Ang Panalangin ni Jehova Makapadato Kanato

“Ang panalangin ni Jehova—mao kana ang makapadato, ug dili niya kana dugangan ug kasakit.”—PROVERBIO 10:22.

1, 2. Nganong ang kalipay walay kalabotan sa materyal nga bahandi?

 GIGAMHAN sa materyalistikong mga pangagpas ang mga kinabuhi sa milyonmilyon karon. Apan ang materyal nga mga butang nakahatag ba kanila ug kalipay? “Wala akoy mahinumdomang panahon diin ang mga tawo mas masulub-on karon sa ilang kahimtang,” nag-ingon ang The Australian Women’s Weekly. Kini midugang: “Nagkasumpaki kini. Kita gisultihan nga maayo kaayo ug kahimtang ang ekonomiya sa Australia, nga ang kinabuhi mas maayo kay sa kaniadto. . . . Apan ang kawalay-paglaom kaylap sa tibuok nasod. Ang mga lalaki ug babaye nakamatikod nga dunay usa ka butang nga kulang sa ilang mga kinabuhi apan dili makatino kon unsa kana.” Pagkatukma sa Kasulatan sa pag-ingon nga ang kalipay ni ang kinabuhi wala magagikan sa mga butang nga atong nabatonan!—Ecclesiastes 5:10; Lucas 12:15.

² Ang Bibliya nagtudlo nga ang kinadak-ang kalipay nagagikan sa panalangin sa Diyos. Bahin niini, ang Proverbio 10:22 nag-ingon: “Ang panalangin ni Jehova—mao kana ang makapadato, ug dili niya kana dugangan ug kasakit.” Kasagarang moresulta ug kasakit ang mahakogon nga pagbaton ug materyal nga mga bahandi. Tukma kaayo nga si apostol Pablo mipasidaan: “Sila nga determinadong madato mangahulog sa tentasyon ug sa lit-ag ug sa daghang binuang ug makadaot nga mga tinguha, nga nagbanlod sa mga tawo sa kalaglagan ug sa kadaotan. Kay ang gugma sa  salapi maoy gamot sa tanang matang sa makadaot nga mga butang, ug tungod sa pagpangab-ot niini nga gugma ang pipila nahisalaag gikan sa pagtuo ug nagtusaktusak sa ilang kaugalingon sa daghang kasakitan.”—1 Timoteo 6:9, 10.

3. Nganong ang mga alagad sa Diyos makaagom ug mga pagsulay?

³ Sa laing bahin, ang walay-kasakit nga mga panalangin modangat sa tanan nga “nagpadayon sa pagpamati sa tingog ni Jehova.” (Deuteronomio 28:2) Apan, tingali ang uban mangutana, ‘Kon dili dugangan ug kasakit ang panalangin ni Jehova, nganong daghan kaayong mga alagad sa Diyos ang nag-antos?’ Ang Bibliya nagtug-an nga ang atong mga pagsulay gitugotan sa Diyos apan ang tinuod kini nagagikan kang Satanas, sa iyang daotang sistema, ug sa atong kaugalingong dili-hingpit nga kinaiyahan. (Genesis 6:5; Deuteronomio 32:4, 5; Juan 15:19; Santiago 1:14, 15) Si Jehova mao ang tuboran sa “matag maayong gasa ug matag hingpit nga regalo.” (Santiago 1:17) Busa, ang iyang mga panalangin dili gayod mopahinabo ug kasakit. Busa, atong hisgotan ang pipila sa hingpit nga mga gasa sa Diyos.

Ang Pulong sa Diyos—Usa ka Bililhon nga Gasa

4. Unsang panalangin ug bililhon kaayong gasa ang nadawat sa katawhan ni Jehova niining “panahon sa kataposan”?

⁴ Mahitungod sa “panahon sa kataposan,” ang tagna ni Daniel nag-ingon: “Ang matuod nga kahibalo modagaya.” Ugaling, kini gidugangan ug pagpatin-aw pinaagi sa mga pulong: “Wala gayoy mga daotan nga makasabot; apan ang mga may hait nga salabotan makasabot.” (Daniel 12:4, 10) Hunahunaa lang kana! Ang Pulong sa Diyos—ilabina ang tagna—gipadayag sa ingon niana nga kaalam sa Diyos nga ang daotan dili gayod makatugkad sa tinuod nga kahulogan niana, kondili ang mga katawhan ra ni Jehova. “Ako nagadayeg kanimo sa dayag, Amahan, Ginoo sa langit ug yuta,” miampo ang Anak sa Diyos, “tungod kay gitagoan mo nga maampingon kining mga butanga gikan sa mga maalamon ug sa mga makinaadmanon, ug nagbutyag niini ngadto sa mga bata.” (Lucas 10:21) Pagkadakong panalangin ang pagkabaton ug bililhong gasa nga sinulat nga Pulong sa Diyos, ang Bibliya, ug pagkahimong usa niadtong gihatagan ni Jehova ug espirituwal nga salabotan!—1 Corinto 1:21, 27, 28; 2:14, 15.

5. Unsa ang kaalam, ug sa unsang paagi mabatonan nato kana?

⁵ Wala unta kitay espirituwal nga salabotan kon dili pa sa “kaalam nga gikan sa itaas.” (Santiago 3:17) Ang kaalam mao ang katakos sa paggamit sa kahibalo ug pagsabot sa pagsulbad sa mga suliran, paglikay o pagsanta sa mga kapeligrohan, pagkab-ot sa mga tumong, o paghatag ug maayong tambag. Sa unsang paagi mabatonan nato ang kaalam sa Diyos? Ang Proverbio 2:6 nag-ingon: “Si Jehova magahatag ug kaalam; sa iyang baba nagagikan ang kahibalo ug ang katakos sa pag-ila.” Oo, panalanginan kita ni Jehova ug kaalam kon magpadayon kita sa pagpangayo niini diha sa pag-ampo, sama sa iyang paghatag kang Haring Solomon ug “maalamon ug masinaboton nga kasingkasing.” (1 Hari 3:11, 12; Santiago 1:5-8) Aron makabaton ug kaalam, kinahanglang magpadayon usab kita sa pagpamati kang Jehova pinaagi sa regular nga pagtuon ug pagpadapat sa iyang Pulong.

6. Nganong dalan sa kaalam ang pagpadapat sa mga balaod ug mga prinsipyo sa Diyos diha sa atong kinabuhi?

⁶ Ang pangunang mga pananglitan sa kaalam sa Diyos makaplagan diha sa mga balaod ug mga prinsipyo sa Bibliya. Kini makahatag kanato ug kaayohan sa tanang paagi—sa pisikal, mental, emosyonal, ug espirituwal. Ang salmista tukmang miawit: “Ang balaod ni Jehova hingpit, nga nagapahiuli sa kalag. Ang pahinumdom ni Jehova kasaligan, nga  nagahimo nga maalamon sa walay kasinatian. Ang mga sugo ni Jehova matul-id, nga makapalipay sa kasingkasing; ang kasugoan ni Jehova hinlo, nga nagapadan-ag sa mga mata. Ang kahadlok kang Jehova lunsay, nga magpadayon hangtod sa kahangtoran. Ang hudisyal nga mga hukom ni Jehova matuod; sila lunlon matarong. Sila tilinguhaon pa kay sa bulawan, oo, labi pa kay sa dinalisay nga bulawan.”—Salmo 19:7-10; 119:72.

7. Unsay moresulta tungod sa dili pagsunod sa matarong nga mga sukdanan sa Diyos?

⁷ Sa laing bahin, kadtong dili mosunod sa matarong nga mga sukdanan sa Diyos dili makakaplag ug kalipay ug kagawasan nga ilang gipangita. Sa madugay ug sa madali, ilang makita nga ang Diyos dili mabiaybiay, kay anihon sa tawo ang iyang gipugas. (Galacia 6:7) Giani sa minilyon niadtong wala magsunod sa mga prinsipyo sa Bibliya ang makasubo nga mga resulta sama sa pagsabak nga wala-kinahanglana, dulumtanang mga sakit, o makadaot nga mga pagkagiyanon. Gawas kon mahinulsolong mag-usab sa ilang dalan sa kinabuhi, ang ilang dalan sa ngadtongadto moagak kanila sa kamatayon ug tingali kalaglagan diha sa kamot sa Diyos.—Mateo 7:13, 14.

8. Nganong malipayon ang mga mahigugmaon sa Pulong sa Diyos?

⁸ Apan, kadtong nahigugma sa Pulong sa Diyos ug nagpadapat niana makabaton ug dagayang mga panalangin karon ug sa umaabot. Sila may katarongan sa pagbati nga nakabaton ug kagawasan pinaagi sa balaod sa Diyos, tinuod gayod nga malipayon, ug maikagong naghulat sa panahon sa dihang sila makabaton ug kagawasan gikan sa sala ug sa makamatayng mga epekto niini. (Roma 8:20, 21; Santiago 1:25) Kini nga paglaom segurado tungod kay kini nasandig sa labing mahigugmaong gasa sa Diyos ngadto sa katawhan—ang halad lukat sa iyang bugtong Anak, si Jesu-Kristo. (Mateo 20:28; Juan 3:16; Roma 6:23) Kining kinalabwang gasa nagpamatuod sa kadako sa gugma sa Diyos alang sa katawhan ug nagpasalig ug walay kataposang mga panalangin alang sa tanan nga magpadayon sa pagpamati kang Jehova.—Roma 8:32.

Mapasalamaton sa Gasa sa Balaang Espiritu

9, 10. Sa unsang paagi makapahimulos kita gikan sa gasa ni Jehova nga balaang espiritu? Paghatag ug usa ka pananglitan.

⁹ Ang laing mahigugmaong gasa sa Diyos nga atong angayng pasalamatan mao ang iyang balaang espiritu. Sa adlaw sa Pentekostes 33 K.P., giawhag ni apostol Pedro ang panon sa mga tawo nga didto niadtong tungora sa Jerusalem: “Paghinulsol kamo, ug magpabawtismo ang matag usa kaninyo sa ngalan ni Jesu-Kristo alang sa kapasayloan sa inyong mga sala, ug inyong madawat ang walay bayad nga gasa nga balaang espiritu.” (Buhat 2:38) Karon, si Jehova mohatag ug balaang espiritu ngadto sa iyang dedikadong mga alagad nga nangayo niana diha sa pag-ampo ug nga buot motuman sa iyang kabubut-on. (Lucas 11:9-13) Sa karaang panahon, kining labing gamhanang puwersa sa uniberso—ang balaang espiritu sa Diyos, o aktibong gahom—naghatag ug gahom sa mga lalaki ug babaye sa pagtuo, lakip sa unang mga Kristohanon. (Zacarias 4:6; Buhat 4:31) Kini samang makahatag usab kanato ug gahom, bisan tuod makaatubang kita ug lisod buntogon nga mga kababagan o mga kalisod ingong katawhan ni Jehova.—Joel 2:28, 29.

¹⁰ Tagda ang pananglitan ni Laurel, kinsa napolyo ug nabuhi pinaagi sa makina nga iron lung sulod sa 37 ka tuig. a Bisan pa sa iyang lisod kaayo nga kahimtang, siya masibotong nag-alagad sa Diyos hangtod sa iyang kamatayon. Sulod sa mga katuigan, dagayang gipanalanginan ni Jehova si Laurel. Pananglitan, siya nakatabang ug 17 ka tawo sa pagkabaton ug tukmang kahibalo sa kamatuoran sa Bibliya, bisag anaa siya sulod sa iyang makina 24 ka oras sa usa ka adlaw! Ang iyang kahimtang makapahinumdom sa mga pulong ni apostol Pablo: “Sa dihang ako maluya, ako gamhanan hinuon.” (2 Corinto 12:10) Oo, ang bisan unsang kalamposan nga atong mabatonan sa pagsangyaw sa maayong balita nagagikan, dili sa atong kaugalingong katakos ug gahom, kondili gikan sa tabang  sa Diyos pinaagi sa balaang espiritu, nga iyang ihatag ngadto niadtong magpadayon sa pagpamati sa iyang tingog.—Isaias 40:29-31.

11. Unsang mga hiyasa ang gipatungha sa espiritu sa Diyos ngadto niadtong nagsul-ob ug “bag-ong pagkatawo”?

¹¹ Kon kita matinumanong mamati sa Diyos, ang iyang espiritu mopatungha diha kanato ug mga hiyas nga gugma, kalipay, kalinaw, hataas-nga-pailob, kalulot, pagkamaayo, pagtuo, kalumo, ug pagpugong sa kaugalingon. (Galacia 5:22, 23) Kini nga “bunga sa espiritu” maoy bahin sa “bag-ong pagkatawo” nga kinahanglang isul-ob sa mga Kristohanon nga maoy ipuli sa matukobon, samag-mananap nga mga taras nga tingali ilang gipasundayag kaniadto. (Efeso 4:20-24; Isaias 11:6-9) Ang labing hinungdanon niini nga bunga mao ang gugma, nga “usa ka hingpit nga bugkos sa panaghiusa.”—Colosas 3:14.

Kristohanong Gugma—Usa ka Gasa nga Pakahamilion

12. Sa unsang paagi gipasundayag ni Tabitha ug sa ubang unang-siglong mga Kristohanon ang gugma?

¹² Ang Kristohanong gugma maoy laing bulahang gasa nga gikan kang Jehova—usa nga angay natong pakahamilion. Kini gigamhan sa prinsipyo, ug tugob usab kaayo kini sa pagbati nga mas nagpasuod kini sa mga magtutuo kay sa pagkasuod sa kadugo. (Juan 15:12, 13; 1 Pedro 1:22) Pananglitan, palandonga si Tabitha, usa ka buotang Kristohanong babaye sa unang siglo. “Siya daghag maayong mga buhat ug mga gasa sa kaluoy,” ilabina alang sa mga babayeng balo sa kongregasyon. (Buhat 9:36) Kining mga babayehana tingali dunay mga paryente, apan si Tabitha buot motabang ug modasig kanila kutob sa iyang maarangan. (1 Juan 3:18) Pagkamaayong panig-ingnan ang gipakita ni Tabitha! Ang inigsoong gugma maoy nagtukmod kang Prisca ug Aquila aron ‘ipameligro ang ilang kaugalingon’ alang kang Pablo. Ang gugma maoy nakatukmod usab kang Epafras, Lucas, Onesiforo, ug sa uban sa pagtabang sa apostol sa dihang siya nabilanggo sa Roma. (Roma 16:3, 4; 2 Timoteo 1:16; 4:11; Filemon 23, 24) Oo, ang mga Kristohanon nga ingon niana nga matang karon ‘adunay gugma sa ilang taliwala,’ usa ka bulahang gasa nga gikan sa Diyos nga nagpaila kanila ingong tinuod nga mga tinun-an ni Jesus.—Juan 13:34, 35.

13. Sa unsang paagi ikapasundayag nato nga giapresyar gayod nato ang atong Kristohanong panag-igsoonay?

¹³ Gipabilhan mo ba ang gugma nga gipasundayag sa Kristohanong kongregasyon? Mapasalamaton ka ba sa atong espirituwal nga panag-igsoonay, nga lukop sa tibuok-kalibotan? Kini usab maoy makapalipay  ug makapadato nga mga gasa nga gikan sa itaas. Sa unsang paagi atong ikapasundayag nga atong gipabilhan sila? Pinaagi sa pagtanyag ug balaang pag-alagad ngadto sa Diyos, pinaagi sa pagpakigbahin sa Kristohanong mga tigom, ug pinaagi sa pagpasundayag sa gugma ug sa ubang mga bunga sa espiritu sa Diyos.—Filipos 1:9; Hebreohanon 10:24, 25.

“Mga Gasa nga mga Lalaki”

14. Unsay gikinahanglan sa usa ka Kristohanon kon siya buot moalagad ingong usa ka ansiyano o usa ka ministeryal nga alagad?

¹⁴ Ang Kristohanong mga lalaki nga buot moalagad sa ilang isigkamagsisimba ingong mga ansiyano o ministeryal nga mga alagad adunay maayong tumong. (1 Timoteo 3:1, 8) Aron mahimong kuwalipikado niining mga pribilehiyoa, ang igsoong lalaki kinahanglang mahimong usa ka espirituwal nga lalaki, daghag nahibaloan sa Kasulatan ug masiboton sa pag-alagad sa kanataran. (Buhat 18:24; 1 Timoteo 4:15; 2 Timoteo 4:5) Siya kinahanglang magpasundayag ug pagkamapaubsanon, pagkamakasaranganon, ug pagkamapailobon, kay ang mga panalangin sa Diyos dili moabot ngadto sa mga tawong mapangahason, hambogiro, ug ambisyoso. (Proverbio 11:2; Hebreohanon 6:15; 3 Juan 9, 10) Kon minyo, siya kinahanglang mahimong usa ka mahigugmaong ulo sa pamilya nga may katakos sa pagdumala sa iyang tibuok panimalay. (1 Timoteo 3:4, 5, 12) Kay nagpabili man siya sa espirituwal nga mga bahandi, kining matanga sa lalaki makadawat ug panalangin ni Jehova.—Mateo 6:19-21.

15, 16. Kinsa ang napamatud-ang “mga gasa nga mga lalaki”? Paghatag ug mga pananglitan.

¹⁵ Kon kadtong nag-alagad ingong mga ansiyano sa kongregasyon magkugi ingong mga magwawali, mga magbalantay, ug mga magtutudlo, sila naghatag kanato ug maayong mga katarongan sa pag-apresyar sa ingon niini nga matang nga “mga gasa nga mga lalaki.” (Efeso 4:8, 11) Kadtong nakapahimulos sa ilang mahigugmaong pag-alagad tingali dili kanunayng mobungat sa ilang apresasyon, apan si Jehova nakakita sa tanan nga ginahimo sa matinumanong mga ansiyano. Dili niya kalimtan ang gugma nga ilang gipasundayag alang sa iyang ngalan pinaagi sa pag-alagad sa iyang katawhan.—1 Timoteo 5:17; Hebreohanon 6:10.

¹⁶ Palandonga ang kahimtang sa usa ka kugihang ansiyano nga miduaw sa usa ka Kristohanong dalagita nga hapit nang operahan sa utok. “Siya maluloton kaayo, matinabangon kaayo, matinagdanon kaayo,” misulat ang usa ka higala sa pamilya. “Nangayo siyag permiso nga mag-ampo ngadto kang Jehova uban namo. Samtang siya nag-ampo, ang amahan [dili usa sa mga Saksi ni Jehova] midanguyngoy, ug mitulo ang mga luha sa tanan diha sa lawak sa ospital. Pagkamabination sa pag-ampo sa ansiyano, ug pagkamahigugmaon gayod ni Jehova sa pagpadala kaniya sa tukma gayod nga panahon!” Laing pasyenteng Saksi miingon bahin sa mga ansiyano nga miduaw kaniya: “Sa dihang sila mipaingon sa akong katre sa intensive care unit, nahibalo ako nga bisag unsa pay mahitabo sukad nianang yugtoa, maagwanta nako kini. Nalig-on ako ug nagmalinawon.” Mapalit ba ang maong mahigugmaong kabalaka? Dili gayod! Kini maoy usa ka gasa nga gikan sa Diyos, nga mahimong mabatonan pinaagi sa Kristohanong kongregasyon.—Isaias 32:1, 2.

 Ang Gasa nga Pag-alagad sa Kanataran

17, 18. (a) Unsang gasa sa pag-alagad ang gihatag ni Jehova ngadto sa tanan niyang katawhan? (b) Unsang tabang ang gitagana sa Diyos aron atong matuman ang atong ministeryo?

¹⁷ Wala nay molabaw pa nga kadungganan ang ikahatag diha ni bisan kinsang tawo kay sa nianang pag-alagad kang Jehova, ang Labing Hataas. (Isaias 43:10; 2 Corinto 4:7; 1 Pedro 2:9) Bisan pa niana, ang pribilehiyo sa pagpakigbahin sa publikong ministeryo bukas sa tanan—batan-on ug tigulang, lalaki ug babaye—nga dunay tinuod nga tinguha nga moalagad sa Diyos. Gipahimuslan ba nimo kining bililhong gasa? Ang uban tingali dili mosangyaw tungod kay mibati sila nga kulag katakos, apan hinumdomi nga si Jehova mohatag sa iyang balaang espiritu ngadto sa nag-alagad kaniya, ug kini mohulip sa bisan unsa nga tingali nakulang kanato.—Jeremias 1:6-8; 20:11.

¹⁸ Gipiyal ni Jehova ang buluhatong pagsangyaw sa Gingharian ngadto sa iyang mapainubsanong mga alagad, dili ngadto sa mga tawo nga may pagkahambogiro ug nagsalig sa ilang kaugalingong mga abilidad. (1 Corinto 1:20; 26-29) Ang mapainubsanon, makasaranganong mga tawo modawat sa ilang mga limitasyon ug nagsalig sa tabang sa Diyos samtang nagapakigbahin sila sa pag-alagad sa kanataran. Ilang giapresyar usab ang espirituwal nga tabang nga iyang gitagana pinaagi sa “matinumanong piniyalan.”—Lucas 12:42-44; Proverbio 22:4.

Malipayong Kinabuhing Panimalaynon—Usa ka Maayong Gasa

19. Unsang mga butang ang makapalampos sa pagmatuto sa mga anak?

¹⁹ Ang kaminyoon ug malipayong kinabuhing panimalaynon maoy mga gasa nga gikan sa Diyos. (Ruth 1:9; Efeso 3:14, 15) Ang mga bata usab maoy bililhong “panulondon gikan ni Jehova,” nga nakahatag ug kalipay sa mga ginikanan nga malamposon sa pagsilsil sa diyosnong mga hiyas diha kanila. (Salmo 127:3) Kon usa ikaw ka ginikanan, padayon sa pagpamati sa tingog ni Jehova pinaagi sa pagbansay sa imong gagmayng mga anak sumala sa iyang Pulong. Kadtong mohimo niini makatagamtam gayod sa tabang ug dagayang panalangin ni Jehova.—Proverbio 3:5, 6; 22:6; Efeso 6:1-4.

20. Unsay makatabang sa mga ginikanan kansang mga anak mitalikod sa matuod nga pagsimba?

²⁰ Bisan pa sa makugihong mga paningkamot sa diyosnong mga ginikanan, tingali may mga anak sila nga mopili sa pagtalikod sa matuod nga pagsimba inigdako na nila. (Genesis 26:34, 35) Makapaguol gayod kini sa mga ginikanan. (Proverbio 17:21, 25) Apan, imbes mawad-an ug paglaom, makatabang kanila ang paghinumdom sa ilustrasyon ni Jesus bahin sa usikan nga anak. Bisan tuod milayas ang anak sa balay ug misubay sa masukihong dalan, siya sa ulahi mipauli sa balay sa iyang amahan, kinsa midawat kaniya sa malipayon ug sa mahigugmaong paagi. (Lucas 15:11-32) Kon unsa man ugaling ang mahitabo, ang matinumanong Kristohanong mga ginikanan makasalig sa pagsabot ni Jehova, sa iyang mahigugmaong pagtagad, ug sa iyang dili-mapakyas nga pagpaluyo.—Salmo 145:14.

21. Ngadto kang kinsa kita mamati, ug ngano?

²¹ Nan, kinahanglang tinoon sa matag usa kanato kon unsa gayod ang importante sa atong kinabuhi. Kita ba nangagpas pag-ayo sa materyal nga kadagaya, nga mahimong mohatag ug kasakit kanato ug sa atong mga pamilya? O nangagpas ba kita sa ‘maayong mga gasa ug hingpit nga mga regalo’ nga nagagikan sa “Amahan sa langitnong kahayag”? (Santiago 1:17) Si Satanas, “ang amahan sa bakak,” buot nga mangamas kitag maayo alang sa materyal nga bahandi ug mawad-ag kalipay ug kinabuhi. (Juan 8:44; Lucas 12:15) Apan, si Jehova tinuod nga nagtagad kanato ug nagtinguha nga mabatonan nato ang labing maayo. (Isaias 48:17, 18) Busa, magpadayon kita sa pagpamati sa atong mahigugmaong langitnong Amahan ug kanunayng ‘magbaton ug tumang kalipay’ diha kaniya. (Salmo 37:4) Kon mosubay kita nianang dalana, ang bililhong mga gasa ug dagayang panalangin ni Jehova makapadato kanato—ug wala gayoy idugang niana bisag gamay nga kasakit.

[Footnote]

Nahinumdom Ka Ba?

• Asa makaplagan ang kinadak-ang kalipay?

• Unsa ang pipila ka gasa nga gihatag ni Jehova sa iyang katawhan?

• Nganong usa ka gasa ang pag-alagad sa kanataran?

• Unsay mahimo sa mga ginikanan aron makabaton sa panalangin sa Diyos samtang nagmatuto sila sa ilang mga anak?

[Mga Pangutana sa Pagtuon]

[Hulagway sa panid 16]

Nagpakita ka ba ug apresasyon sa gasa sa Diyos sa iyang sinulat nga Pulong?

[Hulagway sa panid 17]

Bisan pa sa malisod kaayo nga mga kahimtang, si Laurel Nisbet masibotong nag-alagad sa Diyos

[Mga hulagway sa panid 18]

Sama kang Tabitha, ang presenteng-adlawng mga Kristohanon ilado sa ilang mga buhat sa gugma

[Hulagway sa panid 19]

Ang Kristohanong mga ansiyano adunay mahigugmaong pagtagad sa mga isigkamagtutuo