Sa Unsang Paagi Makatabang Ka sa Usa ka Anak nga “Mausikon”?

“Magmaya tungod kay . . . siya nawala ug nakaplagan.”—LUCAS 15:32.

1, 2. (a) Unsay sanong sa pipila ka batan-on bahin sa Kristohanong kamatuoran? (b) Unsa kahay bation sa mga ginikanan ug mga anak sa maong mga kahimtang?

 “DILI na ako mag-Saksi!” Pagkamakapakurat alang sa mahinadlokon-sa-Diyos nga mga ginikanan nga naningkamot gayod sa pagmatuto sa ilang mga anak diha sa Kristohanong dalan nga makadungog niining mga pulonga gikan sa usa ka anak! Ang ubang mga batan-on “maanod” lamang nga walay aktuwal nga pagsulti sa ilang mga intensiyon. (Hebreohanon 2:1) Daghan kanila nahisama sa anak nga mausikon sa sambingay ni Jesus, kinsa mibiya sa balay sa iyang amahan ug nag-usik-usik sa iyang panulondon diha sa usa ka halayong yuta.—Lucas 15:11-16.

² Bisan tuod ang kadaghanang Saksi ni Jehova walay ingon niini nga suliran, alang sa mga may ingong suliran, walay pulong nga panghupay ang bug-os makapapas sa ilang kasubo. Ug dili pagahikalimtan mao ang kasub-anang masinati mismo sa masukihong batan-on. Sa iyang kahiladman, ang iyang tanlag basin nagtulisok kaniya. Sa sambingay ni Jesus, ang anak nga mausikon sa kadugayan “nakaamgo,” nga nakapalipay sa iyang amahan. Sa unsang paagi ang mga ginikanan ug uban pa diha sa kongregasyon makatabang sa mga mausikon aron ‘makaamgo’?—Lucas 15:17.

Kon Nganong ang Pipila ka Anak Modesidir sa Pagbiya sa Kamatuoran

3. Unsa ang pipila ka hinungdang ang mga batan-on modesidir sa pagbiya sa Kristohanong kongregasyon?

³ Adunay ginatos ka libong batan-on nga malipayong nag-alagad kang Jehova diha sa Kristohanong  kongregasyon. Nan, nganong mobiya man ang ubang mga batan-on? Basin sila mobati nga adunay dili nila mapahimuslan nga gitanyag sa kalibotan. (2 Timoteo 4:10) O tingali giisip nilang ang mapanalipdanong toril ni Jehova mapig-oton kaayo. Ang sad-ang tanlag, kusganong interes sa kaatbang nga sekso, o tinguhang dawaton sa mga isigkaingon makapahinabo usab nga ang usa ka batan-on maanod pahilayo sa panon ni Jehova. Ang usa ka batan-on tingali mohunong sa pag-alagad sa Diyos tungod sa daw pagkasalingkapaw sa bahin sa iyang mga ginikanan o kaha sa ubang Kristohanon.

4. Unsa sagad ang pangunang hinungdan sa pagkahisalaag sa mga batan-on?

⁴ Ang rebelyosong tinamdan ug panggawi sa usa ka anak kasagaran maoy mga simtoma sa espirituwal nga kahuyang, nga maoy mga banaag kon unsay anaa sa iyang kasingkasing. (Proverbio 15:13; Mateo 12:34) Sa bisan unsang katarongan nga ang usa ka batan-on tingali mahisalaag, ang pangunang hinungdan sa suliran sagad mao ang pagkawala niyay “tukmang kahibalo sa kamatuoran.” (2 Timoteo 3:7) Labaw pa kay sa yanong pagtuman lamang sa mga tulumanon sa pagsimba kang Jehova, hinungdanon nga ang mga batan-on makaugmad ug suod nga personal nga relasyon uban kaniya. Unsay makatabang kaniya sa pagbuhat niana?

Pakigsuod sa Diyos

5. Unsay gikinahanglan aron maugmad sa usa ka batan-on ang personal nga relasyon uban sa Diyos?

⁵ “Duol sa Diyos,” misulat ang tinun-ang si Santiago, “ug siya moduol kaninyo.” (Santiago 4:8) Aron mahimo kana, ang usa ka batan-on kinahanglang matabangan sa pag-ugmad ug kahinam alang sa Pulong sa Diyos. (Salmo 34:8) Sa sinugdan siya magkinahanglag “gatas”—ang paninugdang mga pagtulon-an sa Bibliya. Apan samtang siya magkalipay sa Pulong sa Diyos ug mahinam na sa “gahi nga pagkaon,”—ang laglom nga espirituwal nga impormasyon—sa dili madugay siya makadangat sa espirituwal nga pagkahamtong. (Hebreohanon 5:11-14; Salmo 1:2) Ang usa ka batan-on nga miangkong siya nagpatuyang sa bug-os sa paagi sa kinabuhi sa kalibotan misugod sa pagpabili sa espirituwal nga mga sukdanan. Unsay nakatabang kaniya sa pagbag-o? Kay misanong sa usa ka sugyot nga pagabasahon ang tibuok Bibliya, gisunod niya ang usa ka regular nga eskedyul sa pagbasag Bibliya. Oo, ang regular nga pagbasa sa Pulong sa Diyos mahinungdanon aron maugmad ang suod nga bugkos uban kang Jehova.

6, 7. Sa unsang paagi ang mga ginikanan makatabang sa ilang mga anak nga makaugmad ug kahinam alang sa Pulong sa Diyos?

⁶ Pagkahinungdanon nga tabangan sa mga ginikanan ang ilang mga anak nga makaugmad ug kahinam alang sa Pulong sa Diyos! Bisan pag may regular nga pagtuon sa pamilya, usa ka dalagita nakig-uban sa mga delingkuwente. Mahitungod sa iyang pagtuon sa pamilya, siya nahinumdom: “Sa dihang si Papa mosukna sa mga pangutana, basahon ko lang ang mga tubag, nga dili gani motan-aw sa iyang nawong.” Inay yanong kobrehan ang materyal panahon sa pagtuon sa pamilya, ang maalamong mga ginikanan mogamit sa arte sa pagtudlo. (2 Timoteo 4:2) Aron ang usa ka batan-on malingaw sa pagtuon, kinahanglang mobati siyang nalangkit. Nganong dili isukna ang punto-de-bista nga mga pangutana ug tugotan siya sa pagpahayag sa iyang hunahuna? Dasiga ang batan-on sa pagpadapat sa materyal nga gihisgotan. a

⁷ Dugang pa, himoang bibo ang Kasulatanhong panaghisgot. Kon haom, ipadula sa mga batan-on ang mga hitabo ug mga drama sa Bibliya. Tabangi sila sa paghanduraw sa dapit ug mga kinaiyahan sa yuta diin nahitabo ang gihisgotang mga hitabo. Ang paggamit sa mga mapa ug mga tsart makatabang. Oo, uban ang diyutayng panghanduraw, ang pagtuon sa Bibliya mahimong bibo ug may kadaiyahan. Ang mga ginikanan usab angayng magsusi sa ilang kaugalingong mga relasyon uban kang Jehova. Samtang sila mas masuod kang Jehova, makatabang sila sa ilang mga anak sa paghimo niana.—Deuteronomio 6:5-7.

8. Sa unsang paagi ang pag-ampo makatabang sa usa nga masuod sa Diyos?

⁸ Ang pag-ampo makatabang usab sa usa nga masuod sa Diyos. Ang usa ka dalagita nalibog kay dili makapili tali sa Kristohanong paagi sa kinabuhi ug sa iyang pakig-uban sa mga higala nga dili sama niyag pagtuo. (Santiago 4:4) Unsay iyang gibuhat mahitungod niadto? “Sa una gayong higayon,” siya misugilon, “ako miampo gayod kang Jehova mahitungod sa akong gibati.” Siya mihinapos nga ang iyang pag-ampo gitubag sa dihang  sa kadugayan sulod sa Kristohanong kongregasyon nakakaplag siya ug higala nga iyang kasumbongan ug sekreto. Kay mibating si Jehova naggiya kaniya, iyang gisugdan ang pag-ugmad sa personal nga relasyon uban sa Diyos. Ang mga ginikanan makatabang sa ilang mga anak pinaagi sa pagpauswag sa kalidad sa ilang mga pag-ampo mismo. Sa dihang magaampo ingong usa ka pamilya, ang mga ginikanan bug-os nga makapahayag sa ilang mga pagbati ug mga suliran aron bation sa ilang mga anak ang personal nga bugkos tali sa mga ginikanan ug kang Jehova.

Magmapailobon Apan Malig-on

9, 10. Unsang panig-ingnan ang gihatag ni Jehova sa pagbaton ug hataas-nga-pailob sa masukihong mga Israelinhon?

⁹ Sa dihang ang usa ka batan-on mosugod sa pagkaanod, basin mosulay siya sa pagpalain sa iyang kaugalingon ug mosalikway sa paningkamot sa iyang mga ginikanan nga makighisgot uban kaniya sa espirituwal nga mga butang. Unsay mahimo sa mga ginikanan sa maong masulayong kahimtang? Palandonga kon unsay gihimo ni Jehova sa karaang Israel. Iyang giantos ang “tikig ug liog” nga mga Israelinhon sulod sa kapig 900 ka tuig una siya mobiya kanila ngadto sa ilang masukihong dalan. (Exodo 34:9; 2 Cronicas 36:17-21; Roma 10:21) Bisan pa sa ilang sublisubling ‘pagsulay kaniya,’ si Jehova ‘naluoy’ kanila. “Sa daghang higayon gipahilayo niya ang iyang kasuko, ug wala niya pukawa ang bug-os niyang kaaligutgot.” (Salmo 78:38-42) Ang Diyos dili masaway sa iyang mga pakiglabot kanila. Ang mahigugmaong mga ginikanan magasundog kang Jehova ug magmapailobon sa dihang ang anak dili dayon mosanong sa ilang mga paningkamot sa pagtabang kaniya.

¹⁰ Ang pagbaton ug hataas-nga-pailob, o pagkamapailobon, wala magpasabot nga “mag-antos sa hataas nga panahon”; kini nagkahulogan sa pagdumili nga mawad-ag paglaom nga moarang-arang ang natugaw nga relasyon. Si Jehova naghatag ug panig-ingnan kon sa unsang paagi magbaton ug hataas-nga-pailob. Siya mao ang nanguna sa paglihok pinaagi sa pagpadala nga ‘sublisubli’ sa iyang mga mensahero ngadto sa mga Israelinhon. Si Jehova “naluoy sa iyang katawhan,” bisan pag “nagpadayon sila sa pagbugalbugal sa mga mensahero sa matuod nga Diyos ug nagtamay sa iyang mga pulong.” (2 Cronicas 36:15, 16) Siya nangaliyupo sa mga Israelinhon, nga nag-ingon: “Palihog, talikod kamo, ang matag usa gikan sa iyang daotang dalan.” (Jeremias 25:4, 5) Bisan pa niana, wala ikompromiso ni Jehova ang iyang matarong nga mga prinsipyo. Ang mga Israelinhon gitudloan nga ‘mobalik’ sa Diyos ug sa iyang mga dalan.

11. Sa unsang paagi ang mga ginikanan magbaton ug hataas-nga-pailob apan malig-on diha sa pagpakiglabot sa usa ka nahisalaag nga anak?

 ¹¹ Ang mga ginikanan makasundog kang Jehova sa pagbaton ug hataas-nga-pailob pinaagi sa dili dayon pagsurender kon bahin sa nahisalaag nga anak. Nga dili mawad-ag paglaom, sila makahimo sa unang lihok aron mahuptan ang maayong komunikasyon o aron mabuksan pag-usab ang komunikasyon. Samtang magasunod sa matarong nga mga prinsipyo, sila ‘sublisubli’ nga makapangaliyupo sa anak nga mobalik sa dalan sa kamatuoran.

Sa Dihang ang Usa ka Menor-de-Edad nga Anak Mapalagpot

12. Unsa ang responsabilidad sa mga ginikanan may kalabotan sa usa ka menor-de-edad nga anak nga ipon pa nila sa pagpuyo apan kinsa gipalagpot gikan sa kongregasyon?

¹² Unsa na man kon ang usa ka menor-de-edad nga anak nga ipon pa sa pagpuyo sa iyang mga ginikanan malangkit sa seryosong buhat nga daotan ug tungod sa iyang dili-mahinulsolong tinamdan mapalagpot gikan sa kongregasyon? Sanglit ang anak ipon pa sa pagpuyo sa iyang mga ginikanan, sila responsable gihapon sa pagtudlo ug pagdisiplina kaniya nga nahiuyon sa Pulong sa Diyos. Sa unsang paagi mahimo kini?—Proverbio 6:20-22; 29:17.

13. Sa unsang paagi ang mga ginikanan makasulay sa pagtandog sa kasingkasing sa usa ka masalaypong anak?

¹³ Mahimong posible—sa tinuod, labing maayo—nga himoon ang maong pagpanudlo ug pagdisiplina panahon sa pribadong pagtuon sa Bibliya. Ang ginikanan kinahanglang dili maghukom sumala sa magahiong tinamdan sa anak ug angayng mosulay sa pagsabot kon unsay anaa sa iyang kasingkasing. Unsa ka grabe ang iyang espirituwal nga sakit? (Proverbio 20:5) Mahimo bang matandog ang malumong bahin sa iyang kasingkasing? Unsang mga kasulatan ang magamit sa epektibong paagi? Si apostol Pablo nagpasalig kanato: “Ang pulong sa Diyos buhi ug gamhanan ug mahait pa kay sa espada nga duhay-sulab ug modulot bisan hangtod sa pagbahin sa kalag ug sa espiritu, ug sa mga lutahan ug sa ilang uyok, ug makatugkad sa mga hunahuna ug mga tuyo sa kasingkasing.” (Hebreohanon 4:12) Oo, ang mga ginikanan makahimog labaw pa kay sa pagsulti lamang sa ilang mga anak nga dili malangkit pag-usab sa buhat nga daotan. Sila makatinguha nga maoy manguna sa paglihok ug pag-atiman sa proseso sa pagkaayo.

14. Unsang unang tikang ang angayng buhaton sa usa ka masalaypong batan-on aron mapasig-uli ang iyang relasyon uban kang Jehova, ug sa unsang paagi ang mga ginikanan makatabang sa anak sa paghimo sa maong tikang?

¹⁴ Ang usa ka masalaypong batan-on kinahanglang magpasig-uli sa iyang relasyon uban kang Jehova. Ang unang tikang nga iyang kinahanglang buhaton mao ang ‘paghinulsol . . . ug pagbalik.’ (Buhat 3:19; Isaias 55:6, 7) Sa pagtabang sa mga batan-ong anaa sa ilang panimalay aron maghinulsol, ang mga ginikanan kinahanglang ‘magapadayon sa pagpugong sa kaugalingon bisan ilalom sa daotan, malumong magatudlo’ sa bata nga dili hilig sa pagkamatarong. (2 Timoteo 2:24-26) Kinahanglang sila ‘magbadlong’ kaniya sa Biblikanhong diwa. Ang Gregong pulong nga gihubad ‘pagbadlong’ mahubad usab nga ‘hatagan ug makapatuo nga ebidensiya.’ (Pinadayag 3:19; Juan 16:8) Busa, ang pagbadlong naglangkit sa pagpakitag igong ebidensiya aron mapatuo ang anak bahin sa pagkamakasasala sa iyang dalan. Tinuod, ang pagbuhat niana dili sayon. Kon posible, ang mga ginikanan makapukaw sa iyang kasingkasing, nga gamiton ang tanang paagi nga haom sa Kasulatan sa pagkombinsir kaniya. Angay nga sulayan nila ang pagtabang kaniya nga masabtan ang panginahanglan nga ‘dumtan ang daotan, ug higugmaon ang maayo.’ (Amos 5:15) Basin siya maulian sa iyang “hustong panimuot gikan sa lit-ag sa Yawa.”

15. Unsa ang bahin sa pag-ampo diha sa pagpasig-uli sa relasyon sa usang masalaypon uban kang Jehova?

¹⁵ Sa pagpasig-uli sa relasyon sa usa uban kang Jehova, ang pag-ampo kinahanglanon kaayo. Siyempre, walay usa ang angayng “mangamuyo” mahitungod sa dayag nga sala nga tin-awng ginabatasan  nga dili-mahinulsolon ni bisan kinsa nga sa nangagi nakig-uban sa Kristohanong kongregasyon. (1 Juan 5:16, 17; Jeremias 7:16-20; Hebreohanon 10:26, 27) Bisan pa niana, ang mga ginikanan makahangyo kang Jehova nga sila hatagag kaalam sa pagdumala sa kahimtang. (Santiago 1:5) Kon ang usa ka napalagpot nga batan-on mohatag ug ebidensiya sa paghinulsol apan wala makabaton ug “kagawasan sa pagsulti ngadto sa Diyos,” ang mga ginikanan makaampo nga kon ang Diyos makakitag pasikaranan sa pagpasaylo sa sala sa anak, ang Iyang kabubut-on maoy matuman. (1 Juan 3:21) Ang pagkadungog niining mga pag-ampoa angayng makatabang sa batan-on sa pagsabot nga si Jehova maoy maluluy-ong Diyos. b—Exodo 34:6, 7; Santiago 5:16.

16. Sa unsang paagi makatabang kita sa mga membro sa pamilya sa mga menor-de-edad nga napalagpot?

¹⁶ Kon ang usa ka bawtismadong batan-on mapalagpot, ang mga membro sa kongregasyon gidahom nga “mohunong na sa pagpakig-uban” kaniya. (1 Corinto 5:11; 2 Juan 10, 11) Kini basin sa kadugayan makatabang kaniya nga ‘makaamgo’ ug mobalik sa mapanalipdanong toril sa Diyos. (Lucas 15:17) Bisan pa niana, kon siya mobalik man o dili, ang mga membro sa kongregasyon makadasig sa pamilya sa napalagpot nga batan-on. Kitang tanan makapangitag mga kahigayonan sa pagpakitag “pagbati alang sa isigkaingon” ug “magmabination” kanila.—1 Pedro 3:8, 9.

Kon sa Unsang Paagi ang Uban Makatabang

17. Unsay angay ibutang sa hunahuna sa mga membro sa kongregasyon sa dihang maninguha sa pagtabang sa nahisalaag nga anak?

¹⁷ Unsa na man ang usa ka batan-ong wala mapalagpot gikan sa Kristohanong kongregasyon apan naluya sa pagtuo? “Kon ang usa ka sangkap nagaantos,” misulat si apostol Pablo, “ang tanang ubang mga sangkap magaantos uban [kaniya].” (1 Corinto 12:26) Ang uban makapakitag aktibong interes sa maong batan-on. Hinuon, gikinahanglan ang usa ka sukod sa pagbantay, sanglit ang masakiton sa espirituwal nga batan-on mahimong makadaot sa ubang mga batan-on. (Galacia 5:7-9) Sa usa ka kongregasyon, ang maayog-tuyo nga mga tawong hingkod nga buot motabang sa pipila ka batan-on nga nahimong huyang sa espirituwal nagdapit kanila sa mga tapoktapok aron motugtog ug popular nga mga awit. Bisan pag ang mga batan-on daling miuyon ug nalingaw sa maong mga tapoktapok, ang ilang impluwensiya sa usag usa sa kadugayan misangpot sa ilang pagbulag sa kongregasyon. (1 Corinto 15:33; Judas  22, 23) Ang makatabang aron mamaayo ang masakitong anak maoy, dili ang sosyal nga mga tapoktapok nga walay espirituwal nga pagtultol, kondili ang panagkauban nga motabang kaniya sa pag-ugmad ug kahinam sa espirituwal nga mga butang. c

18. Sa unsang paagi makasundog kita sa tinamdan sa amahan sa anak nga mausikon sa sambingay ni Jesus?

¹⁸ Sa dihang ang usa ka batan-on nga mibiya sa kongregasyon mobalik sa Kingdom Hall o motambong ug asembliya, hunahunaa kon unsay iyang pagbati. Dili ba angayng ipakita nato ang nahinangop nga tinamdan sa amahan sa anak nga mausikon sa sambingay ni Jesus? (Lucas 15:18-20, 25-32) Ang usa ka tin-edyer nga mibiya sa Kristohanong kongregasyon ug sa ulahi mitambong ug distritong kombensiyon mipahayag: “Abi kog ang tanan dili manumbaling sa usa ka tawo nga sama kanako, apan ang mga igsoong lalaki ug babaye miduol kanako ug nag-abiabi kanako. Ako dulot nga natandog.” Siya misugod na usab sa pagtuon sa Bibliya ug sa ulahi nabawtismohan.

Ayaw Pagsurender

19, 20. Nganong angay nga padayon natong huptan ang positibong tinamdan bahin sa usa ka anak nga mausikon?

¹⁹ Ang pagtabang sa usa ka anak nga “mausikon” aron ‘makaamgo’ nagkinahanglag pailob ug mahimong usa ka hagit alang sa mga ginikanan ug sa uban. Apan ayaw pagsurender. “Si Jehova dili langaylangayan mahitungod sa iyang saad, sumala sa pag-isip sa pipila ka tawo nga paglangaylangay, kondili siya mapailobon kaninyo tungod kay siya wala magtinguha nga adunay malaglag apan nagtinguha nga ang tanan makakab-ot sa paghinulsol.” (2 Pedro 3:9) Kita adunay Kasulatanhong pasalig nga buot ni Jehova nga ang katawhan maghinulsol ug mabuhi. Sa pagkamatuod, siya ang unang milihok aron himoon ang usa ka kahikayan sa pagpasig-uli sa mga tawo sa iyang kaugalingon. (2 Corinto 5:18, 19) Ang iyang pailob nakapaposible nga makaamgo ang minilyon.—Isaias 2:2, 3.

²⁰ Nan, dili ba angayng ang mga ginikanan mogamit sa tanang Kasulatanhong paagi nga posible aron tabangan nga makaamgo ang ilang mausikong menor-de-edad nga anak? Sa pagsundog kang Jehova, magbaton ug hataas-nga-pailob samtang imong himoon ang positibong mga tikang sa pagtabang sa imong anak nga mobalik kang Jehova. Magmalig-on sa pagsunod sa mga prinsipyo sa Bibliya, ug paningkamoti nga ipabanaag ang mga hiyas ni Jehova nga gugma, hustisya, ug kaalam samtang ikaw magaampo kaniya alang sa iyang tabang. Ingon nga daghang magahiong mga rebelde misanong sa mahigugmaong pagdapit ni Jehova nga mobalik, ang imong anak lalaki o babaye nga mausikon mahimong makabalik sa mapanalipdanong toril sa Diyos.—Lucas 15:6, 7.

[Mga footnote]

Nahinumdom Ka Ba?

• Unsa kaha ang pangunang hinungdan sa suliran sa dihang ang mga batan-on mobiya sa kongregasyon?

• Sa unsang paagi ang mga batan-on matabangan sa pag-ugmad ug personal nga relasyon uban kang Jehova?

• Nganong ang mga ginikanan kinahanglang magbaton ug hataas-nga-pailob apan malig-on sa pagtabang sa usa ka anak nga mausikon?

• Sa unsang paagi kadtong mga sakop sa kongregasyon makatabang nga makabalik ang usa ka batan-on nga mausikon?

[Mga Pangutana sa Pagtuon]

[Hulagway sa panid 15]

Ang pagbasa sa Pulong sa Diyos mahinungdanon aron maugmad ang suod nga bugkos uban kang Jehova

[Hulagway sa panid 15]

Ang kinasingkasing nga pag-ampo sa mga ginikanan makatabang sa ilang mga anak nga mobati sa personal nga bugkos tali sa mga ginikanan ug kang Jehova

[Hulagway sa panid 17]

Dawata ang usa ka anak nga mausikon sa dihang siya ‘makaamgo’

[Hulagway sa panid 18]

Himoa ang positibong mga tikang sa pagtabang sa imong anak nga mobalik kang Jehova