Aduna ba Gayoy Makapahiusa sa mga Tawo?

BISAN unsa pay imong mga tinuohan, lagmit mouyon ka nga aduna gayoy mga mahigugmaon sa kamatuoran diha sa halos tanang relihiyon. Ang mga tawo nga nagpabili pag-ayo kon unsay matuod ug andam nga mangita niana makaplagan diha sa mga Hindu, Katoliko, Hudiyo, ug uban pa. Bisan pa niana, daw nabahin ang katawhan tungod sa relihiyon. Ang uban naggamit gani sa relihiyon alang sa daotang mga katuyoan. Posible pa kaha nga mahiusa ang sinserong mga tawo gikan sa tanang relihiyon kinsa adunay gugma alang sa kon unsay matul-id ug matuod? Mahiusa ba sila aron makab-ot ang usa ka tumong?

Pagkamakapatugaw nga makita nga nagkadaghan ang nagkabahinbahin tungod sa relihiyon! Tagda ang pipila niini nga mga panagbangi. Ang mga Hindu nakig-away sa mga Budhista sa Sri Lanka. Ang mga Protestante, Katoliko, ug mga Hudiyo nag-ula ug dugo diha sa lainlaing mga panagbangi. Ang “mga Kristohanon” nakig-away sa mga Muslim sa Bosnia, Chechnya, Indonesia, ug Kosovo. Ug sa Marso 2000, ang duha ka adlaw nga kagubot nga nalangkit sa relihiyon maoy hinungdan sa kamatayon sa 300 ka taga-Nigeria. Sa pagkatinuod, gisugnoran sa relihiyosong pagdumot ang kabangis niini nga mga panagbangi.

Ang sinserong mga tawo kasagarang makurat sa kadaotan nga gihimo sa ngalan sa relihiyon. Pananglitan, daghang tigsimba ang nakugang nga ang mga klerigo nga nag-among-among sa mga bata opisyal nga gitugotang magpabilin diha sa pipila ka iglesya. Ang ubang mga magtutuo naulaw pag-ayo sa mga pagkabahinbahin sulod sa daghang gitawag ug Kristohanong mga sekta bahin sa mga isyu sama sa homoseksuwalidad ug aborsiyon. Dayag nga ang relihiyon wala makapahiusa sa katawhan. Bisan pa niana, adunay tinuod nga mga mahigugmaon sa kamatuoran diha sa daghang tinuohan, ingon sa gipakita sa mosunod nga mga eksperyensiya.

Sila Nangandoy sa Kamatuoran

Si Fidelia maoy usa ka sinsero ug debotado nga magsisimba sa Iglesya Katolika sa San Francisco sa La Paz, Bolivia. Moluhod siya atubangan sa imahen ni Maria ug mag-ugbok atubangan sa krusipiho sa kinanindotang mga kandila nga iyang mapalit. Kada semana, modonar siya ug daghang pagkaon ngadto sa pari aron iapod-apod taliwala sa mga pobre. Apan, lima sa mga masuso ni Fidelia ang nangamatay sa wala pa sila mabunyagi. Sa dihang giingnan siya sa pari nga silang tanan nag-antos sa kangitngit sa Limbo, nahibulong si Fidelia, ‘Kon mahigugmaon ug maluloton ang Diyos, nganong himoon man niya kini?’

Si Tara, nga usa ka medikal nga doktor, gimatuto ingong usa ka Hindu sa Kathmandu, Nepal. Nagsunod sa gidangtan-nag-kasiglohan nga mga kostumbre sa iyang mga katigulangan, siya nagsimba sa iyang mga diyos diha sa mga templo sa Hindu ug may mga idolo diha sa iyang balay. Apan gihasol si Tara sa mga pangutanang sama niini: Nganong daghan kaayo ang nag-antos? Nganong mangamatay ang mga tawo? Halos wala siyay makaplagang makapatagbawng mga tubag diha sa iyang relihiyon.

Si Panya, sa laing bahin, nagdako ingong usa ka Budhista diha sa usa ka balay ubay sa kanal sa Bangkok, Thailand. Gitudloan siya nga ang pag-antos  mosangpot tungod sa mga buhat nga nahimo sa kanhing mga kinabuhi ug nga ang kagawasan gikan niana makab-ot pinaagi sa pagwagtang gikan sa kaugalingon sa tanang tinguha. Sama sa ubang sinserong mga Budhista, gitudloan siya ug halalom nga pagtahod alang sa kaalam sa nagbestig-dalag nga mga monghe nga moadto sa ilang balay kada kadlawon aron magpakilimos. Gibuhat niya ang meditasyon ug nangolekta siya ug mga imahen sa Budha sa pagtuo nga makahatag kinig proteksiyon. Human malangkit sa usa ka grabeng aksidente nga nakaparalisar kaniya gikan sa hawak paubos, miduaw si Panya sa Budhistang mga monasteryo, nga sinserong naglaom nga matambalan sa milagrosong paagi. Wala siya makakaplag ug tambal o espirituwal nga kalamdagan. Hinunoa, naladlad siya sa espiritismo ug nagsugod pag-apil-apil niana.

Si Virgil natawo sa Tinipong Bansa ug miduyog sa mga Black Muslim sa kolehiyo. Masiboton siyang nag-apod-apod sa ilang literatura, nga nangangkon nga ang puti nga tawo mao ang Yawa. Sa ilang hunahuna, mao kanay hinungdan kon nganong ang mga puti nakahimog daghan kaayong kapintasan batok sa mga itom. Bisan pag sinsero sa iyang mga tinuohan, natugaw si Virgil sa mga pangutana: Daotan ba ang tanang puti? Ug nganong ang dakong bahin sa pagwali may kalabotan man sa kuwarta?

Bisan tuod nagdako si Charo sa daghag Katoliko nga Amerika del Sur, siya maoy sinserong Protestante. Nalipay siya nga dili bahin sa idolatriya nga naglibot kaniya. Si Charo malipayng mosimba kada Dominggo alang sa makapatandog sa emosyon nga serbisyo, diin siya misinggit ug “Aleluya!” ug miduyog sa relihiyosong pag-awit ug pagsayaw nga misunod niana. Si Charo sinserong nagtuo nga siya naluwas na ug gipakatawo pag-usab. Nagbayad siya ug ikapulo sa iyang kinitaan ngadto sa simbahan, ug sa dihang ang iyang paboritong ebanghelisador sa TV mangayog mga amot, padad-an niya siyag kuwarta alang sa mga bata sa Aprika. Apan, sa dihang gipangutana niya ang iyang pastor kon nganong ang Diyos sa gugma magsakit sa mga kalag diha sa impiyerno, iyang naamgohan nga wala siyay ikahatag nga makahuloganong tubag. Sa ulahi, nadiskobrehan usab niya nga ang iyang mga amot wala diay gamita sa pagtabang sa mga bata sa Aprika.

Bisan pag lainlaig kagikan, kining lima ka tawo adunay butang nga gikausahan. Sila nahigugma sa kamatuoran ug sinserong nangitag matinud-anong mga tubag sa ilang mga pangutana. Apan mahiusa ba gayod sila diha sa matuod nga pagsimba? Ang mosunod nga artikulo magtubag sa maong pangutana.

[Hulagway sa panid 4]

Posible bang mahiusa gayod ang mga tawo nga lainlaig kagikan?

[Picture Credit Line sa panid 3]

G.P.O., Jerusalem