Magmapasalamaton ug Magmalipayon

“ANG pagkamapasalamaton maoy usa ka paninugdang kasinatian sa tawo,” nag-ingon ang Calgary Herald, usa ka mantalaan sa Canada. Mikutlo ang Herald sa pipila ka nuybe-anyos nga mga estudyante sa tunghaang elementarya kinsa gipasulat sa ilang magtutudlo bahin sa tanang butang nga niana sila mapasalamaton. Usa ka batan-on nag-ingon nga siya mapasalamaton sa iyang pamilya ‘tungod kay sila nag-atiman kaniya.’ Usa ka batang babaye ang mapasalamaton usab sa iyang pamilya, nga nag-ingon: “Tungod kanila ako layo sa peligro, himsog, inatiman, hinigugma, pinakaon, ug kon wala pa ang akong mga ginikanan, wala unta ko niining kalibotana.”

Ang pagkadili-mapasalamaton motultol sa grabeng pagkawalay-katagbawan. Sumala sa pilosopo-teologo nga si J. I. Packer, “kita gilalang aron magkinabuhi nga magsalig sa Diyos ug magsalig sa usag usa.” Magpahinumdom kini kanato sa maalamong tambag sa Bibliya nga gisulat daghang siglo kanhi, nga nag-ingon: “Magmapasalamaton kamo.” (Colosas 3:15) Ang pagpahayag ug kinasingkasing nga mga pasalamat ngadto sa uban makatabang nga maugmad ang mabinationg mga relasyon.

Dugang pa, pinaagi sa pag-apresyar ug pagpabili sa usag usa, nagmapasalamaton usab kita kang Jehova, ug nakita niya kini. Ang Bibliya nag-ingon: “Ang mga mata [ni Jehova] naglibotlibot sa tibuok nga yuta aron ipakita ang iyang kusog alang niadtong kansang kasingkasing maoy bug-os alang kaniya.” (2 Cronicas 16:9) Gipasaligan kita sa Diyos nga siya mahinumdom ug magpabili sa gugma nga gipakita sa mga tawo alang sa iyang ngalan. (Hebreohanon 6:10) Oo, aduna kitay maayong katarongan nga magmapasalamaton tungod kay kining hiyasa, kon ipakita adlaw-adlaw, makapahimuot kang Jehova ug makadugang sa atong kalipay. Sama kini sa giingon sa Proverbio 15:13: “Ang usa ka malipayong kasingkasing may maayong epekto sa panagway.”