Usa ka Basahon nga Walay Interes ang mga Batan-on

“SA UNSANG paagi ako makaseguro nga ang Bibliya mao gayod ang Pulong sa Diyos? Ingong basahon, wala kini makapukaw sa akong interes,” komento sa usa ka batan-ong babaye nga ginganlag Beate.

Sa Alemanya, diin nagpuyo sa Beate, ang kadaghanan sa mga batan-on sama niyag pagbati; busa, sila wala maghunahuna nga hinungdanon ang pagbasa sa Bibliya. Gipadayag sa usa ka surbi didto di pa dugay nga mga 1 ka porsiyento sa mga batan-on ang sagad kaayong nagbasa sa Bibliya, 2 porsiyento ang sagad nagbasa, 19 porsiyento ang talagsa ra, ug duolan sa 80 porsiyento ang wala gayod magbasa. Ang estadistika malagmit kaamgid sa ubang kayutaan, tingali diha usab sa imong gipuy-an. Tin-aw, ang Bibliya maoy usa ka basahon nga walay interes ang mga batan-on.

Busa, dili ikatingala nga sa katibuk-an ang mga batan-on gamay ra kaayog nahibaloan bahin sa Bibliya! Sa sayong bahin sa tuig 2000, ang mantalaang Lausitzer Rundschau nagtaho bahin sa surbi nga nagpadayag kon unsa ka daghang tawo ang sinati sa Napulo ka Sugo ug naggamit niini ingong giya sa kinabuhi. Sa mga tawo nga kapin sa 60 anyos ang pangedaron, 67 porsiyento ang nahibalo sa mga sugo ug gigiyahan niini; sa mga tawo nga ubos sa 30 anyos ang pangedaron, ang ihap maoy 28 porsiyento lamang. Sa pagkatinuod, daghang batan-on ang dili sinati sa Pulong sa Diyos.

Ang Uban Dunay Lahing Panglantaw

Sa laing bahin, sa tibuok kalibotan, milyonmilyong batan-on ang nakakaplag nga mapuslanon kaayo ang Pulong sa Diyos. Pananglitan, si Alexander maoy 19 anyos ug nagbasa sa Bibliya kada buntag sa dili pa moadto sa trabaho. “Alang kanako, kini ang kinamaayohang paagi nga sugdan ang akong adlaw,” siya miingon. Gibatasan ni Sandra ang pagbasag usa ka bahin sa Bibliya kada gabii. “Nahimo na kining bahin sa akong adlaw-adlaw nga rutina,” siya nagpatin-aw. Ug si Julia, nga 13 anyos, nakaugmad na ug batasan sa pagbasa ug labing menos usa ka kapitulo sa Bibliya sa dili pa matulog magabii. “Nalipay gayod ako niini, ug gusto nakong ipadayon kini nga batasan hangtod sa umaabot.”

Unsang panglantaw ang husto ug maalamon? Ang Bibliya takos ba gayod nga basahon? Kini ba mapuslanon ug hinungdanon alang sa mga batan-on? Unsay imong hunahuna?