Mga Pangutana Gikan sa mga Magbabasa

Ang Colosas 1:16 nag-ingon bahin sa Anak sa Diyos nga “ang tanang ubang butang gilalang pinaagi kaniya ug alang kaniya.” Sa unsang diwa nga ang tanang butang gilalang “alang” sa Anak sa Diyos, si Jesus?

Gigamit ni Jehova ang iyang bugtong nga Anak ingong ang batid nga magbubuhat sa paglalang sa tanang ubang butang, sa ato pa, sa tanang butang gawas kang Jesus mismo. (Proverbio 8:27-30; Juan 1:3) Sa tukma, ang Anak mobatig kalipay tungod niining maong mga buluhaton, ug niining diwaa kini maoy “alang” kaniya.

Kita nasayod nga ang tawhanong mga ginikanan nagdahom nga mobatig dakong kalipay, ug sagad nga mobati niana, tungod sa ilang mga anak. Busa, ang usa ka proverbio sa Bibliya naghisgot bahin sa ‘usa ka anak nga gikahimut-an [sa iyang amahan].’ (Proverbio 3:12; 29:17) Sa samang paagi, si Jehova nga Diyos mibatig kalipay tungod sa Israel sa dihang ang iyang katawhan nagmatinumanon. (Salmo 44:3; 119:108; 147:11) Siya usab mobatig kangaya tungod sa pagkamatinumanon sa iyang mga maunongon hangtod sa atong panahon.—Proverbio 12:22; Hebreohanon 10:38.

Busa, haom alang sa Diyos nga tugotan ang iyang kaubang-magbubuhat, si Jesus, nga mobatig kalipay tungod sa iyang mga nabuhat. Sa pagkatinuod, ang Proverbio 8:31 nag-ingon nga ang Anak ‘nalipay sa mabungahong yuta sa iyang yuta, ug ang mga butang nga iyang gikahinangpan maoy uban sa mga anak sa mga tawo.’ Mao kini ang diwa sa dihang ang Colosas 1:16 nag-ingon: “Ang tanang ubang butang gilalang pinaagi kaniya ug alang kaniya.”