Kon sa Unsang Paagi Makahimo Ka ug Maayong mga Desisyon

ANG kagawasan sa pagpili maoy usa ka gasa gikan sa Diyos. Kon kini wala, kita walay kalainan sa mga robot, nga dili makabuot sa atong mga lihok. Apan, kay nakabaton niini, kita makaatubang ug mga suliran. Kay duna man kitay kagawasan sa pagpili, kita kinahanglang mohimog mga desisyon samtang kita nagakinabuhi pa.

Siyempre, daghang desisyon dili kaayo hinungdanon. Ang uban, sama sa kon unsang karera ang atong pilion o kon magminyo ba, makaapektar sa atong bug-os nga umaabot. Ang ubang mga desisyon makaapektar sa ubang mga tawo. Ang pipila ka desisyon nga himoon sa mga ginikanan dako ug epekto sa ilang mga anak. Dugang pa, kita dunay tulubagon sa Diyos sa daghang desisyon nga atong himoon.—Roma 14:12.

Nagkinahanglan ug Tabang

Ang mga tawo walay maayong rekord kon bahin sa paghimog desisyon. Ang usa sa unang mga desisyon nga nahimo sa tawo nga narekord dili maayog resulta. Si Eva midesidir sa pagkaon sa bunga nga klarong gidili sa Diyos. Ang iyang pagpili, nga gipasukad sa hakog nga tinguha, nakatukmod sa iyang bana sa pagduyog kaniya sa pagsupak sa Diyos, ug ang resulta mao ang grabeng pag-antos sa katawhan. Sa daghang kaso, ipasukad gihapon sa mga tawo ang ilang mga desisyon sa hakog nga mga tinguha inay sa hustong mga prinsipyo. (Genesis 3:6-19; Jeremias 17:9) Ug sa dihang makaatubang ug mabug-at nga mga desisyon, kita nahibalo gayod sa atong mga limitasyon.

Nan, dili ikahibulong nga sa dihang maghimo ug dagkong mga desisyon, daghan ang mangayog tabang gikan sa mga tinubdan nga mas hataas kay sa mga tawo. Ang Bibliya nagrekord ug usa ka okasyon sa dihang si Nabucodonosor, samtang nakiggubat, kinahanglang mohimog desisyon. Bisag usa siya ka hari, nakita niya nga kinahanglang modangop siya “sa pagpanag-an,” mangonsulta sa mga espiritu. Busa, ang rekord nag-ingon: “Giuyog niya ang mga udyong. Nangutana siya pinaagi sa terapim; misusi siya sa atay.” (Ezequiel 21:21) Maingon man karon, daghan ang mangutana sa mga manghihimalad ug mga astrologo ug mangayog tabang sa mga espiritu sa ubang mga paagi. Apan kini sila malinglahon ug makapahisalaag.—Levitico 19:31.

Adunay Usa nga kasaligan gayod ug kinsa sa tibuok kasaysayan nakatabang sa mga tawo sa paghimog maalamong mga desisyon. Kanang maong usa walay lain kondili si Jehova nga Diyos. Pananglitan, sa karaang panahon, gihatagan sa Diyos ang iyang nasod, ang Israel, ug Urim ug Tumim—lagmit, sagradong mga ripa nga ripahon sa panahon nga makaatubang ang nasod ug mga kahimtang nga seryoso kaayo. Pinaagi sa Urim ug Tumim, si Jehova mihatag ug direktang tubag sa mga pangutana ug mitabang sa mga tigulang sa Israel aron matino nga ang ilang mga desisyon nahiuyon sa iyang kabubut-on.—Exodo 28:30; Levitico 8:8; Numeros 27:21.

Palandonga ang laing pananglitan. Sa dihang gipatawag si Gideon aron maoy mangulo sa kasundalohan sa Israel batok sa Midian, siya kinahanglang mohimog desisyon kon dawaton ba ang maong halangdong pribilehiyo. Si Gideon, kay buot nga pasaligan nga siya tabangan ni Jehova, nangayo ug usa ka milagrosong ilhanan. Siya nag-ampo nga ang balhibo sa karnero nga gipasagdan sa gawas sa tibuok gabii mabasa sa yamog apan ang yuta sa palibot niini magpabiling uga. Sa  pagkasunod gabii, siya mihangyo nga ang balhibo sa karnero magpabiling uga samtang ang yuta sa palibot niini mabasa sa yamog. Malulotong gihatag ni Jehova kang Gideon ang mga ilhanan nga iyang gihangyo. Tungod niini, si Gideon mihimog hustong desisyon ug, pinaagi sa tabang sa Diyos, bug-os nga gipildi ang mga kaaway sa Israel.—Maghuhukom 6:33-40; 7:21, 22.

Komosta Karon?

Karon, si Jehova nagtanyag gihapon ug tabang sa iyang mga alagad kon mohimo sila ug hinungdanong mga desisyon. Sa unsang paagi? Kita ba, sama kang Gideon, mohangyo ug ‘pagsulay pinaagi sa balhibo sa karnero,’ mga ilhanan gikan kang Jehova aron ipakita kanato kon unsa ang hustong desisyon? Usa ka magtiayon nagduhaduha kon mobalhin ba sila aron moalagad sa dapit nga mas dako ang panginahanglan alang sa mga magwawali sa Gingharian. Aron matabangan sila sa pagdesisyon, sila naghimog usa ka pagsulay. Ilang gihanyag ang ilang balay nga ibaligya sa kantidad nga ilang gitakda. Kon ang balay mahalin sa petsa nga gitakda ug sa giingong kantidad o mas taas pa, ilang isipon kini ingong timailhan nga buot ang Diyos nga sila mobalhin. Kon ang balay dili mahalin, ilang sabton kini nga dili buot ang Diyos nga sila mobalhin.

Ang balay wala mahalin. Timailhan ba kana nga dili gusto si Jehova nga kining maong magtiayon mag-alagad sa dapit nga mas dako ang panginahanglan? Siyempre, pagpangahas ang pag-ingon sa laktod kon unsay buot o dili buot ni Jehova nga himoon sa iyang mga alagad. Kita dili makaingon nga karon si Jehova dili gayod mangilabot aron ipasundayag ang iyang kabubut-on alang kanato. (Isaias 59:1) Apan, kita walay katungod sa pagdahom sa ingon niana nga pagpangilabot sa atong dagkong mga desisyon, nga sa ingon atong gisalig ang atong paghimog desisyon ngadto sa Diyos. Gani, bisan si Gideon sa dakong bahin sa iyang kinabuhi kinahanglang mohimog mga desisyon nga walay milagrosong mga ilhanan gikan kang Jehova!

Dugang pa, ang Bibliya nag-ingon nga mabatonan ang pagtultol sa Diyos. Kini nagtagna bahin sa atong panahon: “Ang imong mga igdulungog makadungog ug pulong sa imong luyo nga mag-ingon: ‘Mao kini ang dalan. Lakaw kamo niini,’ kon kamo moadto sa tuo o kon kamo moadto sa wala.” (Isaias 30:21) Kon mag-atubang kita ug hinungdanong mga pagpili, nahiangay gayod nga maningkamot aron matino nga ang atong mga desisyon nahiuyon sa kabubut-on sa Diyos ug magpabanaag sa iyang labawng kaalam. Sa unsang paagi? Pinaagi sa pagkonsulta sa iyang Pulong ug pagtugot niini nga mahimong ‘lampara sa atong tiil, ug kahayag sa atong alagianan.’ (Salmo 119:105; Proverbio 2:1-6) Sa paghimo niini, kinahanglang atong batasanon ang pagkuhag tukmang kahibalo gikan sa Bibliya. (Colosas 1:9, 10) Ug kon mohimog desisyon, kinahanglang manukiduki gayod kita sa tanang prinsipyo sa Bibliya mahitungod sa maong butang. Ang maong pagpanukiduki magpaarang kanato sa ‘pagtino sa mas hinungdanong mga butang.’—Filipos 1:9, 10.

Kinahanglang makigsulti usab kita kang Jehova pinaagi sa pag-ampo, mosalig nga siya mamati kanato. Makapahupay gayod ang pagsulti ngadto sa atong mahigugmaong Diyos sa desisyon nga atong himoon ug sa mga kapilian nga atong gihunahuna! Nan, kita masaligong makapangayo sa pagtultol aron makahimog hustong desisyon. Kasagaran, pahinumdoman kita sa balaang espiritu sa mga prinsipyo sa Bibliya nga aplikado, o kaha tabangan kita niini aron mas masabtan pa ang kasulatan nga may kalabotan sa atong kahimtang.—Santiago 1:5, 6.

 Si Jehova nagtagana usab ug mga tawong hamtong diha sa kongregasyon nga atong kasultihan sa atong mga desisyon. (Efeso 4:11, 12) Apan, sa dihang mangonsulta sa uban, dili nato angayng sundon ang dalan sa mga tawong moduol sa nagkalainlaing tawo hangtod nga sa kataposan makakita sila ug usa ka tawo nga mosulti sa gusto nilang madunggan. Dayon ang tambag nianang tawhana maoy ilang sundon. Hinumdoman usab nato ang pasidaang pananglitan ni Rehoboam. Sa dihang kinahanglan siyang mohimog mabug-at nga desisyon, siya nakadawat ug maayo kaayong tambag gikan sa mga tigulang nga nag-alagad sa iyang amahan. Apan, imbes sundon ang ilang tambag, siya nagpakitambag sa mga batan-on nga iyang katalirongan. Misunod sa ilang tambag, nakahimo siya ug dili maalamong desisyon ug tungod niini nawala ang dakong bahin sa iyang gingharian.—1 Hari 12:1-17.

Kon mangayog tambag, pangayog tambag sa mga tawong eksperyensiyado sa kinabuhi ug dunay maayong kahibalo sa Kasulatan ug dunay lalom nga pagtahod sa hustong mga prinsipyo. (Proverbio 1:5; 11:14; 13:20) Kon mahimo, paggahin ug panahon sa pagpamalandong sa mga prinsipyong nalangkit ug sa tanang impormasyon nga imong natigom. Sa dihang masabtan mo ang mga butang sumala sa kahayag sa Pulong ni Jehova, ang hustong desisyon lagmit mahimong mas matin-aw.—Filipos 4:6, 7.

Ang mga Desisyon nga Atong Himoon

Ang ubang mga desisyon daling himoon. Sa dihang gimandoan sa paghunong sa pagsangyaw, ang mga apostoles nahibalo nga sila kinahanglang magpadayon sa pagsangyaw bahin kang Jesus, ug ilang gipahibalo dayon ang Sanhedrin sa ilang desisyon sa pagsunod sa Diyos inay sa tawo. (Buhat 5:28, 29) Ang ubang mga desisyon tingali kinahanglang hunahunaon ug maayo tungod kay walay direktang gisulti ang Bibliya bahin sa maong butang. Bisan pa, ang mga prinsipyo sa Bibliya kasagarang mohatag ug kahayag sa labing maayong desisyon nga himoon. Pananglitan, bisan pag ang kadaghanang matang sa kalingawan nga mabatonan karon wala pa maglungtad sa panahon ni Jesus, dunay tin-awng mga pulong sa Bibliya bahin nianang gikahimut-an ni Jehova ug kanang wala niya kahimut-i. Busa, ang si bisan kinsang Kristohanon nga makigbahin sa kalingawan nga nagpasiugda ug kapintasan, imoralidad, o pagkarebelyoso nakahimog dili maayong desisyon.—Salmo 97:10; Juan 3:19-21; Galacia 5:19-23; Efeso 5:3-5.

Usahay, tingali parehong husto ang duha ka desisyon. Ang pag-alagad sa dapit nga mas dako ang panginahanglan maoy maayo kaayong pribilehiyo ug mahimong moresulta ug dagkong mga panalangin. Apan kon ang tawo sa usa ka katarongan mohukom nga dili moalagad sa dapit nga mas dako ang panginahanglan, makaalagad gihapon siya ug maayo diha sa iyang kaugalingong kongregasyon. Usahay, kita tingali kinahanglang mohimog desisyon nga mohatag kanato ug higayon sa pagpasundayag sa sukod sa atong debosyon kang Jehova o kon unsa ang labing hinungdanon sa atong kinabuhi. Busa, gitugotan kita ni Jehova sa paggamit sa atong kagawasan sa pagpili aron sa pagpasundayag kon unsa gayod ang anaa sa atong mga kasingkasing.

Sa masubsob, ang uban maapektohan sa atong mga desisyon. Pananglitan, ang unang-siglong mga Kristohanon nalipay nga nakagawas sa daghang restriksiyon sa Balaod. Pananglitan, kini nagpasabot nga sila mahimong mokaon o dili mokaon sa pagkaon nga dili-mahinlo ilalom sa Balaod. Bisan pa niana, sila gidasig sa paghunahuna sa mga tanlag sa uban sa dihang mohimog desisyon sa paggamit niini nga kagawasan. Ang mga pulong ni Pablo niining bahina mahimong ikapadapat sa  daghang desisyon nga atong himoon: “Likayi nga mahimong hinungdan sa pagkapandol.” (1 Corinto 10:32) Ang tinguha nga dili mahimong hinungdan sa pagkapandol sa uban mahimong makatabang sa pagtino sa daghang desisyon nga atong himoon. Dugang pa, ang paghigugma sa silingan mao ang ikaduhang dakong sugo.—Mateo 22:36, 39.

Ang Sangpotanan sa Atong Kaugalingong mga Desisyon

Ang mga desisyon nga himoon sumala sa diktar sa tanlag ug gipasukad sa mga prinsipyo sa Bibliya kanunay nga adunay maayong resulta sa ulahi. Sa pagkamatuod, sa pagkakaron kini nagkinahanglan ug pipila ka pagsakripisyo sa kaugalingon. Sa dihang gisultihan sa mga apostoles ang Sanhedrin sa ilang desisyon nga magpadayon sa pagsangyaw bahin kang Jesus, sila gibunalan una pa sila gipagawas. (Buhat 5:40) Sa dihang ang tulo ka Hebreohanon—si Sadrak, Mesak, ug Abednego—midesisyon nga dili sila moyukbo sa bulawan nga larawan nga gipatindog ni Nabucodonosor, ilang gipameligro ang ilang kinabuhi. Sila andam sa pag-atubang sa posibilidad nga ang ilang desisyon basin mosangpot sa ilang kamatayon. Apan sila nahibalo nga ilang mabatonan ang pag-uyon ug panalangin sa Diyos.—Daniel 3:16-19.

Kon makaatubang kita ug mga kalisod human makahimog desisyon nga gitimbangtimbang pag-ayo, dili kana katarongan sa pagtuo nga sayop ang desisyon. “Ang panahon ug ang wala damhang panghitabo” makaapekto ug dako sa sangpotanan bisan sa mga desisyon nga maayo kaayog katuyoan. (Ecclesiastes 9:11) Dugang pa, usahay tugotan ni Jehova ang mga kalisod aron masulayan ang pagkatiunay sa atong panaad. Si Jacob kinahanglang makigdumog sa manulonda sa tibuok gabii una pa makadawat sa panalangin. (Genesis 32:24-26) Kita usab tingali kinahanglang makigdumog sa kalisod, bisan pag husto ang atong ginahimo. Hinunoa, kon ang atong mga desisyon nahiuyon sa kabubut-on sa Diyos, kita makasalig nga siya motabang kanato sa paglahutay ug nga kita panalanginan niya sa kataposan.—2 Corinto 4:7.

Busa, sa dihang mohimog hinungdanong desisyon, ayaw pagsalig sa imong kaugalingong kaalam. Panukiduki sa mga prinsipyo sa Bibliya nga ikapadapat. Isulti kang Jehova ang maong butang. Kon mahimo, konsultaha ang hamtong nga mga isigka-Kristohanon. Unya ayawg kahadlok. Gamita ang imong hinatag-sa-Diyos nga kagawasan sa pagpili sa responsableng paagi. Himoa ang maayong desisyon ug ipasundayag kang Jehova nga ang imong kasingkasing matarong atubangan kaniya.

[Hulagway sa panid 28]

Konsultaha ang Pulong sa Diyos sa dili pa maghimog hinungdanong mga desisyon

[Mga hulagway sa panid 28, 29]

Isulti kang Jehova ang mga desisyon nga imong himoon

[Hulagway sa panid 30]

Mahimong isulti nimo ang imong dagkong mga desisyon uban sa hamtong nga mga Kristohanon