Ang Yawa—Dili Lamang Usa ka Patuotuo

“Sa tibuok Bag-ong Tugon dunay dakong panagsumpaki tali sa mga puwersa sa Diyos ug sa maayo, sa usa ka bahin, ug niadtong iyaha sa daotan nga gipangunahan ni Satanas, sa laing bahin. Dili kini ideya sa usa o duha ka magsusulat, kondili usa ka butang nga gikauyonan. . . . Busa tin-aw ang pamatuod sa Bag-ong Tugon. Si Satanas daotan ug tinuod nga naglungtad, kanunayng batok sa Diyos ug sa katawhan sa Diyos.”—“The New Bible Dictionary.”

NAN, nganong daghang nangangkon nga mga Kristohanon—ug nag-ingong nagtuo sa Bibliya—ang nagsalikway sa ideya nga tinuod nga naglungtad ang Yawa? Tungod kay, sa pagkatinuod, sila dili modawat sa Bibliya ingong Pulong sa Diyos. (Jeremias 8:9) Ang mga magsusulat sa Bibliya, matod nila, nagpabanaag sa mga pilosopiya sa mga nasod sa ilang palibot ug dili-tukma nga nagpahayag sa kamatuoran gikan sa Diyos. Ang Katolikong teologo nga si Hans Küng, pananglitan, misulat: “Ang tinumotumong mga ideya bahin kang Satanas uban sa daghan kaayong demonyo . . . naggikan sa Babilonyanhong tumotumo  nga miyuhot ngadto sa sayong Hudaismo ug gikan didto miyuhot sa Bag-ong Tugon.”—On Being a Christian.

Apan ang Bibliya dili lamang pulong sa mga tawo; kini gayod maoy inspiradong Pulong sa Diyos. Busa, maalamon kon atong hatagag seryosong pagtagad ang ginaingon niini bahin sa Yawa.—2 Timoteo 3:14-17; 2 Pedro 1:20, 21.

Unsay Gituohan ni Jesus?

Si Jesu-Kristo nagtuo nga ang Yawa tinuod. Si Jesus wala tentala sa usa ka daotang kinaiya nga anaa sa sulod niya. Siya giatake sa usa ka tinuod nga persona nga sa ulahi iyang gitawag “ang magmamando niining kalibotana.” (Juan 14:30; Mateo 4:1-11) Nagtuo usab siya nga dunay ubang espirituhanong mga linalang nga nagpaluyo kang Satanas sa iyang daotang mga laraw. Iyang giayo ang “gigamhan-sa-demonyo” nga mga tawo. (Mateo 12:22-28) Bisan ang publikasyong A Rationalist Encyclopædia nga nagpasiugda nga walay Diyos, naghisgot sa kahinungdanon niini sa dihang kini nag-ingon: “Ang pagtuo niining Jesus sa mga Ebanghelyo nga naglungtad ang mga demonyo dugay nang nakapalibog sa mga teologo.” Sa dihang si Jesus naghisgot bahin sa Yawa ug sa iyang mga demonyo, siya dili yanong nagsubli sa mga patuotuo nga gipasa gikan sa Babilonyanhong tumotumo. Siya nasayod nga sila naglungtad gayod.

Daghan kitag makat-onan bahin sa Yawa kon atong tagdon ang mga pulong ni Jesus ngadto sa relihiyosong mga lider sa iyang adlaw: “Kamo gikan sa inyong amahan nga Yawa, ug buot ninyong buhaton ang mga tinguha sa inyong amahan. Kana siya usa ka mamumuno sa iyang pagsugod, ug siya wala mobarog nga lig-on diha sa kamatuoran, tungod kay ang kamatuoran wala kaniya. Inigsulti niya sa bakak, siya nagsulti sumala sa iyang kinaiya, tungod kay siya usa ka bakakon ug ang amahan sa bakak.”—Juan 8:44.

Sumala niini, ang Yawa, nga usa ka ngalang nagkahulogang “tigpasipala,” maoy “usa ka bakakon ug ang amahan sa bakak.” Siya mao ang unang linalang nga namakak bahin sa Diyos, ug gihimo niya kana didto sa tanaman sa Eden. Si Jehova nag-ingon nga ang atong unang mga ginikanan ‘mamatay gayod’ kon mokaon sila gikan sa kahoy sa kahibalo sa maayo ug sa daotan. Pinaagi sa baba sa usa ka halas, si Satanas nag-ingon nga dili tinuod kadtong mga pulonga. (Genesis 2:17; 3:4) Sa haom, siya gitawag “ang orihinal nga halas, ang usa nga gitawag Yawa ug Satanas.”—Pinadayag 12:9.

Ang Yawa namakak bahin sa kahoy sa kahibalo sa maayo ug sa daotan. Siya nangatarongan nga ang pagdili sa pagkaon gikan nianang kahoya dili makataronganon; kadto maoy pag-abuso sa gahom. Si Adan ug Eva, matod pa niya, “mahisama sa Diyos” sa paghukom alang sa ilang kaugalingon kon unsay maayo ug kon unsay daotan. Gipasabot ni Satanas nga ingong mga linalang nga may kagawasan sa pagpili, sila angay nga dunay bug-os nga kagawasan sa paghukom alang sa ilang kaugalingon. (Genesis 3:1-5) Kining maong pag-atake sa pagkahusto sa paagi sa Diyos sa pagmando nakapatungha ug hinungdanong mga isyu. Busa  si Jehova naghatag ug panahon aron mahusay kining maong mga isyu. Kini nagpasabot nga si Satanas gitugotan nga magpabiling buhi sa kasamtangan. Ang iyang limitadong panahon karon hapit nang mahurot. (Pinadayag 12:12) Bisan pa niana, siya nagpadayon sa pagpahilayo sa katawhan gikan sa Diyos pinaagig mga kabakakan ug pagpanglimbong, nga naggamit ug mga tawo sama sa mga eskriba ug mga Pariseo sa adlaw ni Jesus aron sa pagpakaylap sa iyang mga pagtulon-an.—Mateo 23:13, 15.

Si Jesus nag-ingon usab nga ang Yawa “usa ka mamumuno sa iyang pagsugod” ug nga “siya wala mobarog nga lig-on diha sa kamatuoran.” Kini wala magpasabot nga gilalang ni Jehova ang Yawa ingong “usa ka mamumuno.” Wala siya lalanga aron mahimong usa ka amamaliw nga maoy magbantay sa usa ka dapit sa kalayo ug pag-antos alang ni bisan kinsa nga mosupak sa Diyos. Ang “impiyerno” sumala sa gipahayag sa Bibliya dili pinuy-anan ni Satanas. Kini maoy komong lubnganan lamang sa mga tawo.—Buhat 2:25-27; Pinadayag 20:13, 14.

Sa sinugdanan ang Yawa “diha sa kamatuoran.” Siya bahin kanhi sa langitnong pamilya ni Jehova ingong hingpit nga espirituhanong anak sa Diyos. Apan siya wala “mobarog nga lig-on diha sa kamatuoran.” Gipalabi niya ang iyang kaugalingong mga paagi ug ang iyang kaugalingong mga prinsipyo nga gipasukad sa kabakakan. ‘Siya nagsugod’ ingong Yawa ug mamumuno, dili sa panahong siya gilalang ingong manulondang anak sa Diyos, kondili sa dihang siya tinuyo nga mirebelde batok kang Jehova ug namakak kang Adan ug Eva. Ang Yawa sama niadtong mga tawo nga mirebelde batok kang Jehova sa panahon ni Moises. Kini ang atong mabasa bahin kanila: “Sila migawi sa ikadaot sa ilang bahin; sila dili iyang mga anak, ang sayop ilaha.” (Deuteronomio 32:5) Mao usab kini ang ikasulti bahin kang Satanas. Siya nahimong “usa ka mamumuno” sa dihang siya mirebelde ug nahimong responsable sa kamatayon ni Adan ug Eva ug, sa pagkatinuod, sa bug-os nga tawhanong pamilya.—Roma 5:12.

Masinupakong mga Manulonda

Miduyog ang ubang mga manulonda kang Satanas sa iyang pagrebelde. (Lucas 11:14, 15) Kini nga mga manulonda “mitalikod sa ilang nahiangay nga puloy-anang dapit” ug nagmateryalisar ingong mga tawo aron makatagamtam ug seksuwal nga mga relasyon uban “sa mga anak nga babaye sa mga tawo” sa adlaw ni Noe. (Judas 6; Genesis 6:1-4; 1 Pedro 3:19, 20) Ang “ikatulo ka bahin sa mga bituon,” o gamayng grupo sa espirituhanong mga linalang, misubay niini nga dalan.—Pinadayag 12:4.

Ang simboliko kaayong basahon sa Pinadayag naglarawan sa Yawa ingong “usa ka dakong dragon nga ang bulok samag kalayo.” (Pinadayag 12:3) Ngano man? Dili tungod kay siya sa literal dunay makahahadlok, ngil-ad nga lawas. Sa pagkatinuod, wala kita masayod kon unsang matanga ang lawas nga nabatonan sa espirituhanong mga linalang, apan malagmit nga si Satanas dili lahi niining bahina sa ubang mga manulonda nga espirituhanong mga linalang. Apan, ang “usa ka dakong dragon nga ang bulok samag kalayo” maoy haom nga kahubitan sa matukobon, makahahadlok, gamhanan, ug malaglagon nga taras ni Satanas.

Si Satanas ug ang iyang mga demonyo karon gikutohan pag-ayo. Dili na sila makamateryalisar sama sa ilang dayag nga mahimo kanhi. Wala madugay human matukod ang Gingharian sa Diyos diha sa mga kamot ni Kristo niadtong 1914, sila gitambog dinhi sa yuta.—Pinadayag 12:7-9.

Ang Yawa Maoy Usa ka Makahahadlok nga Kaaway

Bisan pa niana, ang Yawa maoy usa gihapon ka makahahadlok nga kaaway. Siya “nagasuroysuroy sama sa usa ka leyon nga nagangulob, nga nagapangitag matukob.” (1 Pedro 5:8) Siya dili usa ka dili-klaro nga daotang kinaiya diha sa atong dili-hingpit nga mga lawas. Tinuod, kita nakigbisog gayod adlaw-adlaw batok sa ato mismong makasasala nga mga hilig. (Roma 7:18-20) Apan ang tinuod nga pakigbisog maoy “batok sa mga magmamando sa kalibotan niini nga kangitngit, batok sa daotang mga puwersa nga espirituhanon sa langitnong mga dapit.”—Efeso 6:12.

 Unsa ka kaylap ang impluwensiya sa Yawa? “Ang tibuok kalibotan nailalom sa gahom sa usa nga daotan,” matod ni apostol Juan. (1 Juan 5:19) Siyempre, dili nato gusto nga magsige na lag hunahuna bahin sa Yawa o dili na makalihok sa hustong paagi tungod sa matuotuohong kahadlok kaniya. Apan, maalamon kon kita magpabiling alisto sa iyang mga paningkamot sa pagbuta kanato aron dili makakita sa kamatuoran ug sa pagbungkag sa atong integridad sa Diyos.—Job 2:3-5; 2 Corinto 4:3, 4.

Ang Yawa dili kanunayng mogamit ug mabangis nga mga paagi sa pag-atake niadtong buot nga mobuhat sa kabubut-on sa Diyos. Usahay, iyang himoon ang iyang kaugalingon nga daw “usa ka manulonda sa kahayag.” Gipasidan-an ni apostol Pablo ang mga Kristohanon niini nga kapeligrohan sa dihang siya misulat: “Ako nahadlok nga sa unsa mang paagi, ingon nga ang halas nagdaldal kang Eva pinaagi sa lipatlipat niini, basin ug ang inyong kaisipan pagapahisalaagon gikan sa katim-os ug kaputli nga angay kang Kristo.”—2 Corinto 11:3, 14.

Busa kita kinahanglang ‘maghupot ug maayong panghunahuna, magmabinantayon, ug mobarog batok kaniya, nga malig-on sa pagtuo.’ (1 Pedro 5:8, 9; 2 Corinto 2:11) Ayaw tugoti nga mahimo kitang daling malimbongan ni Satanas pinaagi sa pag-apil-apil sa bisan unsa nga may kalabotan sa okulto. (Deuteronomio 18:10-12) Mahimong kugihang estudyante sa Pulong sa Diyos, nga hinumdomang si Jesu-Kristo sublisubli nga naghisgot sa Pulong sa Diyos sa dihang siya gitental sa Yawa. (Mateo 4:4, 7, 10) Pag-ampo alang sa espiritu sa Diyos. Ang bunga niini makatabang kanimo nga malikayan ang mga buhat sa unod, nga epektibo kaayong gipukaw ni Satanas. (Galacia 5:16-24) Dugang pa, hugot nga mag-ampo kang Jehova sa dihang imong bation sa usa ka paagi ang pagpit-os gikan sa Yawa ug sa iyang mga demonyo.—Filipos 4:6, 7.

Dili kinahanglang malisang sa Yawa. Si Jehova nagsaad ug tinuod nga proteksiyon batok sa bisan unsa nga himoon ni Satanas. (Salmo 91:1-4; Proverbio 18:10; Santiago 4:7, 8) “Magpadayon sa pagbaton ug gahom diha sa Ginoo ug diha sa pagkagamhanan sa iyang kusog,” nag-ingon si apostol Pablo. Nianang paagiha ikaw “makabarog nga malig-on batok sa mga malipatlipatong kaugdahan sa Yawa.”—Efeso 6:10, 11.

[Hulagway sa panid 5]

Si Jesus nasayod nga ang Yawa tinuod nga persona

[Hulagway sa panid 6]

“Ang tibuok kalibotan nailalom sa gahom sa usa nga daotan”

[Credit Line]

NASA photo

[Mga hulagway sa panid 7]

Barog nga malig-on batok sa Yawa pinaagi sa pagtuon sa Pulong sa Diyos ug sa regular nga pag-ampo