Mabatonan Nimo ang Tinuod nga Pagtuo

Sa dihang 19-anyos pa si Sarah Jayne, iyang nasayran nga siya may kanser sa obaryo. Human sa operasyon, maayo ang iyang pagbati ug positibo siya bahin sa umaabot. Sa pagkatinuod, positibo kaayo nga sa dihang siya nag-edad ug 20, siya may trato na ug nagsugod sa pagplano alang sa iyang kasal. Nianang mao gihapong tuiga mibalik ang kanser, ug iyang nasayran nga pipila na lang ka semana ang iyang kinabuhi. Si Sarah Jayne namatay sa Hunyo 2000, sa hapit na siyang mo-21 anyos.

ANG nakapadayeg sa mga tawong mibisita kang Sarah Jayne sa ospital mao ang iyang kalmadong pagsalig bahin sa umaabot, lakip sa iyang hugot nga pagtuo sa Diyos ug sa iyang Pulong, ang Bibliya. Bisan pa sa grabeng trahedya nga iyang giatubang, segurado siya sa paglaom sa pagkabanhaw—nga iyang makita pag-usab ang tanan niyang higala. (Juan 5:28, 29) “Magkita tang tanan sa bag-ong kalibotan sa Diyos,” siya miingon.

Giisip sa pipila kanang matanga sa pagtuo ingong hinanduraw. “Dili ba ang kinabuhi luyo sa kamatayon maoy usa lamang ka pagtuo sa mga tawong dili segurado,” nangutana si Ludovic Kennedy, “nga sa pagtingog sa kataposang trompeta aduna unyay mga keyk ug ilimnon, bisag linutong bihod ug pagtingog sa mga trompeta usab alang kanila, nga sa usa ka dapit sa malabong nga Eden sila mogugol ug malipayong mga oras uban niadtong namatay una kanila ug sa uban nga mahimong mamatay human kanila?” Niana nga pahayag, kinahanglang mopatungha kita ug sumbalik nga pangutana. Unsa ang mas makataronganon—ang pagtuo nga “mao lamang kining kinabuhia ang atong nabatonan, busa mas maayong pahimuslan nato kini sa bug-os,” matod pa ni Kennedy, o ang pagtuo sa Diyos ug sa iyang saad sa pagkabanhaw? Gipili ni Sarah  Jayne nga motuo sa ikaduha. Sa unsang paagi napalambo niya ang maong pagtuo?

“Mangita sa Diyos . . . ug Makakaplag Gayod Kaniya”

Aron mapalambo ang pagtuo ug pagsalig nganha sa usa ka tawo, ikaw kinahanglang makaila kaniya ug makahibalo kon sa unsang paagi siya naghunahuna ug naglihok. Kini nga proseso naglangkit sa kasingkasing maingon man sa hunahuna. Ingon gayod niini kon mahitungod sa pagpalambo ug tinuod nga pagtuo sa Diyos. Ikaw kinahanglang makaila kaniya, makakat-on bahin sa iyang mga hiyas ug sa iyang personalidad, makahibalo kon napamatud-an ba siyang kasaligan ug kapiyalan sa tanan niyang nasulti ug nahimo.—Salmo 9:10; 145:1-21.

Gibati sa pipila nga imposible kini. Matod nila, ang Diyos halayo ra kaayo, misteryoso kaayo—kon naglungtad man ugaling siya. “Kon ang Diyos tinuod ingon sa pag-isip kaniya sa mga Kristohanon sama ni Sarah Jayne,” nangutana ang usa ka maduhaduhaon, “nganong wala man niya ipadayag ang iyang kaugalingon kanato?” Apan tinuod ba nga ang Diyos halayo ra kaayo ug dili matugkad? Sa usa ka pakigpulong ngadto sa mga pilosopo ug mga makinaadmanon sa Atenas, si apostol Pablo miingon nga “ang Diyos nga naghimo sa kalibotan ug sa tanang butang diha niini” nagtagana usab sa tanan nga gikinahanglan aron “mangita [kaniya] . . . ug makakaplag gayod kaniya.” Sa pagkatinuod, si Pablo miingon: “Siya dili halayo gikan sa matag usa kanato.”—Buhat 17:24-27.

Nan, sa unsang paagi ka “mangita sa Diyos . . . ug makakaplag gayod kaniya”? Nahimo kini sa uban pinaagi sa yanong pagpaniid sa uniberso sa ilang palibot. Alang sa daghan, kini mismo naghatag na ug igong pamatuod sa pagkombinsir kanila nga aduna gayoy Maglalalang. a (Salmo 19:1; Isaias 40:26; Buhat 14:16, 17) Ilang gibati, sama sa gibati ni apostol Pablo, nga ang “dili-makita nga mga hiyas [sa Diyos], nga mao ang iyang walay kataposang gahom ug pagka-Diyos, tin-awng makita sukad sa paglalang sa kalibotan padayon, tungod kay kini sila maila pinaagi sa mga butang nga gihimo.”—Roma 1:20; Salmo 104:24.

Kinahanglan Nimo ang Bibliya

Apan, aron maugmad ang tinuod nga pagtuo sa Maglalalang, kinahanglan nimo ang laing butang nga iyang gitagana. Unsa kana? Ang Bibliya—ang dinasig nga Pulong sa Diyos, nga niana iyang gipadayag ang iyang kabubut-on ug katuyoan. (2 Timoteo 3:16, 17) “Apan yuna pa,” moingon ang uban, “unsaon nimo pagtuo sa bisan unsang isulti sa Bibliya sa dihang makita nimo ang makalilisang nga mga butang nga gihimo sa mga tawong nangangkon nga nagsunod sa Bibliya?” Tinuod, ang Kakristiyanohan dunay makapakurat nga rekord sa pagkasalingkapaw, kabangis, ug imoralidad. Apan masabtan ni bisan kinsang makataronganong tawo nga ang Kakristiyanohan nagpakaaron-ingnon lang nga nagsunod sa mga prinsipyo sa Bibliya.—Mateo 15:8.

Ang Bibliya mismo nagpasidaan nga daghang tawo ang mag-angkong nagsimba sa Diyos apan, sa pagkatinuod, “magalimod pa gani sa tag-iya nga nagpalit kanila.” “Tungod niini,” matod ni apostol Pedro, “ang dalan sa kamatuoran mapasipalahan.” (2 Pedro 2:1, 2) Si Jesu-Kristo nag-ingon nga kini sila maoy “mga mamumuhat sa kalapasan” nga klarong mailhan tungod sa ilang daotang mga lihok. (Mateo 7:15-23) Ang pagsalikway sa Pulong sa Diyos pinasukad sa rekord sa Kakristiyanohan maoy sama sa paglabay sa usa ka sulat gikan sa kasaligang higala tungod lang kay ang tawo nga naghatod niini daotag dungog.

Kon wala ang Pulong sa Diyos imposible nga maugmad ang tinuod nga pagtuo. Pinaagi lamang sa mga panid sa Bibliya nga si Jehova nagpahayag sa iyang mga katarongan bahin sa mga butang, ingnon ta. Siya nagpadayag sa tubag sa dugay nang mga pangutana sama sa kon nganong iyang gitugotan ang pag-antos ug kasakit ug kon unsay iyang buhaton bahin sa maong kahimtang. (Salmo 119:105; Roma 15:4) Si Sarah Jayne nagtuo nga ang Bibliya mao ang dinasig nga Pulong sa Diyos. (1 Tesalonica 2:13; 2 Pedro 1:19-21) Sa unsang paagi? Dili lamang tungod kay gisultihan siya sa iyang mga ginikanan nga tuohan kini, kondili tungod kay migahin siyag panahon sa pagtimbangtimbang nga matinud-anon sa tanang pamatuod nga nagpakitang ang Bibliya maoy usa ka talagsaong pagpadayag gikan sa Diyos. (Roma 12:2) Pananglitan, iyang gipanid-an pag-ayo ang gamhanang impluwensiya sa Bibliya diha sa kinabuhi niadtong nagsunod sa mga prinsipyo niini. Sa tabang sa mga publikasyon sama sa Ang Bibliya—Pulong sa Diyos o sa Tawo?, b iyang gisusi pag-ayo usab ang daghan kaayong ebidensiya diha mismo sa Bibliya nga nagpamatuod nga kini dinasig sa Diyos.

 “Ang Pagtuo Mosunod sa Butang nga Nadungog”

Apan, dili igo ang pagbaton lamang ug Bibliya o bisan ang pagtuo nga kini dinasig. “Ang pagtuo,” misulat si apostol Pablo, “mosunod sa butang nga nadungog.” (Roma 10:17) Ang pagpatalinghog sa Bibliya, dili lang kay ang pagbaton ug Bibliya, mao ang makaugmad ug pagtuo. Ikaw “nagpatalinghog” sa buot nga isulti sa Diyos pinaagi sa pagbasa ug pagtuon sa iyang Pulong. Bisan ang mga bata makahimo niini. Si Pablo nag-ingon nga “sukad pa sa pagkamasuso” si Timoteo gitudloan “sa balaang mga sinulat” sa iyang inahan ug apohang babaye. Nagpasabot ba kini nga nalangkit ang usa ka matang sa pag-impluwensiya sa hunahuna? Dili! Si Timoteo wala maniobraha o malimbongi sa bisan unsang paagi. Siya ‘nakombinsir sa pagtuo’ sa iyang nadungog ug nabasa.—2 Timoteo 1:5; 3:14, 15.

Si Sarah Jayne nakombinsir sa samang paagi. Sama sa unang-siglo nga mga taga-Berea, iyang “gidawat ang pulong [gikan sa iyang mga ginikanan ug sa ubang mga magtutudlo] uban ang tumang kaikag sa hunahuna.” Sa gamay pang bata, walay duhaduha nga siya kinaiyanhong misalig sa gisulti sa iyang mga ginikanan kaniya. Sa ulahi, samtang siya nagtubo, siya dili binuta o basta na lang midawat sa tanan nga gitudlo kaniya. “Sa adlaw-adlaw” siya “maampingong nagasusi sa Kasulatan kon tinuod ba kining mga butanga.”—Buhat 17:11.

Imong Maugmad ang Tinuod nga Pagtuo

Imong maugmad usab ang tinuod nga pagtuo—ang matang sa pagtuo nga gihubit ni apostol Pablo diha sa iyang sulat ngadto sa Hebreohanong mga Kristohanon. Kana nga pagtuo, matod niya, mao “ang masaligan nga pagpaabot sa mga butang nga gilaoman, ang dayag nga pagpasundayag sa mga katinuoran bisan tuod wala makita.” (Hebreohanon 11:1) Kay nabatonan ang maong pagtuo, ikaw makaseguro gayod nga ang tanan nimong paglaom ug pagdahom, lakip ang saad sa Diyos sa pagkabanhaw, mamatuman. Ikaw makombinsir nga ang maong mga paglaom gipasukad sa seguradong mga garantiya, dili sa mahandurawong hunahuna. Imong mahibaloan nga si Jehova wala gayod mapakyas sa pagtuman sa iyang mga saad. (Josue 21:45; 23:14; Isaias 55:10, 11; Hebreohanon 6:18) Ang gisaad sa Diyos nga bag-ong kalibotan mahimo unyang tinuod kanimo nga daw kini naglungtad na. (2 Pedro 3:13) Ug tin-aw nimong makita sa imong mga mata sa pagtuo nga si Jehova nga Diyos, si Jesu-Kristo, ug ang Gingharian sa Diyos maoy tinuod tanan, dili hinanduraw.

Wala ka pasagdi nga mag-inusara sa pag-ugmad ug tinuod nga pagtuo. Gawas sa paghimo sa iyang Pulong nga daling mabatonan, si Jehova nagtagana usab sa tibuok-kalibotan nga Kristohanong kongregasyon  nga komitido sa pagtabang sa mga matarong-ug-kasingkasing nga mga tawo nga maugmad ang pagtuo sa Diyos. (Juan 17:20; Roma 10:14, 15) Dawata ang tanang tabang nga ginahatag ni Jehova pinaagi niana nga organisasyon. (Buhat 8:30, 31) Ug sanglit ang pagtuo maoy bunga sa balaang espiritu sa Diyos, pag-ampo kanunay alang sa maong espiritu sa pagtabang kanimo nga mapalambo ang tinuod nga pagtuo.—Galacia 5:22.

Ayaw pabalda sa mga maduhaduhaon nga motamay kang bisan kinsa nga nag-angkong nagtuo sa Diyos ug sa iyang Pulong. (1 Corinto 1:18-21; 2 Pedro 3:3, 4) Sa pagkamatuod, ang tinuod nga pagtuo dako kaayog bili sa pagpalig-on sa imong baroganan batok sa maong mga pag-atake. (Efeso 6:16) Nakaplagan ni Sarah Jayne nga matuod kana, ug kanunay niyang gidasig kadtong miduaw kaniya sa ospital sa pagpalig-on sa ilang kaugalingong pagtuo. “Himoa ang kamatuoran nga imo na,” matod pa niya. “Magtuon sa Pulong sa Diyos. Magpabiling suod sa organisasyon sa Diyos. Mag-ampo kanunay. Magpabiling aktibo sa pag-alagad kang Jehova.”—Santiago 2:17, 26.

Kay nakita ang iyang pagtuo sa Diyos ug sa pagkabanhaw, usa sa iyang mga nars miingon: “Motuo gyod ka niini, no?” Sa dihang gipangutana kon unsay nakahatag kaniya ug positibong panglantaw bisan pa sa iyang mga pagsulay, siya mitubag: “Ang pagbaton ug pagtuo kang Jehova. Siya maoy akong tinuod nga higala, ug gihigugma ko gayod siya.”

[Mga footnote]

[Hulagway sa panid 6]

“Sukad pa sa pagkamasuso” si Timoteo gitudloan “sa balaang mga sinulat” sa iyang inahan ug apohang babaye

[Hulagway sa panid 6]

Ang mga taga-Berea gidayeg tungod sa pagsusi sa Kasulatan adlaw-adlaw

[Credit Line]

Gikan sa “Photo-Drama of Creation,” 1914

[Mga hulagway sa panid 7]

Ang pagpatalinghog ug pagsunod sa Bibliya, dili lang kay pagbaton niini, ang makaugmad sa pagtuo

[Hulagway sa panid 7]

“Magkita tang tanan sa bag-ong kalibotan sa Diyos”