Pagsidlak Ingong mga Magbabanwag Diha sa Siyudad sa Kahayag

Ang Fluctuat nec mergitur, o “Siya gilambalamba sa mga balod apan dili siya malunod,” mao ang panultihon sa siyudad sa Paris.

SAMA sa usa ka barko, sulod sa milabayng 2,000 ka tuig, gisungsong sa Paris ang daghan kaayong samag-unos nga pagsulong sa mga langyaw ug mga pag-alsa diha mismo sa maong nasod aron padayon kining maglutaw, ingnon ta. Karon usa na sa kinanindotang mga siyudad sa kalibotan, ang Paris gidayeg tungod sa iyang maanindot kaayong arkitektura, sa gilinyahag-kahoy nga mga karsada, ug sa nabantog-sa-kalibotan nga mga museyo. Ang uban nag-isip niana ingong duawanan sa mga magbabalak, mga pintor, ug mga pilosopo. Ang uban nagatagamtam sa iyang lamiang pagkaon ug nagdayeg sa iyang mga tigdisenyo sa bag-ong uso sa sapot.

Sumala sa kasaysayan, ang Paris nahimong kuta sa Katolisismo. Duha ka gatos ka tuig kanhi, tungod sa hinungdanong papel niini diha sa intelektuwal nga kalihokan sa Uropa nga nailhan ingong Kalamdagan, ang Paris gitawag ug Siyudad sa Kahayag. Karon, nahibaloan man nila o wala, kadaghanan sa mga taga-Paris mas naimpluwensiyahan sa pilosopiya nga masubay pa nianang yugtoa kay sa relihiyon.

Apan, ang kaalam sa tawo wala maglamdag sa kinabuhi sa mga tawo sumala sa gidahom. Daghan karon ang nangitag kalamdagan gikan sa lahi nga tinubdan. Sulod sa mga 90 ka tuig na karon, ang mga Saksi ni Jehova “nagasidlak ingong mga magbabanwag” sa Paris. (Filipos 2:15) Sama sa  hanas nga mga marinero, kinahanglang kanunay silang mopasibo sa nag-usab-usab nga mga kiling o mga hitabo aron mapasakay ingong mahulagwayong mga pasahero sa barko “ang tilinguhaong mga butang sa tanang kanasoran.”—Haggeo 2:7.

Usa ka Makaiikag nga Siyudad

Niadtong 1850, ang Paris maoy siyudad nga gipuy-an sa 600,000 ka molupyo. Ang presenteng-adlaw nga populasyon, lakip sa mga sikbit nga balangay, maoy kapin na sa siyam ka milyon. Ang maong pag-uswag miresulta sa pagkahimo sa Paris nga siyudad sa Pransiya nga adunay nagkadaiya kaayong populasyon. Kini maoy sentro sa kalibotan sa hataas nga edukasyon, nakabaton sa kinakaraanang mga unibersidad sa kalibotan, ug gipuy-an sa mga 250,000 ka estudyante. Ang pipila ka sikbit nga balangay sa Paris, nga daghag tag-as nga mga puy-anang mga tinukod nga naghitak sa pagkadelingkuwente ug pagkawalay-trabaho, maoy naghawas sa dili-kaayo tilinguhaong mga dapit sa Paris. Sa walay duhaduha, ang mga Saksi ni Jehova nagkinahanglag kahanas ug pagkamapasiboon sa pagpresentar sa maayong balita sa madanihong paagi ngadto sa tanang matang sa mga tawo.—1 Timoteo 4:10.

 Kapin sa 20 ka milyong turista ang moadto sa Paris kada tuig. Sila tingali mahinamong mosaka sa Eiffel Tower, mopaseyo ubay sa suba sa Seine, o mag-estambay diha sa mga kapehan ug mga bar, nga maghinan-aw sa palibot. Apan, ang adlaw-adlaw nga paso sa kinabuhi sa mga taga-Paris mahimong puliki kaayo. “Ang mga tawo kanunayng nagdali,” miingon si Christian, usa ka bug-os-panahong ministro. “Inigpamauli na nila gikan sa trabaho, sila gikapoy na kaayo.” Dili sayon ang pagpakig-estorya niining puliki nga mga tawo.

Apan, usa sa kinadak-ang mga problema nga giatubang sa mga Saksi ni Jehova sa Paris mao ang pagkontak sa mga tawo diha sa ilang kabalayan. Ang ubang mga tinukod sinangkapan ug mga intercom. Apan, tungod sa pag-uswag sa krimen ang mga apartment kasagarang gitaorag elektronik nga sistema sa seguridad diha sa mga ganghaan, ug lisod ang pagsulod. Sa walay duhaduha nagpatin-aw kini kon nganong diha sa pipila ka dapit, dunay usa lamang ka Saksi sa 1,400 ka tawo. Busa, ang pagsangyaw pinaagig telepono ug ang impormal nga pagsangyaw mas gigamit. Nakahimo ba ang mga Saksi sa ‘pagpasidlak sa ilang kahayag’ sa laing mga paagi?—Mateo 5:16.

Daghan kaayo ang mga kahigayonan ug mga dapit alang sa impormal nga pagsangyaw. Nakita ni Martine ang usa ka babaye nga morag magul-anong nagbarog diha sa usa ka hunonganan sa bus. Ang babaye bag-o lang namatyan sa iyang bugtong anak nga babaye. Gihatagan siya ni Martine ug brosyur nga naundan sa makapahupay nga mensahe sa pagkabanhaw nga anaa sa Bibliya. Dayon wala na sila magkita sulod sa pipila ka bulan. Sa dihang nakita pag-usab ni Martine ang babaye, nakasugod siya ug pagtuon sa Bibliya uban kaniya. Bisan pa sa pagsupak gikan sa iyang bana, ang babaye na-Saksi.

Mabungahong Impormal nga Pagsangyaw

Ang publikong sistema sa transportasyon sa Paris maoy usa sa labing episyente sa kalibotan. Ang ilado nga Metro naghatod ug 5,000,000 ka pasahero kada adlaw. Ang sentral nga estasyon sa ilawom sa yuta sa Paris, ang Châtelet-Les-Halles, giingon nga mao ang kinadak-an ug kinapulikian sa kalibotan. Daghag kahigayonan nga makahimamat ug mga tawo didto. Si Alexandra tigsakayan sa Metro paingon sa trabahoan kada adlaw. Usa ka adlaw niana nakig-estorya siya sa usa ka batan-ong lalaki nga himalatyon sa sakit nga leukemia. Gihatagan siya ni Alexandra ug tract nga bahin sa paglaom sa Paraiso. Usa ka panaghisgot sa Bibliya ang gihimo sa mao gihapong panahon ug dapit kada adlaw sulod sa unom ka semana. Unya usa ka adlaw niana wala na moadto ang maong lalaki. Wala madugay human niadto, ang iyang asawa mitelepono kang Alexandra ug giingnan siya nga paadtoon sa ospital, tungod kay ang iyang bana nagpinal na. Ikasubo, wala na siya maabting buhi ni Alexandra. Human sa iyang kamatayon, ang asawa sa maong lalaki mibalhin sa Bordeaux, sa habagatan-kasadpang Pransiya, diin giduaw siya sa lokal nga mga Saksi. Pagkamaayong balita alang kang Alexandra nga madungog usa ka tuig sa ulahi nga ang biyuda nahimo nang bawtismado nga Kristohanong Saksi ni Jehova, nga naglaom nga makita ang iyang bana nga mabanhaw!—Juan 5:28, 29.

Usa ka tigulang nga Kristohanong babaye ang nakigsulti kang Renata diha sa tren nga nagbiyahe gikan sa Paris paingon sa Limoges, sa kinapusoran sa Pransiya. Sa iyang yutang natawhan sa Polandia, si Renata nagtuon ug teolohiya, Hebreohanon, ug Grego sulod sa lima ka tuig, apan nawad-an siyag pagtuo sa Diyos. Tulo ka bulan sa miagi, miampo siya sa Diyos. Bisan tuod dili gayod interesado sa giingon sa tigulang nga sister ug wala maghunahuna nga magkaestorya pa sila pag-usab, gihatag ni Renata kaniya ang iyang numero sa telepono. Apan, ang sister milahutay ug gitino niya nga sa dili madugay human niana maduaw si Renata. Sa dihang giduaw siya sa usa ka magtiayong Saksi, si Renata naghunahuna, ‘Unsa god intawoy ilang itudlo nako?’ Bisan pa sa iyang pagtuon ug teolohiya, si Renata mapainubsanong nadani sa kamatuoran sa Bibliya. “Nasabtan ko dayon nga mao kini ang kamatuoran,” miingon siya. Karon malipay siyang ipaambit ang mensahe sa Bibliya ngadto sa uban.

Si Michèle nagtuon pagdrayb. Ang ubang mga estudyante sa iyang klase sa teoriya sa pagdrayb misugod pagsulti bahin sa pagpakigsekso una pa ang kaminyoon. Mitutol si Michèle. Usa ka semana sa ulahi, ang instruktor sa pagdrayb, si Sylvie, nangutana kaniya: “Usa ka ba sa mga Saksi ni Jehova?” Nakadayeg si Sylvie sa binase-sa-Bibliya nga panglantaw ni Michèle. Nasugdan ang usa ka pagtuon sa Bibliya, ug usa ka tuig sa ulahi nabawtismohan si Sylvie.

Ang daghang parke ug mga hardin sa Paris maoy maanindot nga dapit nga makig-estorya sa mga tawo. Gipahimuslan ang panahon sa pagpahulay,  si Josette miadto sa parke, diin usa ka tigulang nga babaye, si Aline, ang nagsuroysuroy. Gisaysay ni Josette ang kahibulongang mga saad nga makita diha sa Bibliya. Gihikay ang usa ka pagtuon sa Bibliya, ug si Aline sa wala madugay miuswag hangtod sa punto nga nabawtismohan siya. Karon, sa edad nga 74, si Aline maoy mabungahong regular payunir nga ministro, nga malipay sa pagpaambit sa Kristohanong kamatuoran sa uban.

Kahayag Alang sa Tanang Nasod

Ang mga Saksi sa Paris dili na kinahanglang mobiyahe ngadto sa lagyong mga nasod aron matagamtam ang tugob nga pagkadaiya sa kultura. Duolan sa 20 porsiyento sa populasyon maoy langyaw. Adunay Kristohanong mga kongregasyon ug mga grupo diha sa mga 25 ka lainlaing mga pinulongan.

Ang kahanas ug pagkamamugnaon kasagarang makapatunghag maayong mga resulta niining linaing asaynment sa pag-ebanghelyo. Usa ka Saksi nga Pilipina ang nagmugna ug iyang kaugalingong linain nga teritoryo. Samtang namalit, nakasugod siya ug daghang panagtuon sa Bibliya pinaagi sa pagpakigkabildo sa ubang mga Pilipino diha sa mga tindahan.

Takos sa paningkamot ang paghimo sa unang lakang sa pagsangyaw. Niadtong Disyembre 1996, sa pagkahibalo nga ang nabantog-sa-kalibotan nga sirkos moadto sa maong siyudad, ang mga Saksi sa usa ka langyawg-pinulongan nga kongregasyon mihukom sa pagsulay sa pagkontak sa mga tigpasundayag sa sirkos. Usa ka gabii human sa pasundayag, nakapakigsulti sila sa mga artista nga namauli sa ilang hotel. Kining paghimo sa unang lakang miresulta sa pagkapahimutang ug 28 ka Bibliya, 59 ka Kristohanong mga libro, 131 ka brosyur, ug 290 ka magasin. Pagkahuman sa tulo-ka-semana nga pag-estar, usa sa mga sirkiro nangutana: “Unsaon nako pagkahimong usa sa mga Saksi ni Jehova?” Ang lain miingon: “Mosangyaw ko sa akong nasod!”

Tinagong mga Bahandi nga Pangitaonon Pa

Bisan asa sila motan-aw, ang mga bisita sa Paris makakita ug maanindot nga arkitektural nga mga bahandi nga natukod sa kanhiayng mga panahon. Apan, ang mas hinungdanong mga butang pangitaonon pa. Si Aniza miadto sa Pransiya kauban sa iyang uyoan nga usa ka diplomata. Tigbasa siya ug Bibliya sa balay. Usa ka adlaw samtang nagdalidali siya paggawas sa balay, usa ka payunir ang mihatag kaniya sa tract nga Kon Nganong Ikaw Makasalig sa Bibliya. Nagsabot silang magkita pagkasunod semana, ug nasugdan ang usa ka pagtuon sa Bibliya. Gilutos pag-ayo si Aniza sa iyang pamilya. Miuswag siya sa iyang pagtuon hangtod sa punto nga nabawtismohan siya. Unsay iyang panglantaw sa iyang pribilehiyo nga ipaambit ang kamatuoran sa uban? “Sa sinugdan malisod ang buluhatong pagsangyaw tungod kay maulawon ako. Bisan pa niana, sa dihang gibasa nako ang Bibliya, nakapalihok kini kanako. Wala koy kalinaw sa hunahuna kon dili ko mosangyaw.” Kanang maong tinamdan naghubit sa daghang Saksi sa Paris, kinsa “kanunayng puliki diha sa buluhaton sa Ginoo.”—1 Corinto 15:58.

Ang kamatuoran sa Bibliya naglamdag usab sa mga proyekto sa pamalay diha sa mga sikbit nga balangay sa Paris, nga nagpadayag sa ubang “mga mutya.” Naghunahunang manghulam ug pipila ka rekording, si Bruce miduaw sa iyang higala, nga bag-o pang nahimong usa sa mga Saksi ni Jehova. Kay naabtan ang iyang higala nga nakighisgot sa Bibliya uban sa pipila ka kaila ni Bruce, naminaw si Bruce sa kabildohay. Midawat siya sa tanyag nga pagtuon sa Bibliya apan may pipila ka problema. “Ilado kaayo ako sa maong dapit. Ang akong kinamagulangang igsoon nga lalaki kanunayng makig-away, ug ako nag-organisar ug saba nga mga sayaw. Unsaon pagdawat sa uban ang kamatuoran nga mahimo na akong Saksi?” Bisan pag gisigean siyag hangyo nga paorganisahon ug mga sayaw, gihunong ni Bruce ang maong kalihokan. Usa ka bulan sa ulahi misugod siya sa pagsangyaw: “Ang tanan sa maong dapit gustong masayod kon nganong nahimo akong Saksi.” Sa wala madugay human niadto nabawtismohan siya. Ngadtongadto, nakapribilehiyo siya sa pagtambong sa Tunghaan sa Ministeryal nga Pagbansay.

Ang pagpangitag mga bahandi mahimong hago kaayo. Apan, pagkadakong kalipay sa dihang mopatungha kinig maayong mga resulta. Si Jacky, Bruno, ug Damien maoy mga panadero sa Paris. “Imposibleng makontak kami tungod kay kanunay kaming nagtrabaho ug wala sa balay,” miingon si Jacky. Nakita ni Patrick, usa ka regular payunir, nga dihay pipila ka gagmayng mga lawak sa tumoy sa usa ka tinukod, ug mihinapos siya nga labing menos dunay usa ka lawak nga giokupar. Ang iyang padayong mga paningkamot sa pagpakigkita sa mga namuyo niana nakaanig maayong mga resulta  sa dihang usa ka hapon niana sa kataposan nahimamat niya si Jacky, kinsa temporaryong nag-estar didto. Ang resulta? Ang tulo ka managhigala nahimong mga Saksi ug nakapangita ug laing trabaho nga nagtugot kanila nga mas bug-os nga makapakigbahin sa teokratikanhong kalihokan.

Pagpalurang sa Bagyo

Di pa dugay, ang pipila sa palaumagian sa balita sa Pransiya naghulagway sa mga Saksi ni Jehova ingong peligroso nga relihiyosong kulto. Sa 1996, ang mga Saksi tibuok-kasingkasing nga nakigbahin sa pagpanagtag sa kapin sa siyam ka milyong kopya sa usa ka linaing impormatibong tract nga nag-ulohang Jehovah’s Witnesses—What You Need to Know. Maayo ang mga resulta.

Usa ka linaing kalihokan ang gihimo aron maabot ang tanan. Daghang opisyal ang mipahayag sa ilang apresasyon alang sa mga Saksi. Usa ka mananambag sa munisipyo misulat: “Maayo ang gibuhat sa mga Saksi ni Jehova sa pagpanagtag niini nga tract. Gitul-id niini ang mga kabakakan.” Usa ka doktor ang mikomento: “Dugay na kong nagpaabot niini!” Usa ka lalaki nga nagpuyo sa Paris misulat: “Wala damhang nabasa nako ang Jehovah’s Witnesses—What You Need to Know. Gusto pa nakong mahibalo ug dugang ug pahimuslan ang tanyag nga libreng pagtuon sa Bibliya diha sa balay.” Ang lain misulat: “Salamat sa inyong pagkamatinud-anon.” Giingnan sa usa ka Katolikong babaye ang mga Saksi: “Ah! Sa kataposan gitubag ra gyod ninyo kining mga bakaka!”

Usa ka linaing kalipay alang sa daghang batan-ong mga Saksi sa Paris ang kampanya sa pagwali nga giorganisar alang sa Catholic World Youth Days sa 1997. Bisan tuod ang temperatura maoy kapin sa 35 grado Celsius, mga 2,500 ka Saksi ang nakigbahin. Sulod lamang sa pipila ka adlaw, nakapahimutang sila ug 18,000 ka kopya sa brosyur nga Usa ka Basahon Alang sa Tanang Tawo uban sa mga batan-on gikan sa tanang dapit sa yuta. Dugang pa sa paghatag ug maayong pagpamatuod sa ngalan ni Jehova ug pagpugas sa mga binhi sa kamatuoran, ang kampanya nakapadasig sa batan-ong mga Saksi. Usa ka batan-ong sister nga nagpamubo sa iyang bakasyon aron bug-os nga makapakig-ambit niining linaing kalihokan, misulat: “Si Jehova adunay malipayong katawhan sa yuta kinsa naggamit sa ilang kusog sa pagdayeg sa iyang ngalan. Kining duha ka adlaw, nga tugob ug magantihon, takos ipuli sa tanang bakasyon sa tibuok kinabuhi! (Salmo 84:10)”

Ang Pebrero 28, 1998 mao ang ika-65 nga anibersaryo sa usa ka sugo nga gipagula ni Hitler nga miresulta sa pagdili sa mga Saksi ni Jehova sa Alemanya. Ang mga Saksi sa Pransiya migamit sa maong petsa alang sa publikong mga pasundayag diha sa giabangan nga mga lawak sa video nga Jehovah’s Witnesses Stand Firm Against Nazi Assault, nga nagdetalye sa paglutos nga giantos sa katawhan ni Jehova. Kapin sa pito ka milyong imbitasyon ang gipang-apod-apod. Ang mga historyano ug kanhing mga binilanggo sa kampo mihatag ug makapatandog nga mga pamatuod. Sa Paris, duolan sa 5,000 ang nanambong, lakip ang daghang dili mga Saksi.

Daghan sa Paris ang nagpabili pag-ayo sa espirituwal nga kahayag, ug sila nalipay nga ang mga magmamantala sa Gingharian nagasidlak pag-ayo ingong mga magbabanwag. Sama kini sa giingon ni Jesus: “Dako ang alanihon, apan diyutay ra ang mga mamumuo.” (Mateo 9:37) Ang determinasyon sa mga Saksi ni Jehova sa pagbuntog sa mga hagit sa pagsangyaw diha sa siyudad naghimo sa Paris nga usa ka Siyudad sa Kahayag sa linaing diwa, alang sa kahimayaan ni Jehova.

[Hulagway sa panid 9]

Kapitolyo

[Hulagway sa panid 9]

Opera Garnier

[Hulagway sa panid 9]

Louvre Museum

[Mga hulagway sa panid 10]

Pagpaambit sa mensahe sa Bibliya uban sa puliking mga tawo bisan asa sila makaplagan