang igsoong lalaki nga panganay.” Morag kining tanan nahitabo sa usa ka adlaw.—Job 1:13-19.

Ang sunod nga hugna sa mga pagsulay ni Job lagmit mikabat gayod ug taastaas nga panahon. Si Satanas miduol kang Jehova ug nangangkon nga si Job mapakyas sa pagsulay sa integridad kon siya mismo ang mag-antos—ang iyang lawas. Dayon si Job gitakboyan ug “grabeng hubag gikan sa lapalapa sa iyang tiil hangtod sa iyang alimpulo.” Ang pagkaylap niining sakita sa tibuok niyang lawas mahimong mikabat ug taastaas nga panahon. Ug lagmit mikabat usab ug taastaas nga panahon una makaabot ang balita bahin “niining tanan nga katalagman” ngadto sa iyang nagpakaaron-ingnong mga maghuhupay, kinsa miadto kaniya.—Job 2:3-11.

Si Eliphaz maoy taga-Teman sa yuta sa Edom, ug si Sopar naggikan sa amihanan-kasadpang Arabia, busa ang ilang mga pinuy-anan dili layo kang Job sa Uz, nga lagmit nahimutang sa amihanang Arabia. Apan, si Bildad maoy usa ka Shuhanon, ug gituohan nga ang iyang katawhan nagpuyo ubay sa Euprates. Kon si Bildad didto sa iyang balay niadtong panahona, lagmit mikabat ug mga semana o mga bulan una niya madungog ang situwasyon ni Job ug ang pagbiyahe niya paingon sa Uz. Siyempre, posible nga ang tulo didto duol sa gipuy-an ni Job sa dihang nagsugod ang iyang pag-antos. Bisan unsa pay nahitabo, sa dihang miabot ang tulo ka kauban ni Job, sila “nagpadayon sa paglingkod uban niya diha sa yuta pito ka adlaw ug pito ka gabii” nga walay gisulti.—Job 2:12, 13.

Dayon miabot ang kataposang hugna sa mga pagsulay ni Job, ang mga detalye niana nagpuno sa daghang kapitulo sa maong basahon. Dihay sunodsunod nga mga lantugi o mga pakigpulong niadtong nagpakaaron-ingnong mga maghuhupay, ug kasagaran mitubag si Job. Pagkahuman niana, ang batan-ong lalaki nga si Elihu mihatag ug pagbadlong, ug gitul-id ni Jehova si Job gikan sa mga langit.—Job 32:1-6; 38:1; 40:1-6; 42:1.

Busa, ang mga pag-antos ni Job ug ang kasulbaran niana lagmit nahitabo sulod sa pipila ka bulan, tingali wala dangtig usa ka tuig. Nahibaloan mo tingali gikan sa kasinatian nga ang malisod nga mga pagsulay morag walay kataposan. Bisan pa niana, kinahanglang dili kita malimot nga kini matapos, sama sa nahitabo kang Job. Bisan unsa pa ka dugay ang mga pagsulay nga atong giatubang, angay natong hinumdoman ang pagpaluyo sa Diyos, ingon sa gibanaag sa dinasig nga mga pulong: “Kay bisan tuod ang kasakitan makadiyot lamang ug magaan, kini nagapatungha alang kanamo ug usa ka himaya nga labaw pa gayod ang gibug-aton ug walay kataposan.” (2 Corinto 4:17) Si apostol Pedro misulat: “Human nga kamo makaantos sa makadiyot, ang Diyos sa tanang dili-takos nga kalulot, nga nagtawag kaninyo ngadto sa iyang walay kataposang himaya nga nahiusa kang Kristo, magtapos mismo sa inyong pagbansay, siya magpalig-on kaninyo, siya magpakusgan kaninyo.”—1 Pedro 5:10.