Nahinumdom Ka Ba?

Gipabilhan mo ba ang pagbasa sa di pa dugayng mga gula sa Ang Bantayanang Torre? Buweno, tan-awa kon makatubag ka ba sa mosunod nga mga pangutana:

• Nganong ang mga pangutana nga gipatungha sa Job kapitulo 38 takos konsiderahon bisan karon?

Daghan sa kahibulongang mga buhat nga gihisgotan sa Diyos dili bug-os nga masabtan bisan sa modernong mga siyentipiko. Naglakip kini kon sa unsang paagi gipaposible sa grabidad nga magpabilin ang yuta diha sa orbito niini, kon unsa gayod ang kahayag, kon nganong daghan kaayong kadaiyahan sa mga tipik sa niyebe, kon sa unsang paagi namugna ang mga tulo sa ulan, ug kon sa unsang paagi ang enerhiya nalangkit diha sa mga kilat.—4/15, mga panid 4-11.

• Unsang mga panig-ingnan sa Bibliya ang makatabang kanato sa pagsagubang sa negatibong mga pagbati?

Si Asap, Baruk, ug Noemi nag-atubang ug mga yugto sa pagkaluya sa buot o sa ubang negatibong mga pagbati, ug ang rekord sa Kasulatan bahin sa ilang pagsagubang nga malamposon sa maong mga situwasyon makatabang kanato.—4/15, mga panid 22-4.

• Unsa ang pipila ka mapuslanong mga paagi sa pagtabang sa Kristohanon nga mga babayeng balo?

Ang mga higala makatanyag ug tabang sa maluloton ug klaro nga paagi. Ang mga membro sa pamilya o ang uban pa makahimo tingali sa paghatag ug pinansiyal o materyal nga tabang, diin adunay tinuod nga panginahanglan. Ang mga isigka-Kristohanon makatabang usab pinaagi sa pagpakighigala, pagtagana ug espirituwal nga pagpaluyo ug kahupayan.—5/1, mga panid 5-7.

• Nganong hinungdanon nga magminyo “lamang diha sa Ginoo,” sumala sa gitambag sa 1 Corinto 7:39?

Ang mga kaminyoon ngadto sa mga dili-magtutuo kasagarang miresulta sa kadaot. Dugang pa, ang pagsunod niining maong tambag sa Diyos nagpasabot ug pagkamaunongon ngadto kang Jehova nga Diyos. Kon mosunod kita sa Pulong sa Diyos, dili kita hukman sa atong kasingkasing. (1 Juan 3:21, 22)—5/15, mga panid 20-1.

• Sanglit si Jehova mao lamang ang makapasaylo sa atong mga sala, nganong ang mga Kristohanon mosugid sa bug-at nga mga sala ngadto sa mga tigulang sa kongregasyon?

Oo, angayng pangayoon sa usa ka Kristohanon ang pagpasaylo ni Jehova sa bug-at nga mga sala. (2 Samuel 12:13) Apan maingon nga ang manalagnang si Natan mitabang kang David, ang hamtong nga mga tigulang sa kongregasyon makatabang sa mahinulsolong mga makasasala. Ang pag-adto sa mga ansiyano nahiuyon sa sugo nga gihatag diha sa Santiago 5:14, 15.—6/1, panid 31.

• Unsay pamatuod nga angay natong atimanon ang mga ilo ug mga balo nga nanginahanglan?

Ang makasaysayanhong rekord nagpakita nga ang pagtagana sa maong pag-atiman maoy timailhan sa matuod nga pagsimba taliwala sa karaang mga Hebreohanon ug sa unang mga Kristohanon. (Exodo 22:22, 23; Galacia 2:9, 10; Santiago 1:27) Gilakip ni apostol Pablo sa Kasulatan ang tin-awng mga instruksiyon alang sa mga Kristohanon sa pag-atiman sa nanginahanglan nga mga babayeng balo. (1 Timoteo 5:3-16)—6/15, mga panid 9-11.

• Unsa ang sekreto sa malipayon, makahuloganon nga kinabuhi?

Kinahanglang ugmaron ug huptan nato ang maayong relasyon uban kang Jehova, ang atong langitnong Amahan. Ang pagtuon sa Bibliya maoy hinungdanong tabang sa atong pagbuhat niana.—7/1, mga panid 4-5.

• Ang matag tawo ba adunay dili-mamatayng espiritu nga magpabiling-buhi human sa kamatayon?

Bisan tuod ang pipila ka tawo nagtuo nga ang espiritu—dili ang kalag—maoy dili-mamatay, ang Bibliya wala magpaluyo niining ideyaha. Kini nagpakita nga inigkamatay sa usa ka tawo, siya mobalik sa abog ug dili na maglungtad. Apan nahuptan sa Diyos ang katakos sa pagpabuhi kaniya pag-usab, busa ang bisan unsang paglaom alang sa umaabot nga kinabuhi, pinaagi sa pagkabanhaw, nahasandig sa Diyos. (Ecclesiastes 12:7)—7/15, mga panid 3-6.

• Diin si Daniel sa dihang ang tulo ka Hebreohanon gisulayan diha sa kapatagan sa Dura?

Walay gisulti ang Bibliya. Lagmit si Daniel wala baori nga moadto didto tungod sa iyang ranggo, o lagmit milakaw siya tungod sa usa ka opisyal nga asaynment. Apan makasalig kita nga wala gayod niya ikompromiso ang iyang pagkamatinumanon ngadto kang Jehova.—8/1, panid 31.